Job 39

1 “Mualtung sathakte a suah hun thei na hi hiam? ^a
Sanangpite a no a suah ciangin va vil na hi hiam?
2 A paii sung kha phazah sim na hi hiam?
A suah hun uh thei na hi hiam? ^b
3 Amaute opsakin a no a suak uh hi;
tasuah natna a thuak kha nawn kei uh hi.
4 A note uh khanpha in, gam sungah hat uh hi;
a pite nusia uh a, zuan kik nawn lo uh hi.
5 “Gamsung laate kua in khah ahi hiam? ^c
A khau kua in sut ahi hiam?
6 Ama inn dingin gamtak lak ka pia-a, ^d
a ten nadingun sih omna zangte ka pia hi.
7 Khuasung gamlumna nuihsan bek a, ^e
leeng hawlte otna a za kei hi. ^f
8 Mualno dungte ah gamta a, ^g
singhing lohing a zong hi.
9 “Gam bawngtalte in nang na sem nuam ahi hiam? ^h
Zanin na gan-ankuang gei-ah giak nuam ding hiam? ⁱ
10 Lokalhna ah gam bawngtal a khau-in kai zo na hi hiam?
Na nungah mualkuamte kho ding ahi hiam?
11 A hat luatna hangin a tungah na kinga ngam ding hiam? ^j
Na nasep haksa amah na nusiat ding hiam?
12 Na antang pua in an cilna phualah
a khawm dingin na muang thei diam?
13 “Kala-oh vasate in a khate nuamtakin zaap hiathiat uh hi,
ahi hangin tui vapi khate le a khavengte tawh kitehkak thei lo hi. ^k
14 A pite leitungah tui uh a,
sehnel lakah lumsakin
15 khe khatpeuh in tuate a sikkhak ding le
gamsate in a tuatkhak ding ngaihsun lo uh hi. ^l
16 Ama aa ahi lo bangin a note ngong khoi a;
a sepna a mawkna-a hih na a awlmawh kei hi. ^m
17 ahang in, Pasian in pilna guan loin
ahikeh ngaihsut-siamna a pia kei hi. ⁿ
18 Tua hi napi tai dinga a khavengte a zaak ciangin
sakol le a tunga tuangpa a nuihsan bek hi. ^o
19 “Sakol hatna nang piaksa sa a,
ahikeh a ngawngmul nang posak sa na hi hiam?
20 Nang in kauphe bangin tuansak a, ^p
a lauhuai dingin phitsak na hi hiam? ^q
21 Amah in nakpipi in lei khuat a,
a hatna suangin gal sungah dianggawp hi.
22 Launa nuihsan bek a, bangmah a kihta kei hi; ^r
namsau mai-ah a dual tuan kei hi.
23 Thaltang bawm, atee zialzial teipi le tulzum in ^s
a pang sat lengleng hi. ^t
24 Lauthawng kawm le lawp lua-in leitang ne a,
pengkul a kimut ciangin a omkhong thei kei hi.
25 Pengkul a kimut nak leh phit in a ham hi. ^u
Amah in gamlapi panin gal gimnam za a,
galkap mangpa otna le gal awging thei hi. ^v
26 “Nang pilna hangin simbu lengin
leitaw lamah a kha zal ahi hiam? ^w
27 Nang thupiakna mangin muvanlai sanglen a,
a sangpi ah bu tom ahi hiam?
28 Amah kenbangah teng a, zan ciangin tua lai-ah a giak hi;
ama kulh muanhuai suang hengkawm ahi hi. ^x
29 Tua lai pan an zong dingin kuankhia a, ^y
a gamlapi panin a mitin mukhia thei hi.
30 A note sisanin kivak uh a,
ganhing kithahna munah amah a om hi,” a ci hi. ^z