Joe 3 | ZomZIV | STEP | “Tua ni tua hun ciangin Judah le Jerusalem, a nidang hun uh ka bangsak dinga,

Joel 3

Minamte Thu Kikhen

1 “Tua ni tua hun ciangin Judah le Jerusalem,
a nidang hun uh ka bangsak dinga,
2 Minam khempeuh khawmin ^a
Jehoshaphat ^{▼▼3.2 Jehoshaphet, TOPAcihna; aneu 12 ah zong} Kuam ah ka paipih suk ding hi.
Tua lai-ah ka gouluah, ka mi Israel-te
a langbawlna hangun amaute thu ka khen ding hi;
ahang in, amaute in ka mite,
minamte lakah thehthang uh a, ka gam a hawm uh hi.
3 Ai sanin, ka mite metbawlin
sumzonna-in nei uh a,
a zu dawn nadingun
numeinote a zuak uh hi. ^c

4 Tyre, Sidon le Philistia kualte khempeuh aw, tu-in kei bang hong cih nuam lai na hi uh hiam? Ka gamtatnasa khatpeuh hong thuk kik na hi uh hiam? Hong thuk kik na hi uh leh kei zong no hong sepsate manlangtakin kong thuk kik pah ding hi. 5 Ka kham, ka ngun le ka gou hoihpente la-in note biakinnpi sungah na puak uh hi. 6 Amau leitang tawh a kigamla theithei dingin Judah le Israel mite Greek-te tungah na zuak uh hi.

7 “Na en un, amaute na zuakna mun panun ka thosak dinga na gamtatnasate uh no lutang ah hong tu kik ding hi. 8 Na tanu na tapate uh Judah mite tungah ka zuak dinga, amaute in gamlapi-a om Sabea minamte tungah a zuaksawn ding uh hi,”TOPA in genkhia khin hi. ^d

9 Midangte tungah hih thu tangko un:
Gal sim dingin kithawi un! ^e
Galhangte hansuah un! ^f
Galsiam mite galdo dingin naihsak un.
10 Lo khawhna tute namsau-in sek unla,
heuhna temte teipi in sek un. ^g
A hat lo mite,
“Ka hat hi,” cisak un. ^h
11 Minam khempeuh aw, mun khempeuh pan manlang takin hong kuan unla,
tua lai-ah kikhawm un.
TOPA aw, na galhangte hong puaksuk in. ⁱ
12 “Minamte kithawisak un;
Jehushaphat Kuam hong simsuk uh hen.
Ahang in, mun khempeuh a minamte thukhen dingin
tua lai-ah ka tu ding hi. ^j
13 An lak hun ta ahi manin ^k
na phiaukawi uh vaan un. ^l
Amaute gilo lua mahmah uh ahi manin
hong pai unla lenggah cilna kuang sunga
a dim lenggah bangin cilin
lenggah tui dawhna dimletsak un.
14 Thukhenna Kuam sunga
mihonpite, mihonpite!
Ahang in, thukhenna Kuam ah
TOPA thukhenna nai ta hi.
15 Nipi le khapi kimialsak dinga,
aksite a tang nawn kei ding hi. ^m
16 Zion panin TOPA hawk dinga,
Jerusalem panin kek kia ding hi;
lei le van kiling ding hi. ⁿ
Ahi hangin TOPA a mite bukna suak dinga, ^o
Israel mite mun muanhuai ahi ding hi. ^p

Pasian Mite Thuphate

17 “Tua ciangin keimah TOPA note Pasian,
ka mual siangtho Zion ah ka ten lam na thei ding uh hi.
Jerusalem siangtho dinga ^q
gamdang mite in a zo kik ngei nawn kei ding uh hi. ^r
18 Tua ni ciangin mualliante pan lenggahzu thak taak dinga, ^s
mualneute ah bawngnawi luang ding hi.
Judah gam sunga hawkguam khempeuh ah tui a luang ding hi. ^t
TOPA inn panin ciktui khat luangkhia dinga ^u
acacias ^{▼▼3.18 Ahikeh Shittim} kuam a kawtsak ding hi. ^w
19 Ahi hangin Egypt gam,
gamlak suakin Edom gam, a kizang thei nawn lo sehnel-gam a suak ding hi. ^x
Bang hang hiam cih leh amaute in Judah mite tungah ngongtatin
amau gama mawhpengte’ sisan a luangsak uh hi.
20 Judah gamah mi teng tawntung dinga,
Jerusalem ah khang tawntungin mi a teng ding hi.
21 A sisan mawhna uh ka maisak lohte
ka maisak ding hi,” a ci hi. ^y
Zion ah TOPA teng hi!