Judg 13 | ZomZIV | STEP | TOPA mit ah Israel-te a sia-in gamta leuleu uh a, tua ciangin TOPA in kum sawmli sung Philistia-te khut sungah a pia hi.

Judges 13

Samson Suahna

1 TOPA mit ah Israel-te a sia-in gamta leuleu uh a, tua ciangin TOPA in kum sawmli sung Philistia-te khut sungah a pia hi. ^a

2 Dan-te bawng’ panin Zorah ah Manoah min nei mi khat oma a zi tasel hi-in ta a nei kei hi. 3 Tuanu kiangah TOPA’ vansawltak kilangin, “Nang a tasel na hi-a, ta na nei kei hi; ahi hangin nau paii in tapa khat na nei ding hi. 4 Tu-a kipan zu ahi-a a kibilh khatpeuh ahi zongin na dawn kei dinga, asiang lo khatpeuh na ne kei ding hi; 5 bang hang hiam cih leh nau paii-in tapa na nei ding hi. A suah a kipan a lutungah mulkiatna a kitah kei ding hi; bang hang hiam cih leh naupang Nazir-te suakin Pasian adingin kituamkoih dinga, amah in Philistia-te khut panin Israel hutkhiat ding a pan ding hi,” a ci hi.

6 Tua ciangin numei a pasal kiangah pai-in, “Pasian mi khat ka kiangah hong pai hi. Amah vansawltak hileh kilawma, a zahtak baang mahmah hi. Koi pana hong pai hiam ka dong kei-a a min lah hong gen lo hi. 7 Ahi hangin kei kiangah, ‘Nau na paii dinga tapa na nei ding hi. Tu-a kipan zu le a kibilh peuhmah dawn kei inla, asianglo na khatpeuh ne kei in, bang hang hiam cih leh naupang in a suah-a kipan a sih dong Pasian’ Nazir-te a suak ding hi,’ hong ci hi,” ci-in a ko hi.

8 Tua ciangin Manoah in TOPA kiangah: “Topa aw, ko tunga nong sawl Pasian mipa ko kiangah hong paisak kik inla a suak ding naupang ka khoizia ding uh nong hilhsak nadingin kong thum hi,” ci-in thu a ngen hi.

9 Pasian in Manoah thunget za a, lopaang ah tuanu a om laitakin Pasian vansawltak ama kiangah a pai kik hi; ahi hangin a pasal Manoah a om kei hi. 10 Tuanu a pasal kiangah tai mengmenga, “Zan hala ka kianga hong kilang mipa hiah om!” ci-in a gen hi.

11 Manoah dingin a zi a zui hi. Mipa kiang a tun uh ciangin, “Ka zi a hopih nang na hi hiam?” a ci hi.

“Hi mah ing” a ci hi.

12 Tua ciangin Manoah in, “Na kammalte a tangtun ciangin, naupang nuntakna le a sepzia ding bangci dan hi ding hiam?” ci-in a dong hi.

13 TOPA vansawltak in, “Ka gensa khempeuh na zi in a hih pelmawh ding hi. 14 Lenggui pana piang peuhmah ne lo dinga, zu ahi-a a kibilh dang khat ahi zongin dawn loin asianglo peuhmah a ne kei ding hi. Amah ka thupiaksa peuhmah a hih pelmawh ding hi,” ci-in a dawng hi.

15 Manoah in TOPA vansawltak kiangah, “Nang adingin keelno khat kong bawl khit matengun na khawl in,” a ci hi. ^b

16 TOPA vansawltak in, “Kei nong kho ta zongin na an kong neksak kei ding hi. Ahi zongin meihal biakna na bawl leh TOPA tungah pia in,” ci-in a dawng hi. (Manoah in TOPA vansawltak ahilam a thei kei hi.)

17 Tua ciangin Manoah in TOPA vansawltak kiangah, “Na thugen a maana hong tangtun ciangin kong pahtawi theih nadingin na min bang ahi hiam?” ci-in a teldot hi.

18 Amah in, “Bang hangin ka min hong dong na hi hiam? Tua in theihbanloh b ahi hi,” ci-in a dawng kik hi. 19 Tua ciangin Manoah in keelno khat le an-a biakna la khawmin suangpi tung khatah TOPA a pia hi. Manoah le a zi in a et gige laitakun TOPA in na lamdang sem a: 20 Biakna-tau panin vantunglam ah mei a kuan toh laitakin meikuang lakah TOPA vansawltak a kahto hi. Manoah le a zi in a muh uh ciangin lei ah a boksuk uh hi. Manoah le a zi tungah 21 TOPA vansawltak a kilah kik nawn loh ciangin Manoah in TOPA vansawltak ahilam a phawk hi. ^c

22 Amah in a zi kiangah, “A si ding hita hang ei! Pasian mu khin hang ei! “a ci hi. ^d

23 Ahi hangin a zi in, “TOPA in ei thah hong sawm hileh i khuttung pana meihal biakna le an-a biakna hong sang loin, hih nate khempeuh zong hong lak lo dinga tua bangin hong gen kei ding hi,” ci-in a dawng hi.

24 Numei in tapa nei-a, a min Samson a phuak hi. Amah khangto in TOPA in thupha pia a, 25 Zorah le Eshtaol kikala Mahaneh Dan-a a om sungin TOPA Kha in amah thathawhsak ding a kipan hi.