2 Corinthians 9

Yutia hepatoga mono bona'magi kumu efahi li nupa hi'ahanamofihi ka'a

1Yutia kapogu Hu'mamofihi bona'a enehe'mete efahi epilanamofihi ka'a akeheli'ahabe. Yamofihi henabe luto aku'i koyo lepilube? 2Ana foya'mu komopatini topa nohago keheliloto lenigitini li ho tito lenali hapatini'mu Masetonia bonatoga ma luto lu epi'ohube: Hu'mamofihi agoya hu emise bona'i Akaiya hepatoga nehanamagi tafa kufugu mele'isi le'mo bati hilete kefahi huto hulata nohina kapo'a li huto hi'ahanamofihi ka'a ya'ma Masetonia bona'i lu noepugo bona'i luga'amagi enali amuya melete katini kehelilete ana foya'mu enipagu keta mehuse hu'ehina. 3Nani ana foya'mu lenigitini li ho tito lu lepi'ohuna kagauba buto fa'mene lo lalibe luto lu'ohunalo ya'ma anamoloko melete keta mehuse hilabe luto nigibo nagabo ya'ma enoho lufugo nebabe. 4Nani'ni aliha'a nohunamofihi Masetonia bona'i hiti buto lenali kefahi li nupa huse'namu ligitagahi nehago lenele'mo bati huto lu lepi'ohuna ka'ni limi lalibe luto nani hiti to lenali hiti lubuyati hu lalibe luto yabe. 5Yamofihi ya'ma nani'ni nokehelugo bati higo nalalu'nigita ya'ma enogo'na hoto enoho lufugo kohe tete lenalitoga foiya nebabe. Bi nehetinogo lenali kefahi epilune lite ema afetoga ka'a nimi'ahanamo ni'ibe. Yamofihi yata'a kanagu li nupa hinogo minalibe. Ya hilenogo nani lenalitoga bu nehetito lenohoka lenohoka hinogo'ni kefahi malalana'a huto ni'igopa komopatini li hokolo hite minete kefahi melelata hi'ahanamofihi hapa'amo lama'naka huto hilibe.

6To kefahi li nupa hilana'mu fono ka ya'ma ya luto noluna keheli'ehilo. Lenali bigaha'a nesi'a ho kafaluta ya'ma minoto legeya'a nesi'asigo lilune'mu hune. To bihi nasana asaga bihina lolo hiluta yamofihi minoto samahi tito lilune'mu hune. 7Ya hu'ehina'mu ya'ma suhi lilabe. Lenali fato fato komopatinitu kehelite keheliya ite kehelilana legegeto hite ya'ma kefahi he'milabe. To enipakafa hiti nehinogo bona'magi enohoka enohoka hinogo ya mehuse komopatinigu babahi hite he'milabe. Enegelo bite kefahi he'milata nehana bona'magihi Hu'mau bu gago laga'a besilata nohinagihe. 8Hu'ma ai amuya bo hapa'a nohina bo keta mehuse huto ana'ina ai amuya'a huto hu lepilibe. Ya hulenogo lenalitini lenumu'i nehinogo lenehe'mose foya fato fato bona'mofihi lilune litemo ana'ina'mu sa mehilana'mu yabe. 9Mono bukugu ka fayahi mono bona'magi kumu mone ma luto ni'inamo ni'ibe:

  • Ai'a ana'ina'a guna ito salafa'amagihi
  • enehe'moto epilata nohibe.
  • Ai'a keke'i lu epolose'na'a i laga mehuse
  • mino lito buto minalube'mu hibe.

10Hu'mamofihi ai'a biha'a nasana li huto hu limigo hekolo'ohuta anamofihi legeya'a silaga'i huto higo lito minoto ho tito nohune. Ai'a lenali hiti minoto bigaha'a li huto hu lepi su holoto lusa gito le'mo napa hulenogo enehe'mose'natini yamofihi legeya'a mino bai toloto i futili huto minalube'mu hibe. 11To amuya fe'nohatini hiti lolo hite bona'i enehe'mete fato fato bona'i hiti enele'mo bati hilenogo enehe'mose'natini legeya'a huto hilenogo enali lali kumu yabe lite Hu'mamofihi fokehi lilana'mu yabe. 12Lenali ya hite, Hu'mamofihi naga'a enehe'me'ahanauba legeya'a huto hu'ehina mone ana muhi menina bona'i enele'mo bati hu'ehina to mone hiti Hu'mamofihi enegelo bite babu lite neminana ni'ibe. 13Lenali Kilisitohi ka lamana'a kehelilete li pili kete lite neminana yamofihi hapa'a to lenali Yelusale hepatoga mono ka keheli'ahana bona'i to lenalalutigihi luga'a asaga'i enali hiti lenipagu bati hinogo kehelite babu lite enehe'melata nehanamofihi hapa'a huto hilenogo Hu'mamofihi fayahi mino baga ito minalibe lite le'mo ho tilune'mu habe. 14Ya hilenogo Hu'mamofihi lehe'mose'na'a fato suhi huto lenalitoga li huto nohina'mu yabe lite komopa'ani lenalitoga melete lenali kumu yabe lite Hu'mamofitoga buka tilune'mu habe. 15To lali Hu'mamofihi ai'a lehe'moto fi hetofa hu leto'ehinamofihi afo'afihi Yesu kumu yabe luto lu su meholatamofihi ya'ma fa'mene iyo iyo ka lu etoto fokehi lilune.

Copyright information for `BEF