Acts 18

Polu Koliti lili'na li'ehina

1Alihi Polu Atenisi hepatoti he'mito Koliti hepato bu'ehina. 2Ya huloto Yuta bo mone gi'a Akuila yabe ai Ponitasi hepato kete'ahana bo nohigo bu go'ehina. Ya'ma bouba liha'a Pilisila hiti Itali kegi'atoga bite nemina'inati ma'asi e'aha'ina yabe. To hena'mugope gamani bo Kolotiasiu ai gihiti bouba Yuta bona'i asaga'i Lomu hepa'i he'mite bilo luto enoho lifi he'migo etali ete neha'inalo Polu bu'ehina. 3Polu koyapa'i kata nohi gilata'na naga'atu hetito efaha'a lilata hu'ehina suhi ana alobolemale'i ana suhi neha'igo ai buto etehe'moto mino'ehina. 4Ai asaga fuli kana'alo Yuta bona'i li nupa hite mono kaga lu keheli fa keheli hilata nehana noha'anigu tiloto Yuta bona'i hiti to Giliki bona'i hiti Yesu Hu'mamofihi lusi pana'a huto hu'ehibe, luto kaga lu epi'ehina.

5Alihi Silasiugo Timotiugo Masetonia hepa'i he'mite ai nohinalo limi'igo asaga yupahi Polu mono kaga lu epiba lu epiba huto nohuto ma luto Yuta bona'i lu epi'ehina: Yesu ma'naka luto Hu'mau le'mo ho ti'ehina bo nohibe. 6Ya luto lu epina enali ana ka'a keheli komopa'anigu memolose kiya hi etelata hago Polu ya nehagomo hulata nohina'a huto gukete'agati mumusopa i tili nohuto ma luto lu epi'ehina: Lenali lenugufatini le'mo lenubuto mebilana ya lenali hapatini'mu luto yabe. To nani yananalo kaba mehu'ohube. Yatai ya'maloti fegutoga bona'i nehanaga buloto Yesu kumu enali'i lu yege hoto minaluna'mu yabe. 7Ya luto luloto Polu ho tito buto fegutoga bo mone gi'a Titiu Yasitasi ai Hu'mamofitoga komopa'a emito nominana bomofihi noha'a Yuta bona'magi mono ka beto hilata nehana noho lebato ni'igo anaga kete mine'aha'ina yabe. 8To Kilisipau, Yuta bona'magi li nupa nehana mono noto kaba hu'ehina bouba ai lalameha'a hiti Sipi Bomofitoga komopa'ani emite Poluhi ka'a mege'i mele'ahana. Ya nehago Koliti bona'i luga'a babu lite Poluhi ka'a kehelilete ana mono ka li pili kete nagami'i fele'ahana yabe.

9Mone folugu'i Poluhi bamu'i hu bulo mololoto Sipi Bouba ma luto lu emi'ehina: Kai koli mehuse kaga lu hokolo huto lu epibo. Kai kosele'i nahabe luto kabaga hekini loloto meminobo. 10Nani kai hiti nohunagi bo moneuba kai'i mekahalina'mu yabe. Bona'i ma hepalugu babu lite nehana nani bona'ni nehabe. 11Ya luto lu emigo Polu Hu'mamofihi mono ka'a ana hepato enelepito minoto kufu mone yagi ikahi nayahi mone kegi'a su hoto mone kegi'a nayatogati mone heleko malago huto su hago mino'ehina yabe.

12Ya nohigo alihi Galiohi Lomu gamani bo Gilisi melugu le'mo ho tigo minana kana'alo Yuta bona'i li nupa hite ho tilete Poluhi yato lite ka foya le'mo melelete ma li'ahana: 13Lali keya katiuba o'e lu'ehinagu kaga ya'ma bouba ma hepato asaga bona'i Hu'mamofihi kaga'a fato'i noenelepito enali'i kefefe suhi nohibe. 14Ya nelago Polu ka'anilo nona'a lilube'mu nohigo Galiou ho tito Yuta bona'i ma luto lu epi'ehina: Lenali Yuta bose. Ya'ma bouba gamaniuba kaga molo'ehina'amofihi pelesa ila to foipa suhi mone li huto hula hu'ehitita nani lenali katini keheli leputine. 15To lenali kaga noloka hela ana'ina gi'a hela to lenali keya katini lu nimila nehagomo nani o'e luto nolube. Lenalitini ana kagatini lu sepa ilo. To nani ya'iya lite nelana kamofihi ka foya'a meliluna'mu yagi to kaga'a loko mehilube'mu nohunagihe, ya'ma gamani bo Galiou lu'ehina. 16Ya luto luloto ka foya lilata nonuguti fegutoga enele'mo amuya he'migo limi'ahana. 17Ya higo Yuta bona'i li nupa hite kaga lilata nehana noto kaba bo Sosetenisihi enali nu kite ka foya lilata nehana kasito segihi osahi emi'ahana yabe. To ya hananalo ya'ma gamani bo Galiou, ya habe luto ekesa mone meyigi'ehina yabe.

