Jer 51 | ZomZIV | STEP | Hih in TOPA gen ahi hi: “En un, keimah in Babylon le Leb Kamai mite langkhatah a susiate lungsim ka phonglo ding hi.

Jeremiah 51

1 Hih in TOPA gen ahi hi:

“En un, keimah in Babylon le Leb Kamai ^{▼▼51.1 Leb Kamai pen Chaldea-te cihna hi-a tua pen Babylon-te ahi hi.} mite langkhatah
a susiate lungsim ka phonglo ding hi.
2 Keimah in Babylon a hahsiang ding le a gamsung a vatmai dingin
gamdang mite ka sawl dinga
ama gim thuak ni-in amaute in
a munmun panin a langpan ding uh hi.
3 Thal tawite a thal kamsak kei unla, ^b
a galvan uh tawh zong kithuamsak kei un. ^c
A tangvalte uh zong hawi kei unla,
ama galkapte susiamang ^{▼▼51.3 Hebrew lai ah TOPA} khin un.
4 Babylon ^{▼▼51.4 Ahikeh Chaldea-te} ah amaute kithatin puk ding uh a, ^f
ama kongzingte ah liamgawp ding uh hi. ^g
5 Ahang in, Israel-te Siangtho Pa mai-ah,
Israel gam le Judah gam khialhna tawh a kidim hangin ^h
amaute Pasian Thahatpen TOPA in
amaute gam ^{▼▼51.5 Ahikeh / tuateh Babylon mite gam} a taisan tuan kei hi. ^j
6 “Babylon pan taikhia un! ^k
Na nuntakna uh hu-in tai un!
Ama mawhnate hangin kisusiasak kei un. ^l
TOPA phulak hun hi a, ^m
ama thuak ding a kilawm bangin a thuk kik ding hi. ⁿ
7 TOPA khut sungah Babylon kham hai khat hi a; ^o
tuanu in leitung buppi zu a khamsak hi.
Minamte in ama zu dawn uh a;
tua hangin tu-in mihai suak khin uh hi.
8 Thakhatin Babylon puk dinga, a kisiagawp ding hi. ^p
Amah kah un!
Amah dam thei lai kha ding hi;
a natna nuh ding zatui laksak un. ^q
9 “‘Babylon i damsak nop hangin
kidamsak thei lo hi;
ama tunga thukhenna in vante bana, ^r
meiite bangin sangkah to ahi manin
amah nusia-in i gam ciatah ciah ni. ^s
10 “‘TOPA in eite hong diksak khin hi;
pai un, TOPA eite Pasian sepsa,
Zion ah va gen ni,’ ci uh hi. ^t
11 “Thaltangte hiam unla ^u
lumte tawi un! ^v
TOPA in Babylon suksiat sawm ahi manin ^w
Medes kumpite hanthawn hi.
TOPA in phu la-in,
a biakinnpi phu a la ding hi.
12 Babylon kulhte langah
dialkhai khat khai un! ^x
A cingte behlapin ^y
a buksim ding kithawi un! ^z
TOPA in Babylon mite tungah
tunsak dinga a khensatte tungsak ta ding hi. ^aa
13 No tui tamna gei-a teng
gou haute aw,
na hun uh kibeisak ta a,
a tawpna na tungta uh hi. ^ab
14 Thahatpen TOPA amah le amah kiciama: ^ac
Keimah in kauphe honpi bangin mihing tawh nang kong dim taktak dinga, ^ad
nang tungah gualzo-in a awng ding uh hi.
15 “Amah in a vang tawh leitung bawla;
ama pilna tawh lei pumpi omkhiasakin,
ama theihtelna tawh vante a zalhkhia hi. ^ae
16 Van a ginsak ciangin vante a tuite hawk uh a;
leitung mongte panin tuite kahtosak hi.
Amah in khuaphia le guah sawlkhawm a,
a vankholna inn panin huih a puakkhia hi.
17 Mihing peuhmah ngaihsutna nei lo le theihna nei lo hi a;
kham seekte peuhmah a milim bawlte hangin a maizum ding uh hi.
Ama milim sunte lah zuaupi hi a; ^af
a sungah huu a nei kei hi.
18 Tuate in man nei lo a, ciamnuihna-in kinei lel hi; ^ag
amaute tungah thukhenna a tun ciangin a mangthang ding uh hi.
19 Jacob Tanh tuate abang kei hi; ^ah
ahang in, amah na khempeuh le ^ai
ama bawng’te a Bawlpa -
a min Thahatpen TOPA ahi hi.
20 “Nang, galsim nading ^aj
ka gal khetbuk na hi a -
nangin minamte ka thehzak a,
nangin kumpi-gamte ka susia a,
21 nangin sakolte le a tunga tuangte thehzakin, ^ak
nangin sakollengte le a hawlte ka thehzak a, ^al
22 nangin numei pasal ka thehzak hi,
nangin amoi aham ka thehzaka,
nangin nungak tangval thehzakin,
23 nangin tuucingpa le tuuhon ka thehzak hi,
nangin lokhopa le bawngtalte ka thehzaka,
nangin ukpite le uliante ka thehzak hi.

