Galatians 3

Dɨŋí̵ nɨwɨkwí̵rorɨŋí̵pimɨ dánɨ imónɨpaxí̵pɨ tí̵nɨ ŋwí̵ ikaxí̵pɨ nɨxí̵dɨrɨŋí̵pimɨ dánɨ imónɨpaxí̵pɨ tí̵nɨ nánɨrɨnɨ.

Majɨmají̵á ikárɨnarɨgí̵á Garesia ŋweagí̵áyí̵ne', ámá go dɨŋí̵ pí̵rɨpí̵rí̵ seaíagɨ yarɨŋoɨ? Kiraisomɨ yoxáí̵pámɨ yekwɨroáráná nene nánɨ neaiiŋí̵pɨ nánɨ nionɨ seyí̵ne' tí̵nɨ nɨŋwearí̵ná píránɨŋí̵ repɨyí̵ nɨseaie'ra uŋá eŋagɨ nánɨ sewanɨŋí̵yí̵ne' sɨŋwí̵ tí̵ní̵nɨŋí̵ wɨnɨgí̵á eŋagɨ nánɨ rarɨŋɨnɨ. Nionɨ yarɨŋí̵ bɨ rɨpɨnɨ oseaimɨnɨ, “Gorɨxo xegí̵ kwíyí̵pɨ nɨseaiapɨrí̵ná seyí̵ne' ŋwí̵ ikaxí̵ Moseso eaŋí̵pimɨ xí̵darɨŋagí̵a nɨseanɨrɨ seaiapɨŋí̵ranɨ? Xwɨyí̵á Kiraiso nánɨ rɨnɨŋí̵pɨ arí̵á nɨwiro dɨŋí̵ wɨkwí̵róagí̵a nɨseanɨrɨ mɨseaiapɨpa eŋí̵ranɨ?” Seyí̵ne' arɨge nero majɨmají̵á ayá wí ikárɨnarɨŋoɨ? Iwamí̵ó íná Gorɨxoyá oimónaneyɨnɨro kwíyí̵pɨ eŋí̵ seaímɨxɨŋí̵pimɨ dánɨ ne'ra nu'í̵asáná agwɨ segí̵ eŋí̵ eánɨgí̵ápimɨ dánɨnɨ yóí̵ oimónaneyɨnɨro rɨyarɨŋoɨ? Kiraisomɨ dɨŋí̵ wɨkwí̵róáná seaímeaŋí̵ nɨpɨnɨ surí̵má rɨseaímeaŋɨnigɨnɨ? “Oweoɨ, apɨ surí̵má wí mɨseaímeaŋɨnigɨnɨ.” nimónarɨnɨ. Gorɨxo xegí̵ kwíyí̵pɨ sɨxí̵ nɨseayirɨ emɨmí̵ nɨseaíwapɨyirí̵ná seyí̵ne' ŋwí̵ ikaxí̵ Moseso eaŋí̵pimɨ xí̵darɨŋagí̵a nɨseanɨrɨ nánɨ seaíwapɨyarɨŋí̵ranɨ? Xwɨyí̵á yayí̵ neainarɨŋí̵ imónɨŋí̵pɨ arí̵á nɨwiro dɨŋí̵ wɨkwí̵róagí̵a nɨseanɨrɨ nánɨ mɨseaíwapɨyipa yarɨŋí̵ranɨ?