Polu Silia kegi'a Atioki i behe huto bu'ehina

18Polu Koliti hepato lalu'agi hiti babu kana minoloto Pilisilanogo Akuilanogo Silia metoga botigu tite bilune'mu bi'ahana. Ai mebu'ohuto lama'naka nolube luto Senikilia hepalugu golagalo yahi ti'ehina'mu luto oka'a laga hu'ehina yabe. 19Enali Efeso hepalugu henetilete Pilisilanogo Akuilanogo he'mi etoto'ehina. Ya huloto Yuta bona'magi li nupa lite mono kaga beto hilata nehana nonugu ai tiloto Yuta bona'i hiti kaga lu keheli fa keheli hi'ahana. 20Lali hiti yatama kana minoto kaga mone'a hiti lu limilane lite lana ai o'e lu'ehina. 21Ya luto ka'ani pelesa iloto ma luto lu epi'ehina: Ai Hu'ma linogomo nani aku'i lenalitoga oto bu lenagalube. Ya luloto botigu tiloto Efeso hepa'i he'mito bu'ehina.

22Buto Sisalia melugu henetiloto Yelusale hepato buto lalu'agi Yesuhi komopa'ani emi'ahanana enebe tigiloto aku'i Atioki hepato bu'ehina yabe. 23Analo'i nesi kana minoloto ana hepa'i he'miloto Galesia kegi'a hiti Filigia kegi'a hiti bula ola huto boana'i Yesutoga komopa'ani melete neminanamofihi enele'mo amuya molomofa'na hu'ehina yabe.

Apolosiu Efeso hepato hiti Koliti hepato hiti minoto foya li'ehina

24To Alekasatilia hepatoti Yuta bo mone oto Efeso hepato mino'ehina bomofihi gi'a Apolosi yabe. Ai kaga le'mo bati huto lu epilata nohina to ana huto Hu'mamofihi mono ka fayanugu ge'ahanamofihi keheli bati hu'ehina bo yabe. 25Enali ya'ma bomofihi Sipi Bomofihi Kapo'alo le'mo melete kaga lepi'ahago ana kagauba komopa'a amuya molo'ehigo nohuto Yesu li huto hu'ehinamofihi kaga'a boana'i enelepito to lu epi'ehina. Ya hu'ehina to ai Yoniu nagami'i folo epololata hu'ehinanago ai keheli'ehina yabe. 26To ai hapi fito Yuta bona'magi kaga nupa hite lite minelata nehana noha'anigu tito ka lu hokolo huto lu epi'ehina. Ya higo Pilisilaugo Akuilaugo ka'a kehelilete noha'atitiluga le'mete bite Hu'mamofihi kapo'amu mone'a hiti lepi bati hi'aha'ina yabe. 27Alihi Apolosiu Gilisi metoga bilube'mu nohigo Efeso Yesuhi agoya hu emi'ahana bona'magi he'mete fayahi mone Gilisi hepalugu minela bona'anitoga Apolosihi ya hepatoga be tigite le'mo bati hilo lite fayahi gete emi'ahana. Apolosiu ana hepatoga nehetiloto luga'a bona'i Hu'mau enele'mo koyone huloto komopa'ani aitoga emite minalanana ai'a epi'ehina. Enali Hu'mau enehe'mo'ehina bona'i ya'ma Yesutoga komopa'ani emi'ahanamagi Apolosiu kaba hu epoloto hetofana huto enehe'mo'ehina. 28To ai asaga boana'magi enubulo Yuta bona'magi kaga bati mehina'a lilata nehana ana ka'anilo nona'a lu epigo ai ka'auba enali ka melugu ho fi to'ehina. To ai Yesu kumu ma'naka luto Mesiau nohibe luto Hu'mau mono kagu go'ehinaloti leka soloto enelepito higo enegekesa keheli amuya mele'ahana yabe.

Copyright information for `BEF