a2Kol 3.12-13;
b8Sum 68.18;
c16Kol 2.19
d22Kol 3.9;
e24Jen 1.26, Kol 3.10;
f25Zek 8.16;
g26Sum 4.4;
h32Kol 3.13

Ephesians 4

Kraistnöŋ mindirim neŋgiiga ölŋi mohot akzin.

1Nöŋön Kembubuk qekötahöba kinda nupŋi mealaŋgöra kösö miri azia akzal. Keu mi jim teköba uruŋini keu kewö jiba kuŋguzal: Anutunöŋ ahakmeme aködamunŋambuk aka memba malmegöra eŋgoholöhi, miaŋgö dop iŋini mönö malmal qainŋi kun malme. 2Mönö uruŋini memba et ala keu bapŋe anda guŋbönjönjöŋ qakŋe ambazip ak eŋgiba malme. Lömböt mökösöŋda malme. Mönö lolongöba bölöŋaŋgö kitipŋi kude mememö, qaqaeŋgiba jöpaköm aŋguba malme. 3Uŋa Töröŋan uruŋini qezaköba luaigö kösönöŋ jöhöba mindirim eŋgimakzawi, iŋini mönö uru jöhöjöhö mi sutŋine ahömapköra kapaŋ köla kinme.

4Anutunöŋ eŋgoholöhi, miaŋgöreŋ mönö öröröŋ oyaeŋkoyaeŋ akingö jörömqörömŋini mohot miyök al eŋgiiga al mamböta malje. Miaŋgö dop iŋini mewöŋanök Kraistkö öl kembaŋi mohot aketka Uŋa Töröŋi mohotnöŋ mönö inahöm eŋgiiga malme. 5Kembunini mohotnöŋ galöm köl eŋgiiga öröröŋ möt narim waŋgigetka o melun mohot miyöhök mem eŋgigetka mohot aka malje. 6Anutunini mohotnöŋ körek iwi ak neŋgimakza. Yaŋön yuai pakpak körek neŋgoŋgita Kembu öŋgöŋgöŋi ak neŋgimakza. Mewö aka jitŋi tem kölbingöra körek kuŋguba inahöm neŋgiba urunini dop malmal tatat ak neŋgimakza.

7Miaŋgö dop öröröŋ Kraistkö ölŋi mohot maljinmö, Kraistnöŋ kalem möriamŋi mokoba sihimŋaŋgö dop neŋgiyök. Nup memegö mötmöt kalem könaŋi könaŋi mi mohot mohot neŋgöra dopnine mendeŋ neŋgiiga maljin. 8Miaŋgö keuŋi mi kewö jigetka Buŋa Kimbinöŋ ahöza,

“Yaŋön euyaŋgöreŋ öŋgöba kinda kösö ambazip gwötpuk eŋgömeiga buŋaurupŋi aketka kalemŋi kalemŋi mi ambazip neŋgöra neŋgiyök.”
9“Euyaŋgöreŋ öŋgöyök,” Anutunöŋ keu mi mönö denöwögöra jiyök? Miaŋgö könaŋi kewö: Kraistnöŋ mutuk Suepnöhök erök. Mönö gölme dutŋe emuyaŋgöreŋ geyök. 10Eröhi, yaŋön mönö mewöyök liliŋgöba eu öŋgöyök. Öŋgöba Suep mirigö jakeŋi pakpak eŋgoŋgita qakŋe euyaŋgöreŋ öŋgöba malja. Miaŋgöreŋ mala Suep gölmegö öröyuaiŋiri pakpak mi ösumŋan kokolak qeba jömuk dop köl teköba malja. 11Kraistnöŋ ambazip neŋgöra mötmöt kalemŋi könaŋi könaŋi kewö mendeŋ neŋgiyök: Nupŋi mendeŋ neŋgiiga tosatŋan melaimelai ambazip bohonŋi (aposol) aket. Tosatŋan kezapqetok ambazip (profet) aket. Tosatŋan urukuŋgukuŋgu ambazip (ewanjelis) aket. Tosatŋan lama galöm (pasto) aka kusum neŋgineŋgi böhi qaqazu aket.