Bɨkwí̵yo re nɨrɨnɨrɨ eánɨnɨ, “Ebɨrí̵amo Gorɨxo urí̵í̵pɨ dɨŋí̵ wɨkwí̵róagɨ nánɨ ‘We' rónɨŋí̵ imónɨŋí̵ worɨnɨ.’ rárɨŋí̵rɨnɨ.” E nɨrɨnɨrɨ eánɨŋagɨ nánɨ dɨŋí̵ re móí̵rɨxɨnɨ, “Gɨyí̵ marí̵áɨ, dɨŋí̵ Gorɨxomɨ wɨkwí̵roarɨgí̵áyí̵ Ebɨrí̵amoyá í̵wiárí̵awe' imónɨgí̵áyí̵rɨnɨ.” móí̵rɨxɨnɨ. Eŋíná Gorɨxo re eŋwɨpeárɨŋí̵ eŋagɨ nánɨ “E'máyí̵ nionɨ dɨŋí̵ nɨkwí̵róáná ‘We' rónɨgí̵áyí̵rɨnɨ.’ rárí̵ɨmɨgɨnɨ.” nɨrɨrɨ eŋwɨpeárɨŋí̵ eŋagɨ nánɨ Bɨkwí̵yo nɨrɨnɨrɨ eánɨŋí̵pa Ebɨrí̵amomɨ xwɨyí̵á yayí̵ winarɨŋí̵ imónɨŋí̵ rɨpɨ urɨŋɨnigɨnɨ, “Joxɨmɨ dánɨ ámá rɨxí̵ wɨrí̵ wɨrí egí̵áyo nɨyonɨ naŋí̵ wiimí̵árɨnɨ.” urɨŋɨnigɨnɨ. Ayɨnánɨ re rɨpaxí̵rɨnɨ, “Gorɨxo ámá xí̵omɨ dɨŋí̵ wɨkwí̵roarɨgí̵á gɨyí̵ gɨyo Ebɨrí̵amo, dɨŋí̵ wɨkwí̵roŋomɨ tí̵nɨ nawínɨ naŋí̵ wiiŋí̵yí̵rɨnɨ.” rɨpaxí̵rɨnɨ. 10 Rɨpɨ nánɨ enɨ dɨŋí̵ nɨmorí̵ná axí̵pɨ yaiwipaxí̵rɨnɨ. Ámá ŋwí̵ ikaxí̵ Moseso eaŋí̵pimɨ nɨxí̵dɨrɨŋí̵pimɨ dánɨ Gorɨxoyá sɨŋwí̵yo dánɨ we' rónɨŋwae'ne oimónaneyɨnɨrɨ yarɨgí̵á ní̵nɨ oyá sɨŋwí̵yo dánɨ sa aní̵nɨmɨxɨnɨpí̵rí̵a nánɨ xwɨyí̵á meárɨnɨgí̵áyí̵ imónɨŋoɨ. Bɨkwí̵yo re nɨrɨnɨrɨ eánɨŋagɨ nánɨ rarɨŋɨnɨ, “Ámá ŋwí̵ ikaxí̵ Bɨkwí̵yo eánɨŋí̵ apɨ apɨ nɨyonɨ xɨxenɨ mɨxí̵dɨpa yarɨgí̵á gɨyí̵ gɨyí̵ Gorɨxoyá sɨŋwí̵yo dánɨ sa naní̵nɨmɨxɨnanɨro nánɨ xwɨyí̵á meárɨnarɨŋoɨ.” nɨrɨnɨrɨ eánɨŋagɨ nánɨ rarɨŋɨnɨ. 11 Bɨkwí̵yo rɨpɨ enɨ nɨrɨnɨrɨ eánɨŋagɨ nánɨ rarɨŋɨnɨ, “Ámá dɨŋí̵ wɨkwí̵róagí̵a nánɨ Gorɨxo ‘We' rónɨŋoɨ.’ rárɨŋí̵yí̵ dɨŋí̵ nɨyɨmɨŋí̵ tí̵gí̵á imónɨpí̵ráoɨ.” nɨrɨnɨrɨ eánɨŋagɨ nánɨ dɨŋí̵ re yaiwiárɨpaxí̵rɨnɨ, “Ámá wo ŋwí̵ ikaxí̵ eánɨŋí̵pimɨ xí̵darɨŋagɨ nánɨ Gorɨxo ‘We' rónɨŋoxɨrɨnɨ.’ urárɨpaxí̵ mimónɨnɨ.” yaiwiárɨpaxí̵rɨnɨ. 12 We' rónɨŋí̵ oimónaneyɨnɨro ŋwí̵ ikaxí̵ xí̵darɨgí̵ápɨ, ayí̵ Gorɨxomɨ dɨŋí̵ wɨkwí̵roarɨgí̵ápɨ tí̵nɨ xɨxenɨmanɨ. Rɨpɨ Bɨkwí̵yo nɨrɨnɨrɨ eánɨŋagɨ nánɨ rarɨŋɨnɨ, “Ámá ŋwí̵ ikaxí̵ eánɨŋí̵pɨ xí̵darɨgí̵áyí̵ bɨ aí mɨwiamó wigí̵ xɨxenɨ nɨxí̵dɨrɨŋí̵pimɨ dánɨnɨ dɨŋí̵ nɨyɨmɨŋí̵ tí̵gí̵áyí̵ imónarɨgí̵árɨnɨ.” nɨrɨnɨrɨ eánɨŋagɨ nánɨ rarɨŋɨnɨ. 13 Judayene ŋwí̵ ikaxí̵ eánɨŋí̵pimɨ dánɨ naní̵naní̵wá nánɨ xwɨyí̵á meárɨnɨŋwae'ne imónɨŋagɨ aí Kiraiso xewanɨŋo nene nánɨ xwɨyí̵á neameárɨniarí̵ná waní̵nɨmɨxí̵ápimɨ dánɨ gwí̵nɨŋí̵ nearoayíroŋí̵rɨnɨ. Ayí̵ rɨpɨ nɨrɨnɨrɨ eánɨŋagɨ nánɨ seararɨŋɨnɨ, “Ámá pɨkíáná íkí̵áyo yekwɨroárɨnɨgí̵á gɨyí̵ gɨyí̵ Gorɨxoyá sɨŋwí̵yo dánɨ aní̵nɨmɨxɨnanɨro xwɨyí̵á meárɨnɨgí̵áyí̵rɨnɨ.” nɨrɨnɨrɨ eánɨŋagɨ nánɨ “Kiraiso nene nánɨ xwɨyí̵á neameárɨniŋí̵pimɨ dánɨ gwí̵nɨŋí̵ nearoayíroŋí̵rɨnɨ.” seararɨŋɨnɨ. 14 Ebɨrí̵amomɨ sí̵mɨmaŋí̵yo dánɨ Gorɨxo “Naŋí̵ e nɨseaiimí̵árɨnɨ.” re'roárɨŋí̵pɨ e'máyo enɨ wímearɨ Judayene Gorɨxo negí̵ arí̵owamɨ sí̵mɨmaŋí̵yo dánɨ “Nɨgí̵ kwíyí̵pɨ nɨseaiapɨmí̵árɨnɨ.” rɨŋí̵pɨ nene Kiraiso neaiiŋí̵pɨ dɨŋí̵ wɨkwí̵roarɨŋwápimɨ dánɨ neaímearɨ ení̵a nánɨ gwí̵nɨŋí̵ nearoayíroŋí̵rɨnɨ.

