1 Peter 2

“Xwɨyí̵á Gorɨxoyá oxí̵dɨmɨnɨrɨ ayá wí seaimóní̵wɨnɨgɨnɨ.” urɨŋí̵ nánɨrɨnɨ.

Ayɨnánɨ segí̵ rí̵á kɨroarɨgí̵á nɨpɨnɨ tí̵nɨ yapí̵ wíwapɨyarɨgí̵á nɨpɨnɨ tí̵nɨ naŋí̵ rɨro sɨpí rɨro yarɨgí̵ápɨ tí̵nɨ sɨpí dɨŋí̵ yaiwiarɨgí̵ápɨ tí̵nɨ xwɨyí̵ápai uŋwɨrárarɨgí̵á nɨpɨnɨ tí̵nɨ apɨ nɨpɨnɨ rɨxa xwí̵á weyárí̵í̵rɨxɨnɨ. E nero niaíwí̵ sɨŋí̵ xɨrí̵áyí̵ amɨŋí̵ nánɨ ayá wí wimónarɨŋí̵pa seyí̵ne' enɨ axí̵pɨ xwɨyí̵á Gorɨxoyápɨ —Apɨ ikweakwí̵mí̵ minɨŋí̵pɨrɨnɨ. Apɨ arí̵á nɨwirɨ xɨxenɨ oxí̵dɨmɨnɨrɨ ayá wí seaimóní̵wɨnɨgɨnɨ. Gorɨxo yeáyí̵ seayimɨxemeaní̵e nánɨ segí̵ dɨŋí̵ niaíwí̵ amɨŋí̵ nɨnɨrí̵ná xwe' iwiaroarɨgí̵ápa axí̵pɨ yóí̵ nimónɨro amɨpí Gorɨxo wimónarɨŋí̵pɨ nánɨ dɨŋí̵ aumau'mí̵ iní̵í̵rɨxɨnɨrɨ xwɨyí̵á oyápɨ nánɨ ayá wí seaimóní̵wɨnɨgɨnɨ. Seyí̵ne' aiwá gí̵gí̵ neróná awí̵í yarɨŋí̵pɨ nánɨ nɨjí̵á imónarɨgí̵ápa Ámɨnáo dɨŋí̵ sɨpí nɨwirí̵ná naŋí̵ seaiiŋí̵pɨ nánɨ rɨxa nɨjí̵á imónɨgí̵áyí̵ne' eŋagí̵a nánɨ apɨ e e'í̵rɨxɨnɨ.

“Seyí̵ne' ámá Gorɨxoyáyí̵ne'rɨnɨ.” urɨŋí̵ nánɨrɨnɨ.

