Jos 8 | ZomZIV | STEP | Tua ciangin TOPA in Joshua kiangah, “Lau kei in; zong lungkia kei in. Galkap buppi kuanpih inla paito in Ai va sim un. Na khut sungah Ai kumpipa, a mite, a khuapi le a gam kong pia khin hi.

Joshua 8

Ai Siatna

1 Tua ciangin TOPA in Joshua kiangah, “Lau kei in; zong lungkia kei in. Galkap buppi kuanpih inla paito in Ai va sim un. Na khut sungah Ai kumpipa, a mite, a khuapi le a gam kong pia khin hi. 2 A van nusiatte uh le ganhonte na laksak theih ding longal uh Jericho le a kumpipa tunga na hih bangun Ai le a kumpipa tungah na hih ding uh hi. Khuapi nungah a buksimte pangsak in,” a ci hi.

3 Tua ciangin Joshua le galkap buppi Ai sim dingin a kuankhia uh hi. Amah in galsim a siampente tul sawmthum teelkhia a zanin kuansak a 4 hih bangin thu a pia hi: “Limtakin na ngai un. Khuapi nunglam mun khatah na buksim ding uh hi. Khuapi tawh a kigamla lua ah pai kei un. Na vekun a kigingsa-in om den un. 5 Kei le kei tawh a omlai khempeuh in khuapi manawhin kongkuan ding uh a, a masa a bangin kote do dingin mite hong kuankhiat uh ciangin ko ka na tai ding uh hi. 6 Amaute ko hong delhin khuapi pan a taikhiat khit mateng uh ka na nung kik ding uh hi; tua hileh amaute in, ‘A masa-a bangin ei hong lelin a tai uh hi,’ ci ding uh hi. Tuaci-a amaute mai pan ka tai uh ciangin, 7 na buksimna panun no hong paikhia-in khuapi nong la ding uh hi. TOPA note Pasian in note khut sungah hong pia ding hi. 8 Khuapi na lak khit uh ciangin mei-in hal un. TOPA thupiaksa bangin hih un. Thu kong pia khin hi; na hih ding uh thei un,” a ci hi.

9 Tua ciangin Joshua in amaute kuankhiasak a, amaute pai-in Ai nitumna lam, Bethel le Ai kikala a buksim nading uh mun zuanin tua lai-ah a ngak uh hi - ahi hangin tua zanin mipite omna ah Joshua a giak lai hi. ^a

10 A zing ciang zingtungin Joshua in a mite kikhawmsak a, amah le Israel makaite masa in Ai lam manawh in a kuan uh hi. 11 Amah tawh a omkhawm galkap khempeuh khuapi lam manawhin kuankhia uh a, khuapi mai a tung uh hi. Amaute in Ai leilu-lam ah giahphual sat uh a; amau le khuapi kikal ah guam khat a om hi. 12 Joshua in mi tulnga bang sehkhia a khuapi nitumna-lam Ai le Bethel kikalah a buksimsak hi. 13 Amaute in giahphuala galkapte khempeuh - khuapi leilu-lam le khuapi nitumna lam amau mun ding ciatah a pangsak uh hi. Tua zanin Joshua kuam sungah a pai hi.

14 Ai kumpipa in hih banga kihih a muh ciangin amah le a khuapi mi khempeuh Israel do dingin Arabah kimuh sukna mun khatah zingsang tungin a kuankhia uh hi. Ahi hangin khuapi nunglam ah amah buksim ding a ki-omsak lam a thei kei hi. 15 Joshua le Israel khempeuh kilelsakin amaute mai-ah lehtai uh a, sehnel gam lam a manawh uh hi. 16 Amaute nungdelh dingin Ai mi khempeuh kisam uh a Joshua nungdelhin khuapi panin mi khemsa in a taikhia khin uh hi. 17 Israel-te delhin a kuan lo Ai le Bethel ah pasal khat beek a om kei hi. Israel delh in kuankhia khin uh a, a khuapi uh honsa in a nusia uh hi. ^b

