Luke 4

Seten uqa Jisas temdon

(Matju 4.1-11; Mak 1.12-13)

1Odocob Jisas Kis Gun cacawac men uqa Jodan Wadec ceseli hon. Odocob Kis Gun iwaldocob wadauna
(4.1)Age je Matju 3.1na nijia eu feiga.
nuen.
2Ono deel 40 odi bibilen leceb Seten temdon. Saen eu cunug uqa ceteh oso qee jel. Eunu deel 40 hedocob uqa wen don.

3Odocob Seten uqa Jisas madon, “Hina Anut Melahfi meen i madocom sab ibuldocob jaga,” don.

4Odocob Jisas jejeg hewi madon, “Anutna jaqec je eu odi madena:

‘Sab jec himec dana cebac bilec qee adena,’ ena,” don.
(Loo 8.3)

5Odocob Seten uqa Jisas ehudeceb aluhna timesi uqa Jisas mahamaha cul cunug mahuc bahic ihacdon. 6Odimei Seten madon, “Maha cul eu ija mugumi. Hina amina gob cehimeg ijanu cuha fecemfi ijana gagadic odoc cunugca agena tumutum cahulecca ihigen. Dana oso gawifig ija uqa utigen. Age cehewanaga eu cunug hina ihecnu ihoc,” don.

8Odocob Jisas jejeg hewi madon, “Anutna jaqec je odi madena:

‘Tibud uqa hinana Anut uqanu cuha faga,
uqa himec cewel utugale!’ ena,” don.
(Loo 6.13)

9Odocob Seten uqa Jisas ehudeceb Jerusalem ono belesin. Odimesi tempel qabna timesi mudeceb tawimesi madon, “Anutna jaqec je eu odi madena:

‘Anut uqana ensel maadeceb
hina jaim meenna qee tudoiaunnu age hina ebenegana hewihi ehi ni mihuqagan,’ ena.
(Buk Song 91.11-12)

Eunu hina Anut Melahfi ene bitacimeg tonoga,” don.

12Odocob Jisas jejeg hewi madon, “Anutna jaqec je odi madena:

‘Tibud, hinana Anut, eu cain temdu fagaun,’ ena,” don.
(Loo 6.16)

13Odocob Seten uqa Jisas jic filfilna temdu hedumei cuculdi haun saen me osona temdugiannu nuen.

Jisas uqana cabi Galili hatu ono sanan men

(Matju 4.12-17; Mak 1.14-15)

14Odocob Jisas uqa Kis Gunna gagadic odoc uqaca bibilen Galili hatu ono ceseli nuen. Odocob uqanu je eu hatu alildogina eu cunugna ihoc len. 15Odi cocobi Juda agena cuha jonana iwaladen. Oodon age cunug uqa binan sulein.

Dana cajaca Nasaretdec age Jisas hibemdoin

(Matju 13.53-58; Mak 6.1-6)

16Odocob Jisas uqa Nasaret jobon calimei uqa ben menna ono nuen. Odocob Juda agena cuha deelna agena cuha jona len. Uqa gaid loloiwe eu odi len. Odocob Anutna jaqec je oso sanijecnu tawen. 17Caji tatawen oso uqa je hahun madec dana Aisaiana buk ebenna men. Odocob buk eu qosocdumei je oso walimei sanijimei maaden:

18“Tibud sawen dana cajaca me je qasali maadecnu mool joiten.
Eunu Tibudna Kis eu ijaca bilia.
Uqa dana cajaca gihacdocna bilegina eu age gihacdocnadec besiadecnu je maadigennu sulten.
Uqa dana amaga galuc mec bilegina haun mecioqagannu je maadigennu sulten.
Ija aaqati tootooadec dana cajaca cahahaadigennu sulten.
19Odimig ija qila saen ina Tibud uqana dana cajaca cahahaadecnu hoia ec maadigennu sulten,” aden.
(Aisaia 61.1-2)

20Odocob Jisas uqa buk eu menimei cesuldoc dana eu ceseli utimei toni bilen. Oodon dana cunug cuha jona bilein age amaga cunug Jisas himec mecidoin. 21Odocob uqa maaden, “Anutna jaqec je i age dah memegin ija sanijiga eu qila mele ihoc caleia,” aden.

22Odocob age uqanu je me bahic madimeig uqana je me bahic dodoig ben bahic odi tumatumaein. Odimeig age madein, “Uqa Josef melah qeefo?” ein.