Seyí̵ne' Jisaso —O dɨŋí̵ nɨyɨmɨŋí̵ tí̵ŋí̵ sí̵ŋánɨŋí̵ imónɨŋí̵ worɨnɨ. Ámáyí̵ “Sí̵ŋá ro sɨpíorɨnɨ.” nɨrɨro emɨ móagí̵a aiwɨ Gorɨxoyá sɨŋwí̵yo dánɨ ayá tí̵ŋo eŋagɨ nɨwɨnɨrɨ aŋí̵ xí̵o mɨrarɨŋí̵pɨ nánɨ í̵á yamɨxárɨŋorɨnɨ. Seyí̵ne' enɨ sí̵ŋá dɨŋí̵ nɨyɨmɨŋí̵ tí̵ŋí̵nɨŋí̵ imónɨgí̵áyí̵ne'rɨnɨ. Seyí̵ne' o tí̵ámɨnɨ barí̵ná Gorɨxo nɨseamearɨ aŋí̵ rɨdɨyowá nánɨ xegí̵ kwíyí̵ ŋweapaxí̵ wiwánɨŋí̵ seamɨrarɨnɨ. Seyí̵ne' aŋí̵ iwámɨ dánɨ oyá apaxí̵pánɨŋí̵ imónɨgí̵á “Gorɨxo wimónarɨŋí̵pɨ nánɨnɨ e nɨyaní̵wárɨnɨ.” yaiwiarɨgí̵áyí̵nɨŋí̵ nimónɨro ayí̵ Gorɨxo none nánɨ yayí̵ oneainɨrɨ rɨdɨyowá wiarɨgí̵ápa seyí̵ne' enɨ Jisasɨ Kiraiso seaiiŋí̵yo dánɨ axí̵pí̵nɨŋí̵ xegí̵ kwíyí̵ xí̵o wimónarɨŋí̵pɨ nánɨ seaíwapɨyarɨŋí̵pɨ wiíí̵rɨxɨnɨrɨ seyí̵ne' aŋí̵ wiwánɨŋí̵ seamɨrarɨnɨ. Xwɨyí̵á nionɨ seararɨŋápɨ, ayí̵ Bɨkwí̵yo dánɨ re nɨrɨnɨrɨ eánɨŋí̵pɨ tí̵nɨ xɨxenɨ imónɨŋagɨ nánɨ rarɨŋɨnɨ, “Arí̵á e'poyɨ. Gorɨxonɨ ámá sí̵ŋá aŋí̵ nɨmɨrɨróná sí̵ŋá awiaxí̵ wo xámɨ nɨmearo iwamí̵ó tɨwayɨroarɨgí̵ápa nionɨ enɨ ámá wo gí̵ Saionɨ ŋweagí̵áyo umeŋweaní̵a nánɨ nurí̵pearí̵ná sí̵ŋá ayá tí̵ŋí̵ imónɨŋí̵ wo nɨmearɨ iwamí̵ónɨŋí̵ tɨwayɨroarɨŋɨnɨ. Omɨ dɨŋí̵ wɨkwí̵rogí̵áyí̵ ayá nɨwinɨrɨ ‘Pí nánɨ wɨkwí̵roŋárí̵anɨ?’ wí yaiwipí̵rí̵ámanɨ.” nɨrɨnɨrɨ eánɨŋí̵pɨ nionɨ seararɨŋápɨ tí̵nɨ xɨxenɨrɨnɨ. Ayɨnánɨ dɨŋí̵ wɨkwí̵roarɨgí̵áyí̵ne' nánɨ sí̵ŋá o ayá tí̵ŋo imónɨnɨ. E nerɨ aiwɨ dɨŋí̵ mɨwɨkwí̵ropa yarɨgí̵áyí̵ Bɨkwí̵yo re nɨrɨnɨrɨ eánɨŋí̵pɨ tí̵nɨ xɨxenɨ egí̵awixɨnɨ, “Sí̵ŋá aŋí̵ mɨrarɨgí̵áwa ‘Sɨpíorɨnɨ.’ nɨrɨro emɨ mogí̵o Gorɨxo nɨmearɨ iwamí̵ó tɨwayɨroŋo imónɨŋí̵rɨnɨ.” nɨrɨnɨrɨ eánɨŋí̵pɨ tí̵nɨ xɨxenɨ egí̵awixɨnɨ. Ámá dɨŋí̵ mɨwɨkwí̵roarɨgí̵áyí̵ nánɨ rɨpɨ enɨ nɨrɨnɨrɨ eánɨnɨ, “Sí̵ŋá o, ayí̵ ámá nóreámioarɨ ná eánɨrɨ nikɨrɨpeaánɨrɨ ná eánɨrɨ yarɨgí̵ónɨŋí̵ imónɨnɨ.” nɨrɨnɨrɨ eánɨnɨ. Ayí̵ rɨpɨ nánɨrɨnɨ. Gorɨxoyá xwɨyí̵ápɨ nɨwiaíkiro nánɨ nóreámioarɨ nánɨŋí̵ eánarɨgí̵árɨnɨ. Eŋíná Gorɨxo e e'í̵rɨxɨnɨrɨ urí̵peaagí̵rɨnɨ.

