Acts 15

E'má Jisasomɨ xí̵darɨgí̵áyí̵ nánɨ xwɨyí̵á imɨxɨgí̵á nánɨrɨnɨ.

Ámá wa Judia pɨropenɨsí̵yo dánɨ nɨweapɨro Adiokɨ nɨre'mómáná ámá Jisasomɨ dɨŋí̵ nɨwɨkwí̵roro nánɨ wigí̵ xexɨrí̵meá imónɨgí̵áyo nure'wapɨyiro re urɨgí̵awixɨnɨ, “Seyí̵ne' Judayene tí̵nɨ xɨxenɨ imónɨpí̵rɨ nánɨ negí̵ arí̵o Moseso rɨŋí̵pɨ iyí̵ sí̵mí̵ sí̵ó mɨwákwínɨpa nerónáyí̵, Gorɨxo yeáyí̵ seayimɨxemeapaxí̵ menɨnɨ.” urarɨŋagí̵a Poro tí̵nɨ Banabaso tí̵nɨ xwɨyí̵á sí̵mí̵ tí̵nɨ xɨmɨxɨmí̵ ninɨro xwɨyí̵á ayá wí nɨrɨga nɨwiápí̵nɨmearo ne'í̵asáná ámá e dáŋí̵ Jisasoyá sɨyikí̵ imónɨgí̵áyí̵ re rɨnɨgí̵awixɨnɨ, “Poro tí̵nɨ Banabaso tí̵nɨ negí̵ wa tí̵nɨ Jerusaremɨ nánɨ nuro wáí̵ wurɨmeiarɨgí̵áwa tí̵nɨ ámá e dáŋí̵ Jisasoyá sɨyikí̵ imónɨgí̵áyo wipeŋweagí̵áwa tí̵nɨ nerɨmeánɨmáná ‘Iyí̵ sí̵mí̵ sí̵ó wákwíní̵poyɨ.’ neararɨgí̵á rɨpɨ nánɨ xwɨyí̵á nimɨxɨróná, ayí̵ naŋí̵rɨnɨ.” nɨrɨnɨro urowárau'áná awa xwí̵á Pinisiayɨ rɨnɨŋí̵pimɨ tí̵nɨ Samaria pɨropenɨsí̵yo tí̵nɨ nɨpurí̵ná aŋí̵ apɨ apimɨ Jisasomɨ dɨŋí̵ nɨwɨkwí̵roro nánɨ xexɨrí̵meá imónɨgí̵á wíyonɨ wíyonɨ e'máyí̵ Gorɨxo tí̵ámɨnɨ kɨnɨmónɨgí̵ápɨ nánɨ e e áwaŋí̵ nura nɨmu'roróná yayí̵ nɨwimóa ugí̵awixɨnɨ.

E nemowa rɨxa Jerusaremɨ nɨre'moro aŋí̵ e dáŋí̵ Jisasoyá sɨyikí̵ imónɨgí̵áyí̵ tí̵nɨ wigí̵ wipeŋweagí̵áwa tí̵nɨ wáí̵ wurɨmeiarɨgí̵áwa tí̵nɨ yayí̵ wiemeááná Poro tí̵nɨ Banabaso tí̵nɨ awau' e'máyí̵ tí̵ŋí̵ e emearí̵ná Gorɨxo egí̵ we'yo dánɨ ne'ra uŋí̵ nɨpɨnɨ nánɨ repɨyí̵ wiarí̵ná re eŋɨnigɨnɨ. Parisi imónɨgí̵á Jisasomɨ dɨŋí̵ wɨkwí̵roarɨgí̵á wa nɨwiápí̵nɨmearo re rɨgí̵awixɨnɨ, “E'má Jisasomɨ dɨŋí̵ wɨkwí̵roarɨgí̵áyí̵ negí̵ iyí̵ sí̵mí̵ sí̵ó wákwínarɨŋwápɨ mepa epaxí̵ wí mimónɨnɨ. Ayí̵ ŋwí̵ ikaxí̵ negí̵ arí̵o Moseso eaŋí̵pimɨ mɨxí̵dɨpa nerí̵ná, ‘Ayí̵ ananɨrɨnɨ.’ urɨpaxí̵ mimónɨnɨ. Ayo nure'wapɨyirane ‘Apimɨ anɨŋí̵ miní̵ xí̵dí̵í̵rɨxɨnɨ.’ urí̵wanɨgɨnɨ.” rɨgí̵awixɨnɨ. Ayɨnánɨ wáí̵ wurɨmeiarɨgí̵áwa tí̵nɨ Jisasoyá sɨyikí̵ imónɨgí̵áyo wipeŋweagí̵áwa tí̵nɨ apɨ nánɨ xwɨyí̵á imɨxanɨro nánɨ awí neánɨro rɨxa xwɨyí̵á ayá wí rɨrowiágí̵ niní̵asáná eŋáná Pitao nɨwiápí̵nɨmearɨ re urɨŋɨnigɨnɨ, “Gí̵ nɨrɨxí̵meá imónɨgí̵oyí̵ne', xámɨ dánɨ e'máyí̵ xwɨyí̵á yayí̵ neainarɨŋí̵pɨ arí̵á wiro dɨŋí̵ wɨkwí̵roro epí̵rí̵a nánɨ soyí̵ne'yá wo iwamí̵ó wáí̵ urí̵wɨnɨgɨnɨrɨ Gorɨxo eyíroŋo, ayí̵ nionɨ eŋagɨ nánɨ soyí̵ne' nɨjí̵árɨnɨ. Nionɨ ayo wáí̵ urɨmeááná Gorɨxo —O ámáyá xwioxí̵yo imónɨŋí̵pɨ ní̵nɨ nánɨ nɨjí̵á imónɨŋorɨnɨ. O xegí̵ kwíyí̵pɨ nene neaiapɨŋí̵pa axí̵pɨ mɨnɨ nɨwirɨŋí̵pimɨ dánɨ sɨwá re'nɨŋí̵ neaiŋí̵rɨnɨ. E'máyí̵ enɨ dɨŋí̵ nɨnɨkwí̵roróná, ayí̵ ananɨrɨnɨ. Sɨwá e'nɨŋí̵ neaiŋí̵rɨnɨ. Judayene xegí̵ bɨ neaiirɨ e'máyo xegí̵ bɨ wiirɨ eŋí̵manɨ. Nene neaiiŋí̵pa axí̵pɨ ayí̵ enɨ dɨŋí̵ wɨkwí̵roarɨŋagí̵a nɨwɨnɨrɨ yokwarɨmí̵ wiiŋí̵rɨnɨ. 10 Ayɨnánɨ soyí̵ne' Gorɨxo wikí̵ oneaónɨrɨ pí nánɨ yarɨŋoɨ? Ŋwí̵ ikaxí̵ Moseso eaŋí̵pimɨ dánɨ saŋí̵ negí̵ arí̵owa ananɨ nɨmeámɨ upaxí̵ mimónɨŋí̵pɨ —Apɨ, ayí̵ ŋwí̵ ikaxí̵ negí̵ arí̵owa oxí̵daneyɨnɨróná nɨxí̵dɨpaxí̵ mimónɨŋí̵pɨrɨnɨ. Apɨ pí nánɨ e'má Jisasomɨ dɨŋí̵ wɨkwí̵roarɨgí̵áyo wikwiáranɨro yarɨŋoɨ? Soyí̵ne' Gorɨxo ayo mɨwikwiárɨŋí̵pɨ wikwiáranɨro nerɨŋí̵pimɨ dánɨ Gorɨxo nene wikí̵ oneaónɨrɨ yarɨŋoɨ. 11 Nene dɨŋí̵ wí re mɨmó, ‘Ŋwí̵ ikaxí̵ eánɨŋí̵pɨ xí̵darɨŋwápimɨ dánɨ yeáyí̵ neayimɨxemeapaxí̵rɨnɨ.’ wí mɨmó dɨŋí̵ re neaipɨmónɨnɨ, ‘Ámɨná Jisaso e'máyo wá nɨwianɨrɨ ayo nánɨ wayí̵á upeiŋí̵yo dánɨnɨ Gorɨxo yeáyí̵ uyimɨxemeaarɨŋí̵pa Judayene enɨ axí̵pɨ e yeáyí̵ neayimɨxemeaarɨŋí̵rɨnɨ.’ Dɨŋí̵ e neaipɨmónɨnɨ.” urɨŋɨnigɨnɨ.

