Lev 13 | ZomZIV | STEP | TOPA in Moses le Aaron tungah,

Leviticus 13

Kilawhthei Vunnatna tawh Kisai Ngeinate

1 TOPA in Moses le Aaron tungah, 2 “Mi khatpeuh in a vun tungah a kilawh thei vun natna ^{▼▼13.2 Tang ngeina-ah phak; Hebrew ah phak natna tektek hi tuan loin vun natna khat peuhpeuh cihna hi.Hih khenpi sunga khempeuh zong} a suak thei ding a bawk ahikeh a dulh ahikeh a kang liklek a neih leh amah siampipa Aaron ahikeh a tapate ^{▼▼13.2 Ahikeh a suante} siampite khat tungah a kipaipih pelmawh ding hi. 3 Siampipa in tua vuna meima veel dinga a meima munah mulkang a po-a, meima zong vun sang a thukzaw ^{▼▼13.3 Ahikeh a vun sangin a thuksuk zawk leh; hih khenpi sung khempeuh ah zong} ahilam a kilat leh tua in a kilawh thei vun natna khat ahi hi. Siampipa in a veel ciangin amah a siang loin kiseh hi, ci ding hi. 4 A vun meima kanga a vun sanga thukzaw dingin a kilata, a meima sunga mul a kan nai kei leh siampipa in tua cinapa ni sagih sung a tangkoih ding hi. 5 A ni sagih ni ciangin siampipa in amah veel dinga a meima kikhel tuan loin a vun ah zong masem tuan lo hi cih a muh leh adang ni sagih sung a tuamin ki-omsak lai ding hi. 6 A ni sagihna ni-in siampipa in veel kik dinga, a meima masem tuan loin a vuai leh siampipa in amah a siang hi, ci-in gen ding hi; tua pen a dulh mawkmawk ahi hi. Mipa in a puansilhte sawp pelmawh dinga tua ciangin amah a siang ding hi. 7 Ahi hangin amah siampipa tungah kilak a, amah a siang hi, ci-a a kipulak khitin tua a dulh pen a vun tungah a masem leh siampipa tungah pelloin a kilak kik ding hi. 8 Siampipa in amah vel dinga a dulh in a vun tungah ma a sem leh amah siang lo hi, ci-in pulak ding hi; tua in a kilawh thei natna khat ahi hi.

9 “Mi khatpeuh in a kilawh thei vun natna a vei leh siampipa kiangah kipuak pelmawh ding hi. 10 Siampipa in amah veel dinga a vun sungah kangin bawka a multe a kan khita a bawk sungah mathak a om leh, 11 tua pen vun natna kumlui hi a, siampipa in amah siang lo hi, ci-in a pulak ding hi. Amah a siang losa ahi manin tuam omsak kul lo hi. ^d

12 “Tua natna a vuntung khempeuh ah a kilawh khit leh siampipa muhna ciangah cinapa a luzang pan a khepek donga vun khempeuh a tuam khit leh, 13 siampipa in amah veel dinga natna in a pumtuam khin ahileh tua mipa a siang hi, ci-in pulak ding hi. Amah a pumtangin kangkhin ahi nungsang a siang ahi hi. 14 Ahi hangin ama tungah mathak a kilat peuhpeuh ciangin amah a siang lo ahi ding hi. 15 Siampipa in mathak a muh ciangin amah a siang lo ahi hi; amah a kilawh thei natna vei ahi hi. 16 Tua a mathak pen kikhelin a kan leh pel loin siampipa kiangah pai ding hi. 17 Siampipa in amah veel dinga, a meima kikhelin a kan leh siampipa in meima vei pen a siang hi, ci-in a pulak ding hi; tua ciangin amah a siang hi ding hi. ^e