E nerɨ aí eŋíná Gorɨxo ámá xegí̵ imónɨgí̵áyí̵ nánɨ rɨŋí̵pa seyí̵ne' nánɨ enɨ xɨxenɨ axí̵pɨ re nɨrɨnɨrɨ eánɨnɨ, “Ámá gwí̵ wɨrí xí̵o xegí̵ imóní̵wɨnɨgɨnɨrɨ í̵á yamɨxárɨŋí̵rínɨŋí̵ imónɨro mɨxí̵ ináyí̵ xí̵oyá apaxí̵pánɨŋí̵ imónɨgí̵áyí̵nɨŋí̵ imónɨro ámá gwí̵ mónɨgí̵á ‘Xí̵o wimónarɨŋí̵pɨnɨ e'wanɨgɨnɨ.’ yaiwiarɨgí̵áyí̵nɨŋí̵ imónɨro ámá xí̵oyá imónɨgí̵áyí̵nɨŋí̵ imónɨro egí̵áyí̵rɨnɨ.” nɨrɨnɨrɨ eánɨŋí̵pɨ seyí̵ne' nánɨ xɨxenɨ rɨnɨnɨ. Gorɨxo —O seyí̵ne' sí̵á yinɨŋí̵mɨnɨ pí̵nɨ nɨwiárɨmɨ nɨbɨro xegí̵ wí̵á ókiárɨŋí̵mɨnɨ ŋweapí̵rí̵a nánɨ í̵á seaumɨrɨŋorɨnɨ. O seyí̵ne' awiaxí̵ seáyɨ e'mɨ imónɨŋí̵ xí̵o seaiiŋí̵pɨ ámáyo áwaŋí̵ urí̵í̵rɨxɨnɨrɨ apɨ apɨ imóní̵í̵rɨxɨnɨrɨ searí̵peaŋí̵rɨnɨ. 10 Eŋíná seyí̵ne' Bɨkwí̵yo “Ámá sɨpí̵á imónɨgí̵áyí̵rɨnɨ.” nɨrɨnɨrɨ eánɨŋí̵pɨ tí̵nɨ xɨxenɨ nimónɨro aiwɨ agwɨ ríná rɨxa ámá Gorɨxoyáyí̵ne' imónɨŋoɨ. Bɨkwí̵yo rɨnɨŋí̵pa xámɨ Gorɨxo ayá mɨseawianɨŋí̵yí̵ne' aiwɨ agwɨ ríná rɨxa ayá seawianarɨŋí̵yí̵ne'rɨnɨ.

“Ámá Gorɨxo nánɨ mají̵á imónɨgí̵áyí̵ tí̵nɨ nɨŋwearóná píránɨŋí̵ e'í̵rɨxɨnɨ.” urɨŋí̵ nánɨrɨnɨ.

11 Gí̵ dɨŋí̵ sɨxí̵ seayiŋáyí̵ne', eŋí̵ rɨre'mɨxí̵ nɨseairɨ re seararɨŋɨnɨ, “Seyí̵ne' aŋí̵ mɨ dáŋí̵yí̵ne'nɨŋí̵ nimónɨro xwí̵á rɨrímɨ urí̵nɨgí̵áyí̵ne' í̵eapá seainarɨŋí̵pɨ xe oneainɨrɨ sɨŋwí̵ mɨwɨnɨpanɨ. Í̵eapá seainarɨŋí̵pɨ dɨŋí̵yo sɨpí seaikɨxe'mɨnɨrɨ yarɨŋí̵ eŋagɨ nánɨ rarɨŋɨnɨ. 12 Seyí̵ne' ámá Gorɨxo nánɨ mají̵á nero nánɨ e'má imónɨgí̵áyí̵ tí̵ŋí̵ e nɨŋwearóná píránɨŋí̵ we' rónɨŋí̵pɨnɨ e'í̵rɨxɨnɨ. E'máyí̵ ikayí̵wí̵ nɨsearɨróná ‘Ámá rɨkɨkɨrí̵ó yarɨgí̵áyí̵ne'rɨnɨ.’ searí̵á aí seyí̵ne' we' rónɨŋí̵ imónɨŋí̵pɨnɨ yarɨŋagí̵a sɨŋwí̵ nɨseanɨro nánɨ sí̵á Kiraiso ámáyo mí ómómɨxɨmí̵ winɨ nánɨ bɨní̵áyimɨ omɨ seáyɨ e umí̵eyoaro ‘Joxɨ rɨxí̵darɨgí̵áyí̵ xeŋwí̵ rɨŋwárɨnɨ.’ rɨro epí̵rí̵a nánɨ píránɨŋí̵ e e'í̵rɨxɨnɨ.” seararɨŋɨnɨ.

“Ámá seáyɨ e seaimónɨgí̵áyo ínɨmɨ wurí̵ní̵í̵rɨxɨnɨ.” urɨŋí̵ nánɨrɨnɨ.

