Mar 10 | ZomZIV | STEP | Tua ciangin Jesu tua mun nusia in Jordan gal khat lam Judea kualah a pai hi. Ama kiangah mihonte va pai leuleu uh a, a hih ngei bangin amaute thu a hilh hi.

Mark 10

Kimakna

1 Tua ciangin Jesu tua mun nusia in Jordan gal khat lam Judea kualah a pai hi. Ama kiangah mihonte va pai leuleu uh a, a hih ngei bangin amaute thu a hilh hi. ^a

2 Pharisee-te pawlkhat va pai uh a, a zia-etna un, “Mikhat in zi a mak ding thukham tawh a kituak hiam?” ci-in a dong uh hi.

3 Amah in, “Moses in note bang thu hong pia ahi hiam?” ci-in a dawng hi.

4 Amaute in, “Mi khatin a zi a makna lai pia-a, a zi a nawkiksak theih nading Moses in a phal hi,” a ci uh hi.

5 Jesu in, “Na lungtang uh khauh lua ahi manin Moses in hih thukham note adingin a gelh ahi hi. 6 Ahi hangin Pasian in na khempeuh a piansak cilin amaute ‘numei le pasal-in a bawl hi.’ ^{▼▼10.6 Pc. 1:27} 7 ‘Hih thu hangin pasal in a nu a pa nusia-in a zi tawh kigawm dinga, ^{▼▼10.7 Khutgelh masa pawlkhatah a zi tawh kigawm ding hi cih om lo hi} 8 amaute gel sakhat a suak ding uh hi.’ ^{▼▼10.8 Pc. 2:24} Tua ahi ciangin amaute nih hi nawn loin khat ahi hi. 9 Tua ahi manin Pasian gawmsate mihing in khen kei ta hen,” a ci hi.

10 Amaute inn sungah a om kik uh ciangin, nungzuite in hih thu Jesu a dong uh hi. 11 Amah in, “Ama zi ma-a, numei dang khat a tenpih peuhmah a zi angkawmsan ahi hi. 12 Tua ciangin numei khat in a pasal ma-a pasal dang khat a tenpih leh tua numei angkawm a suak hi,” ci-in a dawng hi. ^e

Naupangnote le Jesu

13 Jesu lawn dingin mipite in nau pangnote ama kiangah a paipih uh leh, nungzuite in amaute a na tai uh hi. 14 Jesu in a muh ciangin a lungkim kei hi. Amah in amaute kiangah, “Naupangnote ka kiangah hong paisak un, amaute dal kei un. Ahang in, Pasian gam i cih hih bangte aa ahi hi. 15 Thutak kong geninah, naupangno banga Pasian gam a sang lo peuhmah, tua sungah a lut ngei kei ding hi,” a ci hi. 16 Tua ciangin amah in naupangnote a khutin tawi-a, a tunguah a khutte nga in amaute thupha a pia hi.

A Hau Khangnopa

17 Jesu a paikhiat laitakin ama kiangah mi khat va tai-a, a mai ah khukdinin, “A hoih siapa aw, nuntak tawntungna ka luah nadingin bang ka hih ding kul hiam?” ci-in a dong hi. ^f

18 Jesu in, “Bang hangin kei hoih hong ci na hi hiam? Pasian bek longal mi hoih khat beek a om kei hi. 19 ‘Tual that kei in, ang kawm kei in, gu kei in, zuau teci pang kei in, khem kei in, na nu na pa pahtawi in,’ ^{▼▼10.19 Pk. 20:12-16; Tp. 5:16-20} kici thupiakte na theihsa ahi hi,” ci-in a dawng hi. ^h

20 Tuapa in, “Sia aw, tuate khempeuh ka neu tunga kipan ka zuihsa ahi hi,” a ci hi. ⁱ

21 Jesu in amah enin it a, “Na khat na kisam lai hi. Pai-in, na neihsa khempeuh zuak inla mizawngte pia in. Tua hileh vantungah gou na nei ding hi. Tua khit ciangin hong pai inla kei hong zui in,” a ci hi. ^j

22 Hih thu hangin tuapa a mai a mual hi. Amah hau mahmah ahi manin lungsi dedu in a paikhia hi.

23 Jesu in a kim teng en kawikawi a, a nungzuite kiangah, “A haute Pasian gam a lut nading haksa na zen e!” a ci hi. ^k

24 Nungzuite in Jesu thugente lamdang a sa mahmah uh hi. Ahi hangin Jesu in, “Tate aw, Pasian gam lut nading haksa mahmah si! ^{▼▼10.24 Khutgelh pawlkhatah hauhna a muangte ading} 25 Mihau khat Pasian gam a lut ding sangin phim bilvang ah kala-oh thawl ding a baihzaw hi,” a ci hi. ^m

26 Nungzuite in lamdang sa semsem uh a, “Tua hileh kua kihonkhia thei peuhmah ding hiam?” ci-in khat le khat a kikum uh hi.

27 Jesu in amaute en a, “Mihing adingin ahi thei lo mah ahi hi; ahi hangin Pasian adingin tua bang hi lo hi. Pasian adingin na khempeuh hi thei hi,” a ci hi.