18 Tua ciangin TOPA in Joshua kiangah, “No tungah khuapi hong pia ta ding ka hi manin na khut sunga teipi Ai lam ngatin zan in,” a ci hi. Tua ciangin Joshua in a teilot Ai lam a ngat hi. 19 A teilot khuapi lam a ngat phetin a buksimte a omna panun diangkhiapah uh a mailam a nawt henhan uh hi. Khuapi ah lutin la uh a mei-in a hal pah uh hi. ^c

20 Ai mite in leh-et uh a khuapi kangkhu van lamah kitung to a muh uh hangin sehnel-gam lam manawha tai Israel-te amau a delhte lamah kihei uh ahi manin lam khat peuhpeuh ah suahtak theih nading hun a nei kei uh hi. 21 A buksim pawlte in khuapi lakhin uh a, khuapi kangkhu Joshua le Israel khempeuh in a muh uh ciangin kileh hei-in Ai mite a do uh hi. 22 Israel-te alang tuakah pangin amaute a laizangah a mat theih nadingun a buksim pawlte zong khuapi pan a kuankhia uh hi. Israel in amaute khat beek hawi loin that khin a khahsuah zong a nei kei uh hi. 23 Ahi hangin Ai kumpipa hingmat uh a Joshua kiangah a puak uh hi. ^d

24 Israel in lopaang le sehnel gama amaute a delh Ai mite khempeuh thatin namsau-in a thah siang khit uh ciangin Israel-te khempeuh Ai ah kileh kik uh a khua sunga om khempeuh a that siang uh hi. 25 Tua ni-a a si Ai mite numei pasal a vekpi-in tul sawm le nih a pha hi. 26 Ahang in, Joshua in Ai sunga teng khempeuh a kisiat ^{▼▼8.26 Hebrew lai ah mihing le nate TOPA} khit mateng a teilot a letna khut a dok kik kei hi. 27 Ahi hangin TOPA in Joshua a lam-lahsa bangin Israel in van kinusiate le ganhingte a puakhia uh hi.

28 Tua ciangin Joshua in Ai haltum a, tuni dongin vansia kholna suakin kuama tenlohna mun a suak hi. 29 Ai kumpipa sing tungah khai-a, nitak dong tua lai-ah a kinusia hi. Nitum ciangin Joshua in singtung pan a luang lakhiasak a, khuapi lutna kongpi ah a paisuksak hi. Amaute in a tungah suangtum tampi ciang uh a tuni dong a omlai hi. ^f

Ebal Vum ah Thukhun Kithaksuaksak

30 Tua ciangin TOPA nasempa Moses in Israel-te a thupiaksa bangin 31 Joshua in Ebal Vum ah TOPA Israel Pasian adingin biakna-tau khat a dawh hi. Amah in Moses Laibu sunga kigelhsa tawh kizui-in - sik vanzat khatpeuh zanga kisek lo, suangtum omsate in a dawh hi. Amaute in tua tungah meihal biakna le kilawmtakna biakna ^{▼▼8.31 Tang ngeina-in kilemna biaknate}TOPA a pia uh hi. 32 Tua lai-ah Joshua in Moses gelhsa thukham, Israel-te muhin suang tungah a teikhia hi. 33 Israel khempeuh - pemtate hitaleh tualsuakte hitaleh a kibangin a upate uh, a uliante uh le a thukhente uh tawh TOPA thukhun singkuangpi a pua Levi siampite maingatin a singkuangpi lang tuakah a ding uh hi. TOPA nasempa Moses in, Israel mite thupha a kipiak ciangin hih dinga lamlahna a piaksa bangin mipi alang in Gerizim Vum maingat uh a alangte in Ebal vum lam maingatin a ding uh hi.

34 Tua khit ciangin Joshua in Thukham Laibu sunga om - thuphate le hamsiatnate a kammal om khempeuh a om bang tektekin a sim hi. 35 Moses thupiaksa kammal khempeuh, Israel mihon buppi - numei, naupang le amaute laka teng pemtate khempeuh tungah Joshua in a sim loh mal khat zong a om kei hi. ^h