Acts 20

Polu Masetonia kapogu hiti Giliki kapogu hiti bu'ehina

1To ya'ma kaga limito fililago Polu Yesuhi kaga kehelise bona'i kehe igo ago kaga luto enele'mo laga huto'a enebe tigito enalitogati he'mito bu'ehina. Ai Masetonia kapogu buto ana melugu neheti'ehina. 2Ya'ma kapogu buto Yesu kumu kaga babu luto noepito to enele'mo laga nohuto buto buto'a Giliki kapogu neheti'ehina. 3Ana kapogu ikahi loebe monebe minoto to alihi botigu tito Silia melugu bilube luto nohigo Yuta bona'magi ai kumu boga lite nehago Polu kehelito i behe huto Masetonia kapogu aku'i bilube luto bu'ehina. 4To ai hiti bi'ahana bona'i Belia hepato bomo, gi'a Sopata, Pilasihi pana'a, ai yagi to Tesalonika hepato bona'i loemo, etigi'atiti Alisitaka yagi Sekatasiu yagi to Tebe hepato bo mone gi'a Gaiyasi hiti to Esia meto bona'i loebe monebe enigi'ani Timotiu yagi Tikiku yagi Tolofimu yagi enaligo yabe. 5Enali kohe tete bite Toloasi hepatoga legeba hite mine'ahana. 6To lali ya'ma fuli yupahi beleti nose'na yisititu lolo mehise nenana ya'ma su hago lali Filipai hepatogati botigu tito buto 5 yegegu bu'ehigo lali Toloasi hepatoga nehetiloto anaga enali nehanalo li nupa hutoti 7 yegegu mino'ohune.

Polu Toloasi hepalugu mino'ehina kana su ho'ehina

7To lali minoto salele yupahi mone yatama nohi ifo hasagu tito li gehesa huto Yesuhi ka'a beto huto beleti nose'na li gofa huto nalube'mu nohuto, Polu li nupa hi'ahanamagihi kaga lamana'a lu epiba lu epiba nohuto yago lenehe'mito bilunagi luto kaga lu noepibe. 8To lali li nupa hu'ohuna hasagu ifo nopogu mino'ohuna. Yanagu libi'i babu luto li kulu ti'ahabe. 9To Polu kaga luba luba nohigo pana'i mone neheya kola gi'a Eutikusi hokolo kapoguluga fito minoto bu kolo kolo huto'a to bu'i kofa huto ana ifo muya loebe monebe hasaguti limo ito felisa'a i gofa hago fili'ehina yabe. Ya higo bona'magi le'mo saga hite fili su habe lite keheli'ahana. 10To Polu anaga limito ya'ma pana'mo ifi toto koloto nu ki'ehina. Lenelesatini melino luto mefilise nohibe lu'ehina. 11To yalo ifo nopogu tito beleti nose'na li gofa huto epito to nose'na noloto kaga luba luba huto minoto go'i ligo bufa hu'ehibe. 12To enali ya'ma pana'i mefilise nohigo le'mete komopa'anigu bati higo mine'ahabe.

Polu Toloasi hepatogati he'mito Miletusi hepato bu'ehina

13To Polu melugu mone'a hiti bilube luto nobigo lali botigu tito kohe toto Asoso hepatoga buto anagati Poluhi lofotula hilune luto bu'ohune. 14To Asoso hepatoga nehetito Poluhi le'moto botigu moneko'na buto Mitilini hepatoga nehetune. 15To anagati he'mito buto alihi Kiosi hepa'i lebato'i buto bege ligito buto etehi Semosi hepato neheti'ohune. To eteha'a anagati he'mito buto Efeso hepato bege ligito buto ana yupapogo Miletusi hepato nehetune. 16Polu Yelusale hepatoga mono fuli yupapogu ya'ma gi'a Petikosu yupahi yabe ana yupapogu nehetilube luto to Efeso hepatoga buloto Esia kapogu minaluna kana le'mo yatama hilibe luto ligo lali Efeso hepa'mo bege ligito buto Miletusi hepatoga neheti'ohune.

