2 Timothy 3

“ ‘Jisasomɨ oxí̵dɨmɨnɨ.’ yaiwiarɨŋagɨ aí ámá sɨpí xɨxegí̵nɨ epí̵rí̵a nánɨ saŋí̵ runɨní̵árɨnɨ.” urɨŋí̵ nánɨrɨnɨ.

Joxɨ rɨpɨ nánɨ dɨŋí̵ iróneɨ. Sí̵á yoparí̵ imónɨŋí̵yí̵ tí̵ŋíná Jisaso weapɨní̵áyi sɨnɨ mimónɨŋáná “Omɨ anɨŋí̵ ouxí̵daneyɨ.” yaiwiarɨgí̵áyo saŋí̵ wunɨpaxí̵ imónɨŋí̵pɨ wímeaní̵árɨnɨ. Ayí̵ ámá sɨpíyí̵ rɨpɨ rɨpɨ epí̵rí̵á eŋagɨ nánɨ rarɨŋɨnɨ. Wiwanɨŋí̵nɨ dɨŋí̵ sɨpí inɨro nɨgwí̵ nánɨ íkí̵nɨŋí̵ sɨpí inɨro mɨxí̵ meakí̵nɨnɨro wárɨxa imónɨro ikayí̵wí̵ rɨro xɨnáíxaneyo aríkwí̵kwí̵ wiro ámá amɨpí naŋí̵ bɨ wíagí̵a aí yayí̵ mɨwipa ero pí pí ŋwí̵á imónɨŋí̵pɨ wɨwií̵á rɨrómí̵ ero u'rɨxí̵meáyo dɨŋí̵ sɨxí̵ muyipa ero sí̵mɨsí̵ neainɨróná pɨyí̵á mɨwí̵rɨnɨpaxí̵ imónɨro sɨpí owímeanɨrɨ mɨmayí̵ó rɨro pí pí í̵eapá winarɨŋí̵pɨ mɨwiaíkipaxí̵ imónɨro pí pípɨ oyaneyɨnɨrɨ neróná ímí̵ tí̵nɨ ero pí pí naŋí̵ imónɨŋí̵pɨ nánɨ wikí̵ ónɨro wigí̵ wínɨyí̵ aí nánɨ mɨyí̵ urɨro pasá umero ayá nepeárɨmáná u'rapí ero wiwanɨŋí̵yí̵ nánɨ “Seáyɨ e mimónɨpa reŋwɨnɨ?” yaiwinɨro amɨpí nerí̵ná Gorɨxo yayí̵ winarɨŋí̵pɨ nánɨ íkí̵nɨŋí̵ sɨpí bɨ mɨwí wiwanɨŋí̵yí̵ yayí̵ winarɨŋí̵pɨnɨ nánɨ íkí̵nɨŋí̵ sɨpí wiro epí̵rí̵árɨnɨ. Mimóní̵ xwɨyí̵á nɨrɨro “Gorɨxomɨ píránɨŋí̵ xí̵danɨro rí̵a yarɨŋoɨ?” oneaiaiwípoyɨnɨrɨ nero aiwɨ oyá eŋí̵ eánɨŋí̵ xí̵omɨ xí̵dɨpí̵rí̵a nánɨ wimɨxɨpaxí̵ imónɨŋí̵pimɨ rí̵wí̵ umopí̵rí̵árɨnɨ. Ámá e yarɨgí̵áyí̵ tí̵ŋí̵ e yarí̵róɨrɨxɨnɨ. Ayí̵ ámá ayí̵yá wí rɨpɨ yarɨgí̵á eŋagɨ nánɨ “Ayí̵ tí̵ŋí̵ e yarí̵róɨrɨxɨnɨ.” rɨrarɨŋɨnɨ. Wigí̵ xwɨyí̵á pɨyɨpɨyí̵ urarɨgí̵ápimɨ dánɨ aŋí̵ ákɨŋáyo nɨpáwiro apɨxí̵ wigí̵ í̵wí̵ e'í̵ápimɨ dánɨ ayá udunarɨŋíwamɨ —Íwa dɨŋí̵ nɨpɨkwɨnɨ mɨmaxɨrɨgí̵íwarɨnɨ. Wigí̵ mɨŋí̵ winarɨŋí̵pimɨ dánɨ sɨpí oyaneyɨnɨrɨ nipemeánɨmɨ warɨgí̵íwarɨnɨ. Nɨjí̵á oimónaneyɨnɨrɨ anɨŋí̵ miní̵ ne'wapí̵nɨrɨ aí xwɨyí̵á nepaxɨŋí̵ imónɨŋí̵pɨ tí̵nɨ xɨxenɨ nɨjí̵á mimónarɨgí̵íwarɨnɨ. Íwamɨ yapí̵ wíwapɨyarí̵ná arí̵á nɨwiro nánɨ gwí̵yónɨŋí̵ nikɨrɨpeaánɨrɨ ŋweaŋoɨ. Eŋíná Janiso tí̵nɨ Jaboriso tí̵nɨ awau' Mosesomɨ maŋí̵ pí̵rí̵ wiaíkímí̵ yanɨri nánɨ egí̵ípa ámá sɨpí ayí̵ —Ayí̵ dɨŋí̵ rí̵á xeyánɨgí̵áyí̵ eŋagɨ nánɨ dɨŋí̵ nɨpɨkwɨnɨ mɨmoarɨgí̵áyí̵rɨnɨ. Xwɨyí̵á nepa imónɨŋí̵pimɨ dɨŋí̵ mɨkwí̵roarɨŋagí̵a nánɨ Gorɨxo rí̵wí̵ umoŋí̵yí̵rɨnɨ. Ayí̵ enɨ awau' egí̵ípa axí̵pɨ xwɨyí̵á nepaxɨŋí̵ imónɨŋí̵pɨ pí̵rí̵ wiaíkímí̵ yanɨro yarɨgí̵árɨnɨ. Eŋíná yegí̵ Isɨrerɨyí̵ wigí̵ awau' Mosesomɨ maŋí̵ pí̵rí̵ wiaíkímí̵ owiaiyɨnɨrɨ yarɨgí̵ípɨ sɨŋwí̵ nɨwɨnaxí̵dɨróná “Majɨmají̵á nikárɨnɨri rí̵a yarɨŋiɨ?” yaiwiagí̵ápa agwɨ ríná enɨ ámá ní̵nɨ sɨpí yarɨgí̵áyí̵ wigí̵ yarɨgí̵ápɨ sɨŋwí̵ mí nómɨxɨróná “Majɨmají̵á nikárɨnɨro rí̵a e'í̵awixɨnɨ?” yaiwipí̵rí̵á eŋagɨ nánɨ xwɨyí̵á nepaxɨŋí̵ imónɨŋí̵pɨ pí̵rí̵ wiaíkímí̵ yanɨro yarɨgí̵ápɨ sɨpu'ru'rí̵ epí̵rí̵árɨnɨ.