12Kraistkö ölŋi mi urumeleŋ ambazip. Neŋön yeŋgö uruŋini naŋgöinga köhököhöi miwikŋaibingöra nupŋi mewö mendeŋda kuŋgum neŋgiyök. Könagesö sarakŋi neŋön körek urugö nupŋi membingö jöjöröm teköba malbingöra aka mewö inahöm neŋgiyök. 13Mewöŋa mewö nup murutŋi murutŋi memba mala Anutu möt nariba könaŋgep Nahönŋi möt yaköm soroköba miaŋgöreŋ qezaköm aŋguba mohot aka kinbin. Anutugö mötmötŋi aka aködamun yuaiŋi pakpak mi mönö körekŋanök Kraistköreŋ ahöza. Neŋön Kraistkö köweŋeyök mötmöt ösumŋi öröinga musulumgöm neŋgiiga qarim sehiba köhöiba malinga aködamunŋi köl neŋgii körek asuhui malbin.

14Toroqeba namande tandök malbinbuköra Kraistnöŋ urunini kuŋguba nanŋi ewö aködamuninambuk akingöra inahöm neŋgimakza. Namande tandök malinga qewöloŋ ambazipnöŋ areŋ i me wai ala möndöba tutuhum neŋgigetka tala et neŋguyöhi, iŋini mönö miaŋgö dop aka laŋ malbepuk. Luhutnöŋ lilikqilik qeiga köwetnöŋ kunduriga sirinöŋ gödöwöröt laŋ waŋgiriga an qem kam qem aka simbiŋsambaŋ ahakza. Miaŋgö dop gölme ambazipnöŋ silenöŋ alal aka unji memba tilipmötmöt miwikŋaiba ambazip laŋ kusum eŋgigetka jaŋjuŋ ahakze.

15Miaŋgö dop laŋ kude malmemö, keu ölŋanök töp jiba jöpaköm aŋguba malme. Mewö mala Kraistnöŋ nöröpnini akzawi, kesötŋini mönö yaŋgöreŋ möndömgöget geiga töndangöba yuai pakpak miaŋgöreŋ qarim köhöiba aködamunŋinambuk aka malme. 16Kraistnöŋ nöröpnini aka ölŋi jömuhök galöm köl neŋgiiga ginimuramŋi körekŋan mönö ölŋaŋgö köna böröŋi mindiriba jöhöm neŋgigetka kutulaŋgömakzin. Ösum mohot mohot ahöm neŋgizawaŋgö dop mönö nupnini memba kötöngöba jöpaköm aŋguinga ölŋi miaŋön köhöiba qarimakza. Mewö. a , b , c 

Asakŋaŋgö ahakmeme dölökŋi aka memba malme.

17Mewö akzinaŋgöra nöŋön Kembugö jitŋe memba galöm meme keu kewö jibi möt yaköme: Urumeleŋgö kopa ambazip uru mötmötŋini sohoiga nesak ewö aka öne omaŋi laŋ malakzei, iŋini yeŋgö tandök bölöŋi kude toroqeba aka memba malme. 18Urumeleŋgö kopa ambazip yeŋgö urumötmötŋinan söŋauiga Anutubuk malmalgöra siksauk aka sohoze. Mötmöt bölöŋan uruŋini gwözöŋda duhuyöhaŋgöra aka gukmaulem aka tönpin malje. Miaŋgöra Anutugöreŋ malmal köhöikŋe qahö qekötahömakzemö, nanŋinök laŋ töhön malje. 19Galömŋini qahö mem aŋgugetka uruŋini gwözöŋ teköiga gamu taŋgeŋ malje. Uruŋini kaiseronöŋ jöhöba qewöloŋ yuaigöra laŋ söŋgaiba tölöhomakze. Yuai membagun membingö nepaqepalok köpösöŋgömakze.