13 Seyí̵ne' Ámɨnáo wimónarɨŋí̵pimɨ oxí̵daneyɨnɨro ámá seameŋweapí̵rí̵a nánɨ imónɨgí̵á ayí̵ ayo ínɨmɨ sɨmaŋwí̵yónɨŋí̵ yeáyí̵ wurí̵ní̵í̵rɨxɨnɨ. E nero mɨxí̵ ináyí̵ seáyɨ e imónɨŋo gapɨmaní̵ nɨyonɨ seáyɨ e wimónɨŋí̵ eŋagɨ nánɨ omɨ sɨmaŋwí̵yónɨŋí̵ yeáyí̵ wurí̵nɨro gapɨmaní̵yí̵ enɨ ámá í̵wí̵ yarɨgí̵áyo pɨrí̵ umamoro naŋí̵ yarɨgí̵áyo seáyɨ e umero oe'poyɨnɨrɨ urí̵peaŋí̵yí̵ eŋagɨ nánɨ ayo enɨ sɨmaŋwí̵yónɨŋí̵ wurí̵nɨro e'í̵rɨxɨnɨ. 15 Gorɨxo seyí̵ne' nánɨ re nɨyaiwirɨ wimónarɨŋagɨ nánɨ rarɨŋɨnɨ, “Ámá nionɨ dɨŋí̵ nɨkwí̵roarɨgí̵áyí̵ naŋí̵ nero ínɨmɨ e nɨwurí̵nɨrɨŋí̵pimɨ dánɨ ámá mají̵á nikárɨnɨro wigí̵ mají̵á imónɨgí̵ápimɨ dánɨ yapí̵ nɨrɨro ‘Gorɨxomɨ dɨŋí̵ wɨkwí̵roarɨgí̵áyí̵ sɨwí̵ sɨpí yarɨgí̵árɨnɨ.’ rarɨgí̵ápimɨ saŋiárí̵í̵rɨxɨnɨ.” nɨyaiwirɨ wimónarɨŋagɨ nánɨ rarɨŋɨnɨ. 16 Gapɨmaní̵yo ínɨmɨ nɨwurí̵nɨróná Jisaso seaiiŋí̵pimɨ dánɨ í̵wí̵ nánɨ áxeŋwarí̵nɨŋí̵ mɨseainɨŋí̵yí̵ne' eŋagɨ nánɨ ámá “Nene áxeŋwarí̵ minɨpa eŋagwɨ nánɨ í̵wí̵ ananɨ yaní̵wɨnɨ.” nɨrɨro yarɨgí̵ápa mepa e'í̵rɨxɨnɨ. Ámá “Gorɨxo wimónarɨŋí̵pɨnɨ oyaneyɨ.” nɨwimónɨro ínɨmɨ nɨwurí̵nɨro nánɨ í̵wí̵ epaxí̵ imónɨŋí̵pɨ me' yarɨgí̵ápa seyí̵ne' enɨ axí̵pɨ e e'í̵rɨxɨnɨ. 17 Ámá nɨyonɨ we'yo uŋwɨrárɨro se'rɨxí̵meáyo dɨŋí̵ sɨxí̵ uyiro Gorɨxomɨ wáyí̵ wiro mɨxí̵ ináyí̵ seáyɨ e imónɨŋomɨ we'yo uŋwɨrárɨro e'í̵rɨxɨnɨ.

“Kiraiso sɨŋwepɨgí̵ neaiiŋí̵pimɨ xí̵dí̵í̵rɨxɨnɨ.” urɨŋí̵ nánɨrɨnɨ.

