Lev 18 | ZomZIV | STEP | TOPA in Moses tungah,

Leviticus 18

Ngeina Lo Kiluppihna

1 TOPA in Moses tungah, 2 “Israel-te hopih inla amaute tungah: Keimah TOPA note Pasian ka hi hi. 3 Na ten ngeina uh Egypt a amaute gamtat bangin na gamta peuhmah kei ding uh a, note kong piak nading mun Canaan gama amaute gamtat bangin na gamta peuhmah kei ding uh hi. Amaute gamtatna zui kei un. 4 Ka thukhamte na zui pelmawh ding uh a, ka thukipsa na zuihna-uah na kidawm ding uh hi. Keimah TOPA note Pasian ka hi hi. 5 Ka thukipte le ka thukhamte zui un; ahang in, tuate a zui mi tuate bangin a nungta ding hi. Keimah TOPA ka hi hi.

6 “‘Kuamah in a kinaipih tanaute luppih dingin a naih kei ding hi. Keimah TOPA ka hi hi.

7 “‘Na nu na luppihna hangin na pa selpho kei in. Amah na nu ahi hi; amah luppih kei in.

8 “‘Na pa zi luppih kei in; tua in na pa a selpho ding hi. ^a

9 “‘Inn khat sunga suak ahi a, mundang khata suak ahi zongin na pa tanu ahikeh na nu tanu, na sanggam numeite luppih kei in.

10 “‘Na tapate tanu ahikeh na tanute tanu luppih kei in; tua in nang hong selpho ding hi.

11 “‘Na pa suan - na pa zi’ tanu, luppih kei in amah na sanggamnu ahi hi.

12 “‘Na pa sanggamnu luppih kei in; amah na pa tanau mahmah ahi hi.

13 “‘Na nu sanggam nu luppih kei in; bang hang hiam cihleh amah na nu kinaipih mahmah ahi hi.

14 “‘Ama zi na mawhpih sawmna hangin na pa sanggampa selpho kei in; amah na innlak nu ahi hi. ^b

15 “‘Na monu luppih kei in. Amah na tapa zi ahi hi; amah luppih kei in. ^c

16 “‘Na sanggampa zi luppih kei in; tua in na sanggampa selpho ding hi.

17 “‘Nuta khat a tanu tawh luppih khawm kei in. Numei khat a tapa tanu ahikeh a tanu’ tanu tawh luppih khawm kei in; amaute a kinai mahmah a kitanau ahi hi. Tua pen kheltatna ahi hi. ^d

18 “‘Na zi a nuntak lai-in a sanggamnu na zino dingin la-in amah luppih kei in.

19 “‘Numei khat a khasim nin neih huna a sian loh hunin luppih dingin naih kei in. ^e

20 “‘Na vengpa zi luppihna tawh nang le nang kibuahsak kei in. ^f

21 “‘Molech thoihna-a piak ^{▼▼18.21 Ahikeh mei-a khul dingin} dingin na tate khat beek pia kei in, ahang in na Pasian min na daisak peuhmah kei ding hi. Kei mah TOPA ka hi hi.

22 “‘Numei luppih bangin pasal luppih kei in; a kihhuai ahi hi. ^h

23 “‘Ganhing khatpeuh luppihna tawh nang le nang kibuahsak kei in. Numei khatpeuh ganhing luppih dingin kipia kei hen; tua pen lehtatna ahi hi. ⁱ

24 “‘Hihte khatpeuh in nang le nang kibuahsak kei in, bang hang hiam cih leh hihte a note na kibuahsak ma-ua ka nawhkhiat ding namte kibuahsak-na hici bangte mah ahi hi. 25 A leitang nangawn a buah hi; tua ahi manin tua mawhna hangin dan ka pia a, tua leitang in a tunga teng mite a luakhia hi. 26 Ahi hangin note in ka thukham le ka thukipte na zui pelmawh ding uh hi. A tualsuakte le no laka teng pemtate in a kihhuai hih nate na hih peuhmah kei ding uh hi; 27 ahang in, na mai-ua leitanga tengte in hih nate khempeuh hih uh a, a leitang a buah hi. 28 Tua hi-a note in a leitang na buahsak uh leh note mai-a om minamte a luakkhiat bangin note hong luakhia ding hi. ^j

29 “‘Hih a kihhuai nate a hih peuhmah - tua banga gamtate pel lo in a mipihte panin kikhenkhia ding hi. 30 Keima deihna zui unla nong pai ma-ua a kihhuai na gamtatna ngeinate uh zui loin tuate tawh no le no kibuahsak kei un. Keimah TOPA note Pasian ka hi hi, ci hi,’ ci in,” a ci hi. ^k