Psa 77 | ZomZIV | STEP | Tumtheih makaipa ading. Jeduthun ading. Asaph phuah. Phatna-la khat. Pasian tungah huhna ngenin ka kikokhia hi; Pasian hong zak dingin ka kikokhia hi.

1 Pasian tungah huhna ngenin ka kikokhia hi;
Pasian hong zak dingin ka kikokhia hi.
2 Ka lungdon ciangin Pasian ka sam hi; ^a
zanin ka khut gimsak loin ka zakkhia a, ^b
ka hinna a kihehnem thei kei hi. ^c
3 Pasian aw, nang hong phawkin ka mau hi; ^d
ka lungsim ka geelgeel a ka kha a bah ta hi. ^e
4 Ka mit na mitsisak kei a,
lungkham lua-in ka pau kei hi.
5 A beisa nite le kum sawtpi laite ^f
ka ngaihsun hi;
6 zana ka la sakte ka phawk hi.
Ka lungsim in geelgeelin ka kha in dong a:
7 “Topa in eite hong nial den tam maw?
Ama angvanna hong lak kik nawn kei ve maw? ^g
8 Ama itna kip mangsuakta hi ve maw? ^h
Ama thuciam kipeel den ta ve maw? ⁱ
9 Pasian in a lainat ding mangngilh ahi tam? ^j
Amah hehin ama khuatuahna dok kik ta ahi tam?” ci hi. ^k
10 Tua ciangin hih thu: “Sang Penpa taklam khut seplai kumte, ^l
ngen lai ning,” ci-in ka ngaihsun hi.
11 TOPA’ sepsate ka phawk ding hi;
hihi, tanglai-a na bawl nalamdangte ka phawk ding hi.
12 Na nasepte khempeuh ka lungngaingai dinga, ^m
a thahat na nasepte khempeuh ka ngaihsunsun ding hi. ⁿ
13 Pasian aw, na lampite a siangtho hi.
Eite Pasian zah a lian bang pasian om ahi hiam? ^o
14 Nalamdangte a bawl Pasian nang na hi-a; ^p
mite lakah na vangliatna na lakkhia hi.
15 Na khut thahatin nangma mi,
Jacob le Joseph’ suante na tankhia hi. ^q
16 Pasian aw, tuite in nang hong mu uh a,
tuite in nang hong mu-in a kivei uh hi; ^r
tui thuk mahmahte a kilok damdam uh hi.
17 Meiite in tui buasuk a, ^s
vanging in huihkhuate a thawn hi; ^t
na thaltangte a suktaan a totaan hi. ^u
18 Pingpei lakah na vanging kiza a, ^v
na khuaphia in leitung buppi taanin, ^w
leitung lingin a kising hi. ^x
19 Na khelam tuipi tungah pai a, ^y
na lamlianpi tuihatte tungah pai napi,
na khekhapte a kimu kei hi.
20 Nang mah in na mite tuuhon bangin ^z
Moses le Aaron’ khutin na makaih hi. ^aa