Rut 2 | ZomZIV | STEP | Tu-in Naomi in a pasal lamte tanau Elimelech bawng’te Boaz kici mi gina kinaipih khat a nei hi.

Ruth 2

Ruth le Boaz Kimu

1 Tu-in Naomi in a pasal lamte tanau Elimelech bawng’te Boaz kici mi gina kinaipih khat a nei hi. ^a

2 Moab numei Ruth in Naomi kiangah, “Lo ah hong kuansak inla, hong mu-a hehpihhuai hong sa peuhpeuh nunga a nusiat uh ansanghte hong tawmsak in,” a ci hi. ^b

Naomi in tuanu kiangah, “Ka tanu aw, va kuan in,” a ci hi. 3 Tua ciangin amah paikhia a, anlate laknasa lolai-ah ansangh a va kaikhawm hi. Tua a kaihkhopna mun pen Elimelech bawng’ pana Boaz ii lo na hi hi. ^c

4 Tua khit phetin Bethlehem pana hong tung Boaz in anlate hopih in, “Note tawh TOPA omkhawm ta hen,” a ci hi. ^d

Amaute in, “TOPA in thupha hong pia hen!” a ci kik uh hi. ^e

5 Boaz in a anlate ukpa kiangah, “Hua numei kua ta hiam?” ci-in a dong hi.

6 A ukpa in, “Amah Naomi tawh Moab pana hong ciah kik Moab numei ahi hi. 7 Tuanu in, ‘Nong hehpihna-in an late nunga buhkung lakah a sanghte hong khawmsak in,’ hong ci hi. Amah lo sungah vakvakin zingsang a kipan tu dong niliim ah tomvei sung a khawl loh buang na semsuak hi,” ci-in a dawng hi. ^f

8 Tua ciangin Boaz in Ruth kiangah, “Ka tanu aw, na ngai in. Lo dangah pai-in ansangh zong kei inla hitak panin paikhia kei in. Ka nasem numeinote tawh omkhawm in. 9 Pasalte an laknasa en gige inla numeinote nungteng zui in. Pasalte in bangmah hong cih loh nadingun ka gen sa ahi hi. Tuateh na dang a tak peuhpeuh ciangin pai inla pasalte tui dipsa tuibeel sunga dawn in,” a ci hi.

10 Tua takteh amah leilam nga-in a boksuk hi. Amah in, “Bang hangin gamdang mi khat lel - keimah in nang maipha mu ka hi hiam?” a cikhia hi. ^g

11 Boaz in, “Na pasal sih nungsang na teknu adingin na nasepna teng - na nu na pa le na pianna gam na nusiat a, na theih ngei loh mite tawh tengkhawm dinga nong paina hong kigenkhin zo hi. 12 Na sepnasa ah TOPA in hong thukkik ta hen. Ama khanuai beel dinga nong paina TOPA, Israel-te Pasian in azah tampi in pahtakman hong pia ta hen,” ci-in a dawng hi. ^h

13 Tuanu in, “Ka topa aw, na maipha hong musak denin, na nasem numeinote khat hi lo napi-in kei nong hehnema kamdamin nong hopih hi,” a ci hi. ⁱ

14 An nek hun ciangin Boaz in tuanu kiangah, “Hiah hong pai in. Anlum la-in lenggah zuthuk lakah diah in,” a ci hi. ^j

Tuanu anlate tawh a tutkhawm ciangin an kansa pawlkhat a pia hi. Amah in a kham dong ne a, pawlkhat a khamval hi. 15 Ansang kaikhawm dinga a din ciangin Boaz in a mite kiangah, “Buhphalte lak nangawn ah na khawmsak unla amah nawngkaisak kei un. 16 Tua sangsikin lom hensate lak pan dokkhia-in a top dingin nusiat un, amah tai kei un,” a ci hi. ^k

17 Tua ciangin Ruth in nitak dong lo-ah ansang a kaikhawm hi. Tua ciangin ama khopsa mangbuh-hamte cil-a ephah ^{▼▼2.17 Tua pen seng 3/5 bang (litre 22 bang)} khat khawng a pha hi. 18 Amah in khuapi sungah pua-a a teknu in a kaikhopsa zah a mu hi. Ruth in a an khamval teng puak-a amah a pia hi. ^m

19 A teknu in tuanu kiangah, “Tuni’n koi-ah na kaikhawm a? Koi-ah na va sem na hia?” ci-in donga, “Nang hong phawk kha mipa in thupha ngah hen,” a ci hi. ⁿ

Tua ciangin Ruth in a teknu kiangah, a nasepna mun neipa thu a gen hi, “Tuni-a ka nasepna pa a min Boaz ahi hi,” a ci hi.

20 Naomi in a monu kiangah, “TOPA in thupha pia hen! Tuapa in a sisate le a hing laite tunga a migitna a khawlsak tuan nai kei hi,” a ci hi. Amah in, “Tua mipa i kinaipih ahi hi; amah i tanaubul-tankhiapa khat ahi hi,” ci-in a monu tungah a genbeh lai hi. ^o

21 Tua ciangin Moab numei Ruth in, “Amah in kei kiangah, “Ka nasemte in an khempeuh a lak khit mateng amau tawh omkhawm in,” nangawn hong ci lai hi,” a ci hi.

22 Naomi in a monu Ruth kiangah, “Ka tanu aw, ama numeinote tawh na kithuah ding hoih mah ding hi; bang hang hiam cih leh midang khatpeuh lo ah nang hong kibawlsia thei ding hi,” a ci hi.

23 Tua ciangin mangbuh le mangbuh-ham lakkhit mateng Boaz nasem numeinote tawh Ruth a kithuahkhawm hi. Tuateh a teknu tawh a omkhawm hi.