23Odocob uqa maaden, “Mele, age doc me je i matoqagan, ‘Hag me madec dana hinadodoc dewen eeldoga,’ toqagan. Odocob ageha odi ija matoqagan, ‘Ceteteh hina Kapaneam ono odom egina ene hinana jobon gugna ha odoga,’ toqagan.
(4.23)Je i “Hag me madec dana hinadodoc dewen eeldoga” uqana gug eu odi. Dana uqa cabi oso ocnu ihoc ec madena eu uqa dana cajaca amagana cabi eu ugian. Odocob age uqana je eunu wawaga meleigian. Jisas uqa but 18-19na Anut uqa cabi ben uqa ebenna men ec maden. Eunu Jisas uqa dana cajaca age madoqagan, “Hina casac kobolkobol odocom ege hinana jenu wawige meleigian,” doqagan ec cisdon.
24Ija mele maadigina, je hahun madec dana oso uqana jobon gugna age gaid qee dah mudegina. 25Dah meigale, weleca, Ilaijana saenna, cabi gel cijedca jagel 6-pela leceb wa qee hoc sabnu cahel ben hatu cunug ihoc li nijoloi. Saen euna caja wij mati bahic age Isrel hatuna biloloig eu mele. 26Euqa Anut uqa Ilaija caja wij eundec ageca oso qee suldocob lel. Euqa caja wij oso uqa Sarefat jobon Saidon taun ono biloloi uqadih suldocob nuen. 27Odocob weleca, je hahun madec dana Ilaisana saenna, dana lepraca mati bahic age Isrel hatuna biloloig qa Ilaisa uqa eundec oso qee me mudel. Euqa Neman, uqa Siria hatunadec dana, uqadih me muden,” aden.

28Odocob dana cunug cuha jona bilein age je eu dumeig gemanaga ben. 29Odimeig age cajimeig Jisas taun dunuhdec didodoig ehudi age aluh gesacna taun cehein euna isec ehi tein. Aluh igocna timeig age u helecebil agafecna toni qugian ein. 30Euqa dana cajaca age gemogemo cocobi wooladi uqana jic nuen.

Jisas uqa dana oso buga me qeeca buga me qee eu ititacdon

(Mak 1.21-28)

31Odocob Jisas uqa jobon oso, ijan Kapaneam, ono Galili hatuna nuen. Ono uqa Juda agena cuha deelna dana iwaladoloi. 32Uqa je Anutna gagadic odocca iwalaadi maaden. Eunu age uqana iwaladec jenu tumatumaein. 33Odocob Juda agena cuha jo eu dunuh dana oso buga me qeeca bilen, buga eu gegehinca uqana jo ibuldon. Uqa jejeg benna utai Jisas madon, 34“Se Jisas Nasaretdec, hina eetanu odigegan? Hina fadalgecnu hogafo? Ija hina cel dananu dugina. Hina dana gun eu Anut suldocob nen,” don.

35Euqa Jisas buga me qee eu cahacdudu madon, “Je culuga. Dana cuculdi qisacdoga!” don. Odocob buga me qee eu dana eu amagana u qeleceb mahana tonen. Odi ninijen dana eu cuculdi qisacdon. Uqa dana eu me qee oso qee odol.

36Odocob age cunug eu fimeig ben bahic tumatumaein. Odimeig age madocobmadocobi sisilein, “Eu cel je bahic madeia? Ge, uqa dana benwe Anutna gagadic odocca buga me qee maadeceb cali hu belegina!” ein. 37Odocob Jisasna cabinu je eu hatu alildu bilein cunug ihoc len.

Jisas uqa Pita momoig me muden

(Matju 8.14-15; Mak 1.29-31)

38Odocob Jisas uqa Juda agena cuha jo culdimei Saimonna jona len. Ono len eu Saimon momoig hag deweg daincaca hulec ninijennu Jisas madoin. Age uqa cesuldocnu ninidoin. 39Odocob Jisas uqa hagca caja ninijen uqa limei cabal qeihna tawimei hag eu cahacdu madon, “Hag, qila culduga,” don. Odocob hag deweg dainca hulen eu culdeceb cajimei sab jec saciadumei cewel uaden.

Jisas uqa dana cajaca mati bahic me maden

(Matju 8.16-17; Mak 1.32-34)

40Odocob cam totonen dana cajaca cunug age cotogail hag gug filfilca cedadecebil Jisasca ahoin. Odocob uqa eben dewenegana meceb age cunug me mamadien. 41Buga me qee ha age dana cajaca leih deweneganadec cali hu bebeli Jisas fecebil dana cajaca age amegna toni mahulimeig utai madein, “Hina Anut Melah!” ein.

Euqa age uqa Anutna Krais eu doinnu Jisas uqa age eu madecnu cahacaden.

Jisas uqa Juda agena cuha jona me je maaden

(Mak 1.35-39)

42Odocob qasil cojageceb Jisas jo eu cuculdi cudun tiliec bahicna, dana oso qee bilec, euna nuen. Odocob dana cajaca age waludein. Waludodoi age gulucdumeig uqa qee culadeiaunnu cahacdoiga odoin. 43Euqa uqa maaden, “Ija Anutna culnu me je jobon ben filfil maadigen. Ge, Anut uqa cabi inu sulten,” aden.

44Odimei uqa Juda agena cuha jonana Judia hatuna
(4.44)Grik jaqec je hilah leihna age je fil jaqein eu odi: Galili hatuna
me je qasali maadi cobon.

Copyright information for `AEY