“Nionɨ rɨre'wapɨyiŋápɨ xaíwí̵ í̵á xɨrí̵ɨrɨxɨnɨ.” urɨŋí̵ nánɨrɨnɨ.

10 Joxɨ nionɨ tí̵nɨ nemerai sɨŋwí̵ nanaxí̵dagoxɨ eŋagɨ nánɨ nionɨ ámáyo ure'wapɨyemeagápɨranɨ, nemerí̵ná yagápɨranɨ, e oemɨnɨrɨ yagápɨranɨ, Gorɨxomɨ dɨŋí̵ nɨwɨkwí̵róa wagápɨranɨ, wikí̵ mɨwónɨpa nerɨ awayinɨ yagápɨranɨ, ámá nánɨ wá nunagí̵pɨranɨ, xeanɨŋí̵ xwámámí̵ wiagápɨranɨ, apɨ nɨpɨnɨ yagápɨ nánɨ joxɨ nɨjí̵árɨnɨ. 11 Nionɨ aŋí̵ Adiokɨyɨ rɨnɨŋí̵pimɨ tí̵nɨ Aikoniamɨyɨ rɨnɨŋí̵pimɨ tí̵nɨ Risɨtɨraɨ rɨnɨŋí̵pimɨ tí̵nɨ aŋí̵ apiau' apimɨ wáí̵ urɨmearí̵ná xeanɨŋí̵ nikárí̵agɨ nánɨ rí̵nɨŋí̵ nímeaŋí̵pɨ nánɨ enɨ joxɨ nɨjí̵á imónɨŋɨnɨ. Xeanɨŋí̵ rí̵á tí̵ŋí̵ nikárayíagí̵a aí xwámámí̵ wiŋárɨnɨ. Apɨ nɨpimɨnɨ dánɨ Ámɨnáo e'í̵ nɨmímɨnɨŋí̵rɨnɨ. 12 Ai, ámá Kiraisɨ Jisaso tí̵nɨ nawínɨ ikárɨnɨgí̵á eŋagɨ nánɨ omɨ píránɨŋí̵ oxí̵daneyɨnɨrɨ yarɨgí̵á nɨyonɨ enɨ xeanɨŋí̵ wímeaní̵árɨnɨ. 13 Ámá sɨpí yarɨgí̵áyí̵ tí̵nɨ mimóní̵ yarɨgí̵áyí̵ tí̵nɨ wigí̵ sɨpí yarɨgí̵ápɨ sayá nimɨxa nuróná wíyo yapí̵ wíwapɨyiro wiwanɨŋí̵yí̵ oboyá dɨŋí̵yo dánɨ yapí̵ e'wapí̵nɨro epí̵rí̵árɨnɨ. 14 E epí̵rí̵á eŋagɨ aí xwɨyí̵á joxɨ rɨre'wapɨyiŋápimɨ dánɨ nɨjí̵á imónɨrɨ “Apɨ nepaxɨŋí̵ imónɨŋí̵pɨrí̵anɨ?” yaiwiárɨrɨ eŋí̵pɨ wí arí̵á mikeamó xaíwí̵ í̵á xɨrí̵ɨrɨxɨnɨ. Ayí̵ rɨpɨ nánɨ rɨrarɨŋɨnɨ. Joxɨ nene xwɨyí̵á apɨ rɨrɨŋwae'ne nánɨ “Ayí̵ dɨŋí̵ ŋwɨrárɨpaxí̵yí̵rí̵anɨ?” nɨyaiwirɨ píránɨŋí̵ nɨjí̵á imónɨrɨ 15 oníná dánɨ rí̵wamɨŋí̵ Gorɨxoyá nɨrɨnɨrɨ eánɨŋí̵pɨ nánɨ nɨjí̵á imónɨrɨ eŋagɨ nánɨ rɨrarɨŋɨnɨ. Rí̵wamɨŋí̵ nɨrɨnɨrɨ eánɨŋí̵ apɨ joxɨ í̵á nɨrorɨŋí̵pimɨ dánɨ dɨŋí̵ e'mí̵ saímí̵ moŋí̵pɨ morí̵a nánɨ sɨwánɨŋí̵ sipemearɨ Kiraisɨ Jisasomɨ dɨŋí̵ wɨkwí̵róí̵pimɨ dánɨ yeáyí̵ rɨyimɨxemeaní̵a nánɨ sɨwánɨŋí̵ sipemearɨ epaxí̵rɨnɨ. 16 Gorɨxoyá rí̵wamɨŋí̵ nɨrɨnɨrɨ eánɨŋí̵ nɨpɨnɨ xí̵oyá kwíyí̵pimɨ dánɨ nɨrɨro eagí̵ápɨrɨnɨ. Nepa imónɨŋí̵pɨ nánɨ neare'wapɨyipaxí̵ imónɨrɨ xeŋwí̵ yarɨŋwápɨ nánɨ sɨwá neaipaxí̵ imónɨrɨ ayɨyumí̵ neaipaxí̵ imónɨrɨ we' rónɨŋí̵ imónɨŋí̵pɨ yaní̵wá nánɨ yayí̵wí̵ neamepaxí̵ imónɨrɨ eŋí̵pɨrɨnɨ. 17 Xwɨyí̵á apɨ ámá Gorɨxoyá imónɨgí̵áyí̵ rɨpiau' epí̵rí̵a nánɨrɨnɨ. Xí̵o “E e'í̵rɨxɨnɨ.” wimónarɨŋí̵pɨ epí̵rí̵a nánɨ eŋí̵ sɨxí̵ eánɨro pí pí naŋí̵ imónɨŋí̵pɨ epí̵rí̵a nánɨ ipɨmónɨro epí̵rí̵a nánɨrɨnɨ.

Copyright information for AAK