Polu Efeso hepatoga mono'i olopa bona'mofihi mone kaga lu epi'ehina

17To ya'ma Miletusi hepato nohuto Polu bona'i ho lifigo buto Efeso hepatoga Yesuhi kaga'a kehelise nehanamofihi olopa bona'i enali'i kehe ito enele'moto ago Polu ma luto lu epi'ehina: Lenali hapa'ni bu gete a'nekehelibe. Nani ya'ma Esia kapogu yata'a o'ohuna kanaguti hapa'ni bu gete nekehelibe. 19Nani Sipi Bomofihi agoya hu emito lili'na lito minolata napa'a ya'ma hu'ohube. To lenali kumu yibi nohuto lili'na'a lito mino'ohube. To Yuta bona'magi nanimomu'i boga liba liba hite nele'mo sibina nehago mino'ohuna yabe. 20To kaga lu yege hoto mono nasana'mu lenelepito mone lenehe'malina ka fala mekise lu lepi'ohuna. Ya'ma asaga bona'ni li gehesa nehanogo lu lepilata huto to lenali nohatinigu moneko'na moneko'na nehago lu lepila huto mino'ohuna yabe. 21Nani Yuta bona'i hiti fegutoga bona'i hiti lu epito lipoti epi'ohuna: Lenali foipanatini he'mite komopa'ani i gelehe hiti Hu'mamofitoga minete Yesu Kilisito Sipi Boti aitoga agoya hu emilo luto lu epi'ohube. 22To yatai kehelilo. Hu'mamofihi hetofa Sikalafu'uba amuya moloto noho lifigo Yelusale hepatoga nobube. To anaga buto nehetilenogo hena hi netalabe nani keheli bati menohube. 23To ya'ma Sikalafu'uba asaga hepatoga nonehetugo kalabusi naga'i kimilabe luto gabu gilina suhi huto hi ketalabe luto lu nimigo keheli'ohube. 24Ya luto nolimigo to nani minalufi fililufi luto ya'ma negekesa kehelito nemeha'ni su holenogo bati huto ni'inagi ya'ma Sipi Bo Yesuhi foya'a nimi'ehina Hu'ma lehe'mose'namofihi ka'a hiti ka lamana'a hiti lu yege hoto ya'ma lili'na'nimofihi su holenogo bati hilunagihe.

25To ka mone hiti lu lepilugi keheli'ehilo. Lenali okaba'ni aku'i be megalabe. Nani lenalitoga bula ola nohuto ya'ma Hu'mamofihi Kapo'a kumu'i lu hokolo hu letoto humofa'na hu'ohuna bomofita okaba'ni alihi be megalabe luto akeheli'ohube. 26To yatai mone kaga lipoti nolepube. Lenalitogati bona'i moneuba kokulumalugu menehetilenogo nani nugupisa'nilo meminalina'mu yabe. 27Ya'ma noluto hena'mube? Nani ya'ma Hu'mamofihi lu kehelise nasana asaga'i lu hokolo huto mone'a fala meki'ohuna yabe. 28To lenali Hetofa Sikalafu'uba kaba bona'i minalabe luto lenele'mo ho ti'ehina bona'i, lenali Hu'mamofihi naga'i kaba hi epalalo. Ai'a golaha'aloti mina fi'ehina bona'i to sipisipi kaba bo suhi huto kaba hi epalalo. 29Nani lenalitogati bu fa hulenogo foipa bona'i lopi kala tegi nehana bona'i enali lenofolagahatinigu ete ginaga mefilete komopatini le'mo sibina hilabe luto keheli'ohube. 30To lenali mone'amagi lenofolagahatiniguti huto hite faga lite Hu'mamofihi kagamo lu sibina sabana hite pana'alobo enali le'malabe lite kagamo lu sibina hite lilabe. 31Ya hilanagi lenali kaba hite minalo. Nani loeyagi moneyagi foya kanagu etehi utehi hiti lenali kumu yibi huba huba nohuto mono kaga lu lenelepi'ohuta yamofihi mehe'mise mino'ohunagi ya'ma lenekesu meheno.

32To yatai nani Hu'mau kaba huse'na'a to lehe'mose'namofihi ka'a yanagu lenele'malube luto aitoga molo lepolo'ohube. Ai ka'atu lenele'mo bati bati huto amuya molo lepalalibe. Ya huto ya'ma bebe sose'na'a pana'alobo'amagihi guna mololatana ya'ma lepilina'mu yabe. 33To nani mone bomofihi siliba efahifi goli efahifi gukete'afi laga'ni nebesibe luto gili gili huto loka meho'ohuna. 34To nayaha'nitu ya'ma lili'na li'ohutamofihi mina'atu nose'nati hiti to nalalu'nifihi hiti mina fi'ohuna ya'mana lenali keheli'ahana. 35Nani ya huto asaga yupahi sipi lili'na lito lenelepi'ohuna ya'ma lali asaga lili'na amuya menehana bona'i he'moto lilata suhi huto minolata ya'ma lenelepi'ohube. Sipi Boti, Yesu ai'a ma lu'ehina: Ana'ina lilata bati mehibe. To ana'ina fato bona'i epilata ya bati huto komopakagu gelo bilana yabe luto lu'ehina. Lali ya'ma ka'a beto huto bati huto nominone.

36To Polu ya'ma kaga lu su hago enali hiti ai hiti lahupa nohi fite nunumu hi'ahana. 37To enali yibi gofa hite nu nekite soso hi ete'ahana. 38Ai okaba'ni aku'i be megalabe lu epi'ehina yana'mu enipagu gabu'i sipi nogigo le'mete bite boti heti'ehinaga neheti'ahana yabe.

Copyright information for `BEF