Pro 22 | ZomZIV | STEP | Hauh mahmah sangin min hoih deihhuai zaw a; ngun le kham sangin mite sangmuhna hoihzaw hi.

Proverbs 22

1 Hauh mahmah sangin min hoih deihhuai zaw a;
ngun le kham sangin mite sangmuhna hoihzaw hi.
2 A zawng le a hau in neihkhawm nei uh hi;
amaute khempeuh a Bawlpa, TOPA ahi hi. ^a
3 A kidawm thei mi in lauhuaina mu-in bu a, ^b
mimawl in ahileh phusuakin a thuak hi. ^c
4 Kiniamkhiatna le TOPA kihtakna in
hauhna, pahtawina le nuntakna a tun hi. ^d
5 A gilote lampi ah lingte le thangte om a,
a nuntakna a kem mi in ahileh tuate gamlapi-ah a pel hi.
6 Naupang khat a pai nading lampi ah pantah ^{▼▼22.6 Ahikeh patpih} lecin, ^f
a tek dongin a pial nawn kei ding hi. ^g
7 A haupa in a zawngpa uk a,
a leitawipa in a leitawinapa nasem a suak hi.
8 Gitlohna a vawhte in lungkhamna at a,
ama hehna ciangduai kisuksiatsak ding hi. ^h
9 A hawmsem mi in mizawngte a an hawm ahi manin ⁱ
amah thupha kipia a suak hi. ^j
10 Misimmawhte hawlkhia lecin,
kiselna om loin, kitotna le ki-engkona bei ding hi. ^k
11 Lungsim siang a itte le a kamsiamte in
kumpipa lawmin a nei ding hi. ^l
12 TOPA mit in theihna vil gige a,
mi muanhuai lote kammalte ahileh a lawhsamsak hi.
13 Zongzawte in, “A pualam ah humpi om!” ^m
ahikeh “Kongzing ah hong kithat kha inteh!” ci uh hi.
14 Angkawmnu kam in gum thukpi hi-a; ⁿ
TOPA thangpaihna nuai-a om mi tua sungah a kia ding hi.
15 Naupang lungsim ah haina a lomin om a,
sekna ciangduai in tuate ama tung pan nawhkhiamang ding hi.
16 Hauh beh nadingin mizawngte a nengniamte le
mihaute letsong piate - a nih in a zawng ding hi.

Mipilte’ Thugente

17 Mipilte thugente thusim inla ngai in;
kong hilhte na lungsim ah kivawh in. ^o
18 Na lungsim ah vom lecin na lungkim dinga,
na kama na zatpah ding ahi hi.
19 TOPA na muan theih nadingin
tuni-in nang mahmah kong hilh hi.
20 Keimah in nang adingin
thu kuppihna le theihna kamvui sawm thum ^{▼▼22.21 Ahikeh a hilian in kigelh lo; ahikeh a hoih pen in kigelh lo},
21 nang hong sawlpa tungah
hoihtaka na dawn theih nadingin
tumaan le a muantak hong hilh in gelh khin hilo ka hi hiam? ^q
22 Zawng tah ci-in mizawngte zawhthawhbawl kei inla,
thukhen zum ah a tasamte nopneh kei in. ^r
23 Amaute tangin TOPA dinga, ^s
amau van a sutte ama’n a sut ding hi. ^t
24 Mi lungtomte lawmin nei kei inla,
a heh baihte tawh kikhawl kei in;
25 a gamtat zuikha-in
nangmah thang kisiah na suak ding hi.
26 Kiciamna-in na khut beng kei inla,
leiba lohsak dingin kiciam kei in; ^u
27 a dit nading nei kei lecin na zat kimlai
na lupna kidokkhia ding hi. ^v
28 Na pute phuhsa
tanglai kigisuangte khin kei in. ^w
29 Nasep a siam mi na mu hiam? ^x
Kumpipa na sem dinga;
mi mawkmawk na a sem kei ding hi.