Neh 4 | ZomZIV | STEP | Sanballat in kulh ka cian kik uh a zak ciangin hehin a thangpai mahmah hi. Amah in Jew-te zahpihin

Nehemiah 4

Kulh Ciankikna ah Langpanna

1 Sanballat in kulh ka cian kik uh a zak ciangin hehin a thangpai mahmah hi. Amah in Jew-te zahpihin 2 amah a koppihte le Samaria galkapte omin, “Tua Jew migina lote in bang hih uh hiam? A kulh uh puahphat sawm uh ahi hiam? Biakna pia ding uh ahi hiam? Ni khatin zo ding uh ahi hiam? Amaute mah banga a kihaltumsa nin lompi suangtum suaksak kik thei ding uh ahi hiam?” a ci hi. ^a

3 A kianga ding Ammon-te Tobiah in, “Bangbang lam ta le uh - ngia khat a tungah kah bek leh zong kulha a cian uh suangte ciim na ve!” a ci hi. ^b

4 Kote Pasian aw, hong za in, kote hong kisimmawh hi. Amaute hong engcihna amau lutungah tukiksak in. Gam khatah amaute salin kimansak in. 5 Amaute in kulh ciangte mai-ah ^{▼▼4.5 Ahikeh amaute mai-ah nang hong hehsak uh hi.} hong ko uh ahi manin a khialhna uh khuhsak kei inla a mawhna uh na muhna pan sumit kei in. ^d

6 Tua ciangin mite in a lungsim khempeuh uh tawh na sem uh ahi manin kote in a sanna a kim ciang ka tut mateng uh ka ciang uh hi.

7 Ahi hangin Sanballat, Tobiah, Arab-te Ammon-te le Ashdod mite in, Jerusalem puahphatna in mainawt mahmah a, a vangte a kihukkhitna a zak uh ciangin a nak heh mahmah uh hi. 8 Amaute khempeuh kuanin Jerusalem simin buaisak ding a sawm uh hi. 9 Ahi hangin kote in Pasian tungah thu ngenin hih bang hihna a thei dingin sun le zanin galvil ka koih uh hi. ^e

10 Tua hun laitakin Judah gam sunga mite in, “Nasemte thazaw ta uh a, nin lah tam lua mahmah ta, kulh ciang kik zo kei ni,” a ci uh hi. ^f

11 Ka galte un zong, “A theih loh kalun, hong muh ma-un amaute lakah va omin amaute thatin a nasep uh khawlsak ni,” a ci uh hi.

12 Tua ciangin amau nai-a teng Jew-te hong pai-in sawmvei val hong ko uh a, “Bangci lamin na hei uh hangin hong sim veve ding uh hi,” hong ci uh hi.

13 Tua ahi ciangin kulh nunglam a niam pen mun-awng tengah a innkuankuanin a namsau uh, a teipi uh le a thal uh tawh mite pawlkhat ka pangsak hi. 14 Nate ka et dimdem khit ciangin ding in zaliante, uliante le mite khempeuh tungah, “Amaute kihta kei un. A lian mahmah a kihtakhuai Topa phawk unla na sanggampate, na tapate, na tanute na zite le na inn uh adingin do un,” ka ci hi. ^g

15 Ka galte un amau hong sawmna ka theih lam le Pasian in amaute geelna a phiatsak ciangin kulha ka nasepna ciat uhah ka kuan kik uh hi. ^h

16 Tua ni-a kipan ka mite a langin na sem uh a, a langte teipi, lum, thal le galvante tawh kithawisa-in a om uh hi. 17 Judah mi kulh ciangte khempeuh nungah a uliante uh a pang hi. Van nawnte in a khut langkhatun van lenin a langkhatin galhiam tawi uh a, 18 kulh ciangte in a cian kawmun amau pang ciatah namsau a kuah uh hi. Ahi hangin pengkul mutte kei tawh a omkhawm uh hi. ⁱ

19 Tua ciangin zaliante, uliante le mipite khempeuh tungah, “I nasepna zai-a i kithehthang hi, kulh dungah gamlapi kihalin i kikhen hi. 20 Pengkul gin na zakna mun peuhpeuh panun ko kiangah hong kigawm un. I Pasian in ei tangin do ding hi,” ka ci hi. ^j

21 Tuaci-in mi a lang in teipi tawi kawmin khuavak tunga kipan aksi suah dong na ka semsuak uh hi. 22 Tua hun teh mite kiangah, “Sunin na sema zan ciangin galvil na suah theih nadingun na nasemte ciat uh tawh na vekun Jerusalem sungah om un,” ka ci hi. 23 Kei ka hi-a ka sanggampa ahi zongin, ka mite ahi-a kei hong cingte ahi uh zongin ka puan uh ka suah kei uh a; tui ka tawi ciang nangawnun galhiam ka keng ciat uh hi. ^{▼▼4.23 Hebrew in hih gual teng a khiatna kician lo hi.}