20Yeŋön mewö ahakzemö, iŋini Kraistpuk malmalgö könaŋi mi mewö qahö kusum eŋgiget mötket. 21Iŋini keu ölŋaŋgö Toŋi Jisösbuk qekötahögetka miaŋgö dop könaŋi kusum eŋgigetka ölŋi kewö möt yaköget: 22Mutuk ahakmemeŋini walŋi wuataŋgögetka sihim kömbönaŋini bölöŋan isimkakalek ak eŋgiiga ayuhum aŋgubingö aket. Köna kusum eŋgiget mötkeri, miaŋgö dop mönö uruŋini walŋi meteköm gila andö qeme.

23Urumötmötŋini mem guliget kölöŋaiba malmegöra köna kusum eŋgiget. 24Anutunöŋ nini nanŋi kaisoŋgolomŋaŋgö dop sarakŋi aka mal köhöibingöra miwikŋaim neŋgiyök. Uru dölökŋaŋgö malmal solanŋi wuataŋgöbingöra mönö al neŋgiyök. Miaŋgöra uru dölökŋi miyöhök mönö bök kölget geiga malme. Köna mi mönö mewö kusum eŋgigetka möt yaköget.

25Köna mewö ahöiga nini Kraistkö ölŋi mohot miaŋgö uruŋe darumun ewö mindiriba ala-ala aka maljin. Miaŋgöra muneŋ mi mönö meteköm gilget geiga sutŋine keu ölŋanök pakpak eraum möta malme. 26Tembula kukpiriŋnöŋ akŋe ewö, mönö töndup siŋgisöndok kude akŋe. Irimŋini seholimawi, keuŋini mi mönö zilaŋ wehön jeŋan qahö teköba geiga jim tekögetka solanima. 27Mewö Bölöŋaŋgö Toŋan sutŋine kaŋgotpapuköra qeapköba nalö kun kude waŋgiba zilaŋ yakörime.

28Kunŋan yoŋgorö meme malöhi, yaŋön mewö kunbuk kude akŋa. Mewö qahöpmö, mönö nanŋi böröŋan nup kapaŋ köla memba malma. Nup memba nanŋi nene inapŋi miwikŋaiba ölöp amqeba ambazip wanapŋi naŋgöm eŋgimakŋa.

29Keu lösö kun jitŋineyök kude etmapmö, keu ambazip uruŋini naŋgöba mem köhöimawi, mönö miyöhök jiba malme. Ambazip keuŋini möta uruŋini ahözawaŋgö dop qambaŋgöra osizei, mönö miaŋgö dop goro eŋgigetka keu nahömŋi möta ölöwakeak. 30Anutunöŋ buŋaurupŋi sohopnini meiga Suepnöŋ öŋgöbini, nalö miaŋgöra aiwesökŋi kömbönaŋi mekötahöm eŋgiiga uruŋine geba Anutugö muŋgemŋi akza. Miaŋgöra Anutugö muŋgemŋi Uŋa Töröŋi mi mönö wösöbirik kude qem waŋgime.

31Iŋini mönö urukömbuk, urukondum aka urusiŋgok pakpak mi qeköba gilget köröwen tatma. Urukönöpnöŋ kude jula eŋgohoiga uruŋinan auba yom qeta jim aŋgubepuk. Mewöyök andöqeqe keu töhöreŋ mi kude jime. Aŋgöjörak könaŋi könaŋi uruŋini tölöhobapuköra mi mönö körek andö qegetka tikep ahöma. 32Tikep ahömapmö, ala-ala ak aŋguba mököliba guŋbönjönjöŋ qakŋe ak aŋguba malme. Kraistpuk qekötahögetka Anutunöŋ siŋgisöndokŋini mosöta saŋgoŋ eŋgiyöhi, iŋini mönö miaŋgö dop toroqeba köpösihitŋini mosöt aŋguba malme. Mewö. d , e , f , g , h 

Copyright information for `BMU