Numbers 10

Ngun Pengkulte

1TOPA in Moses tungah: 2“Sek-a kiseek ngun pengkul nih bawl inla, mipite sapkhawmna le giahphual suan nadingin zang in. 3A nihin a ginkhawm ciangin Kikhopna Puanbuk lutna mai-ah mipi bup a kikhawm ding uh hi. 4Khat bek a gin ciangin na mai-ah, makaite - Israel bawng’te lutangte kikhawm ding uh hi. 5Pengkul khatvei a kimut ciangin nisuahna lama phualsat behte a dingkhia ding uh hi. 6A nih veina a kimut ciangin leitaw lama giahphual satte a dingkhia ding uh hi. Dinkhiat nading theihsakna-in a kimut ding hi. 7Mipite khop nadingin pengkulte kimut dinga ahi hangin theihsakna a kibang kei ding hi. ^a

8 “Siampi Aaron tapate in pengkul a mut ding uh hi. Hih in nang le khang sawnsawnte adingin a kip den thuzek hi ding hi. 9Na gam sungua no hong nengniam na galte uh tawh na kido uh ciangin pengkulte mut un. Tua ciangin na Pasian uh TOPA in note hong phawkin na galte panun hong hu ding hi. 10Na lungnop hun uh - no adinga kisehsa pawite le Kha Thak pawi hunte - meihal biakna, kilawmtakna biakna a hun ciangin zong pengkulte na mut ding uh a, tuate no adingin Pasian mai-ah phawkna khat ahi ding hi. Keimah TOPA note Pasian ka hi hi,” a ci hi. ^b

Israel-te in Sinai Nusia

11 A kum nihna a kha nihna a ni sawmnihna ni-in Tecipanna biakbuk tungsan panin meii a kilamto hi. 12Tua ciangin Sinai Sehnel-gam panin Israel-te dingkhia uh a, Paran Sehnel gam ah meii a khawl matengin mun khat pan mun khatah a zin kawikawi uh hi. 13Moses tungtawna TOPA thupiak bangin a dinkhiat uh a masapen ahi hi.

14 Judah giahphual-ate pawl amau dialkhai nuai-ah a dingkhia uh hi. Amminadab tapa Nahshon in a uk hi. 15Issachar beh pawl Zuar tapa Nehthanel in uk a, 16Zebulun beh pawl Helon tapa Eliab in a uk hi. 17Tua ciangin biakbuk phelkhia uh a, biakbuk pua Geshon-te le Merari-te a dingkhia uh hi. ^c

18 Tua zomah Reuben giahphuala pawlte amau dialkhai nuai-ah a pai uh hi. Shedeur tapa Elizur in a uk hi. 19Simeon behte pawl ah Zurishaddai tapa Shelumiel in uk a, 20Gad behte pawl Deuel tapa Eliasaph in a uk hi. 21Tua zomah Kohath mite a siangtho nate pua kawmin a dingkhia uh hi. Amaute a tun ma-un biakbuk kilam khin ding hi.

22 Tua zomah Ephraim giahphual-ate amau dialkhai nuai-ah a pai uh hi. Ammihud tapa Eliashama in a uk hi. 23Manasseh behte pawl Pedahzur tapa Gamaliel in uk a, 24Benjamin behte pawl Gideoni tapa Abidan in a uk hi. ^d

25 A nunung pen ah pawl khempeuh nungdalin Dan giahphuala pawlte amau dialkhai nuai-ah a dingkhia ding uh hi. Ammishaddai tapa Ahiezer in a uk hi. 26Asher behte pawl Acran tapa Pagiel in uk a, 27Naphtali behte pawl Enan tapa Ahira in a uk hi. 28Hih in Israel-te a pawlpawlin a dinkhiat uh cianga a paizia uh ahi hi. ^e

29 Moses in a sungpa Midian-te Reuel tapa Hobab tungah, “TOPA genna mun lam zuanin ka dingkhia ding uh hi; nang tungah kong pia ding hi. Ko hong zui in; TOPA in Israel tungah na hoih piak ding hong ciam zo ahi manin nang kong ngai ding uh hi,” a ci hi. ^f

30 Amah in, “Hi kei, kong pai kei ding hi; ka leitanga ka mite kiangah ka ciah kik ding hi,” ci-in a dawng hi.

31 Ahi hangin Moses in, “Nong hehpihna-in kote hong nusia kei in. Gam sunga ka giahphual sat nading mun uh na thei a, ka lampu uh na hi hi. 32Ko nong zuih leh TOPA hong piak a hoih nate nang tawh i hawm ding hi,” a ci hi.

33 Tua ciangin TOPA mual panin dingkhia uh a, ni thum sung a pai uh hi. Amaute khawl nading mun a zonsak dingin tua nithum sungin TOPA thukhun singkuang amaute mai-ah a pai hi. 34Amaute giahphual pan a dinkhiat uh ciangin sunin amaute tung sanah TOPA meii a om hi. ^g

35 Singkuangpi a dinkhiat peuhpeuh ciangin Moses in,

“TOPA aw, ding in!
Na galte kithehthang ta hen; ^h
na galte na mai-ah taikhek uh hen,” a ci hi. ⁱ

36 A khawl peuhpeuh ciangin amah in,

“TOPA aw,
Israel tul tampi simzawh lohte kiangah hong kileh in,” a ci hi. ^j