18 “Mi khatpeuh in vun tungah meimatum vei-in a dama, 19 a meima-tum veina mun bawkin kanga, ahikeh a sankang a suah leh amah siampipa tungah va kilak ding hi. 20 Siampipa in veelsak dinga, vun sahna sanga thukzaw-in, a kilat a, tua sunga a mul a kan khit leh siampipa in amah a siang loin pulak ding hi. Meimatum a omna munah a kitap khit leh a kilawh thei vun natna khat ahi hi. 21 Ahi hangin siampipa in veelsaka, a sungah mulkang po loin vunsahna sangin thukzaw lo-a, a vuai leh siampipa in amah a tuamin ni sagih sung koih ding hi. 22 A vun tung dang a lawh leh siampipa in, amah a siang lo ahi hi, ci-in pulak ding hi; tua pen a kilawh thei ahi hi. 23 Ahi hangin masem tuan lo-a, a mundang a lawh tuan kei leh tua in meimatum pawn hi lel a, siampipa in amah a siang hi, ci-in pulak ding hi.

24 “Mi khatpeuh mei kanga, a katna mathak vun tungah a sankang ahikeh akang liklek a om leh, 25 siampipa in tua mun etsak dinga, a sunga a multe kang khina, vun sahna sangin thukzaw dinga a kilat leh tua pen meikatna pana kipankhia a kilawh thei natna ahi hi. Siampipa in amah a siang lo ahi hi, ci-in pulak ding hi; tua in a kilawh thei vun natna khat ahi hi. 26 Ahi hangin siampipa in a veelsaka a ma-ah a mulkang om loin vun sahna sangin thukzaw lo-a a vuai lel ahileh siampipa in amah ni sagih sung tuam omsak ding hi. 27 A ni sagih ni ciangin siampipa in amah veel kik dinga, a vun dang a lawh leh siampipa in amah a siang lo hi, ci-in pulak ding hi; tua in a kilawh thei vunnatna khat ahi hi. 28 Bangbang ahi zongin masem tuan lo-a, a vun tungtham a lawh tuan kei leh a dulh lel hi-in a katna pana bawk ahileh siampipa in amah a siangin pulak ding hi; tua pen a katna pana meima pawn lel ahi hi. ^f

29 “Numei ahikeh pasal khat in a lutang ahikeh a kha ah meima a neih leh 30 siampipa in a meima veelsak dinga vun sahna sangin thukzaw dingin a kilat-a, a sunga a mul ngatin a naipak mel ahileh siampipa in tua mipa a siang loin pulak ding hi; tua lutang ahikeh kha-a a kilawh thei cithak natna khat ahi hi. 31 Ahi hangin siampipa in hih meima namte a veel ciangin vun sahna zah sangin a thukzaw lo ding tawh a kibata, a sungah mulvom a om kei leh siampipa in tua natna nei pen ni sagih sung a tuamin omsak ding hi. 32 A ni sagih ni-in siampipa in meima veelsak dinga, a thak pen in a mundang lawh tuan loin a sungah a mul-naipak a om kei a, vun sahna sangin thukzaw dingin a kilat kei leh 33 tuapa in a natna mun teng lobuang a mul met dinga siampipa in adang ni sagih a tuamin kem lai ding hi. 34 A ni sagihna ni-in siampipa in a cithak veel dinga a vun dang lawh loin vun sahna sangin thukzaw dinga a kilat leh siampipa in amah a siangin pulak ding hi. Amah in a puansilhte sawp pelmawh dinga tua ciangin amah a siang hi ding hi. 35 Ahi hangin amah siang hi, ci-a a kipulak khitin a ci thakna in a vun sungah ma a seem leh 36 siampipa in amah veel dinga a cithakna in a vun sung a lawh khit leh siampipa in a mul naipak a zon ding kisam nawn lo hi; tua mipa a siang lo ahi hi. 37 Bangbang ahi zongin kikhelna om lo-a, a sungah mulvom po zo hi, ci-a a khentel leh tua cithak a dam khin ahi hi. Amah a siang hi a, siampipa in amah a siangin pulak ding hi.

38 “Numei khat ahikeh pasal khatin a vun tungah cikang khat a neih ciangin 39 siampipa in tuate veel dinga, tua mun a kang milmial ahileh, tua pen a lauhuai lo vuntung puakkhamin adulh hi-a, tua mi a siang ahi hi.