28 Peter in ama kiangah, “Kote in na khempeuh nusia in nang kong zui uh hi,” a ci hi.

29 Jesu in “Thutak kong geninah, keima hang le lungdamna-thu hangin a inn, a sanggampate, a sanggamnute, a nu, a pa, a tate le a lote a nusia peuhmah in, 30 tu khanghunin a zah zakhat (innte, sanggampate, sanggamnute, nute, tate le lote—tuate tawh bawlsiatnate) le hong tung ding khanghunin nuntak tawntungna a ngah ding a kipelh kei ding hi. 31 Ahi hangin a masate tampi nunung ding uh a, a nunungte a masa ding uh hi,” ci-in a dawng hi.

Jesu in a Sih ding Genkhol Leuleu

32 Jesu mapi in amaute Jerusalem manawhin a pai laitakun nungzuite in lamdang vat sa uh a, amau zuite ahileh a lau uh hi. Amah in Sawm-le-nihte paipih tuamin ama tunga piang dingte a hilh hi. 33 Amah in, “Jerusalem dong i pai dinga, siampi makaite le thukham siate tungah Mihing Tapa a kilehhek ding hi. Amaute in amah thah dingin mawhpaih ding uh a, Gentile-te khut ah amah piakhia ding uh hi. 34 Amaute in amah zahko-in, cilphih in, satin, a that ding uh hi. Tua zawh ni thum ciangin amah a tho kik ding hi,” a ci hi. ⁿ

James le John-te Deihngetna

35 Tua ciangin Zebedee tapate James le John a kiangah va pai uh hi. Amaute in, “Sia aw, kong nget peuhpeuh uh hong hihsak dingin kong deih uh hi,” a ci uh hi. ^o

36 Amah in, “Bang hong hihsak leng na deih uh hiam?” ci-in a dong hi.

37 Amaute in, “Na minthanna na ngah ciangin kote gel na taklam khat na veilam khat hong tusak in,” ci-in a dawng hi. ^p

38 Jesu in, “Nong nget uh na thei kei uh hi. Ka dawn ding hai dawn thei ding na hi uh hiam? Ahikeh kei kibaptise nading baptisena ah na kibaptise thei ding uh hiam?” a ci hi. ^q

39 Amaute in, “Ka hih thei ding uh hi,” ci-in a dawng uh hi. Jesu in amaute kiangah, “Ka dawn ding hai na dawn takpi ding uh a, kei kibaptisena tua kibaptisena ah na kibaptise takpi ding uh hi. 40 Ahi hangin ka taklam ahikeh ka veilam a tu ding kei hong piak theih hi lo hi. Tua munte ah a tu dinga a kiseh kholsa mite bek tu ding uh hi,” a ci hi. ^r

41 Nungzui sawmte in hih thu a zak uh ciangin James le John tungah a lungkim kei uh hi. 42 Jesu in amaute samkhawm a, “Gentile-te tungah gam-uka kingaihsunte, amau tungah kiliansak uh a, a uliante uh amau tungah kithuneisak uh hi, cih na thei uh hi. 43 Note tua bang na hi kei uh hi. Tua bang na hi sangsik-un note lakah a lian nuam peuhmah na nasem uh suakin, 44 a masa pen ahi nuam peuh, mi khempeuh sila ahi pelmawh kul hi. 45 Ahang in, Mihing Tapa nangawn ama na midangte a semsak ding hi loin, midangte na a sem ding le mi tampi tat nadingin ama nuntakna pia dinga hong pai ahi hi,” a ci hi. ^s

Mittaw Bartimaeus in Khuamu

46 Tua ciangin amaute Jericho a tung uh hi. Jesu le a nungzuite in mihon tampi tawh tua khuapi a nusiat laitakun mittaw khat Bartimaeus (tua pen, Timaeus Tapa) khut dawh-a ngenin lam gei ah a na tu hi. 47 Amah in Nazareth mi Jesu ahi lam a zak ciangin, “David Tapa Jesu aw, kei hong lainat in,” ci-in a kiko hi. ^t

48 Mi tampi in amah tai uh a, daitaka a om nadingin a gen uh hi. Ahi hangin tuapa in, “David Tapa aw, kei hong lainat in!” ci-in a kiko semsem hi.

49 Jesu khawl a, “Amah sam un,” a ci hi. Tua ciangin amaute in mittawpa kiangah, “Lung nuam in! Ding in! Amah in nang hong sam hi,” ci-in a sam uh hi. 50 Amah in a puantualpi paikhia pahin dingto-a Jesu kiangah a pai hi.

51 Jesu in, “Bang kong hihsak ding deih na hi hiam?” ci-in amah a dong hi.

Tua mittawpa in, “Rabbi aw, khua ka mu thei nuam hi,” a ci hi.

52 Jesu in, “Pai ta in, na upna in nang hong damsak zo hi,” a ci hi. Tua khit phetin amah in khua mu thei pah lian a, lampi ah Jesu a zui hi.