Rev 11 | ZomZIV | STEP | Tehna ciang tawh kibang pumpeng khat kei hong kipia a, “Pai inla Pasian biakinnpi le biakna-tau tehin, tua lai-a om a biate sim in.

Revelation of John 11

Teci Nihte

1 Tehna ciang tawh kibang pumpeng khat kei hong kipia a, “Pai inla Pasian biakinnpi le biakna-tau tehin, tua lai-a om a biate sim in. 2 Ahi hangin a tual puanung pen Gentile-te tunga kipiasa ahi manin teh lohin nusia in. Amaute in tua khuapi siangtho kha 42 sung a tuancil ding uh hi. 3 Ka teci nihte vangliatna ka pia dinga, amaute in ippi puan silhin, ni 1,260 sung gen kholhna a gen ding uh hi,” ci-in hong kigen hi. 4 Hihte, leitung Topa mai-a a ding olive kung nihte le meivak tunna nihte ahi hi. 5 Mi khatpeuh in tuate natsak a sawm leh amaute kam panun meikuang pusuakkhia-in a galte uh valhtum hi. Hih in amaute a nasak nuam peuhpeuh sih pelmawh nading zia ahi hi. 6 Hih mite in amaute thugenkholh hun sung teng guah a zuk loh nadingin van khakcip theih nading vangliatna a nei uh hi. Tua banah amaute in tui sisan suaksak theihna le amaute deih hunhun-a pulpi tawh leitung a thuaksak theih nading uh vangliatna a nei uh hi. ^a

7 Amaute in a teci panna uh a man khit uh ciangin Kawhawmpi pana hong paito gamsa in amaute do ding a, zo-in a that ding hi. 8 Amaute luang, a Topa uh zong a kilhlupna mun Sodom le Egypt ci-a tehpih a kinei khuapi lian sung, lam lian lai-ah a lum ding hi. 9 Ni thum le alang sung mite, beh, pau le minam khempeuh pana mite in tua misi luangte vuisak loin a enen ding uh hi. 10 Hih kamsang nihte in leitunga teng mite thuaksiasak ngei zo uh ahi manin leitung a teng mite kigual zosakin ai ding uh a, khat le khat letsong a kipia ding uh hi. ^b

11 Ahi hangin ni thum le ni lang sungin amaute sungah Pasian tung pana nuntakna huu lutin, a khe un ding ding uh a, amaute lau mahmah ding uh hi. 12 Tua ciangin amaute in vantung panin, “Hih lai ah hong paito un,” a ci aw khat a za uh hi. A galte un amaute a et zuizui lai mah un meii kawm lakah a paito uh hi. ^c

13 Tua laitak tektekin zin nakpi-in linga, khuapi seh sawm suah seh khat a kicim hi. Tua zinling ah mi tul sagih si-a, a nungta lai mite lau lua mahmah in van a Pasian a minthangsak uh hi.

14 Gimna a nihna bei khin zo-a, gimna thumna a tung pah ding hi.

Pengkul a Sagihna

15 Vansawltak a sagihna in a pengkul muta, vantung ah aw ngaih mahmah in: ^d

“Leitung gam teng i Topa gam le ama Christ gam suak zo a, ^e
amah in a tawntung in uk den ding hi,”a ci hi. ^f

16 Tua ciangin Pasian mai-a amau kumpi tokhoma tu upa sawmnih le lite in bokin bia uh a: 17 “A om densa, tu laitaka om,

Thahatpen Topa Pasian aw,
a lian mahmah na vangliatna na la zo a, ^g
gam uk dingin kipan khin na himanin
nang tungah lungdamna kong puak uh hi. ^h
18 Minamte heh uh a; ⁱ na thangpaihna hong tung zo hi.
Misite tunga thukhen ding hun le ^j
na nasem kamsangte, na min a zahtak na misiangte aneu alian - in ^k
pahtakman piak ding hun le
leitung a susiate suksiat ding hun, hong tung zo hi,”a ci uh hi.

19 Tua ciangin vantunga Pasian biakinnpi kihong a, ama biakinnpi sungah ama thukhun singkuangpi kimu hi. Tua mun ah kek kia in khua phia zalzala, van ging damdam in zin linga, gialpi a kia hi. ^l