40 “Pasal khat a sam pulhin a lu a tol leh amah a siang ahi hi. 41 Amah a luzang a sam pulh-a, a tal a kolh leh amah a siang hi. 42 Ahi hangin a lu kolh-a, ahikeh a taltangah sakang meima a vei leh tua pen a lutung ahikeh a taltanga pokhia a kilawh thei natna ahi hi. 43 Siampipa in amah veel dinga a lutang ahikeh a taltanga meima bawk pen a kilawh thei vun natna tawh kibangin a sankangin a om leh, 44 tua mi natna vei hi-a, a siang lo ahi hi. A lutanga meima hangin siampipa in a siang loin pulak ding hi. ^g

45 “Tua bang a kilawh thei natna a nei mi-in pel loin puansia silh dinga a sam hiatmam ^{▼▼13.45 Ahikeh puanin a lu a khuh kei ding hi.} loin, a maitang a nuailam tuamin, ‘Siang lo! Siang lo!’ ci-in a kiko ding hi. 46 Tua bang natna a vei sung teng amah a siang lo ahi hi. Pel loin amah kia om dinga giahphual pualamah a teng ding hi.

Ap Thu-a Ngeinate

47 “Puansilh khatpeuh ap in a siatsak leh - samul puan ahikeh saihadial puan khatpeuh, 48 khau tawh ahikeh samul tawh a kigan ahikeh a kiphan khatpeuh, savun tawh ahikeh savun ahikeh savun tawh a kibawl na khatpeuh - 49 le puansilh ahikeh savun, ahikeh a kigan ahikeh a kiphan nate, ahikeh savun tawh kibawl na khatpeuh a mel eng pian ahikeh san pianin a ap leh pel loin siampipa kilak ding hi. 50 Siampipa in tua ap veel dinga tua a ap na pen ni sagih sung tang koih ding hi. 51 A ni sagihna ni-in tua na veel kik dinga, a ap pen in a puansilh ahikeh a kigan ahikeh a kiphan, ahikeh na-a kizang savun pen mundang a lawh leh tua pen a siahuai ap hi a, tua na a siang lo ahi hi. 52 Amah in tua puansilh ahikeh samul tawh ahikeh khau tawh a kigan ahikeh a kiphan na, ahikeh savun kibawl na khatpeuh gial in a sep peuhmah haltum ding hi; bang hang hiam cih leh tua ap pen a siahuai thei hi-a, tua na haltum ding ahi hi. ⁱ

53 “Ahi hangin siampipa in a veel ciangin tua ap pen puansilh ahikeh a kigan ahikeh a kiphan ahikeh savuna kibawl na a tung daang a lawh kei leh, 54 amah in tua gial in a sep na pen sawpsak ding hi. Tua ciangin amah in adang ni sagih sung tang koih lai ding hi. 55 Tua na a apna mun a kisawp khit ciangin, siampipa in veel dinga, tua ap in a mel a khek tuan keileh a mundang a lawh loh hangin a siang lo ahi hi. A ap in pang khat ahikeh adang khat a siatsak loh hangin mei-in hal un. 56 Siampipa in tua na a veel ciangin tua na a kisawp khit nungin a apte a vul leh, puansilh ahikeh savun ahikeh a kigan ahikeh a kiphan na a siatna mun teng eukhia ding hi. 57 Ahi hangin tua pen puansilh tung ahikeh a kigan ahikeh a kiphan na ahikeh savun kibawl na tungah a mundang ah a kilat kik leh tua banga a ap van peuhmah mei-a hal ding ahi hi. 58 Tua puansilh ahikeh a kigan ahikeh a kiphan na, ahikeh savun kibawl na khatpeuh a kisawpsa pen a ap nawn kei leh pel loin kisawp kik dinga tua ciangin a siang hi ding hi,” a ci hi.

59 Hihte in samul puan ahikeh patpuan a kigan ahikeh a kiphan na, ahikeh savun kibawl na khatpeuh a apna hanga gial in a sepna tawh kisai a siang le a siang lo pulak nading ngeinate ahi hi.