Judg 15 | ZomZIV | STEP | Tua zawh anlak hunin Samson in keelno khat kengin a zi kiangah hawh dingin a pai hi. Amah in, “Ka zi innkhan ah va pai dih ning e,” a ci hi. Ahi hangin a sungpa in a sunga a tum ding a phal kei hi.

Judges 15

Philistia-te tunga Samson Phulakna

1 Tua zawh anlak hunin Samson in keelno khat kengin a zi kiangah hawh dingin a pai hi. Amah in, “Ka zi innkhan ah va pai dih ning e,” a ci hi. Ahi hangin a sungpa in a sunga a tum ding a phal kei hi. ^a

2 A pa in, “Amah a mudah taktak na hilam tel ka hi manin na lawmpa tawh ka tengsak hi. A naunu ngaih baangzaw hi lo hiam? Ama tangin la in,” a ci hi. ^b

3 Samson in amaute kiangah, “Tutungin Philistia-te tungah phulak theih nading thu ka nei hi; amaute ka nasak taktak ding hi,” a ci hi. 4 Tua ciangin amah paikhia a, ngia zathum manin nihta in a mei-ah a khih hi. Tua ciangin nihta mei ah meilah khih khawm a, 5 meilahte a tawh kuang khit ciangin Philistia-te ankung po lakah a khah hi. Amah in buhphal, buhkung polaite, lenggui huan le oliv lote a haltumsak hi.

6 Philistia-te in, “Kua hih hiam?” ci-a a dot uh ciangin amaute kianga, “Timnah-te’ makpa Samson in, a zi a lawmpa a piaksak manun a hih ahi hi,” ci-in a gen uh hi.

Tua ciangin Philistia-te kuanto uh a, tuanu le a pa a haltum uh hi. 7 Samson in amaute kiangah, “Hih banga na hih vial uh, no tungah phu kong lak zawh mateng ka ta kei ding hi,” a ci hi. 8 Amaute simgawp ngi-ingei-in tampitak a tawl-at hi. Tua ciangin paisuk a, Etam suangpi hawmah a om hi. ^c

9 Philistia-te kuanto uh a Judah gam sungah giahphual satin Lehi kiang tengah a kiphalh uh hi. 10 Judah mite in, “Bang hangin ko sim dingin hong kuan na hi uh hiam?” ci-in a dong uh hi.

Amaute in,”Samson in ko hong bawl bangin amah thukin a man dinga hong kuan ka hi uh hi,” ci-in a dawng uh hi.

11 Tua ciangin Judah pana mi tulthum Etam suangpi hawm ah paisuk uh a Samson kiangah, “Philistia-te in ei hong uk lam thei lo na hi hiam? Ko hong bangci bawl na hi hiam?” a ci uh hi.

Amah in, “Amaute kei hong bawlna uh a thuk lel ka hi hi,” ci-in a dawng hi.

12 Amaute in, “Nang hong hencipin Philistia-te tungah hong puak dinga hong kuan ka hi uh hi,” a ci uh hi.

Samson in, “Note in kei nong thah loh nadingun hong kiciam un,” a ci hi.

13 Amaute in, “Thukim ung, kote in hong henin amau tungah kong pia lel ding uh hi. Kong that kei ding uh hi,” ci-in a dawng uh hi. Tua ciangin khauzen thak nihin hen uh a, suangpi pan a paikhiatpih to uh hi. 14 Lehi a manawh laitakun Philistia-te in awngsa-in ama lam a manawh uh hi. TOPA Kha thahatna tawh ama tungah a tung hi. A bana khihna khau buhtu tawh kibang lel-a a khihnate a khut panin a kiakhia hi. 15 Amah in laa khaguh thak khat mu a, manin mi tulkhat a vatlum hi. ^d

16 Tua ciangin Samson in,

“Laa khaguh khatin
amaute a laa bangin ka bawl hi.
Laa khaguh khatin mi
tulkhat ka that hi,” a ci hi.

17 Tua teng a cih khit ciangin laa khaguh a lawnmang hi; tua mun Ramath Lehi b kici hi.

18 A dangtak mahmah a TOPA tungah kiko in, “Na nasempa gualzawhna lianpi nong piakhin hi. Tu-in dangtakin si tangial a, vun-at lohte khutah puk ding ka hi hiam?” a ci hi. 19 Tua ciangin Pasian in Lehi-a kuak sung mun khat hongin tua sung pan tui a phulkhia hi. Samson in a dawn ciangin a tha hat kik-a, a tha a dim kik hi. Tua ahi ciangin tua tuinak En Hakkore c kici-a tu dong Lehi ah a om lai hi. ^e

20 Philistia-te hun kum sawmnih sung Samson in Israel a makaih d hi.