Pro 7 | ZomZIV | STEP | Ka tapa aw, ka thute kem inla, ka thupiakte na sungah khol in.

Proverbs 7

Angkawmnu Thu Vauhilhna

1 Ka tapa aw, ka thute kem inla,
ka thupiakte na sungah khol in.
2 Ka thupiakte kem lecin na nungta ding hi; ^a
kong hilhte na mit nauta bangin cing in.
3 Na khutmete ah vial in;
na lungtang pek tungah gelh in. ^b
4 Pilna kiangah, “Ka sanggamnu na hi hi,” ci inla,
theihtelna na tanau-in man in;
5 amaute in angkawmnu panin nang hong kem ding uh a,
uklah zi kamzol panin hong kem ding uh hi. ^c
6 Ka inn tawhlet a vathangheng vangah
ka khuadak hi;
7 mimawlte lak, tangvalnote lakah
thukhenteltheihna a nei lo
khangno khat ka mu hi. ^d
8 Amah tuanu innkiu lampi ah paisuk a,
tuanu inn lam manawhin a pai hi;
9 tua hunin ni tumta a, ^e
khua mui-in khua mialta hi.
10 Tua ciangin a kizuak numei bangin a kizem numei khat
ngim siamna khat neisa-in amah dawn dingin a kuankhia hi.
11 (Tuanu suahngalin thumang lo-a,
inn ah a om hithiat ngei kei hi;
12 kongzing lak, tual awngte le
mun kiu teng ah mi a buk hi.)
13 Tuanu in amah mancipin tawpa, ^f
maingaltakin: ^g
14 “Ka innah kilawmtakna biakna ^{▼▼7.14 Tang ngeina-in thu nuama biakna} ka bawl a; ⁱ
tuni-in ka thuciam ka tangtun hi.
15 Tu-in nang muak dingin kong pusuak hi;
kong zon leh kong mu ta hi!
16 Ka lupna Egypt pana puangial hoihin
ka tuam khin hi.
17 Ka lupna, myrrh, aloes le cinnamon
gimnamtuite in ka namsak khin hi. ^j
18 Hong pai in, zingsang dong itna tui dawnkhawm ni;
eigel kia in itna nuamzat ni! ^k
19 Ka pasal inn ah om lo hi;
khual gamlapi-a zin ahi hi.
20 A sum-ip dimin sum pua-a, khaliik mateng
inn ah hong ciah lo ding hi,” a ci hi.
21 Zolna kam in amah lampialsak a,
ama kamnel in a khem zo hi.
22 Amah a kigawh nading mun zuan bawngtal bang, ^l
thaltang in a sin a sutlet dong ^m
a awk nading khaukual ^{▼▼7.23 Hebrew ah hih gual kician lo hi} zuan sazuk ^{▼▼7.23 Syriac (Septuagint zong en in): Hebrew in mihai} bang
23 vasa in thang a bawh bangin bawh a,
a nuntakna bei nading ahilam a thei kei hi. ^p
24 Tua hi-a ka tapate aw, tu in na ngai un; ^q
ka thugen thupisim un.
25 Tua numei lam ngaihsun kei unla,
a lampi pialsan un.
26 Tuanu in mi tampitak liamsuah a,
a thahte mi thahat ngentang ahi hi.
27 Ama inn han ^{▼▼7.27 Hebrew ah Sheol} lam zuatna lam lianpi hi-a,
sihna inndei sung tunna ahi hi.