Leviticus 12
Nausuah Khita Kisiansuahna
1TOPA in Moses tungah, 2“Israel-te tungah: ‘Numei khat gai-a tapa a suah leh khasim a nin neih-a a sian loh bang tektekin ni sagih sung a siang loin kiseh hi. 3A nigiat ni-in pasalnote a vun ki-atsak ding hi. 4Tua ciangin numei in a sisan luanna pan a kisiansuah nadingin ni sawmthum le thum ngak tektek ding hi. Tuanu in a kisiansuahna ni a khen mateng a siangtho na khatpeuh lawng lo dinga, mun siangtho ah a pai kei ding hi. 5Amah in tanu mei a suah leh, a nin neih lai bangin nipi kal nih sung a siang lo hi ding hi. Tua ciangin a si luanna pan siansuah nadingin ni sawmguk le guk sung ngak pelmawh ding hi. a 6 “‘Tapa a nei a tanu a nei zongin a kisiansuahna ni a cin khit ciangin Kikhopna Puanbuk lutna-a siampipa kiangah meihal biakna dingin kum khat a pha tuuno khat le mawhna hanga biakna dingin kawlvakhu no ahikeh vakhu khat paipih ding hi. 7Amah in tuanu adingin TOPA tungah thoihdamna bawlsak dinga tua ciangin ama sisan luanna panin a siangin kiseh ding hi; hihte in ta numei ahikeh tapasal a suak numei adingin ngeinate ahi hi. 8 “‘Tuanu in tuuno a neih zawh kei leh vakhu nih ahikeh kawlvakhuno nih khat haltum biak nading, adang khat mawhna hanga biakna dingin a tawi ding hi. Hici bangin siampipa in tuanu adingin thoihdamna bawlsakin, tua ciangin amah a siang hi ding hi,’ ci in,” a ci hi. b
Copyright information for
ZomZIV