Psalms 78

Asaph phuah maskil ▼

▼ 0 Thulu: Lailam ahikeh tumtheihlam kamzat hi kha ding

khat.

1 Ka mite aw, kong hilhna za un; ^b
ka kama ka gen thute ngai un.
2 Gentehnate zangin ka kamka dinga, ^c
tanglai nate, a kisel nate ka pholak ding hi -
3 tuate in i theihsa le i zaksa nate,
i pate in hong gensa nate ahi hi. ^d
4 Amau tate tungah tua thute i im kei ding hi; ^e
ei khita khangte tungah ^f
a phattak TOPA septe, ^g
ama vangliatna le ama bawl a lamdangte i gen ding hi. ^h
5 Amah in Jacob adingin thukipte pia a,
Israel sungah thukham kipsakin
i pate tungah a tate uh a hilh dingun
thu a pia hi;
6 tua in amau khita khangte le a suak nai lo naupangte nangawn in thei a, ⁱ
amau zong a tate uh tungah
a gensawn theih nading uh ahi hi.
7 Tua hileh amaute in a muanna uh Pasian ah nga ding uh a,
a nasepsate mangngilh loin ^j
ama thupiakte zui ding uh hi. ^k
8 Amaute, a lungkhauh a lehdo thei khang mite, ^l
Pasian tungah a lungtangte uh a citak lo -
ama tungah a lungsim uh a muanhuai lo,
a pate uh tawh a kibang kei ding uh hi. ^m
9 Epharaim mite in thal a tawi uh hangin
galdo ni-in a lehtai uh hi; ⁿ
10 amaute in Pasian thukhun zui loin, ^o
a thukham banga nuntak ding a nial uh hi. ^p
11 Amaute in ama bawlsate le
amaute a lahsa nalamdangte mangngilh uh hi. ^q
12 Amah in Egypt gama Zoan kual ah ^r
a pate uh muhin nalamdangte bawl hi. ^s
13 Tuipi kikhensak a, a maute a kantansak hi; ^t
amah in kawm bangin tui a dingkipsak hi. ^u
14 Amah in sunin amaute meii-in makaih a,
zan nilohin meitangin a makaih hi. ^v
15 Sehnel-gam ah suangpite sukham in, ^w
tuipite zah a tam tui, amaute pia hi;
16 suangpi heng pan luite suakkhiasak a,
gunte bangin tui a luangkhiasak hi.
17 Ahi hangin ama tungah amaute mawh lai veve uh a, ^x
sehnel-gam ah Sang Penpa a langdo veve uh hi.
18 Amau lunggulh an a ngetna uh ^y
thei gige in Pasian a zia-et uh hi. ^z
19 Amaute Pasian langah pau in, ^aa
“Pasian in sehnel-gam ah sabuai phah thei ahi hiam?
20 Suangpi a sat ciangin tui phulkhia a
luituite tampitak a luang hi. ^ab
Ahi hangin amah’n an zong hong pia thei ngap ding ahi hiam?
A mite sa hong puak thei ding ahi hiam?” ci uh hi. ^ac
21 Amaute gen TOPA in a zak ciangin heh mahmah a,
Jacob tungah a meikuang khia-in, ^ad
Israel tungah a thangpaihna khang hi;
22 ahang in, amaute in Pasian um loin
ama hutna zong a muang zo kei uh hi.
23 Hi napi amah in tunga huihkhuate thu pia a,
vante’ kongpite hongin ^ae
24 mite nek dingin manna zusak a, ^af
amaute van antang a pia hi.
25 Mite in vansawltakte’ anlum ne uh a;
amaute nek zawh zahzah a pia hi.
26 Vante panin nisuahna lam huih khah a, ^ag
a vangliatna-in leitaw-lam huih a pikhia hi.
27 Amaute tungah leivui bangin sa zusak a,
tuipi gei sehnel bangin a leng thei vasate a zusak hi. ^ah
28 Amah in amaute giahphual sung
puanbuk kim khempeuh ah a tusak hi.
29 Amah in amaute duh mahmah pia ahi manin
a khamval dongun a ne uh hi. ^ai
30 Ahi hangin a duh mahmah uh an a kiheisan ma uh,
amaute kam sungah a muam lai nangawnun ^aj
31 amaute tungah Pasian hehna khanga
amaute laka a thakhauh pente thatin,
Israel tangvalte a phukpai hi. ^ak
32 Hizahtak hi napi, amaute mawh lailai uh a;
nalamdang hizahta laklak taleh amaute in a um tuan kei uh hi.
33 Tua ciangin a nite uh mawk beisak a, ^al
a kumte uh a lauhuaipi-in a beisak hi.
34 Pasian in a maute a thah sial in amaute’n amah zong ding uh a;
lawptakin amah a zuan kik uh hi.
35 Amaute in Pasian, amau Suangpi ahilam, ^am
