aJas 4:11, 12
bLk 6:41, 42
cPn 9:7-8
d1Ku 3:5; Jas 1:5-8
eJas 1:17
fLk 13:24; Jn 10:7, 9
gJer 23:16; Mt 3:10
hPh 6:8; Mt 12:50
iLk 6:47-49
jMk 6:2

Matthew 7

Midangte Tunga Thukhenna

1“Midangte tungah thu khen kei un. Na khen uh leh no tungah zong thu hong kikhen ding hi. 2Midangte tunga na khen bangun no tungah zong hong kikhen dinga, no zat tehna mah tawh no aa zong hong kitehsak ding hi. a

3 “Nang mittanga singpek ngaihsun loin bang hanga na sanggampa mita singatvui them en na hi hiam? 4Nang mittang ah singpek om napi na sanggampa kiangah, ‘Na mit-a ninthem hong lakkhiatsak ning,’ bangci cih thei na hi hiam? 5Kineihsiampa aw, nang mit-a singpek lakhia masa in, tua hileh na sanggampa mit-a na lakkhiat ding ninthem na telmuh pan ding hi. b

6 “A siangtho nate ui pia kei un. Vok mai-ah na kep manphate uh pai kei un. Tua banga na hih uh leh a tuatcil gawp khit uh ciangin kihei-in note hong balnen ding uh hi. c

Ngen, Zong, Kiu

7 “Ngen un hong kipia ding hi; zong un na mu ding uh hi; kiu un kongkhak hong kihon ding hi. 8Ahang in, a ngen khempeuh in a ngah uh hi; a zongte in a mu hi; a kiute ading kongkhak kihon ding hi. d

9 Note lakah a tapa in anlum a nget ciangin suang a pia ding kua om ahi hiam? 10Ahikeh ngasa a nget ciangin gul a pia ding kua om ahi hiam? 11Tua ahileh note migilo hi napi, na tate uh na hoih piak ding thei na hi uh leh vantunga om na Pa un a ngente na hoih pia nuam zawtham lo ding ahi hiam! 12Na khempeuh ah no tunga hong kibawl ding na deih bangun midangte tungah bawl un. Hih in Thukham le kamsangte thu khempeuh huam khin hi. e

Kong-kawcik le Kong-tanzaute

13 “Kong kawcik ah lut un. Ahang in, siatna a tun kongpi tanzau-in lampi zai-a mi tampi a lut hi. 14Ahi hangin nuntakna a tun kongpi neu a, lampi kawcik in mi tawmcik bek a lut hi. f

Singkung le A Gah

15 “Kamsang zuaute hangin na kigalging un. Amaute tuuvun silhin note kiangah hong pai uh hi; ahi hangin amaute sunglam, ngia hangsan ahi hi. 16Amaute a gah un na khentel thei ding uh hi. Lingkung panin lenggah kilo ngei ahi hiam? Thangling kung panin theigah kilo ngei ahi hiam? 17Tua mah bangin kung hoih in gah hoih gah a, kung hoih lo in gah hoih lo a gah hi. 18A kung hoih in gah hoih lo gah thei lo a, tua mah bangin a kung hoih lo in gah hoih gah thei lo hi. 19Gah hoih a gah lo singkung peuhmah kiphukin meikhukah kikhul hi. 20Tua bangin amaute a gah panun na khentel thei ding uh hi. g

21 ‘Topa, Topa’ hong ci khempeuh vantung gamah a lut kim kei ding hi. Ahi hangin vantunga om ka Pa deihna banga gamtate bek a lut ding hi. 22Tua ni ciangin mi tampi in ka kiangah, ‘Topa, Topa, nangma minin thu hilh hi lo ka hi uh hiam; nangma minin dawite hawlkhia in, nalamdang tampi bawl hi lo ka hi uh hiam?’ hong ci ding uh hi. 23Tua ciangin, ‘Note kong thei ngei kei hi. Gitlohna a bawlte aw, kei kiang pan taikhia un!’ teltakin ka ci ding hi. h

Mipil le Mihai Innlamte

24 “Tua hi-a hih ka thute za-a, a zuipahte peuhmah suangpi tunga inn lam mipilpa tawh kibang hi. 25Guah zu in tui khang a, huih nungin tua inn a nawk hi. Ahi zongin suangpi tunga bulkip nei ahi manin tua inn a puk kei hi. 26Ka thute za napi, a zuipah lote sehnel tunga inn lam mihaipa tawh kibang hi. 27Guah zu-a tui khangin, huih nunga tua inn a nawk ciangin pukgawp hi,” a ci hi. i

28 Hih thu teng a gen khit ciangin mihonte in Jesu thuhilhnate lamdang a sa uh hi. 29Bang hang hiam cih leh amah in thukham siate bang hi loin thuneipa khat bangin a hilh hi. j

Copyright information for ZomZIV