12 Awí eánɨgí̵áwa xwɨyí̵á bɨ mɨrí̵ sɨnɨ arí̵ánɨ nɨwiro yarí̵ná Banabaso tí̵nɨ Poro tí̵nɨ e'í̵ nɨrori xwɨyí̵á nurɨri emɨmí̵ tí̵nɨ ayá rɨwamónɨpaxí̵ imónɨŋí̵ tí̵nɨ awau' e'máyí̵ tí̵ŋí̵ e wáí̵ urɨmearí̵ná Gorɨxo egí̵ we'yo dánɨ wíwapɨyiŋí̵pɨ nánɨ repɨyí̵ nɨwiri 13 rɨxa nɨrárɨmáná eŋáná Jemiso nɨwiápí̵nɨmearɨ re urɨŋɨnigɨnɨ, “Gí̵ nɨrɨxí̵meá imónɨgí̵oyí̵ne', xwɨyí̵á nionɨyá bɨ enɨ arí̵á nípoyɨ. 14 ‘Gorɨxo e'máyí̵ nánɨ wí dɨŋí̵ mɨmoarɨnɨnɨ.’ yaiwiagwá aiwɨ xewanɨŋo e'máyí̵ wí nionɨyá imóní̵í̵rɨxɨnɨrɨ nɨwieyírorɨŋí̵pimɨ dánɨ ámá ayí̵ nánɨ moŋí̵pɨ iwamí̵ó sɨwá neaiŋí̵rɨnɨ. Apɨ nánɨ Saimono rɨxa repɨyí̵ neaiŋoɨ. 15 Agwɨ o nearí̵í̵pɨ, ayí̵ wí̵á rókiamoagí̵áwa Depitoyá í̵wiárí̵awe' nánɨ nɨrɨro eagí̵á rɨpɨ tí̵nɨ xɨxenɨ imónɨnɨ, 16 ‘Apɨ nɨpɨnɨ nimónɨmáná eŋáná Gorɨxonɨ ámɨ nɨbɨrɨ aŋí̵ segí̵ mɨxí̵ ináyí̵ Depitoyá pɨneamioagiwá ámɨ mɨrɨmí̵árɨnɨ. Aŋiwá xwɨrí̵á ikɨxe'nɨŋí̵pɨ ámɨ nɨmɨrɨrɨ sɨŋí̵ imɨxɨmí̵árɨnɨ. 17 Ayí̵ rɨpɨ nánɨ e emí̵árɨnɨ. Judayí̵ gwí̵ axí̵rí marí̵áɨ, ámá gwí̵ wɨrí̵ wɨrí ní̵nɨ Ámɨnáonɨ tí̵ámɨnɨ obí̵poyɨnɨrɨ nánɨ ámɨ apɨ e mɨrɨmí̵árɨnɨ. Ayí̵ e'má nionɨyá imóní̵í̵rɨxɨnɨrɨ we'yo í̵á umɨrɨŋáyí̵ nionɨ tí̵ámɨnɨ obí̵poyɨnɨrɨ ámɨ mɨrɨmí̵árɨnɨ. 18 Ámɨnáonɨ xwɨyí̵á rɨpɨ seyí̵ne' nɨjí̵á oimóní̵poyɨnɨrɨ eŋíná dánɨ searɨŋáonɨ seararɨŋɨnɨ.’ Xwɨyí̵á wí̵á rókiamoagí̵áwa eagí̵á apɨ tí̵nɨ Saimonɨ nearí̵í̵pɨ tí̵nɨ xɨxenɨ imónɨnɨ. 19 Ayɨnánɨ dɨŋí̵ nionɨyá enɨ rɨpɨrɨnɨ. E'má Gorɨxo tí̵ámɨnɨ ukɨnɨmónarɨgí̵áyo upupí̵gí̵ mɨwikárɨpa oyaneyɨ. 