YUTE Ai koyoto epi'ehina fayahi

Jude

1Yuteita nani Yesu Kilisitohi kele kele'a to Yemesihi gona'amofita, afotifu Hu'mau elesa molo lepito komopa'a lepilata nohina'mu lenele'mo moloto Yesu Kilisitohi kabalo lenele'mo molo'ehinamo lenali fayahi ya'ma koyoto nolepube.

2Hu'mau komopa'a lepilata nohina to fuluna'a to keke'i lu lepololata'na ya'ma li futili hu lepelenogo minomo buto mineno.

Faga faga mono'i fi lehetete nelina bona'magihi hapa'animu lu epi'ehina

3Keke'i nolu lepolona bona'ise. Nani Hu'mau lenubuto bilata nasana silaga bona'magi hiti lilata nohuta yana'mu fayahi koyoto lepilube luto amuya molo'ohunaya, to bona'magi keheli ule'ale huse'namofihi kapo'a mino hetofa huto minalibe luto Hu'mau lu limi'ehina kaga ya'ma sibi hu lalibe luto asaga'naloga amuya melete foya'a ule'ale hite li etalana lenogo'na bito fayahi koyo lepilube luto kana'ni tupa nohibe. 4Hena'mube? Bona'i luga'a Hu'mamofihi keheli'ahana'a enali folagahatigu fenene hite ti'ahana. To enali moko foya lilata nehanalo Hu'mau ka melemekilina'mu yabe lite ai hetofa bo nohinagihe lite nelana enali ya lite Hu'mamofihi lehe'mose kaga'a li sibi hite to lali moneko kaba boti, Yesu Kilisitohi enemegesa hu emite ibe fitebe hi etelata nehabe. Enali ya'ma bite li he'mila ete li he'mila nehanamofihi hapa'anilo Hu'mau osahi epilina ka koyapa'i mono bukugu fayahi keye'ahanamo ni'ibe.

5Lenali ya'ma ka'a keheli su he'ahanamo anamofipo aku'i lu lepilube'mu nohube. Hu'mau ai ya'ma ligiko lagako bona'i Isilaeli bona'i Iyipi metogati gulu ho epoloto to luga'a aliha'a aitoga meminese to agoya hu meemi'ahana'amagihi enoho fili su ho'ehinamo ni'ibe. 6To agelo mone'amagi enali kaba foya'ani he'mite nohi hepa'aniloti he'mite hi'ahana'a enali'i Hu'mau ule'ale seni nagatu li sipi tuto sa gi epoloto afeha'alo ema metepunagu enele'mo he'mi'ehigo enali kana sipilo ka foya lilina kanamofihi geba hite neminana'a yamofihi beto hite kehelilo. 7To Sotomu to Gomola to nohi hepa'i luga luga mino lito buto oto hu'ehina hepato boana'i beto hilo. Enali ana hite anamofihi hite haya kelete moko fako nasanalo li huto hilago logo amuya moloto minoba minoba nohinagu he'mi epalago nehana nebabe. Yamofihi bu nogotogo lelesati gofa lilina'mu yabe ya suhi hu epolo'ehinamo ni'inagi yana'mu lenegekesu meheno.

8Ya hu epolo'ehinamo ni'inaya aku'i faga mono'i lilata nehana bona'i enali ana hite bamu'i be ge tegi hite enugufatu topa helata'na lilata nehabe. Ya nehite Hu'mau gihiti bo libe pigi bibe hite kokulumalugu gulu guluna'ani hiti bona'i enali ya'ma mumusopa i epelelata nehabe. 9Agelomagihi bo enogo'anifu Mikaeliu ya'ma faga mono'i lilata nehana bona'i hi'ahana suhi huto mehu'ehibe. Ai Mosehi sekuya'a ki'afu lilibe lite Satahi kenasabo bilete ihega ahega helete Satahi ka'a foipa hilibe luto keheli'ehina, ya'ma keta higo ai Satahi megeka meluse ma luto luloto lu emi'ehina: Sipi Bo aliha'a ka kemekilina'mu yabe luto lu emi'ehina. 10Aku'i enali faga faga mono ka lilata bona'magi ya'ma mekeheli'ahana nasana'mu yamofihi ibe fitebe hite to megeka lite minelata nehabe. Yaga kala suhi hite enugufa'ani enumu nofilina nasana'mu fa'mene komopa'anitu kehelilete yalo ya'ma foipa hilete yanauba enele'mo sibi sibi hite ya hinogo enali fili su halabe. 11Akae. Enali minete ya'ma hena hena hilana ni'ibe? Enali Atahi pana'a Keniu foipa kapo'alo bu'ehina'a ya'ma kapolo bilana suhi hite ya nehabe. To efaha fe'nopofihi laga'a kehelite lite minete Balamuhi kapolo ya'ma me'me hite nebabe. To Kolau ai Hu'mau lu'ehina ka'amofihi pelesa ito he'mi'ehina ana hite kegeiyo hilete'ani yanauba enele'mo laba hinogo fililana'mu yabe. 12Bona'i ya hana'amagihi lenali mono kamofihi gomolu nose'na li gehesalo'i ya'ma yaga nose'namu ha ha lite neheti'ahana enubuya mehu'ehina enali enigi'ani le'mo napa napa hite li gehesamo le'mo sibina nehabe. Enali enubu enekesa meni'igo enali'ani nasana'muko anasi keheli keheli nehabe. Enabagaguti kele yau yau hinaga nelabe. Enali ya'ma ko fato fato hite sopopo ya'ma fa'mene yasiuba li he'migo buto fa'menena lolo hulata nohina ya suhi hite melete nehana yanauba gusunupa'a meni'ina suhi lolo hulata nohibe. To yafa mone nose'na legeya'a holata kanalo legeya'a mehalina'mu yabe. Ya suhi hite enali nehabe. To yafa mone su ti'ahago bi'ehina ya'ma enali hi'ahana suhi hite minese'nalo nehabe. 13To enali hege nagami'i kele'a amuya'a hiti minago libi'na kele'na huto kolota kolota huto hulata nohibe. Enali bona'i ya hana'amofihi foipana'ani enubuya huse'na ya suhi huto huto hulata nohibe. Sonofi'i luga'amagi enali sibigopa nagopa hite humofa'na hilata nehana enali kapo meenelepilana'mu yabe. Sonofi'i ya hana suhi hite nehana bona'i ya'ma sinihi gise'namofihi komopa'agu ule'alena'a ya'ma Hu'mau le'mo nupa huto metepu hepato lolo huloto ya'ma minoba minoba huse'nagu he'mi epolo'ehinamo ni'ibe.

