Jos 1 | ZomZIV | STEP | TOPA nasempa Moses a sih khit ciangin Moses huhpa Nun’ tapa Joshua tungah TOPA in,

Joshua 1

TOPA in Joshua Thupia

1 TOPA nasempa Moses a sih khit ciangin Moses huhpa Nun’ tapa Joshua tungah TOPA in, 2 “Ka nasempa Moses si ta hi. Tua ahi ciangin tu-in amaute - Isreal-te tunga ka piak ding gamah pai dingin, Jordan Gun galkah dingin nang le hih mite khempeuh kithawi un. 3 Moses tunga ka ciamsa bangin na siikna mun peuhpeuh nang kong pia ding hi. 4 Na gam ding uh - sehnel-gam pan Lebanon, gun lianpi Ephrates Hit-te gam sung khempeuh pan nitumna lamah Tuipi lian ^{▼▼1.4 Tua pen Mediterranean} dong hi ding hi. 5 Na nuntak sung teng nang langkhat ah kuamah a pang zo kei ding hi. Moses ka ompih bangin nang kong ompih ding hi; nang kong nusia kei dinga kong taisan ngei kei ding hi. ^b

6 “Hih mite in a luah dingun amaute piak dinga a pute uh tunga ka ciamsa gamah amaute makaih ding na hi manin hat inla hang in. 7 Hat inla hang mahmah in. Ka nasempa Moses in nang hong piak thukham khempeuh limtakin mang in; na paina peuhah na gualzawh theih nadingin veilam ahi-a taklam ahi zongin pialsan kei in. 8 Hih Thukham Laibu sunga kigelh khempeuh limtaka na sep theih nadingin na kam tawh kilawisak kei inla sun le zanin ngaihsunsun in. Tua hileh na dau pai-in na lawhcing ding hi. 9 Thu hong pia khin hi lo ka hi hiam? Hat inla hang in. Lauthawng kei in; na paina peuhah TOPA note Pasian in hong ompih ding ahi manin lungkia kei in,” a ci hi.

10 Tua ciangin Joshua in uliante thu pia a: 11 “Giahphual tengah pai unla, ‘Na lam-an ding uh kiging un. Tuni-a kipan nithum sungin TOPA note Pasian in na neih dingun hong piak ding gamah hih lai pan Jordan gal ah kahin na pai ta ding uh hi,’ ci un,” ci-in a sawl hi. ^c

12 Ahi hangin Joshua in Reuben-te, Gad-te Manasseh beh alangte tungah, 13 “TOPA nasempa Moses in note tungah hong thupiak, ‘TOPA note Pasian in tawlngakna hong pia-in hih gam hong ngahsak ding hi,’ a cih phawk un. 14 Na zite na tate uh le na ganhonte uh, Moses hong piaksa Jordan nisuahna lamah om ding uh a, ahi hangin na galkap mite uh galhiam tawisa-in na sanggamte uh mai ah galkah ding uh hi. 15 TOPA in note tawlngakna hong piak bangin amaute tawlngakna pia a, TOPA note Pasian in na sanggamte uh neih dingin a piak ding gam, amaute in zong a lak khit matengun amaute na huh ding uh hi. Tua khit ciangin na ciah kik ding uh a, TOPA’ nasempa Moses in hong piaksa Jordan nisuahna-lam - nomau neihsa nisuahna lampang teng na luah ding uh hi,” a ci hi. ^d

16 Tua ciangin amaute in, “Nong thupiak peuhpeuh ka sem ding uh a, nong sawlna peuhpeuhah ka pai ding uh hi. 17 Moses thu khempeuh ka man bang tektekun nang thu kong mang ding uh hi. TOPA na Pasian in Moses a ompih bangin nang zong hong ompih tapeuh hen. 18 Na kammal a lehdo peuhmah, le na thupiak mang lo-a, na thupiak dingte a mang lo peuhmah kithat ding hi. Hat inla hang in!” ci-in a dawng uh hi.