24 Zion tunga a bawl uh mawhnate khempeuh hangin Babylon le Babylon a tengte ^{▼▼51.24 Ahikeh Chaldea-te tg.35 ah zong} khempeuh tungah nangma mitmuhin ka thuk ding hi,” TOPA in cikhia hi.

25 “A susia mualpi aw, leitung buppi a susiapa aw,
nang langkhatah kei ka pang hi,”

TOPA in cikhia hi.
“Nang langkhatah ka khut ka zan dinga,
keen ah hong khukkhia-in
mual kangtum kong suaksak ding hi. ^an
26 Nang hong kinusiacip ding ahi manin
nang tung panin innkiu suang dingin suang kila lo dinga,
innbul suangphah dingin suang khatpeuh zong a kila tuan kei ding hi,”

TOPA in cikhia hi.
27 “Tua gam ah dialkhai khaito un!
Minamte lakah pengkul mut un!
Tuanu sim dingin minamte kithawi uh henla;
amah sim Ararat, Minni le
Ashkenaz kumpi-gamte kaikhawm uh hen. ^ao
Tuanu sim dingin a makai ding seh uh henla;
kauphe honpi khat bangin sakolte sawlto un.
28 Amah a sim dingin minamte -
Medes kumpite,
a ukpite uh le a uliante uh,
le ama ukna gam khempeuh kithawisak un.
29 Babylon tungah TOPA ngimna tung ahi manin
a gam kilingin kinuaigawp a -
tua lai-ah kuamah a ten nawn loh nadingin ^ap
Babylon gam, gam simtham a suak hi. ^aq
30 Babylon galhangte in do nawn lo uh a; ^ar
amau kulh muanhuai sungah a ommawk uh hi.
Amaute hatna hawm ta a;
numei abang uh hi. ^as
Ama tenna mei-in kihal a;
a kongpi kalhna zawlte a kitan khin hi. ^at
31 Thukote kimatin tunga,
thupuakte tung thithe-in -
Babylon kumpipa kiangah
khuapi khempeuh kila khin phial hi; ^au
32 gun ngahmun teng kila khina,
zang phailak teng kihaltumin
galkapte patau ta uh hi,” ci-in thu a zasak thithe uh hi.

33 Hih in Israel Pasian Thahatpen TOPA gen ahi hi:

“Babylon tanu ancil huna
an cilna mun tawh kibang a;
amah anlak-a a kilak ding hun tungpah ding hi,” ci hi. ^av
34 Babylon kumpipa Nebuchadnezzar in eite hong nawmvalh a, ^aw
eite hong lawnthalin,
leibeel hawm hong suaksak hi.
Gulpi bangin eite hong valhin,
eite limna-in gil vah a,
tua ciangin hong ikkhia kik hi.
35 Eite satak ^{▼▼51.35 Ahikeh eite le i tate tungah hong kibawlna} tunga hong kingongtatna Babylon-te tungah tu ta hen,” ^ay
Zion a tengte in ci uh hi.
“Eite sisan Babylon-te tungah tu ta hen,”
Jerusalem in ci hi. ^az

36 Tua ahi ciangin hih in TOPA gen ahi hi:

“En un, note thu ah kong hu dinga,
na phu uh kong laksak ding hi; ^ba
ama tuipi ka kangcipsak dinga’ ^bb
a ciktuite ka keusak ding hi.
37 Babylon, van kisia lompi suak dinga,
se-alte zualna mun suakin ^bc
kuama tenlohna mun,
a kilipkhap le a kiphitsan mun a suak ding hi.
38 A mite khempeuh humpinelkai khanglai bangin hawk ding uh a,
humpi no bangin a ngik ding uh hi.
39 Ahi hangin amaute a thawh laitakun
mu-a a awt nadingun
amaute ading pawi bawlsakin -
zu ka khamsak dinga,
tua ciangin amaute ihmu denin a khanglo nawn kei ding uh hi,” ^bd

