Mar 15 | ZomZIV | STEP | Zingsang phalvak tungin siampi makaite in upate, thukham siate le Sanhedrin buppi tawh thukhensatna a bawl uh hi. Amaute in Jesu henin paikhiatpih uh a, Pilate khutah a tun uh hi.

Mark 15

Pilate Mai-ah Jesu

1 Zingsang phalvak tungin siampi makaite in upate, thukham siate le Sanhedrin buppi tawh thukhensatna a bawl uh hi. Amaute in Jesu henin paikhiatpih uh a, Pilate khutah a tun uh hi.

2 Pilate in, “Nang Jew-te kumpipa na hi hiam?” ci-in a dong hi.

Jesu in, “Ka hi hi, na cih bang ahi hi,” ci-in a dawng hi.

3 Siampi makaite in amah thu tampi tawh a mawhmat uh hi. 4 Tua ahi ciangin Pilate in, “Amaute in nang thu tampi tawh hong mawhmat uh na thei hi. Dawng lo ding na hi hiam?” ci-in a dong hi.

5 Ahi hangin Jesu in dawng tuan lo lailai ahi ciangin Pilate in lamdang a sa mahmah hi. ^a

6 Tua hun lai-in pawi hun ciangin mipite nget thongkia khatpeuh a khahkhiat ding ngeina ahi hi. 7 Kumpi langdo-a, tualthatte tawh thong kiakhawm Barabbas kici mi khat a om hi. 8 Pilate kiangah mihonpite va pai uh a, a hih ngei banga a hih nadingin a ngen uh hi.

9 Pilate in, “Jew-te kumpipa no kiangah hong khah leng na deih uh hiam?” ci-in a dong hi. 10 Tua pen siampi makaite in Jesu a hazat manun ama khutah a tut uh ahilam a theih man ahi hi. 11 Ahi hangin Pilate in Barabbas a khahsak zawk nadingin siampi makaite in mihonpite a tawsawn uh hi. ^b

12 Pilate in, “Tua ahileh Jew-te kumpipa na cih pa uh bang ka cih ding hiam?” ci-in a dong hi.

13 Amaute in, “Kilhlum in,” ci-in a kiko uh hi.

14 Pilate in, “Bang hangin maw? Amah in bang tatkhialhna nei ahi hiam?” ci-in a dong hi.

Ahi hangin amaute in, “Amah kilhlum in!” ci-in a kinak ko semsem uh hi.

15 Pilate in mihonpite a lungkimsak nop manin amaute kiangah Barabbas a khah hi. Amah in Jesu a satsak khit ciangin kilhlup dingin amaute khutah a ap hi. ^c

Galkapte in Jesu Zahko

16 Galkapte in Jesu kumpi inn (tua pen gam-ukpa innpi) ah paipih uh a, tua ciangin galkap company bup khat a sam uh hi. 17 Tua ciangin amaute in kumpi puan dupsan khat silhsak uh a, ling tawh kumpi lukhu khat phanin amah a khusak uh hi. 18 Tua ciangin amaute in, “Jew-te kumpipa aw, na khan sawt ta hen!” ci-in a otkhai uh hi. 19 Amaute in ciangkhutin a lu satsat uh a, cil a phihphih uh hi. Amaute khuk dinin amah a bia uh hi. 20 Amah a zahko khit uh ciangin kumpi puan dupsan suahkhiatsak uh a, ama puan a silhsak kik uh hi. Tua khit ciangin kilhlup dingin a paikhiatpih uh hi. ^d

Kilhlupna

21 Alexander le Rufus-te pa, Cyrene pana Simon kici mi khat in gamsung panin tua lai a va tawn hi. Amaute in zawhthawh thu-in amah singlamteh a puasak uh hi. 22 Amaute in Golgotha (Luguh Mun cihna) kici munah Jesu a paipih uh hi. 23 Tua ciangin amaute in amah, paknamtui kha tawh kihel lenggahzu a pia uh hi. Ahi hangin a dawn kei hi. 24 Amaute in singlamteh tungah amah a kilh uh hi. Amaute in a puan hawm uh a, kua in koi tang ding cihna-in ai a lawn uh hi. ^e