18 Xɨnáíwánɨŋí̵ nimónɨro omɨŋí̵ wiiarɨgí̵áyí̵ne', segí̵ bosí̵ seamearɨgí̵áwa nánɨ wáyí̵ nɨwiro ínɨmɨ nɨwurí̵nɨróná naŋí̵ nɨseamero awayinɨ seaiarɨgí̵áyonɨ marí̵áɨ, uyí̵nií̵ nɨseaikárɨro seamearɨgí̵áyo enɨ ínɨmɨ wurí̵nɨrí̵ɨnɨ. 19 Ayí̵ rɨpɨ nánɨ rarɨŋɨnɨ. “Gorɨxo wimónarɨŋí̵pɨ apɨrí̵anɨ?” nɨyaiwiro sa apɨnɨ oyaneyɨnɨro nánɨ “Pí pí xeanɨŋí̵ neaikáráná dɨŋí̵ rí̵á neaxearɨŋí̵pɨ ayí̵ ananɨrɨnɨ.” nɨyaiwiro xwámámí̵ nɨwirí̵náyí̵, Gorɨxo yayí̵ winarɨŋí̵ eŋagɨ nánɨ ananɨ bosowamɨ wurí̵ní̵í̵rɨxɨnɨ. 20 Í̵wí̵ yarɨŋagí̵a nɨseanɨro uyí̵nií̵ seaikáránáyí̵, seyí̵ne' xwámámí̵ wíagí̵a aiwɨ “Gorɨxo nene xwámámí̵ wiarɨŋagwɨ nánɨ ananɨ yayí̵ seáyɨ e neamení̵árɨnɨ.” rɨseaimónarɨnɨ? Oweoɨ! E nerɨ aí seyí̵ne' naŋí̵nɨ yarɨŋagí̵a aiwɨ uyí̵nií̵ seaikáráná xɨxe mɨwí xwámámí̵ nɨwirí̵náyí̵, Gorɨxo yayí̵ winɨpaxí̵pɨ yarɨŋoɨ. 21 Gorɨxo seyí̵ne' e e'í̵rɨxɨnɨrɨ we'yo í̵á seaumɨrɨŋí̵rɨnɨ. Rí̵nɨŋí̵ seyí̵ne' meapaxí̵ imónɨŋí̵pɨ Kiraiso nɨmeárɨnɨrí̵ná rí̵nɨŋí̵ seyí̵ne' enɨ surí̵má nɨmeárɨnɨróná epí̵rí̵ápɨ nánɨ sɨŋwepɨgí̵ seaiiŋí̵ eŋagɨ nánɨ rarɨŋɨnɨ. 22 O Bɨkwí̵yo “Í̵wí̵ bɨ mepa erɨ xegí̵ maŋí̵pá tí̵nɨ yapí̵ bɨ mɨrɨpa erɨ eŋí̵rɨnɨ.” nɨrɨnɨrɨ eánɨŋí̵pɨ tí̵nɨ xɨxenɨ eŋɨnigɨnɨ. 23 Omɨ ikayí̵wí̵ umeararí̵ná xí̵o enɨ wí xɨxe ikayí̵wí̵ murɨpa erɨ omɨ rí̵nɨŋí̵ wiarí̵ná “Soyí̵ne' mɨyí̵ó rárárɨnɨŋí̵yo rɨxa urí̵kwínɨpí̵ráoɨ.” murɨpa erɨ Gorɨxomɨ —O ámá nɨyonɨ wigí̵ egí̵ápɨ tí̵nɨ xɨxenɨ pɨrí̵ umamoarɨŋorɨnɨ. Omɨ dɨŋí̵ nɨwɨkwí̵rorɨ “Ayí̵ nionɨ níí̵ápɨ nánɨ pɨrí̵ umamoní̵árɨnɨ.” yaiwirɨ eŋɨnigɨnɨ. 24 Nene í̵wí̵ eŋwápɨ nánɨ Gorɨxo pɨrí̵ nɨneamamorí̵náyí̵ xɨxenɨ imónɨmɨnɨrɨ eŋí̵ aiwɨ o nene pɨrí̵ neamamómɨnɨrɨ e'í̵pɨ Kiraisomɨ pɨrí̵ umamóáná o rí̵nɨŋí̵ nɨmearɨ yoxáí̵pámɨ dánɨ peŋɨnigɨnɨ. Ámá pɨyí̵ sɨnɨ í̵wí̵ bɨ mepa yarɨgí̵ápa seyí̵ne' enɨ axí̵pɨ ero ámá sɨŋí̵ ŋweagí̵áyí̵ amɨpí xwapí̵ yarɨgí̵ápa seyí̵ne' enɨ axí̵pɨ we' rónɨŋí̵ imónɨŋí̵pɨ ero e'í̵rɨxɨnɨrɨ peŋɨnigɨnɨ. Omɨ iwaŋí̵ nɨme'pero pɨkigí̵áyo dánɨ segí̵ wárá rɨxa naŋí̵ inɨŋagɨ nánɨ “Apɨ e e'í̵rɨxɨnɨ.” seararɨŋɨnɨ. 25 Eŋíná sɨnɨ Jisasomɨ dɨŋí̵ mɨwɨkwí̵ropa neróná sipɨsipí̵ xiáwomɨ pí̵nɨ nɨwiárɨmɨ ŋɨŋií̵á neánowirí̵ná yarɨŋí̵pa yagí̵áyí̵ne' aiwɨ agwɨ ríná segí̵ seáwo —O dɨŋí̵pɨ awínɨŋí̵ seameŋweaarɨŋorɨnɨ. O tí̵ŋí̵mɨnɨ nɨbɨro nánɨ rɨxa píránɨŋí̵ ŋweaŋoɨ.

Copyright information for AAK