“Ŋwí̵ ikaxí̵pɨ nɨrɨrí̵ná Ebɨrí̵amomɨ ‘Nɨseaiimí̵árɨnɨ.’ urɨŋí̵pɨ xwí̵á oiwenɨnɨrɨ rɨŋí̵manɨ.” urɨŋí̵ nánɨrɨnɨ.

15 Gí̵ nɨrɨxí̵meáyí̵ne', ámae'ne yarɨŋwápɨ nánɨ xwɨyí̵á bɨ osearɨmɨnɨ. Ámá wo xwɨyí̵á rɨxa nɨre'roárɨrí̵ná “E nɨsiimí̵árɨnɨ.” nurɨrɨ nánɨ “Joxɨ rɨrí̵ápɨ íkí̵ sɨŋagɨ nɨkwí̵rɨmónɨmí̵ámanɨ.” e'nɨŋí̵ nurɨrí̵náyí̵, rí̵we'ná ámɨ omɨwiárómɨnɨrɨ nerɨ wí rɨní̵áranɨ? Ámɨ sɨŋí̵ bɨ gí̵wí̵ nímɨxɨrɨ wí rɨní̵áranɨ? Oweoɨ. 16 Gorɨxo Ebɨrí̵amomɨ tí̵nɨ iyí̵ axí̵pámɨ tí̵nɨ sí̵mɨmaŋí̵yo dánɨ “Dɨxí̵ iyí̵ axí̵pámɨ dánɨ naŋí̵ nɨseaiimí̵árɨnɨ.” re'roárɨŋí̵pɨ nurɨrɨ iyí̵ axí̵páyɨ nɨrɨrí̵ná Ebɨrí̵amoyá í̵wiárí̵awe' obaxí̵ nánɨ mɨrí̵ ná wonɨ Kiraiso nánɨ rɨŋí̵rɨnɨ. 17 Nionɨ osearɨmɨnɨrɨ seararɨŋápɨ rɨpɨ imónɨnɨ. Wigí̵ sí̵mɨmaŋí̵yo dánɨ “Naŋí̵ e nɨseaiimí̵árɨnɨ.” nurárɨmáná eŋáná xwiogwí̵ rɨxa 430 nɨmu'rómáná eŋáná ŋwí̵ ikaxí̵pɨ nurɨrɨ aiwɨ xámɨ “E nɨseaiimí̵árɨnɨ.” nurɨrí̵ná “Íkí̵ sɨŋagɨ nɨkwí̵rɨmónɨmí̵ámanɨ.” e'nɨŋí̵ urárɨŋí̵pɨ nánɨ wí rakínɨŋí̵manɨ. Ayɨnánɨ re nimónarɨnɨ, “ ‘E nɨseaiimí̵árɨnɨ.’ urárɨŋí̵pɨ Gorɨxo wí xwí̵á oiwenɨnɨrɨ eŋí̵manɨ.” nimónarɨnɨ. 18 Ŋwí̵ ikaxí̵ rɨnɨŋí̵pɨ xí̵darɨŋwápimɨ dánɨ Gorɨxo nene nánɨ neaipɨmoáriŋí̵pɨ neaímeapaxí̵ nimónɨrí̵náyí̵, nene re yaiwianɨgɨnɨ, “O ‘Nɨseaiimí̵árɨnɨ.’ re'roárɨŋí̵pimɨ dɨŋí̵ wɨkwí̵roarɨŋwápimɨ dánɨ neaímeapaxí̵manɨ.” yaiwianɨgɨnɨ. E nerɨ aí Ebɨrí̵amomɨ sí̵mɨmaŋí̵yo dánɨ “Nɨseaiimí̵árɨnɨ.” re'roárɨŋí̵pimɨ dɨŋí̵ wɨkwí̵roŋí̵pimɨ dánɨnɨ wímeaŋí̵ eŋagɨ nánɨ dɨŋí̵ wí e yaiwianɨme'wɨnɨ.