TOPA in cikhia hi.
40 “A kigo ding tuunote,
tuutalte le keeltalte bangin
amaute kipaipih suk ding hi. ^be
41 “Bangci banga Sheshack ^{▼▼51.41 Sheshach, Babylon mite cihna} kila-in, ^bg
leitung buppi kisaktheihna kiman mawk ahi hiam!
Minamte lakah
Babylon kilipkhap na’ncia!
42 Tuipi in Babylon tuum dinga,
a tuihual hawkte in amah a khuh ding hi. ^bh
43 A khuapite kinusiacip dinga,
gamkeu a kitaisan gam suakin,
kuama ten lohna gam suak dinga
a kantanin kuamah khual a zin kei ding hi. ^bi
44 Babylon sunga om Bel, an ka suaksak dinga,
a valhsate ka ikkhiasak kik ding hi.
Ama tungah minamte lui-in a luang nawn kei ding uh hi.
Tuateh Babylon kulh a puk ding hi. ^bj
45 “Ka mite aw, ama sung panin paikhia un!
Na nuntak nadingun tai un! ^bk
TOPA hehluatna panin taikhia un. ^bl
46 Gamsung ah kamlengsawn na zak uh ciangin
lungkia kei unla lau kei un; ^bm
tu kumin kamlengsawn khat kigenin, nikum ciang adang khat kigen dinga,
gamsungah ngongtatna le
gam-uk khat le gam-uk khat kidona kamlengsawn kiza ding hi.
47 Ahang in, Babylon milimte
dan ka tuahsak ding hun hong tung taktak ding hi; ^bn
a gambup ka zahlaaksak dinga,
a kithatte khempeuh ama sungah a puk ding uh hi.
48 Tua ciangin leilu-lam panin ^bo
amah sim dingte hong kuankhia ding uh ahi manin
leitung, vantung le a sunga omte khempeuh in
lungdamin Babylon a otkhai ding uh hi,” ^bp

TOPA in cikhia hi.
49 “Babylon hangin gam khempeuh ah
mi kithatin a puk bang tektekin
Israel thahna hangin Babylon a puk pelmawh ding hi. ^bq
50 No, namsau pana suaktate aw,
dingding nawn loin paisan pak un!
Gamlapi a om TOPA phawk unla ^br
Jerusalem ngaihsunsun un.
51 “Eite hong kisimmawh a,
zahlaak i hi manin ^bs
i maitang maizumna in a tuam hi,
bang hang hiam cih leh TOPA inn-a mun siangthote ah
gamdang mite lut uh hi.” ^bt
52 TOPA in cikhia hi:
“Ahi hangin tuanu milimte dan ka thuaksak hun hong tun ciangin
a gamsung khempeuh ah
a liamte a tau ding uh hi.
53 Babylon in van aban zawzen ^bu
galdalna sangpi a bawl zongin
amah susia ding mi ka kuansak veve ding hi,” ^bv

TOPA in cikhia hi.
54 “Babylon panin kikona aw khat a ging hi,
Babylon mite ^{▼▼51.54 Ahikeh Chaldea-te} pana
siatna lianpi awging ahi hi. ^bx
55 TOPA in Babylon susia dinga;
ama gamlum henhanna a daisak ding hi.
Tuilianpite bangin gal-tuihual ging zuahzuah dinga; ^by
amau hawkna aw a kithawn kik ding hi.
56 Babylon susia dingte hong kuan ding uh a;
ama galhangte kimanin
a thalpeute uh kikuaitan ding hi. ^bz
Ahang in, dan a thuaksak TOPA in Pasian hi-a,
a cingin a thukkik ding hi. ^ca
57 Keimah in a uliante le a mipilte zu ka khamsak dinga,
a gam-ukte a galkap mangte le galhangte zong tuamah bangin ka bawl ding hi;
amaute lumden ding uh a, a khanglo nawn kei ding uh hi,” ^cb
Kumpipa, a min Thahatpen TOPA in cikhia hi. ^cc

58 Hih in Thahatpen TOPA gen ahi hi:

“Babylon kulh sahpi lei tawh cinin ciim dinga ^cd
ama kongpi sangpite mei tawh kihalin, ^ce
a mite bangmah loin thahawm ding uh a, ^cf
a minamte gimna mei-a khul ding bek a suak uh hi,” a ci hi.

59 Hih in Judah kumpipa Zedekiah aman zawh a kum lina kum, Babylon ah a pai lai-ua, Mahseiah tapa Neriah tapa zum nasem ukpipa Seraiah tungah Jeremiah in a piak thupuak ahi hi. 60 Babylon tunga tung ding siatna khempeuh - Babylon tawh kisai-a kiciamtehsa thu khempeuh Jeremiah in laizial khatin a gelh khin hi. 61 Amah in Seraiah tungah, “Babylon na tun ciangin hih thute khempeuh na sim ding thei in. 62 Tua ciangin,’ TOPA aw, mihing le ganhing ten loh nadingin hih mun ka susia ding hi, na ci hi; a kinusia den ding hi ta hi,’ ci in. 63 Hih laizial na sim khit ciangin suang khat tawh henkhawm inla Euphrates sungah lawn in. 64 Tua ciangin a tunga ka tunsak ding gimnate hangin a tho kik nawn lo dingin hih bangin Babylon a tum ding hi. Tuateh a mite a puk ding uh hi,’ ci in,” a ci hi. ^cg

Jeremiah kammalte hih ciang ahi hi.