Sang Pen Pasian amaute Tanpa ahilam a phawk uh hi. ^an
36 Ahi hangin amaute in amah maitang phat uh a;
a leii un amah khem in; ^ao
37 a lungsim uh ama tungah thutak lo-a, ^ap
ama thukhun ah a muanhuai kei uh hi.
38 Hinapi aman lainat veve a; ^aq
amau tatkhialhnate maisakin
a siasak kei hi.
Hun khat khit hun khat a hehna ki-ip a, ^ar
a thangpaihna a kimin a suahkhia kei hi.
39 Amah in amaute ci-le-sa hi in ^as
a kileh kik nawn lo huihdam nung bang ahilam uh phawk hi. ^at
40 Amaute in sehnel-gam ah amah lehdo pahpah in
gamtul ah amah lunggimsak tazen uh hi! ^au
41 Amaute in Pasian zia-et kikkik uh a; ^av
Israel Siangtho Pa a lunggimsak uh hi. ^aw
42 Amaute in a vangliatna phawk lo uh a - ^ax
a nengniamte pan a tatkhiatna,
43 Egypt a lim lamdangte a lah nite le ^ay
Zoan kuala ama nalamdangte a phawk kei uh hi. ^az
44 Amah in a gunte uh sisan suaksak a; ^ba
amaute in luite panin tui a dawn thei kei uh hi.
45 Amah in tho honpi sawl-a amaute gaisak in; ^bb
uiphukte sawl-a amaute a susiasak hi. ^bc
46 Amah in a ankungte uh kauphe pia a, ^bd
a ankung gahte uh kaukhuphon a pia hi.
47 Amah in a lengguite uh gialin siasak a, ^be
a theithek gahte uh vukkhalin a siasak hi.
48 A gannote uh gialpi dengsak a,
a gan khawite uh kektangte a dengsak hi. ^bf
49 Ama lungsona amaute tungah kuangsak a, ^bg
ama thangpaihna, lungkimlohna le galneihna ahi -
a siasak vansawltak honkhat a khahkhia hi. ^bh
50 Amah in a heh nading lampi khat bawl a;
sihna pan amaute hawi tuan loin
pulpi a tungsak hi.
51 Amah in Egypt ta masa khempeuh sattuk a, ^bi
Ham’ puanbukte sunga pasal hat gah masate a satpuk hi.
52 Ahi hangin a mite tuuhon bangin paikhiatpih a; ^bj
tuute bangin sehnel-gam kantan in makaih hi.
53 Amaute bittakin makaih ahi manin a lau kei uh hi;
ahi hangin tuipi in a galte uh a tuumcip hi. ^bk
54 Tua bangin amaute a gam siangtho gamgi tun a,
a khut taklamin a laksa mualtung gamah a tun hi. ^bl
55 Amaute mai-ah minamte nawhkhiatsak-in, ^bm
a gamte uh amaute tanh dingin pia hi;
amaute inn ah Israel behte a tengsak hi.
56 Ahi hangin amaute in Pasian zia-et in,
Sang Penpa lehdo lai uh hi;
ama ngeinakipte a zui kei uh hi.
57 A pate uh mah bangin ciktak loin muanhuai lo uh a,
thalpeu suihkhialh muan theih loh bang uh hi. ^bn
58 Amau munsangte-in amah hehsak uh a; ^bo
a milimte-un ama hazatna a phonglo uh hi. ^bp
59 Pasian in amau thu a zak ciangin heh mahmah a; ^bq
Israel a nolh kiuhkeuh hi. ^br
60 Amah in mite laka a lam a puanbuk, ^bs
Shiloh a, a munsiangtho a nusia hi. ^bt
61 Amah in a thahat thukham singkuang sal tangsak a, ^bu
a thupina galte khut ah a pia hi.
62 A mite namsau thatsak a; ^bv
ama gouluahte tungah a heh mahmah hi. ^bw
63 A tangvalte uh mei in kangtum a, ^bx
a nungakte un mo la a sa kei uh hi; ^by
64 a siampite uh namsau in that a, ^bz
amau meigongnute kap zong a kap thei kei uh hi.
65 Tua ciangin zu pengnawng ihmu khanglo mipa bangin
a ihmutna pan Topa a khanglo hi. ^ca
66 Amah in a galte satthuk a;
amaute a maizum den dingin a koih hi. ^cb
67 Tua ciangin Joseph’ puanbukte nolh a,
Ephraim beh a teel kei hi; ^cc
68 ahi hangin Judah beh teel a, ^cd
a it Zion Vum a teel hi. ^ce
69 Asannate bangin a munsiangtho lam a, ^cf
a kipden dinga a phuhsa leitung a bangsak hi.
70 Amah in a nasempa David teel a,
tuuhuangte panin a la hi; ^cg
71 amah in tuucing kimlai ^ch
a mite ahi Jacob, ^ci
ama goutanh ahi Israel cing dingin amah a puak hi.
72 Tuateh David in lungsim citakin amaute cinga;
khutsiamtakin amaute a makaih hi. ^cj