Numbers 16

Korah Dathan le Abiram

1Levi tapa Kohath, Kohath tapa Izhar, Izhar tapa Korah le Reuben-te panin - Eliab tapa Dathan le Abiram, le Peleth tapa On-te kimisak a uh a, 2Moses a langpan uh hi. Mihonpite makai minthang vaihawm pawl dinga kisehsa Israel mi 250 in amaute a koppih uh hi. 3Moses le Aaron langpan dingin kuankhawm uh a, “Ki-uangsak lua uh teh! Mihon buppi a vekpi un siangtho uh hi, amaute TOPA in ompih hi. Tua hi napi bang dinga TOPA mite sangin a thupi zawa kikoih na hi uh hiam?” a ci uh hi. ^a

4 Moses in hih thu a zak ciangin a mai a kunsuk hi. 5Tua ciangin Korah le ama nungzuite khempeuh kiangah: “Zingsang ciangin TOPA in ama aa kua hi a, kua siangtho hiam, cih hong lak dinga, tua mipa a kiangah a paisak ding hi. Ama telpa pen amah in a kiangah paisak ding hi. 6Nangmah Korah le na nungzuite khempeuh: na kisim unla 7zing ciangin TOPA mai-ah mei-in gimnamtui na hal dih un. TOPA teel tua mipa a siangthopa pen hi ding hi. No Levi mite uang lua zaw uh teh!” a ci hi. ^b

8 Moses in zong Korah tungah, “Tu-in no Levi mite aw, ngai dih un! 9Israel-te’ Pasian in Israel mipi dangte panin hong khenkhia-a, TOPA biakbuk-a ama kianga nasemin mipite mai-ah amau adingin biakna na sem dinga hong koih phazo sa hoh lo na hi hiam? 10Amah in note le na Levi mipihte uh ama kiangah hong koih napi, tu-in siampi za zong ngah na sawm lai uh hi. 11Nang le na nungzui-te na kikopkhawmna uh TOPA langpanna ahi hi. Na phunsan dingin Aaron kua himawk ahi hiam?” a ci hi.

12 Tua ciangin Moses in, Eliab tapa Dathan le Abiram a samsak hi. Ahi hangin amaute in, “Pai buang lo e! 13Khuaizu le bawngnawi a luanna gam pan hong lakhia in sehnel gam ah thah dinga nong omsak hawmthawh lai na hi hiam? 14Tua tham loin bawngnawi le khuaizu a luanna gam sungah nong tunpih kei a, lote le lenggah lote nong luahsak kei hi. Hih mite mittang b khelkhia lai ding na hi hiam? Kong pai peuhmah kei ding uh hi!” a ci uh hi. ^c

15 Tua ciangin Moses heh mahmah a TOPA kiangah, “Amaute biakna sang kei in. Amaute tung panin laa khat nangawn zong ka la nai kei a, amaute khat tungah zong ka khial kei hi,” a ci hi. ^d

16 Moses in Korah kiangah, “Zing ciangin nang le na nungzuite khempeuh TOPA kiangah na kilak ding uh hi - nang le amaute le Aaron. 17Note in na gimnamtui beel tek uh tawi-in a sungah gimnamtui na koih ding uh hi - gimnamtui beel vekpi 250 hi a - TOPA mai-ah a pia ding uh hi. Nang le Aaron in zong na gimnamtui beel uh na pia ding uh hi,” a ci hi. 18Tua ciangin a gimnamtui beelte ciat uh la uh a, a sungah mei le gimnamtui koihin Kikhopna Puanbuk lutna ah Moses le Aaron tawh a dingkhawm uh hi. 19Korah in Kikhopna Puanbuk lutna amaute langkhatah a nungzuite a kikhopsak khit ciangin mihonpite khempeuh tungah TOPA minthanna kilang hi. 20TOPA in Moses le Aaron tungah, 21“Amaute thakhatin a kibeisak theih nadingin hih a kikhawm mihonpite panin kihemkhia un,” a ci hi. ^e

22 Ahi hangin Moses le Aaron mai kunsuk uh a, “Pasian aw, mihingte Pasian aw, mi khat a mawhnate hangin mipi buppi tungah heh ding na hi hiam?” ci-in a kiko uh hi.

23 Tua ciangin TOPA in Moses tungah, 24“Mihonpi tungah, ‘Korah, Dathan le Abiram-te puanbuk panin kihemkhia un,’ ci un,” a ci hi.

