Numbers 1

Mi Kisimna

1Israel-te Egypt pana a paikhiat khit uh a kum nihna, a kha nihna a ni masa ni-in Sinai Sehnel gam-a Kikhopna Puanbuk ah TOPA in Moses a hopih hi. Amah in: 2“Israel mipi bup a bawng’ le a innkuan zui-in simin, pasal peuhmah a min uh khat khit khat gual in. 3Nang le Aaron in kum sawmnih pan a tungsiah, Israel-te khempeuh pasal paltan tum thei ding peuhmah amau kikhenna bangin na sim ding uh hi. 4A beh, simin pasal khat ciat, a innkuan lutang pen ciat in nang hong huh ding uh hi. 5Nang hong huh ding mite min hihte ahi hi: ^a

Reuben panin, Shedeur tapa Elizur; ^b
6 Simeon panin, Zurishaddai tapa Shelumiel; ^c
7 Judah panin, Amminadab tapa Nahshon; ^d
8 Issachar panin, Zuar tapa Nethanel; ^e
9 Zebulun panin, Helon tapa Eliab; ^f
10 Joseph tapate pan:
Ephraim panin, Ammihud tapa Elishama; ^g
Manasseh panin, Pedahzur tapa Gamaliel; ^h
11 Benjamin panin, Gideoni tapa Abidan; ⁱ
12 Dan panin, Ammishaddai tapa Ahi-ezer; ^j
13 Asher panin, Ocran tapa Pagiel; ^k
14 Gad panin, De-u-el tapa Eliasaph; ^l
15 Naphtali panin, Enan tapa Ahira,” ahi hi. ^m

16 Hihte mihonpi pana kiseh pupa beh pana makaite ahi hi. Amaute Israel bawng’ lutangte ahi uh hi.

17 Moses le Aaron in a min kipiasate tonpih uh a, 18a kha nihna a ni masa ni-in mihonpi bup a kikhawmsak uh hi. Tua mite in amau pupa bawng’ le innkuan zui-in ciamteh uh a kum sawmnih leh a tungsiah a min a banbanin a khum uh hi; 19Tua pen TOPA in Moses a thupiak bang ahi hi. Tua hi-a Sinai Sehnel gamah tuaci-in mi khat khit khat a sim uh hi. ⁿ

20 Israel tapa upa pen Reuben suante panin:

Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 21Reuben beh panin mi 46,500 a pha hi.

22 Simeon suante panin: ^o

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in kisima a min uh a kigual ahi hi. 23Simeon beh panin mi 59,300 a pha hi.

24 Gad suante panin:

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 25Gad beh panin mi 45,650 a pha hi.

26 Judah suante panin:

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 27Judah beh panin mi 74,600 a pha hi.

28 Issachar suante panin: ^p

Kum sawmnih pan a tungsiah paltan tum thei ding pasal khempeuh amau bawng’te le a innkuante ciamtehna tawh kizui-in a min uh a kigual ahi hi. 29Issachar beh panin mi 54,400 a pha hi.

30 Zebulun suante panin: ^q

Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 31Zebulun beh panin mi 57,400 a pha hi.

32 Joseph tapate pan:

Ephraim suante panin:

Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 33Ephraim beh panin mi 40,500 a pha hi.

34 Manasseh suante panin: ^r

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 35Manasseh beh panin mi 32,200 a pha hi.

36 Benjamin suante panin: ^s

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 37Benjamin beh panin mi 35,400 a pha hi.

38 Dan suante panin:

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-a a min uh a kigual ahi hi. 39Dan beh panin mi 62,700 a pha hi.

40 Asher suante panin:

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawhzui-in a min uh a kigual ahi hi. 41Asherbeh panin mi 41,500 a pha hi.

42 Naphtali suante panin: ^t

Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 43Naphtali beh panin mi 53,400 a pha hi.

44 Hih mite pen Moses Aaron le amau innkuan ciat tanga a sem Israel makai sawm le nihte misimna ahi hi. 45Israel mi paltan tum thei ding khempeuh kum sawmnih pan a tungsiah a innkuan zui-a kisim ahi hi. 46A vekpi-a kigawm mi 603,550 a pha hi. ^u

47 Tuate lakah Levi beh innkuan teng adangte tawh a kisim khawm kei hi. 48TOPA in Moses tungah: 49“Na misimna ah Israel dangte tawh Levi beh na simkhawm peuhmah kei ding hi. 50Tua tangin, Levi-te Tecipanna biakbuk - a nazat khempeuh le tua tawh kisai na khempeuh uk dingin seh in. Amaute in biakbuk le a vanzat khempeuh a pua ding uh hi; amaute in cing ding uh a, a kimkot ah giahphual sat ding uh hi. 51Biakbuk a kiphualsuan peuhpeuh ciangin Levi-te in phel ding uh a, biakbuk a kilam peuhpeuh ciangin Levi-te in a sem ding uh hi. Midang khatpeuh a kiangah a pai leh kithat ding hi. 52Israel-te in a pawlpawlin a puanbukte uh lam ding uh a, amau satsa giahphual-a dialkhai nuai-ah a om tek ding uh hi. 53Levi-te in ahileh Israel mipite tungah thangpaihna a tun loh nadingin biakbuk kimkot ah a puanbukte uh a lam ding uh hi. Levi-te in Tecipanna biakbuk kep ding tavuan a la ding uh hi,” a ci hi. ^v

54 TOPA in Moses a thupiak bang tektekin Israel-te in hihte khempeuh a sem uh hi.