Psa 118 | ZomZIV | STEP | TOPA hoih ahi manin ama tungah lungdam ko un; ama itna kip tawntung hi.

Psalms 118

1 TOPA hoih ahi manin ama tungah lungdam ko un; ^a
ama itna kip tawntung hi.
2 Israel in: ^b
“Ama itna kip tawntung hi,” ci uh hen.
3 Aaron innkuante in:
“Ama itna kip tawntung hi,” ci uh hen.
4 TOPA a kihtate in: ^c
“Ama itna kip tawntung hi,” ci uh hen.
5 Ka lunggim hunin TOPA ka sam a, ^d
ama’n hong dawngin kei hong khahkhia hi.
6 TOPA in kei hong ompih hi; ka lau kei ding hi. ^e
Mi in kei bang hong cih thei ding ahi hiam?
7 TOPA in kei hong ompih hi; amah kei hong huhpa ahi hi. ^f
Ka galte tungah gualzo-in ka en ding hi. ^g
8 Mihing i muan sangin ^h
TOPA belh hoihzaw hi. ⁱ
9 Gam-ukte i muan sangin
TOPA belh hoihzaw hi.
10 Minamte khempeuh in kei hong umcih uh hangin
TOPA minin amaute ka khaktan hi. ^j
11 Amaute in ka kim ka pam ah hong umcih uh hangin ^k
TOPA minin amaute ka khaktan hi.
12 Amaute in khuaipi hon bangin kei hong pumtuam uh hangin ^l
linglak kang bangin manlangin a simang uh hi; ^m
TOPA minin amaute ka khaktan hi. ⁿ
13 Kei hong kithalsawnin ka puk dek hangin
TOPA in kei hong huh hi.
14 TOPA ka thahatna le ka zaila hi a; ^o
keima hotkhiatna a suak zo hi. ^p
15 Gualzawhna le lungdama kikona in
a thumaante puanbuk sung thawn a: ^q
“TOPA khut taklam in a thahat nate sem khin ta!
16 TOPA khut taklam a sangin kilamto a;
TOPA khut taklam in a thahat nate sem hi!” ci hi.
17 Kei si loin ka nungta dinga,
TOPA sepsa ka tangko ding hi. ^r
18 TOPA in nasiatakin hong taihilh hangin ^s
sihna hong thuaksak zen lo hi. ^t
19 Thumaanna kongpite kei hong hon in, ^u
lutin TOPA tungah lungdam kong ko ding hi. ^v
20 Hih in TOPA kongpi hi-a,
thumaan mite lut theih nading ahi hi.
21 Kei hong dawng na hi manin lungdam kong ko ding hi.
Keima hotkhiatna na hi ta hi. ^w
22 Inn lamte nolh suangin ^x
innkhum nang suang suak zo hi.
23 TOPA in hih sem khin a,
eite mitmuh in a piandang hi. ^y
24 Tu-ni TOPA bawlsa ahi hi;
eite’n nuamsa in kipak ni. ^z
25 TOPA aw, kote hong honkhia in; ^aa
TOPA aw, kote zawhna hong pia in.
26 TOPA mina hong paipa thupha ngah ahi hi.
TOPA inn panin nang ^{▼▼ 26 Hebrew ah a tam genna} thupha kong pia uh hi. ^ac
27 TOPA in Pasian hi-a, ^ad
ama khuavak eite tungah hong tangsak hi. ^ae
Khut ah singhiang tawisa in,
biakna-tau’ kite dongin ^{▼▼ 27 Ahikeh biakna pawite khau-in henkhawmin /tawi} pawi bawlin hong kizomsak hi. ^ag
28 Nang ka Pasian na hi hi, lungdam kong ko ding hi;
nang ka Pasian na hi hi, nang kong tawisang ding hi. ^ah
29 TOPA hoih ahi manin ama tungah lungdam ko un;
ama itna kip tawntung hi.