2 Corinthians 1

Poronɨ —Nionɨ Gorɨxo wimónɨŋí̵pimɨ dánɨ Kiraisɨ Jisasoyá wáí̵ wurɨmeiarɨŋá wonɨrɨnɨ. Nionɨ tí̵nɨ negí̵ nɨrɨxí̵meá Timotio tí̵nɨ yawawi sɨyikí̵ Gorɨxoyá imónɨgí̵á Korinɨyo ŋweagí̵áyí̵ne' tí̵nɨ oyá ámá imónɨgí̵á Gɨrikɨyí̵ aŋí̵yo wí e wí e ŋweagí̵áyí̵ne' tí̵nɨ nánɨ payí̵ rɨna nearɨ mónaparɨŋwiɨ. Negí̵ ápo Gorɨxo tí̵nɨ Ámɨná Jisasɨ Kiraiso tí̵nɨ awau' wá seawianɨri seyí̵ne' nɨwayɨrónɨro ŋweapí̵rɨ nánɨ seaimɨxɨri e'isixɨnɨ.

Xeanɨŋí̵ wímeáagɨ aí Gorɨxo ikɨŋwí̵ umɨrɨŋí̵pɨ nánɨrɨnɨ.

Gorɨxo —O negí̵ Ámɨná Jisasɨ Kiraisomɨ xano imónɨrɨ oyá Ŋwí̵áo imónɨrɨ eŋorɨnɨ. Omɨ yayí̵ nɨwirane seáyɨ e umí̵eyoaaneyɨ. Wá wianarɨgí̵á ámáyo wímeaarɨŋí̵ nɨpɨnɨ mí̵kí̵ ikiŋorɨnɨ. Ámá pí pípɨ nánɨ dɨŋí̵ sɨpí wiarɨŋí̵yo mɨŋí̵ ikɨŋwí̵ umɨrarɨgí̵ápɨ mí̵kí̵ ikiŋo, ayí̵ orɨnɨ. O mɨŋí̵ ikɨŋwí̵ neamɨrarɨŋí̵pa nene enɨ axí̵pɨ pí pí xeanɨŋí̵ wímeáí̵yo mɨŋí̵ ikɨŋwí̵ umɨraní̵wá nánɨ pí pí xeanɨŋí̵ neaímeááná mɨŋí̵ ikɨŋwí̵ neamɨrarɨŋí̵rɨnɨ. Rí̵nɨŋí̵ Kiraiso ámáyo arɨrá owimɨnɨrɨ nerí̵ná wímeaŋí̵pɨ nene enɨ ayá wí neaímeaarɨnɨ. E nerɨ aí xí̵o neaiiŋí̵pimɨ dánɨ Gorɨxo mɨŋí̵ ikɨŋwí̵ ayá wí neamɨrarɨŋí̵rɨnɨ. Xeanɨŋí̵ none neaímeáí̵pɨ, ayí̵ seyí̵ne' seaerí̵kiemeaarane mɨŋí̵ ikɨŋwí̵ seamɨrɨrane yaní̵wá nánɨ neaímeaarɨnɨ. Mɨŋí̵ ikɨŋwí̵ Gorɨxo neamɨrarɨŋí̵pɨ, ayí̵ seyí̵ne' mɨŋí̵ ikɨŋwí̵ seamɨraní̵wá nánɨ enɨ neamɨrarɨŋí̵rɨnɨ. Nepa mɨŋí̵ ikɨŋwí̵ seamɨrarɨŋwae'yí̵ne' eŋánáyí̵, xeanɨŋí̵ none xwámámí̵ wiarɨŋwápa seyí̵ne' enɨ xeanɨŋí̵ axí̵pɨ imónɨŋí̵pɨ xwámámí̵ wipaxí̵yí̵ne'rɨnɨ. None re nɨyaiwirɨ nɨjí̵á imónɨŋwɨnɨ, “Rí̵nɨŋí̵ none meaarɨŋwápɨ seyí̵ne' enɨ axí̵pɨ meaarɨgí̵árɨnɨ. Ayɨnánɨ Gorɨxo mɨŋí̵ ikɨŋwí̵ neamɨrarɨŋí̵pa seyí̵ne' enɨ axí̵pɨ seamɨrarɨŋí̵rɨnɨ.” nɨyaiwirɨ nɨjí̵á nimónɨrane nánɨ dɨŋí̵ re nɨyaiwirane ikwí̵moarɨŋwápɨ sí̵kí̵kí̵ onɨnɨ, “Seyí̵ne' eŋí̵ neánɨro pí pí seaímeáí̵pɨ ananɨ xwámámí̵ nɨwiro ŋweapí̵rí̵árɨnɨ.” yaiwiarɨŋwápɨ sí̵kí̵kí̵ onɨnɨ.

