Job 3

Iob i tata kakaina ure kana bung na kinakava

1Namur ta go Iob i ga papa ra ngiene, ma i ga tata kakaina ure kana bung na kinakava. 2Ma Iob i ga biti:

3Boina ba na panie kaugu bung na kinakava,
Ma nam ra marum ba i ga biti: Di tar lalau pa ra bul tutana.
4Boina ba nam ra bung na keake na bobotoi:
Boina ba God liu na nuk vue,
Ma koko ra kapa na pupua tana.
5Boina ba ra bobotoi ma ra malur na minat dir a kale pa ia upi kadir,
Ma ra bakut na pulu pa ia;
Ma nina ba na vabobotoi ra bung na keake, boina ba na vaburut ia.
6Ma ure nam ra bung na marum, boina ba ra ngala na bingnimuna na konom vake;
Koko na gugu varurung ma ra lavur bungbung ta ra kilala;
Ma galiaka da luk tar ia tai ta ra umana gaigai.
7Boina ba nam ra bung na marum na biu,
Ma pa ta na na kakailai na gugu tana.
8Boina ba ra umana tena papait diat a vul nam ra bung,
Nina dia vartuluai upi ra ngala na vui na ta.
9A umana tagul na lar diat a bobotoi tana,
Ma galiaka ra buabuarana na gire ra kapa,
Ba na bobe ra taptapke;
10Tago pa i ga banu bat ra tatal na bul,
Ma pa i ga pulu bat ra ura kiau na matagu kan ra varmonong.

11Ta ra ava pa iau ga mat ta ra tatal na bul?
Ma ba iau ga vana rikai kan ra bala i nagu, ta ra ava pa iau ga vung vue ra tulungeagu?
12Ta ra ava ra ura buk na keke dir ga ki pa iau,
Ma ra ura u pi ina u ta dir?
13Gala damana, gala ina ga va vovovon,
Ma ina tia va mat ika ma ra malmal,
14Varurung ma ra umana king ma ra umana tena varvateten ai ra rakarakan a gunagunan,
Nina dia ga vatut ra umana lingling na gunan upi kadiat,
15Varurung ma ra umana luluai dia uviana ma ra goled,
Ma nina dia ga vabuka kadia lavur palpal ma ra silva.
16Ina ga da ra bul ba di ga kava pit ia,
Ma ra bul tadoko nina pa i ga gire ge ra kapa.
17Abara ta nam ra gunan di langalanga kan ra tena varpiam,
Ma ra lavur biluana dia ngo.
18A umana vilavilau dia va guvai ma ra malmal abara,
Pa dia valongore ra nilai ra umana luluai na papalum.
19A luluai ma ra vilavilau dir par dir ki ie,
Ma ra vilavilau i langalanga kan kana luluai na papalum.

20Ta ra ava di tul tar ra kapa pire diat dia ki na malari,
Ma ra nilaun pire diat dia kaina kakit?
21Dia kiki upi ra minat, ma pa dia gire,
Dia manga tikan upi ia ma ra ngatngat na magit pata;
22Dia gugu muka, ma dia ga,
Ba dia tikan tadav ra babang na minat.
23Ta ra ava di tul tar ra kapa pire nina pa i na ilam kana nga,
Ma pire nina bula ba God i ga tur bat ia?

24A lavur oir nam agu gem,
Ma kaugu lavur niriri dia talalongo da ra tava.
25Nam nina iau burut ure, nam iat i tadav iau,
Ma nina ra magit iau ururian tana go iat i tadatadav iau.
Pa iau nunure ra malmal, ma pa iau nunure ra ningo,
Pa iau nunure ra kini langalanga; a kinadik ika i monong iau.
26

Copyright information for `KSD