20 Ŋwí̵ ikaxí̵ eánɨŋí̵ nɨpɨnɨ nánɨ mɨwikwiárɨpa nemáná aí sa payí̵ wí nearane re urí̵wanɨgɨnɨ, ‘Judayene xwɨrí̵á neainɨpaxí̵ imónɨŋí̵ rɨpɨ rɨpɨ mepa e'í̵rɨxɨnɨ. Ámá wí mimóní̵ ŋwí̵á imónɨŋí̵pɨ nánɨ rɨdɨyowá yarɨgí̵ápɨ mɨnɨpa e'í̵rɨxɨnɨ. Apɨxí̵ nɨmearí̵ná sewɨnɨ mɨmeánɨpa e'í̵rɨxɨnɨ. Naŋwí̵ gwí̵ siŋwí̵yo xɨráná ragí̵ sɨnɨ eŋí̵pɨ mɨnɨpa e'í̵rɨxɨnɨ. Rakiwí̵ enɨ mɨnɨpa e'í̵rɨxɨnɨ.’ Apɨnɨ payí̵ nearane urí̵wanɨgɨnɨ. 21 Ámá eŋíná dánɨ ne'ra nɨbɨro nene ŋweaŋwá ríná enɨ Sabarí̵á ayí̵ ayo aŋí̵ apɨ apimɨ ámá wa ŋwí̵ ikaxí̵ Moseso eaŋí̵pimɨ dánɨ í̵á roro ure'wapɨyiro yarɨŋagí̵a nánɨ e'máyí̵ Judayene xwɨrí̵á neainarɨŋí̵pɨ nánɨ nɨjí̵á imónɨŋoɨ. Ayɨnánɨ rí̵wamɨŋí̵ apɨnɨ nearane e urí̵wanɨgɨnɨ.” urɨŋɨnigɨnɨ.

E'máyí̵ nánɨ payí̵ nearo wiowárɨgí̵á nánɨrɨnɨ.

22 Wáí̵ wurɨmeiarɨgí̵áwa tí̵nɨ Jerusaremɨ dánɨ Jisasoyá sɨyikí̵ imónɨgí̵á ní̵nɨ tí̵nɨ wigí̵ wipeŋweagí̵áwa tí̵nɨ enɨ dɨŋí̵ ná bɨnɨ nɨxɨrɨro re rɨnɨgí̵awixɨnɨ,

“Negí̵ wí Poro tí̵nɨ Banabaso tí̵nɨ payí̵ nɨmaxɨrɨmɨ upí̵rɨ nánɨ nɨrí̵pearane'náyí̵ naŋí̵rɨnɨ.” nɨrɨnɨro Judasomɨ —O xegí̵ yoí̵ ámɨ bɨ Basabasorɨnɨ. Omɨ tí̵nɨ ámɨ wo Sairasomɨ tí̵nɨ —Awau' Jisasomɨ dɨŋí̵ nɨwɨkwí̵roro nánɨ xexɨrí̵meá imónɨgí̵áyo seáyɨ e imónɨgí̵íwau'rɨnɨ. Awau'mɨ nɨrí̵pearo
23 payí̵ re nɨrɨnɨrɨ eánɨŋí̵pɨ wiowárɨgí̵awixɨnɨ, “Wáí̵ wurɨmeiarɨŋwáone tí̵nɨ Jisasoyá sɨyikí̵ imónɨgí̵áyo umeŋweaŋwáone tí̵nɨ nene segí̵ se'rɨxí̵meá imónɨŋwae'ne seyí̵ne' negí̵ nɨrɨxí̵meá imónɨgí̵áyí̵ne' nánɨ —Wiyí̵ne' aŋí̵ yoí̵ Adiokɨyo ŋweagí̵áyí̵ne', wiyí̵ne' Siria pɨropenɨsí̵yo ŋweagí̵áyí̵ne', wiyí̵ne' Sirisia pɨropenɨsí̵yo ŋweagí̵áyí̵ne'rɨnɨ. Seyí̵ne' nánɨ payí̵ rɨpɨ nearɨ wiowáre'naparɨŋwɨnɨ. Seyí̵ne' nɨyí̵ne'nɨ yayí̵ oseainɨnɨ. 