Negí̵ nɨrɨxí̵meáyí̵ne', ayí̵ rɨpɨ nánɨ seararɨŋɨnɨ. Xeanɨŋí̵ none Esia pɨropenɨsí̵yo ŋweaŋáná neaímeaŋí̵pɨ “Seyí̵ne' sɨnɨ mají̵á oimóní̵poyɨ.” mɨneaimónarɨnɨ. Xeanɨŋí̵ rí̵á tí̵ŋí̵ none eŋí̵ neánɨrane aí xwámámí̵ mɨwipaxí̵ imónɨŋí̵pɨ neaímeáagɨ “Arɨ yaní̵wɨnɨ?” nɨyaiwirí̵ná “Rɨxa nɨpeanɨre'wɨnɨ?” yaiwiŋwárɨnɨ. Ai, newanɨŋone “Eŋí̵ eánɨŋwáonerí̵anɨ?” nɨyaiwirane dɨŋí̵ mɨŋwɨrárɨní̵ sa Gorɨxomɨ —O ámá pegí̵áyí̵ wiápí̵nɨmeapí̵rí̵a nánɨ wimɨxarɨŋorɨnɨ. Omɨnɨ none dɨŋí̵ uŋwɨráraní̵wá nánɨ sɨkwí̵á neaiŋí̵pɨ neaiŋɨnigɨnɨ. Sɨkwí̵á neaiŋí̵ apɨ ámá opisí̵ aŋí̵yo dánɨ xwɨrɨxí̵ arí̵á nɨwimáná “Rɨxa pɨkípoyɨ.” rarɨŋo rɨxa “Awamɨ pɨkípoyɨ.” ránánɨŋí̵ neaiŋɨnigɨnɨ. 10 E nerɨ aí nene maŋí̵ umónanɨ nánɨ mɨmu'ropaxí̵ imónɨŋí̵ apimɨ dánɨ Gorɨxo e'í̵ neamínɨŋí̵rɨnɨ. Rí̵wí̵yo bɨ enɨ e'í̵ neamínɨní̵árɨnɨ. “Ámɨ rí̵wí̵yo bɨ maŋí̵ umónɨpaxí̵pimɨ umónanɨrɨ yarí̵ná e'í̵ neamínɨní̵árɨnɨ.” nɨyaiwirɨ dɨŋí̵ wikwí̵moarɨŋwáo seyí̵ne' none nánɨ rɨxɨŋí̵ nɨneaurɨyirɨŋí̵pimɨ dánɨ arɨrá nɨneairí̵ná ananɨ e'í̵ neamínɨní̵árɨnɨ. Gorɨxo e'í̵ neamínarɨŋagɨ nɨwɨnɨróná re nɨyaiwiro, “O ámá obaxene rɨxɨŋí̵ wurɨyarɨŋwápɨ arí̵á nɨneairɨ nánɨ Porowamɨ wá nɨwianɨrɨ xeanɨŋí̵ wímeáí̵pimɨ dánɨ e'í̵ umínɨŋí̵rí̵anɨ?” nɨyaiwiro none nánɨ omɨ yayí̵ wipí̵rí̵árɨnɨ.

Korinɨyo ámɨ muŋí̵pɨ nánɨ áwaŋí̵ urɨŋí̵ nánɨrɨnɨ.

