Pro 13 | ZomZIV | STEP | Tapa pil in a pa lamlahna thusim a, mi simmawhte in ahileh taihilhna a ngai kei uh hi.

Proverbs 13

1 Tapa pil in a pa lamlahna thusim a,
mi simmawhte in ahileh taihilhna a ngai kei uh hi. ^a
2 Mihing in a muk gah pana na hoihte nopsakpih a,
mi muanhuai lote in ahileh ngongtatna bek nuam sa uh hi.
3 A kam a kem zote a nuntakna kem hi-a, ^b
a mawk paute ahileh a kisia ding hi. ^c
4 Thadah mi in lunggulh mahmah napi bangmah ngah lo a, ^d
thanuamte deihna ahileh cingtakin kipia hi.
5 Thumaante in zuauthu mudah a, ^e
migilo in ahileh maizumna le mindaina a tun hi.
6 Thumaanna in a citak mi cinga,
gitlohna in mimawhpa a lawnthal hi. ^f
7 Mi khat zawng napi ahau kineih om a, ^g
mi dang khat hau mahmah napi, a zawng kineih om hi. ^h
8 Mi khat a hauhna in a nuntakna tankhia thei a,
mizawng khat in ahileh a kitawnna kam a za kei hi. ⁱ
9 A thumaante’ khuavak tangpha a,
migilote’ meivak ahileh kisumit hi. ^j
10 Kisaktheihna in kitotna bek piangsak a, ^k
pilna ahileh mi ngaihsutpihna a sang thei mi sungah kimu hi.
11 A maan lo sum kiamkiam a,
tawmtawma kholte’ sum khangkhang hi.
12 A tungpak lo lametna in lungsim nasak a,
lunggulhna tangtunna ahileh nuntakna singkung ahi hi. ^l
13 Lamlahna a simmawh mi in thuak dinga, ^m
thupiakna a zahtak mi ahileh pahtakman kipia hi.
14 Mipilte hilhna in nuntakna tuikhuk hi-a, ⁿ
sihna thang panin mi khat kipelhsak hi. ^o
15 Theihtelna hoih in angvanna lawhtak a,
muanhuai lohna lampi ahileh haksa ^{▼▼13.15 Ahikeh muanhuai lohna a kip nei hi} hi.
16 A kidawm thei mi peuhmah theihna tawh gamta a,
mihai in ahileh a haina pholak hi.
17 Migilo kamtaipa in buaina tuak a, ^q
a muantak palai in damna a puak hi. ^r
18 Sektatna a awlmawh lo mi tungah zawnna le maizumna tunga, ^s
puahphat ding a thudon peuhmah kipahtawi hi.
19 Lunggulhna tangtutna in lungtaina hi-a, ^t
mihaite in ahileh gitlohna kiheisan ding kih uh hi.
20 A pilte tawh kikhawlte pil a,
mihaite kithuahpihpa in natna thuak hi. ^u
21 Kamsiatna in mimawhpa delh a, ^v
daupaina ahileh a thumaante’ pahtakman ahi hi. ^w
22 Mi hoihpa in a tate’ tate gouluah ding nusiat a,
mawhneipa hauhna ahileh a thumaan mi adingin kikhol hi. ^x
23 Mizawngpa lo ah an tampi piang thei a,
ahi hangin thutan lohna in a siakmang hi.
24 Ciangduai a zang lo mi a tapa mudah hi-a, ^y
a tapa a it mi in limtakin sek hi.
25 A thumaante in a lungkim zah ne a,
migilote ahileh gilkial uh hi.