24 None rɨxa arí̵á re wíwárɨnɨ, ‘Negí̵yí̵ wí none “Soyí̵ne' nuro e urí̵poyɨ.” murí̵wámɨ ayí̵ seyí̵ne' tí̵e nánɨ nɨbɨro seare'wapɨyarí̵ná dɨŋí̵ rí̵á seaxerɨ dɨŋí̵ sɨmɨgwí̵á seayinɨrɨ eŋí̵rɨnɨ.’ arí̵á e wíwá eŋagɨ nánɨ 25 none rɨxa dɨŋí̵ ná bɨnɨ tí̵nɨ nimónɨmáná ‘Ayí̵ rɨpɨ nerane'ná naŋí̵rɨnɨ.’ neaimóní̵í̵rɨnɨ, ‘Ámá negí̵ wamɨ nɨrí̵pearane Banabasomɨ tí̵nɨ Soromɨ tí̵nɨ —Awau' nene dɨŋí̵ sɨxí̵ uyiŋwáwau'rɨnɨ. Negí̵ Ámɨná Jisasɨ Kiraiso nánɨ wáí̵ nurɨmeríná yoí̵ mayí̵ nimónɨri urɨmegí̵íwau'rɨnɨ. Awau'mɨ tí̵nɨ negí̵ wamɨ tí̵nɨ seyí̵ne' tí̵ŋí̵ e nánɨ nurowáre'napɨrí̵ná, ayí̵ naŋí̵rɨnɨ.’ neaimóní̵í̵rɨnɨ. 27 Ayɨnánɨ rí̵wamɨŋí̵ re eaarɨŋwápɨ Judaso tí̵nɨ Sairaso tí̵nɨ awau' maŋí̵ tí̵nɨ enɨ ananɨ áwaŋí̵ searí̵isixɨnɨrɨ urowárarɨŋwɨnɨ. 28 None xwɨyí̵á nimɨxɨrane'ná kwíyí̵ Gorɨxoyáyo dánɨ re rɨní̵wanigɨnɨ, ‘Ŋwí̵ ikaxí̵ ayá wí saŋí̵nɨŋí̵ imónɨŋí̵pɨ mɨwikwiárɨpanɨ.’ rɨní̵wanigɨnɨ. Ŋwí̵ ikaxí̵ e'máyí̵ne' aga pí̵nɨ mɨwiárɨpaxí̵ imónɨŋí̵pɨ, ayí̵ rɨpɨnɨrɨnɨ. 29 Ámá wigí̵ mimóní̵ ŋwí̵á imónɨŋí̵pɨ nánɨ rɨdɨyowá yarɨgí̵ápɨ mɨnɨpa e'í̵rɨxɨnɨ. Rakiwí̵ mɨnɨpa e'í̵rɨxɨnɨ. Naŋwí̵ gwí̵ siŋwí̵yo xɨráná ragí̵ sɨnɨ eŋagɨ nánɨ mɨnɨpa e'í̵rɨxɨnɨ. Apɨxí̵ nɨmearóná sewɨnɨ mɨmeánɨpa e'í̵rɨxɨnɨ. Seyí̵ne' nene rí̵wá apɨnɨ e nerónáyí̵, ayí̵ apánɨ yarɨŋoɨ. Negí̵ xwɨyí̵á apɨrɨnɨ.”
E nɨrɨro payí̵ eagí̵awixɨnɨ.