19 E seararɨŋagɨ nánɨ ámá wo re nɨrɨnɨŋoɨ, “Ŋwí̵ ikaxí̵ rɨnɨŋí̵pimɨ xí̵darɨŋwápimɨ dánɨ Gorɨxo nene nánɨ neaipɨmoáriŋí̵pɨ nepa mɨneaímeapaxí̵ nimónɨrí̵náyí̵, pí nánɨ ŋwí̵ ikaxí̵pɨ nearɨŋí̵rí̵anɨ?” nɨrɨnɨŋoɨ. Ai ayí̵ Ebɨrí̵amoyá iyí̵ axí̵pá imónɨŋo —“Omɨ dánɨ naŋí̵ nɨseaiimí̵árɨnɨ.” urɨŋo, ayí̵ orɨnɨ. O imóní̵e nánɨ “Í̵wí̵ nene yarɨŋwápɨ xí̵oyá maŋí̵ nɨwiaíkirɨ rí̵a yarɨŋwɨnɨ?” oyaiwípoyɨnɨrɨ ŋwí̵ ikaxí̵pɨ nearɨŋí̵rɨnɨ. Ŋwí̵ ikaxí̵ apɨ Gorɨxo aŋí̵nají̵yá maŋí̵yo dánɨ apaxí̵pánɨŋí̵ imónɨŋí̵ womɨ urɨŋí̵pɨrɨnɨ. 20 Ámá wo apaxí̵pánɨŋí̵ imónɨŋo apɨ urɨnɨrɨ nurowárɨrí̵ná xewanɨŋo apɨ urɨnɨmenɨŋoɨ. E nerɨ aí Gorɨxo “E nɨseaiimí̵árɨnɨ.” nurɨrí̵ná ámá apaxí̵pánɨŋí̵ imónɨŋí̵ womɨ murowárí̵ wayá sí̵mɨmaŋí̵yo dánɨ urarɨgí̵ápa axí̵pɨ e eŋí̵rɨnɨ.

21 Ámá wo re rɨnɨŋoɨ, “Gorɨxo xwɨyí̵á Ebɨrí̵amomɨ sí̵mɨmaŋí̵yo dánɨ ‘E nɨseaiimí̵árɨnɨ.’ nurɨmáná ámɨ rí̵wí̵yo xegí̵ ámáyo ŋwí̵ ikaxí̵pɨ nurɨrí̵ná ikweakwí̵mí̵ nerɨ mɨrɨpa reŋɨnigɨnɨ?” Ámá wo e ráná “Oweoɨ, wí e rɨpaxí̵manɨ.” urɨmí̵ɨnɨ. Gorɨxo ŋwí̵ ikaxí̵ ámá nɨxí̵dɨrɨŋí̵pimɨ dánɨ dɨŋí̵ nɨyɨmɨŋí̵ imónɨpí̵rí̵a nánɨ imónɨpaxí̵ bɨ nɨrɨrɨ sɨŋwɨrɨyí̵, ayí̵ ŋwí̵ ikaxí̵ apɨ xɨxenɨ xí̵darɨŋagí̵a nɨwɨnɨrí̵ná “Gí̵ sɨŋwí̵yo dánɨ we' rónɨgí̵áyí̵ne'rɨnɨ.” urɨpaxí̵ imónɨmɨnɨrɨ eŋí̵rɨnɨ. 22 E nerɨ aí rí̵wamɨŋí̵ Bɨkwí̵yo neánɨrɨŋí̵yo dánɨ ámae'ne negí̵ í̵wí̵ yarɨŋwápɨ nánɨ Gorɨxo gwí̵nɨŋí̵ neayáragí̵rɨnɨ. Ámá Jisasɨ Kiraisomɨ dɨŋí̵ wɨkwí̵roarɨgí̵áyo sa e yarɨgí̵ápimɨ dánɨ “E nɨseaiimí̵árɨnɨ.” re'roárɨŋí̵pɨ tí̵nɨ xɨxenɨ wiiní̵a nánɨ ámae'ne í̵wí̵ yarɨŋwápɨ nánɨ ŋwí̵ ikaxí̵ neánɨrɨŋí̵yo dánɨ gwí̵nɨŋí̵ neayáragí̵rɨnɨ.

“Ŋwí̵ ikaxí̵pɨ Kiraisomɨ dɨŋí̵ wɨkwí̵róí̵rɨxɨnɨrɨ yayí̵wí̵ neameŋí̵rɨnɨ.” urɨŋí̵ nánɨrɨnɨ.

