Judg 19 | ZomZIV | STEP | Tua hun lai-in Israel in kumpi a nei kei hi. Tu-in Levi-te khat Ephraim mualtung gam gamlapi ah tengin Judah gam Behtlehem pan a zino ding khat a la hi.

Judges 19

Levi-pa le A Zino

1 Tua hun lai-in Israel in kumpi a nei kei hi.

Tu-in Levi-te khat Ephraim mualtung gam gamlapi ah tengin Judah gam Behtlehem pan a zino ding khat a la hi. 2 Ahi hangin tuanu ama tungah a muanhuai kei hi. Tuanu nawkik-a, Judah gam Behtlehem-a a pa innah a ciah kik hi. Tua lai-ah kha li a om khit ciangin 3 a ciah kik nading a zol dingin a pasal a va pai hi. Amah in a nasempa le laa nih a keng hi. Tuanu in amah a pa’ innah paipih-a, a pa in a muh ciangin lungtaitakin a muak hi. 4 A sungpa, numeino’ pa in a taam tadih dingun a kho hi; tua ciangin amah ni thum sung taam-a ne-in dawnin tua lai-ah a lum hi. ^a

5 A nili ni-in tho baih uh a, ciah dingin a kithawi uh hi; ahi hangin numei no’ pa in a makpa kiangah, “Bang khatpeuh ne photin kitawldamsak lai-un; tua khitteh na ciah na kei ding uh hiam,” a ci hi. 6 Tua ciangin amaute a nih un a ne a dawn dingin a tu uh hi. Tua khit ciangin numeino’ pa in, “Tu zan taam tadih unla nuamtakin om hithiat un,” a ci hi. 7 Tuateh mipa ciah dingin a dintoh ciangin a sungpa in amah zol a, tua zan a taam lai uh hi. 8 A ningana ni zingsang pai dinga a thawh ciangin numeino’ pa in, “Kitawldam-sak in. Nikai dong khawl lai un!” a ci hi. Tua ciangin amaute gel in an a ne khawm uh hi.

9 Tua ciangin mipa, a zino le a nasempa tawh pai dingin a din uh ciangin a sungpa, numeino’ pa in, “En un, nitak lua ta hi. Tu zan tam lai un; ni tum dekta hi. Tam unla nuamtakin om hithiat un. Zingciang zingtungin tho unla na inn lam uah ciah un,” a ci hi. 10 Ahi hangin zantam beh nuam nawn loin mipa dingkhia a Jebus (Jerusalem cihna) lam manawhin tutphah kivawhsa laate gel le a zino tawh a pai hi. ^b

11 Jebus kiang a tun uh ciangin ni tum dektaka a nasempa in a pu kiangah, “Hong pai un, hih Jebus-te khuapi ah tungin zantaam ni,” a ci hi.

12 A pu in, “Hi kei, namdangte khuapi ah tung kei ni a mite Israel-te hi lo hi. Gibeah a i paisuak ding hi,” ci-in a dawng hi. 13 Amah in, “Pai ni, Gibeah hiam Ramah hiam i tun mateng pai-in tua munte khat zawsangah giak ni,” a cih beh lai hi. 14 Tua ciangin paisuak uh a, Benjamin a Gibeah kiang a tun un ni tumta hi. 15 Tua lai-ah giak dingin a khawl uh hi. Amaute pai-in khuapi tual-awngah tu uh a ahi hangin a inn a tungsak dingin kuamah in a sam kei hi. ^c

16 Tua nitakin Gibeah a teng (tua muna omte Benjamin-te ahi hi) Ephraim mualtung gam pana pisal khat a lo pana vaiciah a tung hi. 17 Amah khuadaka khuapi tual-awng a zinte mu in, “Koi a pai ding na hi uh hiam? Koi pan hong pai na hi ua?” ci-in a dong hi.

18 Amah in, “Judah a Bethlehem panin khualzin kimlai ka hi uh a, ka tenna uh Ephraim mualtung gam nawl pek a zuan ka hi uh hi. Judah a Bethlehem a pai khin ka hi a, tu-in TOPA inn-a pai ding ka hi hi. Kuamah in a inn ah hong tungsak lo hi. 19 Ka laa an ding uh buhtu le gan-an ka nei uh a, na nasemte - kei le ka nasemnu le ka tonpih uh tangvalpa adingin anlum le zu ka nei uh hi. Bangmah ka kisam kei uh hi,” ci-in a dawng hi. ^d

20 Pisalpa in, “Ka inn ah hong tung un. Na kisap peuhpeuh uh kong pia ding hi. Zanin tual-awng ah giak kei tapeuh un,” a ci hi. 21 Tua ciangin a inn ah tungsaka a laate a vaksak hi. A khete uh a sil khit uh ciangin a ne a dawn uh hi.

22 Amaute a kigualnop suah laitakun khuapi sunga mi tatsia pawlkhatin a inn a um uh hi. A kongkhak tumtum uh a, inn nei pisalpa otsanin, “Na inn a hong tung mipa luppih nuam ung, hong pusuaksak in,” a ci uh hi.

23 Inn neipa a pua ah paikhia-in amaute kiangah, “Hi kei lawmte aw, ki-uangsak lua kei un. Hih mipa ka zin ahi nungsang hih bangin dai nadingin gamta kei un. 24 En un, hih ka tanu bitlai le ama zino a om hi. Tuate hong pusuaksak ning, zangin na ut bangbangun bawl un. Ahi zongin hih mipa tungah tua bang a daihuai-in gamta kei un,” a ci hi. ^e

25 Ahi hangin mite in a thu a ngai kei uh hi. Tua ciangin mipa in a zino amaute kiangah paikhiasaka, amaute in tuanu buanin zan thapai a khup a thalin a ututun hih uh a, khuavak ciangin a khah pan uh hi. 26 Khuavak ciangin numei a pu omna innah ciah kik-a, kongkhak ah tukin ni suah dong tua lai-ah a lum hi. ^f

27 Zingsang a pu a thawh ciangin inn kongkhak honga a khualzin ban zom dingin kong a kan leh inn kongka lai-ah a zino tukin luma sangkil tungah a khut a nga hi. 28 Amah in tuanu kiangah, “Tho ou; pai ni ei,” a ci hi. Ahi hangin a dawng kei hi. Tua ciangin mipa in a laa tungah pua-in a inn lam a zuan hi.

29 Inn a tun ciangin temta mana zino a phei a liangin semnen a, seh sawm le seh nih suah in Israel omna mun khempeuh ah a khak hi. 30 A mu peuhmah in, “Egypt-te pan Israel-te a paikhiat toh a kipan hih bang na kimu ngei loin a kigamta ngei kei hi. Ngaihsun dih un! Kikum dih un! Bang kicih ding hiam, hong gen un,” a ci uh hi. ^g