2 Zon

Agau e nugau zebigeg

Zon go koli guzenai sikut weun, “Iz agal gumaranemin du banou. Iz sikut e air banou tub gonugau gelegul abai sikut wai marem.” Dudu ipal agal dabeleu guzenai omen, ‘Zon go gue sikut air gonugau gelegul abai sikut wai marab tam, go tatau ze meun. Go Kristen duailel uzan tub darem mui goagal gumaraneu du en mui tatau ze meun.’

Zon nug duailel agal oiagab petak emen go duailel ipal en oiagab eim noumabun awareun. Ag polu ze maranem dudu agal ze i ducan aimai awareun.

2 John

1O air, Uwait nug na nait gelenar abai gonugau pet aimai tapai mizeun, Iz, Zon, agal gumaranemin du, gonun, iz ag sikut e wai marem. Izal oiab ag en noumai darem, iz sag tam, dudu go petak ze abiu, goagen han ag en oiagab eim noumai darem. 2Einen, Petak ze go igual oigeb oug dareu, go muzmuz igual oigeb oug damau.

3Memenig Uwait, gonugau nag Yesus Kristus dual agal oiagab nug ig en noumaimai, go petak ig en oiagab eg wina goagal dabeleu eim ig gaul isanigemen, guzenaimai, igual oigeb selai damau.

Igag unum zaiger en oigeb nug noumabun igul sesamorab.

4Dudu ipal agen nait gelenar ipal petak ze sesamoremenin ailemen doimai, iz siksikem. Igul go memenig nugtal sesamoran aigeun sul guzenanemen. 5O abi, go gonun, iz na aizem, igag unum zaiger en igual oigeb nug noumab. Kasai ze e ulis na sikut wai mizem go ze awau tam, go kasai ze go getalan. 6Zaiger en oiageb nug noumabun igul enai: Ig Uwait nugau kasai ze suban sesamoranem. Ag getal Yesus en oiagab petak emen ebu, ag gonugau kasai ze guzenai domen, ag zaiger en oiagab nouman, ag igul go sesamoran.

Igag Kristus nugau ze gusig patab.

7Dudu asiu em e ebu ze polumigabun aidanem. Goagen enanem, “Yesus Kristus go du sul alab tam.” Guzenai ze macanemen dudu go polumanemen. Go Yesus Kristus nugau iwai zaugul. 8Ag suban uligan, ag ece naliu go wabun salau gusig mai daremen i utamamen. Ag suban tapai dabi Dubanou Ban nug ag ece naliu marabun tapai mareun go unum maramau. 9Bo, du tub go betei ze atai tub oimai, Kristus nugau abai maraneun ze suban gusig patab tam, Uwait du go dual pezai dacab tam. Bo, du in go Yesus Kristus nugau abai maraneun ze gusig patai dacaneu du, memeg nug gonugau nag dual agen du go dual pezai darem. 10Bo, du tub go petak ze ag ebalagab i oi bitaba agen du go ‘Amban’ aimai i auran, agen agal zaueim i imai sien. 11Du in nug du go ‘Amban’ auramau, go gonugau zaug usalaimai, gonugau salau eg isanuramau.

Sikut poabun ze.

12Iz ze asiu dareu ag awarabun iboin, bo, iz ze go unum sikut wab utem. Bo, iz ag waiagab betei uligaremin, igag ereg hoboi daimai ze mab, guzenaimai, igual oigeb banou siksikamau.

13Agal abianag Uwait nug tapai moroun, gonugau gelegul agen na ‘Amban’ ai aizem.

Copyright information for `BMH