12 Ayí̵ rɨpɨ nánɨ mɨxí̵ meakí̵nɨnarɨŋwɨnɨ. “None naŋí̵ rí̵a wiiŋwanigɨnɨ? Sɨpí rí̵a wiiŋwanigɨnɨ?” yarɨŋí̵ e ninɨrane'ná re yaiwinarɨŋwɨnɨ, “Gorɨxomɨ mɨxí̵darɨgí̵áyo sɨyikwí̵ mínɨŋí̵ nimónɨmáná wiirane omɨ píránɨŋí̵ nuxí̵dɨrí̵ná epaxí̵pɨ nepánɨ wiirane nerane aiwɨ seyí̵ne' ayí̵ aŋɨpaxí̵ e seaiiŋwanigɨnɨ.” yaiwinarɨŋwɨnɨ. Ayí̵ “Nɨjí̵á ámá wigí̵ dɨŋí̵yo dánɨ imónarɨgí̵ápimɨ dánɨ marí̵áɨ, Gorɨxo wá nɨneawianɨrɨ eŋí̵ sɨxí̵ neaímɨxɨŋí̵pimɨ dánɨ ayo e wiirane seyí̵ne' aŋɨpaxí̵ e seaiirane eŋwanigɨnɨ.” nɨyaiwinɨrane nánɨ mɨxí̵ meakí̵nɨnarɨŋwɨnɨ. 13 None seyí̵ne' nánɨ payí̵ nearɨ nɨseamónapɨrí̵ná rí̵wamɨŋí̵ seyí̵ne' í̵á nɨroro nɨjí̵á mimónɨpaxí̵pɨ nearɨ wí̵re'naparɨŋwámanɨ. Sa rí̵wamɨŋí̵ seyí̵ne' ananɨ í̵á nɨroro nɨjí̵á imónɨpaxí̵pɨ nearɨ wí̵re'naparɨŋwárɨnɨ. Agwɨ seyí̵ne' none e oyaneyɨnɨrɨ nearɨ wí̵re'naparɨŋwápɨ nánɨ “Awa ayí̵ apɨ nánɨ rí̵a yarɨŋoɨ?” nɨyaiwiro xɨxenɨ mɨneaiaiwiarɨŋagí̵a aiwɨ seyí̵ne' rɨpɨ epí̵rí̵a nánɨ dɨŋí̵ seaikwí̵moŋwɨnɨ. Rí̵we'ná seyí̵ne' none yarɨŋwápɨ nánɨ “Awa ayí̵ apɨ nánɨ regí̵awixɨnɨ?” nɨyaiwiro none e oyaneyɨnɨrɨ yarɨŋwápɨ tí̵nɨ xɨxenɨ neaiaiwipí̵rí̵a nánɨ dɨŋí̵ seaikwí̵moŋwɨnɨ. Seyí̵ne' “Porowa e yanɨro nánɨ regí̵awixɨnɨ?” xɨxenɨ nɨneaiaiwirónáyí̵, sí̵á Ámɨná Jisaso weapɨní̵áyimɨ none seyí̵ne' nánɨ ayá wí mɨxí̵ seameakí̵naní̵wápa seyí̵ne' enɨ none nánɨ mɨxí̵ neameakí̵nɨpí̵rí̵árɨnɨ.

