Mar 1 | ZomZIV | STEP | Pasian Tapa Jesu Christ tawh kisai lungdamna-thu a kipatna.

Mark 1

Baptize-pa John in Lampi Sialkhol

1 Pasian Tapa ^{▼▼1.1 Khutgelh pawlkhat in Pasian Tapa cih nei lo} Jesu Christ tawh kisai lungdamna-thu a kipatna.

2 Kamsangpa Isaiah lai sungah:

“Na lampi a sialkhol dingin,
ka thupuakpa na mai-ah ka sawl ding hi,” ^{▼▼1.2 Mal. 3:1}
3 “Gamlak-a kikopa aw in
‘Topa ading lampi sialkhol unla,
ama lampi na tangsak un,’” ^{▼▼1.3 Isa. 40:3} ci-in kigelh hi. ^d

4 Tua bangin John in sehnel-gam kual sungah baptise in mawhnate maisak nading kisikna tawh kisai baptisena thu hilh in a pai hi. 5 Judea gam sung teng le Jerusalem a mite khempeuh ama kiangah a pai uh hi. A mawhnate uh pulak uh a, amah in Jordan Gun sungah a baptise hi. 6 John in kala-oh mul tawh kibawl puan silhin savun kawnggak a gak hi. Kauphe le gamlak khuaizu an in a nei hi. 7 Ama thupuak hih ahi hi: “Ka nungah kei sanga vanglianzaw khat hong pai ding hi. Kun in ama khedap khaute sut ding nangawnin ka kilawm kei hi. 8 Kei in note tui in ^{▼▼1.8 Ahikeh a sung} kong baptize hi. Ahi hangin amah in note Khasiangtho in hong baptize ding hi.” ^f

Jesu Kibaptisena le Kizia-etna

9 Tua hunin Galilee gam Nazareth panin Jesu pai-a, Jordan gun sungah John a kibaptisesak hi. 10 Tui lakpanin Jesu a paikhiat toh laitakin van kihong a, ama tungah vakhu bangin Kha a kumsuk a mu hi. 11 Tua laitakin vantung panin aw khat ginga, “Nang, ka it ka Tapa na hi hi; nang tungah ka lungkim mahmah hi,” a ci hi. ^g

12 Thakhatin Kha in amah sehnelgamah sawlpah a, 13 Satan zia-etna thuakin ni sawmli sung a om hi. Gamsate tawh amah omkhawm a, vansawltakte in a don uh hi. ^h

Nungzui Masate Sapna

14 John thong a kiat khit ciangin Pasian lungdamna thuthak tangko in Galilee gam sungah Jesu va pai hi. 15 Amah in, “A hun hong tung zo hi. Pasian gam hong nai ta hi. Kisik unla thupha um un!” a ci hi. ⁱ

16 Galilee Tuipi gei-a Jesu a pai laitakin nga beng mi ahi Simon le a sanggampa Andrew-te in tui sungah len a khuh laitak uh a mu hi. 17 Jesu in, “Hong pai unla kei hong zui un. Mi a mante kong suaksak ding hi,” a ci hi. 18 Amau zong a lente uh nusia pah in amah a zui uh hi. ^j

19 Tua pan tawmkha a pai lai leh Zebedee tapa James le a sanggampa John, a lente uh puaha gunkuang sunga om a mu hi. 20 Amah in amaute sampah a, amau zong a pa uh Zebedee le sumthalawhte gunkuang sungah nusia-in amah a zui uh hi.

Jesu in Kha gilo khat Hawlkhia

21 Amaute Capernaum ah pai uh a, Sabbath ni a tun ciangin synagogue ah Jesu lutin thuhilh a kipan hi. 22 Thukham siate bang hi loin thuneipa khat bangin a hilh manin mite in a thuhilh zia lamdang a sa mahmah uh hi. 23 Tua laitakin synagogue sungah kha gilo ^{▼▼1.23 Greek ah nin; tg. 26 le 27 ah zong} a lut mi khat in, 24 “Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hiam cih kong thei hi - Pasian Mi Siangtho na hi hi!” ci-in a kiko hi.

25 Jesu in khauhtakin, “Pau ken! Ama sung pan paikhia in!” a ci hi. 26 Kha gilo in tua mipa a pumlinsak gawp khit ciangin kiko zekzak kawmin a paikhia hi. ^l

27 Mite in lamdang sa mahmah uh a, “Hih in bang ahi hiam? Thuneihna tawh thuhilhna thak khat hilh mawk! Kha gilote thu a piak ciang nangawnin amaute in a mang tazen uh hi,” ci-in khat le khat a kidong uh hi. 28 Galilee kual bupah ama thu a kizel khinpah hi. ^m

Jesu in Tampi Damsak

29 Synagogue pan amaute a paikhiat khit phetun James le John tawh Simon le Andrew-te innah a hawh uh hi. 30 Simon sungnu nattun a lupna-a lum ahilam amaute in Jesu kiangah a gen uh hi. 31 Tua ciangin ama kiangah Jesu pai-a, a khut lenin a phongto hi. A nattun dam a, amaute a zindo hi. ⁿ

32 Tua nitak, ni a tum khit ciangin mite in cinate le dawilutte khempeuh Jesu kiangah a puak uh hi. 33 Khuazangpi in kongkhak kiangah kikhawm uh a, 34 natna tuamtuam a vei mi tampi Jesu in a damsak hi. Amah in dawi tampi zong hawlkhia a, tua dawite in amah kua hiam cih thei uh ahi manin Jesu in amaute pau ding a phal kei hi. ^o

Gamdaihna Munah Jesu in Thu Ngen

35 Zingkhangpi phalvak ma-in Jesu tho a, tua inn panin gamdaihna munah pai-in tua lai-ah thu a ngen hi. 36 Simon le a pawlte amah zong dingin a pai uh hi. 37 Amah a muh uh ciangin, “Mi khempeuh in nang hong zong uh hi lo hiam!” ci-in a ko uh hi.

38 Jesu in, “Thu hilh dinga hong pai ka hi manin hih khuate khatpeuhah thuhilh dingin paikhia ni” a ci hi. 39 Tua ciangin amah Galilee gam sung tengah zin kawikawi a, synagogue-te ah thu hilhin dawite a hawlkhia hi. ^p

Miphak Khat

40 Miphak ^{▼▼1.40 Greek in phak bek genna hi lo - vunnatna nam tuamtuamte zong genna} khat a kiangah va pai a, khukdinin, “Ut peuh lecin nong siangsak thei hi,” ci-in a thum hi.

41 Khuatuahna tawh Jesu kidimin, a khut zana, tuapa lawngin, “Ka ut hi. Siang ta in!” a ci hi. 42 Tua khit phetin a phak natna in amah nusia-a, a damsiang hi.

43 Jesu in vauhilhna khauh tawh amah sawlkhiapah a, 44 “Hih thu kuamah hilh peuhmah kei in. Ahi hangin pai inla siampipa kiangah va kilak in; amaute tungah teci pang na suah nadingin na sian nading a Moses thupiak biakpiakna na pia in,” a ci hi. 45 Tuapa in tua banga a hih sangsikin paikhia-a genthang in tua thu a kizelsak hi. Tua hangin khuapi sungah Jesu a langtangin lut thei nawn lo-a, a pualam kuama om lohna munmun ah a om kawikawi hi. Tua hi napi mun khempeuh panin mihonte ama kiangah a pai veve uh hi. ^r