Numbers 21

Arad Kisia

1Negev a teng Canaan-mi Arad kumpipa in Atharim zuatna lampi zui-in Israel-te pai cih a zak ciangin amah in Israel-te na do a amaute pawlkhat a man hi. 2Tua ciangin Israel in TOPA tungah hih kiciamna a bawl hi. “Nangmah in kote tungah hih mite nong piak ding leh amau khuapite ka susia b dikdek ding uh hi,” a ci uh hi. 3TOPA in Israel thumna ngai-a amaute tungah Canaan-te a pia hi. Amaute in a khuapite uh le amaute a susia dikdek uh hi; tua ahi manin tua mun Hormah c kici hi.

Sumngo Gul

4 Hor Vum panin zinkhia uh a, Edom kimvel dingin San Tuipi d zuatna lampi a zui uh hi. Ahi hangin lamkal ah mipite lungtom uh hi; 5amaute in Pasian gensia-in Moses gensia uh a, “Bang hangin sehnel-gama si dingin Egypt panin hong paikhiatpih na hi hiam? Anlum lah om kei! Tui lah om kei! A gentak lo hih an lah kih lel ung!” a ci uh hi. ^a

6 Tua ciangin TOPA in amaute lakah gul gupha a khah hi; tuate in mite tu uh a, Israel mite tampi a si uh hi. 7Moses kiangah mite pai uh a,” Nang kong gensiat uh le TOPA ka gensiat uh ka mawh zo uh hi. TOPA in kote panin gulte a lakkhiatmang nadingin thu ngen in,” a ci uh hi. Tua ciangin Moses in mipite adingin thu a ngen hi. ^b

8 TOPA in Moses tungah, “Gul khat bawl inla khuam tung khatah khai in; gul tuksa mite in en thei ding uh a, a nungta ding uh hi,” a ci hi. 9Tua ciangin Moses in sumngo gul khat bawla, khuam tung khatah a khai hi. Tua ciangin mi khatpeuh gul in a tuka sumngo gul a et nak leh a nungta hi. ^c

Moab-a Zinna

10 Israel-te kikhinkhia uh a, Oboth ah giahphual a sat uh hi. 11Tua ciangin Oboth panin dingkhia uh a, nisuahna lampang Moab maingat-a gam sungah a om Iye Abarim ah giahphual a sat uh hi. 12Tua lai panin kikhinkhia leuleu uh a, Zered Kuam sungah giahphual a sat uh hi. 13Tua lai panin dingkhia uh a, Amor-te gamgi dunga kikhung sehnel-gama om Arnon dung sukah giahphual a sat uh hi. Arnon pen Moab-te le Amor-te kikal-a Moab gamgi ahi hi. 14Tua pen bang hang hiam cih leh TOPA Gal Laibu in: ^d

“Suphah a a Waheb le
Arnon guamte, 15le b Ar dong a tungsuk
Moab gamgi dunga kikhung
guam kente,” na ci hi.

16 Tua lai panin TOPA in Moses tungah, “Mite a vekun kikhawmsak un, amaute tui ka pia ding hi,” a cihna mun Beer tuikhuk dong a pai lai uh hi.

17 Tua ciangin Israel in:

“Tuikhuk aw, Phulto in!
Tua thu la’n sa un,
18 kumpi tapate tawhsa mipite uliante tuak uh a,
a sikciang le a ciangkhut-a
a tawh uh tuikhuk thu,’ ci-in la in a sa uh hi.

Tua ciangin amaute sehnel-gam panin Mattanah ah pai uh a, 19Mattanah panin Nahaliel ah, Nahaliel panin Bamoth ah, 20Bamoth panin Pisgah mual dawn pana kimusuk Moab gamval kuamah a tung uh hi.

Sihon le Og Zawhna

21 Israel in Amor-te kumpipa Sihon kiangah kamtai sawl a:

22 “Na gam hong kantansak in. Lo lai ahikeh lenggui lo khatpeuh tawnin ka pai kei ding uh a, tuikhuk khatpeuh a tui zong ka dawn kei ding uh hi. Na gam ka kantan khit matengun kumpi lamlianpi zui-in ka zin ding uh hi,” a cisak hi. ^e

23 Ahi hangin Sihon in a gamgi kantanin Israel a paisak nuam kei hi. A galkap khempeuh kikhawmsak a, Israel do dingin sehnel gamah a kuankhia uh hi. Jahaz a tun uh ciangin Israel tawh a kido uh hi. 24Ahi zongin Israel in namsau tawh amah vat-a, ama gam Arnon panin Jabbok dong laksak uh a, ahi hangin Ammon-te omna ciang bek a la zo uh hi; bang hang hiam cih leh amau gamgi ah kulh tawh a ki-um hi. 25Israel in Amor-te khuapi liante khempeuh, Heshbon le a kimkota khuaneute khempeuh tawh la khawmin a teng uh hi. 26Heshbon pen, Moab kumpi masazawpa do a, ama tung pana leitang Arnon ciang dong a laksak Amor-te kumpipa Sihon khuapi ahi hi. ^f

27 Tua hangin la sungah:

“Heshbon ah hong pai unla lam kik ni;
Sihon khuapi kipsak ni.
28 “Heshbon pan mei pawtkhia,
Sihon khuapi panin meikuang khat. ^g
Tua in Moab a khuapi Ar le,
Arnon leitanga teng mite a haltum hi. ^h
29 Moab aw, gimna thuak si cia!
Chemosh mite aw, no lah kisia ta uh teh! ⁱ
Amah in a tapate galtai le a tanute galmatin,
Amor-te kumpipa Sihon tungah piakhia ta hi.
30 “Ahi hangin ko amaute ka lawnthal uh hi;
Heshbon kisia ta, lamdung tawntung Dibon dong; ^j
Medeba ciang dong a bansa Nophah dong
amaute ka sucip uh hi,” ci-in na kiphuak hi.

31 Tuaci-in Amor-te gamah Israel a teng hi.

32 Moses in Jazer ah thukansimte a sawl khit ciangin a kima tengte la uh a, tua lai-a teng Amor-te a suankhia uh hi. 33Tua ciangin amaute kihei-in Bashan lampi zui-in pai uh a, Bashan kumpipa Og le a galkap buppi, amaute do dingin Edrei ah a kuankhia uh hi.

34 TOPA in Moses tungah, “Amah le a galkap buppi le a gam, nang khut sungah kong pia khin hi, kihta kei in Heshbon a ukpa - Amor-te kumpipa Sihon tunga na hih bangin ama tungah hih in,” a ci hi. ^k

35 Tua ciangin amaute a nungta a om nawn lo dingin amah le a tapate tawh, a galkap buppi a that khawm uh hi. Tua ciangin ama gam a tang uh hi.