Rev 5 | ZomZIV | STEP | Tua ciangin kumpi tokhom tunga tupa taklam ah a langniha kigelh ciamtehna sagiha kiciamteh laizial khat ka mu hi.

Revelation of John 5

Laizial le Tuuno

1 Tua ciangin kumpi tokhom tunga tupa taklam ah a langniha kigelh ciamtehna sagiha kiciamteh laizial khat ka mu hi. 2 Tuateh a thahat vansawltak khat in, “Ciamtehna phela, laizial zal dingin kua cing ahi hiam?” ci-a ngaihtaka kitangko ka mu hi. 3 Ahi hangin vantung ahi zongin, leitung ahi zongin, leinuai ahi zongin, laizial a zal gen loh a sung nangawn a en thei kuamah a om kei hi. 4 Laizial a zal ding ahikeh a sung en dinga a cing nangawn kuamah a kimuh loh manin kah cihtakin ka kap hi. 5 Tua ciangin tua upate khat in kei kiangah, “Kap kei in! En in, Judah beh a Humpinelkai, David Zungpi gualzo ta hi. Amah in tua laizial le a ciamtehna sagihte a hong thei hi,” hong ci hi. ^a

6 Tua ciangin a kigosa hileh kilawm Tuuno khat, tua kumpi tokhom laizangah dinga, a nungta ganhing lite le upate in a kualkhum uh ka mu hi. Amah in ki sagih le mit sagih nei a, tuate, leitung khempeuh a kisawlkhia Pasian kha ^{▼▼5.6 Ahikeh Kha kop sagih} sagihte ahi hi. 7 Amah pai-in kumpi tokhom tunga tupa taklama laizial a la hi. 8 A lak khit ciangin tua a nungta ganhing lite le upa sawmnih le lite, Tuuno mai-ah a boksuk uh hi. Amaute in harp khat ciat nei uh a, misiangte thungetna ahi, gimnamtui tawh a dim kham kuangkumte a tawi uh hi. 9 Amaute in lathak khat, ^c

“Nang hong kigo zo a,
na sisan tawh Pasian ading mi,
beh kim, pau kim, mi kim, nam kim pan
lei khin zo na hi manin tua laizial la a,
a ciamtehna phel dingin na kilawm hi. ^d
10 Nangmah in amaute kumpi-gam khat le kote Pasian nasem ding siampi-in na bawl khin zo a, ^e
amaute in leitung a uk ding uh hi,” ci-in a sa uh hi. ^f

11 Tua ciangin ka en a, vansawltak tampi, tul mun tul tampi le tulsawm mun tulsawm tampite aw ka za hi. Amaute in tua kumpi tokhom le a nungta ganhingte le upate a umcih uh hi. 12 Amaute in, ^g

“A kigosa Tuuno,
vangliatna, hauhna, pilna, hatna, pahtawina, minthanna le
phatna ngah dingin kilawm hi,” ci-in ngaihtakin a sa uh hi. ^h

13 Tua ciangin vantung, leitung, leinuai, tuipi tung le tuate sunga om a kipiang sakte khempeuh in:

“Kumpi tokhom tunga tupa le Tuuno tungah
phatna, pahtawina, minthanna le vangliatna
a tawntungin om den ta hen!” ci-in la a sak uh ka za hi. ⁱ

14 A nungta ganhing lite in, “Amen,” ci uh a upate in bokin a bia uh hi. ^j