14To Atahi giko gakomagi nekisa'agati huto hite bi'ahana huto hilago yalo aliha'a ana huto bihu 7 Inoki huto hu'ehina. Ai ya'ma faga fagalo bona'i ya hana'a enali kumu fono ka luto ma luto lu'ehina:Bu galo. Sipi Bouba ya foipana hana bona'magihi nona'a epilube luto hetofa agelo bona'a babu luto ka foya lilana li gehesalo enele'moto limilina'mu yabe. 15Ya huloto asaga bonatoga hapa'ani lu huto nohuto kegeiyo bona'i Hu'mamofitoga meneminana'a enali kegeiyo'na'animofihi hapa'a nona'a foipana epilina'mu yabe. To kegeiyo bona'magihi Hu'mamofitoga meneminana'amagi enali Hu'mamofihi kaga li sibina sabana hite ka laga mehina'a lilana ananamofihi nona'a epilina'mu yabe. 16Bona'i ya hana'a enali megeka lilata to fato bona'i enifisa ilata nehana to moko tako fato fato'mofihi lolo hite minete, enali'anigo li nupa napa hite neminana bona'i enali luga'a hiti ana kapolo enemege'i melete bilabe lite enofokehi lite fi taga hi epelete lite hilata nehabe.

Enegekesa lito kaga lu epolo'ehina

17To nemehi lepi'ohuna bona'ise. Lenali ya'ma koyapa'i Sipi Boti Yesu Kilisitohi aposolo bona'magi enali kohe tete kaga'a lu lepi'ahanamo yana'mu kehelite minalo. 18Enali ma lite lu lepilata hi'ahanamo ni'ibe: Kana'a sipi tupa higo komopa'anigu foipanamofihi nasanalo ya'ma laga epesise'namo amuya melelata nehana bona'i huto hilete kalana'i mele lepelete mono katini lite mumusopa ilana'mu yabe. 19Bona'i ya hana'amagi ya'ma Hu'mamofihi naga'a loko huse'na li huto hilata nehabe. Hu'mamofihi Sikalafu'a hiti menehana enali enugufa'aniuba kaba hu epololago laga'ani epesise'nalo melelata nehana. 20Ya hite nehanaya, komopa'ni lepi'ohuna bona'ise, lenali monotini legeya'a yanauba komopatini lolo hilenogo amuya melete mineme bite minalabe. Hu'mamofihi fana meha'a hiti Sikalafu'i limi'ehinamofihi amuya'alo minete Hu'mamofitoga lite minalo. 21Ya nehite Sipi Boti Yesu Kilisitou ai fuluna'a molo lepoloto ule'ale huto mino kosaba'i ya'ma minomo bulata nasana molo lepalalina'mu geba hite nehite Hu'mau komopa'a lepi'ehina'alo minalo.

22Hu'mamofihi ka keheli bati mehise loe lae enegekesa neyigina bona'i leniginaga fi epilo. 23Enali logo kapogu bilune'mu haha nelana bona'i enele'mo tiligi salo. To bona'i luga'a leniginaga nefinogo lenelesa nolinogo enele'mo bati hilo. Ya nehite ana'ina'ani kolota kolota hapa'ani ni'inogomo yana hiti kaba hi epalalo.

Hu'mamofi kumu fokehi ho'ehina ka'a

24To Hu'mau lenele'mo hetofa hu'ehigo lele'mo laba hi lalabe lite sekele mamu'a hiti fana mehena'alo foipanatini meminenogo ya nehinogo gobisa'alo lenegelo bise'na hiti amuya'a hiti lenele'mo malalibe. 25Sipi Boti Yesu Kilisito kumu yabe luto lubuto bilina bo Hu'mamofihi aitoga sekele mamu'a hiti fana mehena to amuyana'a hiti to kaba hulata amuya'a, koyapa kana'a mino'ehina to yatai hiti ana huto li'ehina to mino lito buto mino bai toto minalina'mu yabe. Lama'naka.

Copyright information for `BEF