15 Seyí̵ne' “Ayí̵ neparɨnɨ. Poro aga seáyɨ e oimónɨmɨnɨrɨ payí̵ nearɨ mónapɨŋí̵manɨ. Sa nene nánɨ ayo píránɨŋí̵ owimɨxɨmɨnɨrɨ nearɨ mónapɨŋí̵rí̵anɨ?” Seyí̵ne' ananɨ e yaiwipí̵rɨ nánɨ dɨŋí̵ nɨseaikwí̵morí̵ná re yaiwiŋanigɨnɨ, “Xámɨ seyí̵ne' tí̵ŋí̵ e nánɨ nɨbɨrí̵ná dɨŋí̵ sɨxí̵ biau' seamímóɨmɨgɨnɨ.” yaiwiŋanigɨnɨ. 16 E nɨyaiwirí̵ná ayí̵ rɨpɨ yaiwiŋanigɨnɨ, “Masedonia pɨropenɨsí̵yo nánɨ nurí̵ná seyí̵ne' tí̵ŋimanɨ xámɨ numáná ámɨ Masedonia pɨropenɨsí̵yo dánɨ nɨbɨrɨ Judia pɨropenɨsí̵yo nánɨ nurí̵ná óí̵ e dɨŋí̵ sɨxí̵ níga umí̵a nánɨ bɨ niapí̵í̵rɨxɨnɨrɨ ámɨ seyí̵ne' tí̵ŋí̵ aximanɨ bí̵ɨmɨgɨnɨ.” yaiwiŋanigɨnɨ. 17 Nionɨ e yaiwiŋá eŋagɨ nánɨ seyí̵ne' re rɨniaiwiarɨŋoɨ, “Poro ‘E e'ɨmɨgɨnɨ.’ nɨyaiwirí̵ná dɨŋí̵ ɨkwí̵roayirɨ mɨxeaayirɨ nerɨ yaiwiŋí̵rɨnɨ.” rɨniaiwiarɨŋoɨ? “O ‘Rɨpɨ e'ɨmɨgɨnɨ.’ nɨyaiwirí̵ná sɨpí̵í imónarɨŋí̵pimɨ dánɨ nɨyaiwirɨ nánɨ sa dɨŋí̵ ɨkwí̵rorɨ mɨxearɨ yarɨŋorɨnɨ.” rɨniaiwiarɨŋoɨ? 18 Pí pí Gorɨxo rarɨŋí̵pɨ dɨŋí̵ uŋwɨrárɨpaxí̵pa xwɨyí̵á none searɨŋwápimɨ enɨ dɨŋí̵ uŋwɨrárɨpaxí̵pɨ searɨŋwanigɨnɨ. Xwɨyí̵á none searɨŋwápɨ wí dɨŋí̵ ɨkwí̵rorɨ mɨxearɨ yarɨŋwámanɨ. 19 Ayí̵ rɨpɨ nánɨ seararɨŋɨnɨ. Íwí̵ Gorɨxoyáo, Kiraisɨ Jisaso —O nánɨ nionɨ tí̵nɨ Sairaso tí̵nɨ Timotio tí̵nɨ none wáí̵ searɨŋwáorɨnɨ. O dɨŋí̵ ɨkwí̵rorɨ mɨxearɨ yarɨŋomanɨ. Oweoɨ, xegí̵ dɨŋí̵ nɨyaiwirɨ ɨkwí̵róí̵pɨ anɨŋí̵nɨ ɨkwí̵roarɨŋo eŋagɨ nánɨ seararɨŋɨnɨ. 20 Gorɨxo sí̵mɨmaŋí̵yo dání̵nɨŋí̵ “E nɨseaiimí̵árɨnɨ. E nɨseaiimí̵árɨnɨ.” nɨrɨrí̵ná obaxí̵ rárɨŋí̵pɨ “Ayí̵ neparɨnɨ.” yaiwianí̵wá nánɨ sɨwánɨŋí̵ inɨŋo, ayí̵ Kiraisorɨnɨ. O e imónɨŋo eŋagɨ nánɨ Gorɨxomɨ seáyɨ e umeaní̵wá nánɨ yoparí̵pɨ nɨrɨrane'ná Jisasɨ Kiraisoyá yoí̵ rɨrane “Apɨ e imóní̵wɨnɨgɨnɨ.” rɨrane yarɨŋwárɨnɨ. 21 Seyí̵ne' tí̵nɨ none tí̵nɨ nɨnenenɨ Kiraiso tí̵nɨ nawínɨ ikárɨnaní̵wá nánɨ sí̵kí̵kí̵ neaomɨxarɨŋo, ayí̵ Gorɨxo xewanɨŋorɨnɨ. Wáí̵ rarɨŋwápɨ nánɨ nearí̵peaŋo, ayí̵ axorɨnɨ. 22 “Ayí̵ oyárí̵anɨ?” oyaiwípoyɨnɨrɨ yarɨŋí̵pa nene enɨ neaiiŋí̵rɨnɨ. Xegí̵ kwíyí̵pɨ nɨneaiapɨrí̵ná nene “O re'roárɨŋí̵pɨ nɨpɨnɨ xɨxenɨ nɨneaiiní̵árɨnɨ.” yaiwianí̵wá nánɨ kwíyí̵pɨ tí̵nɨ ikɨyiŋí̵nɨŋí̵ neaiárɨŋí̵rɨnɨ.

23 Nionɨ apaxí̵ me' seyí̵ne' tí̵ŋí̵ e nánɨ nɨbɨrɨ mɨxí̵ searáná dɨŋí̵ rí̵á seaxenɨgɨnɨrɨ “Ámɨ Korinɨyo nánɨ mɨbɨpa e'ɨmɨgɨnɨ.” yaiwiŋanigɨnɨ. Nionɨ dɨŋí̵ e yaiwiarí̵ná Gorɨxo, sɨŋwí̵ nanɨŋo ananɨ sopɨŋí̵ nopaxí̵rɨnɨ. 24 None seáyɨ e nɨseaimónɨrane seyí̵ne' dɨŋí̵ ɨkwí̵ropaxí̵ imónɨŋí̵pɨ “Ayí̵ rɨpɨnɨrɨnɨ.” osearaneyɨnɨrɨ mɨyarɨŋwɨnɨ. Seyí̵ne' Jisasomɨ dɨŋí̵ nɨwɨkwí̵roróná sɨrí̵ muní̵ nero wɨkwí̵roarɨgí̵á eŋagɨ nánɨ none Gorɨxomɨ nɨxí̵dɨrane'ná seyí̵ne' dɨŋí̵ nií̵á seainɨní̵a nánɨ sa seyí̵ne' tí̵nɨ nawínɨ omɨŋí̵nɨŋí̵ e'wanɨgɨnɨrɨ imónɨŋwɨnɨ.

Copyright information for AAK