25 Moses dingkhia a Dathan le Abiram-te kiangah pai-a Israel upate in amah a zui uh hi. 26Amah in mihonpite vauhilh a, “Hih migilote puanbuk panin kihemkhia un! Amaute na khat beek lawng kei un, na lawn uh leh amau mawhnate hangin note hong kiphiatkhia ding hi,” a ci hi. 27Tua ciangin amaute Korah, Dathan le Abiram-te puanbuk panin a kihemkhia uh hi. Dathan le Abiram paikhia uh a, a zite a tate uh le a tangeekte uh tawh amau puanbuk lutna ah a dingkhawm uh hi. ^f

28 Tua ciangin Moses in, “Hihte kei thu-a ka hih hi loin hihte khempeuh a sem dingin TOPA in kei hong sawl ahilam na theih nading uh ahi hi. 29Hih mite sih ngeina-in si-in, mihing tuah ngei mah tuak le uh TOPA in kei hong sawl lo hi ding hi. 30Ahi hangin TOPA in a thak tuam mahmah khat tuaksakin lei kamka in amaute le a neihsa khempeuh uh valhin a hing tangun han a ah kivui leh tua ciangin hih mite in TOPA a simmawh lam uh na thei ding uh hi,” a ci hi. ^g

31 Amah in hih thu a gen khit phetin amaute nuai lei kikhenkham a, 32lei kamka-in Korah mite le a innkuanpihte le a neihsate khempeuh uh a valh hi. 33Amaute a neihsa khempeuh uh tawh a hingtangin han sungah tumsuk uh a; lei in amaute khupnelhin kisia uh a, mipite lakah a om nawn kei uh hi. 34Amaute kimkot a om Israel-te tai-in, “Leitang in ei zong hong valh kha in ciai!” ci-in a awng uh hi. ^h

35 Tua ciangin TOPA panin mei kuangkhia a, biakna-a gim namtui a pia mi 250 te a haltum hi.

36 TOPA in Moses kiangah, 37“Siampi Aaron tapa Eleazar kiangah, meikuang khupi lak panin gimnamtui beelte lakhiasakin a gamla sim ah mei-amte thehthangsak in, 38ahang in, amaute nuntakna bei nading zah-a, a mawh mite’ gimnamtui beelte siangtho hi. Tua gimnamtui beelte TOPA mai-ah a siangtho-a kipia ahi manin biakna-tau a luan dingin a pekin seek in. Israel-te adingin tuate lim suaksak in,” a ci hi. ⁱ

39 Tua ciangin siampi Eleazar in a kangtumsa mite’ sumngo gimnamtui beelte khawma, biakna-tau-a sun dingin seek-a, 40TOPA in Moses tungtawna amah a lamlah bangin a hih hi. Hih in Aaron suante longal mi khatpeuh in TOPA mai-ah gimnamtui hal dingin a pai loh nading, a pai leh Korah le a nungzuite bang ding hi, cih Israel-te theihsakna ahi hi.

41 A zing ciangin Israel mi buppi in Moses le Aaron a phunsan uh hi. Amaute in, “TOPA mite na thatlum uh hi,” a ci uh hi.

42 Ahi hangin Moses le Aaron langpanin mipite kikaikhawmin Kikhopna Puanbuk lamah a pai laitakun, thakhatin meii in tuam a, TOPA minthanna a kilang hi. 43Tua ciangin Kikhopna Puanbuk mailam ah Moses le Aaron pai uh a, 44TOPA in Moses kiangah, 45“Amaute thakhatin ka beisak theih nadingin hih mipite panin kihemkhia un,” a ci hi. Tua ciangin amaute a mai kunsuk uh hi.

46 Tua ciangin Moses in Aaron kiangah, “Na gimnamtui beel la inla a sungah gimnamtui koih in, amaute ading biakna-tau pana mei tawh thoihdamna bawl dingin mipite lamah paipah in. TOPA thangpaihna hong pusuak khin hi; pulpi kipan khin hi,” a ci hi. 47Tua ciangin Aaron in Moses cih bangin hih a, mipite laizangah a tai hi. Mipite lakah pulpi kipan khin zo hi; ahi hangin Aaron in gimnamtui halin amaute adingin thoihdamna a bawl hi. 48Amah a sisate le a hing laite kikalah dinga, pulpi a tawp hi. 49Ahi hangin Korah hanga a site banah pulpi-in mi 14,700 a sih beh lai hi. 50Pulpi tawpta ahi manin Kikhopna Puanbuk lutna-a Moses kiangah Aaron a ciah kik hi. ^j