30 E nemowa mɨnɨ wiowáráná awa payí̵ nɨmeámɨ Adiokɨ nánɨ nɨwero nɨre'mómáná ámá e dáŋí̵ Jisasoyá sɨyikí̵ imónɨgí̵áyo awí neaárɨmáná payí̵ mɨnɨ wíagí̵a 31 ayí̵ í̵á nɨroróná xwɨyí̵á eŋí̵ rɨre'mɨxí̵ nɨwiro eánɨŋagɨ nánɨ dɨŋí̵ nií̵á winɨŋɨnigɨnɨ. 32 Dɨŋí̵ nií̵á winarí̵ná Judaso tí̵nɨ Sairaso tí̵nɨ awau' enɨ wí̵á rókiamoarɨgí̵íwau' eŋagí̵i nánɨ wigí̵ xexɨrí̵meá imónɨgí̵áyo xwɨyí̵á ayá wí bɨ tí̵nɨ eŋí̵ rɨre'mɨxí̵ nɨwiri eŋí̵ sɨxí̵ nɨwímɨxɨri egí̵isixɨnɨ. 33 E nemowau' sí̵á wí e nɨŋweagí̵isáná eŋáná awau'mɨ ámɨ wigí̵ urowárɨgí̵áwa tí̵ŋí̵ e nánɨ nurowárɨro yayí̵ wiowárí̵agí̵a nánɨ xexɨrí̵meá imónɨgí̵á e ŋweagí̵áyo pí̵nɨ nɨwiárɨmɨ kikií̵á ne'ra ugí̵isixɨnɨ. 34 [Jerusaremɨ nánɨ nuri aiwɨ Sairaso “Adiokɨyo ámɨ bɨ tí̵nɨ nɨŋwearí̵ná, naŋí̵ emí̵ɨnɨ.” yaiwiŋɨnigɨnɨ.] 35 Awau' e e'agí̵i aí Poro tí̵nɨ Banabaso tí̵nɨ Adiokɨyo nɨŋweari ámá obaxí̵ wí tí̵nɨ nawínɨ xwɨyí̵á Ámɨnáoyápɨ wáí̵ urɨmeri ure'wapɨyiri egí̵isixɨnɨ.

Poro tí̵nɨ Banabaso tí̵nɨ ewáramónɨgí̵í nánɨrɨnɨ.

36 E nemowau' rɨxa sí̵á wí mu'róáná Poro Banabasomɨ re urɨŋɨnigɨnɨ, “Yawawi ámɨ nurai aŋí̵ apɨ apimɨ xwɨyí̵á Ámɨnáoyápɨ wáí̵ nurɨmeraíná ámá Jisasomɨ dɨŋí̵ nɨwɨkwí̵roro nánɨ yegí̵ nɨrɨxí̵meá imónɨgí̵áyí̵ arɨge rí̵a ŋweaŋoɨnɨrɨ sɨŋwí̵ owɨnɨmeaaiyɨ.” urí̵agɨ 37 Banabaso “Ayí̵ ananɨrɨnɨ.” nɨyaiwirɨ “Jonɨ Mako enɨ yawawi tí̵nɨ nawínɨ owaneyɨ.” wimóní̵agɨ aiwɨ 38 Poro arí̵kí re urarɨŋagɨ nánɨ, “Xámɨ wáí̵ urɨmeanɨrane nurane'ná sɨnɨ nápɨ oyaneyɨnɨrɨ nánɨ mu' Pabiria pɨropenɨsí̵yo dánɨ pí̵nɨ nɨyeawiárɨmɨ uŋo ámɨ yawawi tí̵nɨ nawínɨ nɨwirɨmeámɨ mupa oyaiyɨ.” urarɨŋagɨ nánɨ 39 mɨxí̵ nɨrɨnowieání̵isáná apimɨ dánɨ newáramónɨri Banabaso Jonɨ Makomɨ nɨwirɨmeámɨ nurɨ sɨpɨxí̵ womɨ nɨpɨxemoánɨri nɨŋweari pɨrɨŋwí̵ Saipɨrasɨyɨ rɨnɨŋí̵pimɨ nánɨ ugí̵isixɨnɨ. 40 E nánɨ u'agí̵i aí Poro Sairasomɨ nɨmearɨ xexɨrí̵meá imónɨgí̵áyí̵ awau' wáí̵ emearí̵ná Ámɨnáo wá nɨwianɨrɨ ume'wɨnɨgɨnɨrɨ omɨ we'yo mɨnɨ wíáná e dánɨ pí̵nɨ nɨwiárɨmɨ nuri 41 Siria pɨropenɨsí̵yo tí̵nɨ Sirisia pɨropenɨsí̵yo tí̵nɨ áwɨnɨ e nuri aŋí̵ apɨ apimɨ nɨre'mómáná ámá Jisasoyá sɨyikí̵ imónɨgí̵á wíyí̵ wíyo nure'wapɨya nuríná eŋí̵ sɨxí̵ wímɨxɨgí̵isixɨnɨ.

Copyright information for AAK