Num 4 | ZomZIV | STEP | TOPA in Moses le Aaron tungah:

Numbers 4

Kohath Mite

1 TOPA in Moses le Aaron tungah: 2 “Levi khil mah ahi Kohath mite a bawng’te le a innkuanin sim in. 3 Kikhopna Puanbuk ah nasema kuan thei ding kum sawmthum pan kum sawmnga ciang pasal khempeuh sim in. ^a

4 “Kikhopna Puanbuk sungah Kohath mite nasep ding hih ahi hi: A siangthopente cing ding uh hi. 5 Giahphual a kisuan ding ciangin Aaron le a tapate sungtum ding uh a, a liahna puanzak phelkhia-in tua tawh Tecipanna singkuang a tuam ding uh hi. 6 Tua ciangin amaute in tuipi bawngpi c vunin tuam ding uh a, tua tungah puan adum kiuhkeuh tawh khuhin a zawlte a thuah ding uh hi. ^b

7 “Amaute in Ompihna sabuai tungah adum puan phah ding uh a, tua tungah kuangte, keute, le kuangkumte, le dawntheih-a biak nading thambelte koih in; tua tunga om den ding anlum a koih ding uh hi. 8 Amaute in hihte tungah a-ausan puan phah ding uh a, tuipi bawngpi vun tawh tuamin a zawlte a munah a bulh ding uh hi.

9 “Amaute in puan adum khat la in, khuavak ding meivakte a tunna tawh a mei-ek siakna le kuangdaite, le thun tawm ding meitui koihna thambeelte khempeuh a khuh ding uh hi. 10 Tua ciangin amaute in a na zat khempeuh tawh henkhawmin tuipi bawngpi vunin khuh ding uh a, a puakna tal tungah tuate a koih ding uh hi. ^c

11 “Amaute in kham biakna-tau tungah puan adum khat phah ding uh a, tua pen tuipi bawngpi vun tawh khuhin a zawlte a thuah ding uh hi. ^d

12 “Amaute in mun siangtho sunga biak piakna-a kizang khempeuh puan adumin tun ding uh a, tuipi bawngpi vun tawh tuamin, tuate a puakna tal tungah a koih ding uh hi.

13 “Amaute in sumngo biakna-tau tunga vutte luakkhia ding uh a, a tungah puan dupsan a phah ding uh hi. 14 Tua ciangin amaute in a tungah, biakna-tau a biakpiakna-a kizang um le beelte khempeuh, meibung, sa thukna sikka, vutluahna le thehna kuangkumte a tungah a koih ding uh hi. Tua tungah tuipi bawngpi vunte phahin khuh ding uh a, a zawlte a munah a thuah ding uh hi. ^e

15 “Aaron le a tapate in biakna-a vanzat siangthote le biakna na siangthote khempeuh a tun khit uh giahphual suan ding a kiman ciangin Kohath mite a pua dingin a kuan ding uh hi. Ahi hangin amaute in tua a siangtho nate a lawng peuhmah kei ding uh hi; a lawn uh leh a si ding uh hi. Kohath mite in Kikhopna Puanbuk sunga nate a pua ding uh hi. ^f

16 “Siampi Aaron tapa Eleazar in mei-a vak ding sathau, a namtui gimnamtui, a hunhunin an-a biakna le nilh sathaute a uk ding hi. Amah in biakbuk buppi le a sunga nate khempeuh vanzat siangthote le biakna siangthote a uk khawm ding hi,” a ci hi.

17 TOPA in Moses le Aaron tungah, 18 “Levi mite panin Kohath bawng’te a kikhenkhiat loh nadingin thei in. 19 A siangtho pen nate kiangah a pai uh ciangin si lo-a, a nuntak theih nadingun amaute hicisak in: Mun siangtho sungah Aaron le a tapate pai-in amau sep ding le a puak ding ciat uh seh ding uh hi. 20 Ahi hangin Kohath mite tomkha no sung bek nangawn a en dingin a sungah a tum peuhmah kei ding uh hi; a tum uh leh a si ding uh hi,” a ci hi.