23 Xwɨyí̵á dɨŋí̵ wɨkwí̵roarɨŋwáo nánɨpɨ sɨnɨ mɨrɨnɨpa eŋáná ŋwí̵ ikaxí̵ eánɨŋí̵pɨ yayí̵wí̵ nɨneame'ra nɨbɨrɨ xwɨyí̵á apɨ sɨŋánɨ imóní̵e nánɨ gwí̵nɨŋí̵ neayáragí̵rɨnɨ. 24 Ayí̵ rɨpɨ seararɨŋɨnɨ. Ŋwí̵ ikaxí̵ eánɨŋí̵pɨ Kiraiso tí̵ŋí̵ e nánɨ nɨneaipemeámɨ neauní̵a nánɨ yayí̵wí̵ nɨneame'ra bagí̵rɨnɨ. Ámá Kiraisomɨ dɨŋí̵ wɨkwí̵roarɨŋagí̵a nánɨ Gorɨxo “Gí̵ sɨŋwí̵yo dánɨ we' rónɨŋoɨ.” rárarɨŋí̵ eŋagɨ nánɨ nene apɨ e imónaní̵wá nánɨ yayí̵wí̵ nɨneame'ra bagí̵rɨnɨ. 25 Xámɨ yayí̵wí̵ nɨneame'ra bagí̵ aí xwɨyí̵á dɨŋí̵ wɨkwí̵roarɨŋwáo nánɨpɨ rɨxa nimónɨŋagɨ nánɨ yayí̵wí̵ neamearɨŋí̵pimɨ sɨnɨ xí̵dɨpaxí̵ menɨnɨ.

“Dɨŋí̵ wɨkwí̵roarɨŋwápimɨ dánɨ Gorɨxoyá niaíwene imónɨŋwɨnɨ.” urɨŋí̵ nánɨrɨnɨ.

26 Seyí̵ne' nɨyí̵ne'nɨ Kiraisɨ Jisasomɨ dɨŋí̵ wɨkwí̵roarɨgí̵ápimɨ dánɨ o tí̵nɨ nawínɨ nikárɨnɨro nánɨ niaíwí̵ Gorɨxoyá imónɨgí̵áyí̵ne'rɨnɨ. 27 Kiraiso tí̵nɨ oikárɨnaneyɨnɨro nɨyí̵ne'nɨ wayí̵ nɨmearo xí̵o imónɨŋí̵pa oimónaneyɨnɨro rapɨrapí̵ wu'nɨŋí̵ yínɨgí̵árɨnɨ. 28 Seyí̵ne' nɨyí̵ne'nɨ Kiraisɨ Jisaso tí̵nɨ nawínɨ ikárɨnɨŋagí̵a nánɨ wiyí̵ne' Judayí̵ imónɨgí̵áyí̵ne'ranɨ, wiyí̵ne' Gɨrikɨyí̵ imónɨgí̵áyí̵ne'ranɨ, wiyí̵ne' wayá xɨnáíwánɨŋí̵ nimónɨro omɨŋí̵ wiiarɨgí̵áyí̵ne'ranɨ, wiyí̵ne' omɨŋí̵ wayápɨ epí̵rɨ nánɨ áxeŋwarí̵ minɨgí̵áyí̵ne'ranɨ, wiyí̵ne' oxí̵yí̵ne'ranɨ, wiyí̵ne' apɨxí̵yí̵ne'ranɨ, nɨyí̵ne'nɨ sɨyikí̵ ná bɨnɨ imónɨŋagí̵a nánɨ Gorɨxoyá sɨŋwí̵yo dánɨ ananɨ imónɨnɨ. 29 Kiraiso tí̵nɨ nawínɨ ikárɨnɨgí̵áyí̵ne' eŋagɨ nánɨ Ebɨrí̵amoyá iyí̵ axí̵pá imónɨŋoɨ. Ayɨnánɨ xí̵omɨ sí̵mɨmaŋí̵yo dánɨ “Nɨseaiimí̵árɨnɨ.” re'roárɨŋí̵pɨ seaiiní̵áyí̵ne' imónɨŋoɨ. Segí̵ arí̵o Ebɨrí̵amoyá dɨŋí̵pɨ meapí̵rí̵áyí̵ne'nɨŋí̵ imónɨŋoɨ.

Copyright information for AAK