Psalms 38

Yook 38

Dewid ye yook. Kaamoni yeman.

1O Yariman, eb norin wande ongkawaab,
kwane eb arud wande ne yaa didangkewaab.
2Amborom kuu eb ana kumbed ne yaa nabangkoon,
kwane eb dingki kumbed ne nen kubunewen.
3Ebbed ne yaa norin wandewen kowe ne id kuu yiminban keroon,
kwane ne niindem aom kuu korem amuniibban keroon, ne ambarakmaan kowe.
4Ne ambarakmimbed ne nen dabuknandoon,
kukuu dabab darewoob kanyarindeban kwane areb keroon.
5Ne yaa kad yaa bobbob kuu yingkenabe miin arewa keroon,
amborom kuu inameniibban kamaan kowe.
6Ne kuu nikbe kan kubune yiminban keraan,
kwane amkimombed wene amnoom kuu yuudi ameng kame yarebimain.
7Ne id kuu yewed ye niminbed naawonmo denobembirimaan,
kwane ne niindem aom kuu korem amuniibban keroon.
8Ne kuu meenindeban kereni yob beengkemoon areb keraan,
kwane niindem aom miin yiminban kereni wareki kamimain.
9O Yariman, nembed komo komo kamandamiin ye inamen korem kuu eb arinambo ari dianmo dangoon,
kwane ne inum narimain kuu eb ebkaad, biknindo.
10Ne mimyob kuu kurungkurung deeroon,
kwane naromkonoyiibban dowan keraan,
kwane ne indob kuu wud dabuneen.
11Ne arewa keraan kumbed ne mimyob dowaken keendaandaniib nangkodmiayiib kuu bongwawimokban keriwen,
kwane ne karubkim kangkon ambab angkambed dobirimaib.
12Kane kanembed ne yaa nenbande kowandamiib kuu ne dowad kawaad nong kowe bikniwen,
kwane kane kanembed nenbandandamiib kuu ne dowad ye nen monmarem ande kamiib,
amkimombed wene amnoom kuu wunonwanon kamimaib kui.
13Ne kuu kerendem warudki wengambirimokbanman areb,
kwane ne kuu wengwaab dakmimokbanman areb.
14Anamaa, ne kuu karub maa wengambirimokbanman areb kereni,
ye mongkod dande inandimokbanman areb keraan.
15O Yariman, ne kuu eb ande meedmiin,
o Yariman ne God, ebbed ne yaa inanduwaneeb.
16Amborom kuu nembed yedmaan, “Ne yon kereeb beresare kombaraniin kuu,
yi kuu domondaawe ne yaa ambon kamewenib ne nen kubune yika kankoonaib.” andaan.
17Kedi, ne kuu kombarandamiin,
kwane ne yaa yewed kuu ma womoniyiibban angkeen.
18Ne ambarakmi kuu God yaa dakmaan,
kwane ne ambarakmi wedmeni meendobembere yiminban keraan.
19Kumban ne bondan kuu korereyiibban amunmo angkon aromkonoyiib,
kwane idiibbanbed ne yaa arud wandiwendan kuu yemoon.
20Kane kane ne amun kami yaambed arewa kamewimaib kuu,
amun kami ye kerekmen yaa wanaine ne yaa wengamborokbanabimaib.
21O Yariman, ne yaa domowaab,
o ne God, ne yaa ambab keruwaab.
22O Yariman, ne nen burudande angka kowi ye karub,
kirod mene awawe.
Copyright information for `YON