Gershon Mite

21 TOPA in Moses tungah, 22 “Gershon mite zong a bawng’te le a innkuanin sim in. 23 Kikhopna Puanbuk-a na sem ding kum sawmthum pan sawmnga ciang pasal khempeuh sim in.

24 “Hih in Gershon bawng’te nasep le a vanpuak ding uh ahi hi: 25 Amaute in mun siangtho puanzakte, Kikhopna Puanbuk, a khuhna le a puanung a khuhna tuipi bawngpi vunte, Kikhopna Puanbuk lutna-a puankhaite, 26 mun siangtho le biakna-tau, buktual umna puanzakte, a lutna-a puanzak khaute, nasep cianga kithawinate khempeuh a pua ding uh hi. Gershon-te in tuate tawh kisai nasep kisam khempeuh a sem ding uh hi. 27 Amaute nasep, puak ding ahi a nasep dangte ahi zongin Aaron le a tapate makaihna bangin a sem ding uh hi. A puak ding khempeuh uh amaute tungah tavuan na pia ding hi. 28 Hih in Gershon bawng’te in Kikhopna Puanbuka a nasep uh ahi hi. Amaute nasep in siampi Aaron tapa Ithamar makaihna bangbang hi ding hi.

Merari Mite

29 Merari mite amau bawng’te le a innkuanin na sim ding hi. 30 Kikhopna Puanbuk sungah nasem ding kum sawmthum pan sawmnga ciang pasal khempeuh sim in. 31 Kikhopna Puanbuk ah na a sep uh ciangin hih in a tavuan ding uh ahi hi: Biakbuk singpek khempeuh, a zawlte, a khuam le a bullente, 32 tuate tawh a tual umna khuamte, a bullente tawh, puanbuk khetphimte, khaute, amau vanzatte khempeuh le amau vanzat tawh kizom na khempeuh a pua ding uh hi. Mikim tungah ama puak ding tang sehsak in. 33 Hih in Merari bawng’te in siampi Aaron tapa Ithamar makaihna zui-a Kikhopna Puanbuk ah a sep ding uh ahi hi,” a ci hi. ^g

Levi Bawng’te Simna

34 Moses, Aaron le mipite makaite in Kohath-te a bawng’te le a innkuanin a sim uh hi. 35 Kikhopna Puanbuk-a nasem dingin a pai kum sawmthum pan sawmnga a pha pasal khempeuh 36 a bawng’ zui-a simin 2,750 a pha hi. 37 Kikhopna Puanbuk a Kohath-te bawng’te khempeuh a vekpi in hih teng ahi hi. TOPA in Moses tunga a thupiakna tawh kizui-in Moses le Aaron in amaute a sim uh hi. ^h

38 Gershon-te amau bawng’te le a innkuante zui-in kisim hi. 39 Kikhopna Puanbuk ah nasem dingin a kuan kum sawmthum pan sawmnga ciang pasal khempeuh, 40 a bawng’te le a innkuante zui-a simin mi 2,630 a pha hi. 41 Kikhopna Puanbuk a, mi peuhmah a vekpi-in hih teng ahi hi. TOPA thupiak zui-in Moses le Aaron in amaute a sim uh hi.

42 Merari mite amau bawng’te le a innkuante zui-in kisim hi. 43 Kikhopna Puanbuk a, nasem dinga a kuan kum sawmthum pan sawmnga a pha pasal khempeuh, 44 amau bawng’te zui-a simin 3,200 a pha hi. 45 Merari bawng’te pana peuhmah a vekpi in hih teng ahi hi. TOPA in Moses a thupiak zui-a Moses le Aaron in amaute a sim uh ahi hi. ⁱ

46 Tuaci-in Moses Aaron le Israel makaite in Levi mite khempeuh amau bawng’te le a innkuante zui-in a sim uh hi. 47 Na sem ding le Kikhopna Puanbuk pua dinga a kuan kum sawmthum pan sawmnga ciang a pha pasal khempeuh, 48 8,580 a pha hi. 49 TOPA in Moses tunga a thupiak bang zui-in mikim tungah a nasep ding le a puak ding a kigen hi. ^j

TOPA in Moses a thupiak bangin tua bangin amaute a kisim ahi hi. ^k