25 Amaute in amah a kilh laitakun nai thumna a sat hi. 26 Amah kimawhmatna-in JEW-TE KUMPIPA, ci-in theihsakna lai kigelh hi. 27 Amaute in amah tawh, misuamte nih a taklam khat, a veilam khat kilh uh a, 28 tua ciangin Laisiangtho gen: “Thukham palsatte tawh amah kisimkhawm hi” cih thu a tangtung hi. ^{▼▼15.28 Khutgelh pawlkhatah tg.28 (Isa. 53:12) om lo hi} 29 Tua lai a tawnte in amah engko in lupeisan uh a, “Petmah aw! Nang, biakinnpi susia a ni thum sunga lam kik ding pa, 30 singlamteh tung pan hong kumsuk inla, nang le nang hong kihon khia dih ve!” a ci uh hi.

31 Tua mah bangin siampi makaite le thukham siate in amaute lakah amah a zahko uh hi. Amaute in, “Amah in midangte honkhia zo a, amah le amah kihonkhia zo lo pi! 32 I mitin mu a i up theih nadingin hih Israel-te kumpipa, hih Christ ^{▼▼15.32 Ahikeh Messiah} singlamteh tung pan hong kumsuk ta hen,” a ci uh hi. Tua mah bangin amah tawh a kikilh khawmte in zong a engko uh hi.

Jesu Sihna

33 Tua gam bupah nai gukna-a kipan nai kuana dong khim a zing hi. 34 Nai kuana laitakin Jesu in, “Eloi, Eloi, lama sabacthani?” ci-in nakpi-in a kiko hi. A khiatna in, “Ka Pasian, ka Pasian aw, bang hangin kei hong taisan na hi hiam?” ^{▼▼15.34 Ph. 22:1} cihna ahi hi. ⁱ

35 Tua lai-a ding mi kimkhat in a zak uh ciangin, “Ngai dih un, amah’n Elijah sam hi,” a ci uh hi.

36 Mi khat va tai-a, lenggahzu thuk sungah tuihup a diah khit ciangin ciang dawnah koihin Jesu dawn dingin a pia hi. Amah in, “Bangmah cih dah dih un. Amah lakhiasuk dingin Elijah hong pai hiam, en phot dih ni,” a ci hi.

37 Jesu nakpi-in kiko-a tua ciangin a hutawpna a sang hi. ^j

38 Biakinnpi puanzak a lu pan a taw dong kikekin phel nih a suak hi. 39 Jesu mai-a ding zakhat-ukpa in ama kikona le ^{▼▼15.39 Khutgelh pawlkhatah kikona le cih om lo hi} a sihzia a muh ciang- in, “Hih pa Pasian Tapa ^{▼▼15.39 Ahikeh tapa khat} hi takpi ei!” a ci hi.

40 A gamla sim pan numei pawlkhat in a galvil uh hi. Amaute lakah Mary Magdalene, James nauzaw pen le Joses nu Mary, le Salome-te a om uh hi. 41 Hih numeite in Galilee ah amah zui uh a, a kisapnate a sepsak uh hi. Jerusalem dong amah tawh a ton numei dang tampi zong tua lai-ah a om uh hi. ^m

Jesu Kivuina

42 Tua ni, kiginkholh Ni, Sabbath tunma ni ahi hi. Tua hi-a ni niam kuan ciangin, 43 Pasian gam a ngak gige Vaihawmte lakah mi thupi khat, Arimathea mi Joseph Pilate kiangah hangtakin pai-a Jesu luang a va ngen hi. 44 Pilate in amah si zo cih a zak ciangin lamdang a sa hi. Amah in zakhat-ukpa samin, Jesu si khin takpi hiam, cih a dong hi. 45 Si khin zo takpi, cih zakhat-ukpa kam pan a zak ciangin a luang Joseph a pia hi. 46 Tua ciangin Joseph in saihadial puan pawlkhat lei-in siluang lakhia suka, saihadial puanin a tun khit ciangin suangpi a khuak han sungah a sial hi. Tua ciangin tua han kong vang suangtum khatin a khak hi. 47 Mary Magdalene le Joses nu Mary-te in ama kisialna mun a mu uh hi.