Mark 13

“Aŋí̵ rɨdɨyowá yarɨgí̵iwá pɨneapí̵rí̵árɨnɨ.” urɨŋí̵ nánɨrɨnɨ.

Jisaso aŋí̵ rɨdɨyowá yarɨgí̵iwámɨ pí̵nɨ nɨwiárɨmɨ warí̵ná xegí̵ wiepɨsarɨŋowa wo re urɨŋɨnigɨnɨ, “Neare'wapɨyarɨŋoxɨnɨ, aŋí̵ awiaxí̵ ikwí̵rónɨrɨ sí̵ŋá naŋí̵ nɨŋweaxa urɨ eŋí̵ eyí̵ sɨŋwí̵ wɨneɨ.” uráná o re urɨŋɨnigɨnɨ, “Aŋí̵ xwe' tɨyí̵ sɨŋwí̵ rɨwɨnɨŋɨnɨ? Rí̵we'ná sí̵ŋá kɨkírónɨŋí̵ rɨpɨyí̵ womɨ seáyɨ e ikwiárɨnɨní̵ámanɨ. Ní̵nɨ nɨkwierómioaní̵árɨnɨ.” nurɨmɨ ugí̵awixɨnɨ.

Xeanɨŋí̵ xámɨ wímeaní̵ápɨ nánɨ urɨŋí̵ nánɨrɨnɨ.

O dí̵wí̵ mɨŋí̵ Oripiyɨ rɨnɨŋí̵yo nɨŋwearɨ aŋí̵ rɨdɨyowá yarɨgí̵á pí̵nɨ nɨwiárɨmɨ yapí̵ámɨnɨ wenɨŋí̵ nero ŋweaŋáná wiepɨsarɨŋí̵ Pitao tí̵nɨ Jemiso tí̵nɨ Jono tí̵nɨ Adɨruo tí̵nɨ wigí̵pɨ yarɨŋí̵ re wigí̵awixɨnɨ, “Joxɨ ‘Sí̵ŋá womɨ seáyɨ e ikwiárɨní̵ámanɨ. Nɨkwierónowiní̵árɨnɨ.’ nearí̵í̵pɨ gíná imónɨní̵árɨnɨ? Sɨŋwí̵ ayo nɨwɨnɨrane ‘Rɨxa nimónɨnɨ aŋwɨ ayorí̵anɨ?’ yaiwianí̵wá nánɨ pí ekɨyiŋí̵ neainɨní̵árɨnɨ? Ekɨyiŋí̵ neainɨní̵ápɨ nánɨ áwaŋí̵ neareɨ.” urí̵agí̵a o áwaŋí̵ nurɨrɨ re urɨŋɨnigɨnɨ, “Ámá wí yapí̵ seare'wapɨyanɨro epí̵rí̵á eŋagɨ nánɨ dɨŋí̵ í̵á nɨxɨrɨro e'í̵rɨxɨnɨ. Ámá obaxí̵ wo wo nɨbayiro yoí̵ nionɨyá nɨrɨnɨro yapí̵ re seare'wapɨyanɨro epí̵rí̵árɨnɨ, ‘Yeáyí̵ seayimɨxemeámí̵a nánɨ arí̵owayá xwí̵á piaxí̵yo dánɨ iwiaroŋáonɨrɨnɨ.’ seare'wapɨyanɨro e'áná ámá obaxí̵ ‘Nepaxɨnɨ.’ nɨyaiwiro xeŋwí̵yo xí̵dɨpí̵rí̵árɨnɨ. Ayɨnánɨ nionɨ seararɨŋápɨ dɨŋí̵ í̵á nɨxɨrɨro e'í̵rɨxɨnɨ. Seyí̵ne' ‘Aŋí̵ ayo mɨxí̵ inarɨŋoɨ.’ ránáyí̵, xwɨyí̵á imɨŋí̵ ‘Aŋí̵ wu'mɨ mɨxí̵ inarɨŋoɨ.’ rɨnɨme'ánáyí̵, wáyí̵ mepanɨ. Mɨxí̵ ayí̵ xámɨ niga nurɨ aiwɨ sí̵á yoparí̵ Jisasonɨ weapɨmí̵áyi sɨnɨrɨnɨ. Ámá gwí̵ wɨrí nɨwiápí̵nɨmearo wínɨyí̵ tí̵nɨ mɨxí̵ inɨro ero mɨxí̵ ináyí̵ wí nɨwiápí̵nɨmearo wí tí̵nɨ mɨxí̵ inɨro ero aŋí̵ wíyí̵ wíyo poboní̵ erɨ aŋí̵ wámɨ agwí̵ nánɨ ikeamónɨro yarɨŋagɨ nɨwɨnɨrí̵ná dɨŋí̵ re yaiwipí̵rí̵á nánɨ ‘Rí̵we'ná xwe' ení̵a nánɨ iwamí̵ó ríyí̵ rɨyarɨnɨ?’ yaiwipí̵rí̵a nánɨ seararɨŋɨnɨ. Apɨxí̵ niaíwí̵ nɨxɨrɨrí̵ná dɨŋí̵ re yaiwiarɨgí̵ápa ‘Rí̵we'ná rí̵nɨŋí̵ xwe' nimɨnɨrɨ nánɨ iwamí̵ó rɨniarɨnɨ?’ yaiwiarɨgí̵ápa soyí̵ne' enɨ nionɨ rarɨŋápɨ nɨwɨnɨrí̵ná re yaiwíí̵rɨxɨnɨ, ‘Rí̵we'ná xeanɨŋí̵ xwe' neaímeaní̵árí̵anɨ?’ yaiwíí̵rɨxɨnɨ. Nionɨ rí̵wí̵mɨnɨ nɨmamopí̵rɨxɨnɨrɨ nionɨ seararɨŋápɨ sí̵mí̵mɨnɨ tɨro awínɨŋí̵ ŋwearo e'í̵rɨxɨnɨ. Seyí̵ne' nionɨ nɨxí̵darɨŋagí̵a nánɨ ámá wí pí̵rí̵ owiaíkianeyɨnɨro í̵á nɨseaxero negí̵ Judayí̵yá opisí̵ aŋí̵yo seawárɨro rotu' aŋí̵ neneyáyo dánɨ iwaŋí̵ seame'pero epí̵rí̵árɨnɨ. Mɨxí̵ ináyí̵ tí̵nɨ gapɨmaní̵ tí̵nɨ ayí̵yá sɨŋwí̵yo dánɨ enɨ nɨseaurárɨmáná xwɨrɨxí̵ seamepí̵rí̵á eŋagɨ aiwɨ nionɨ nánɨ sɨnɨ urí̵í̵rɨxɨnɨ. 10 Xwɨyí̵á nionɨ nánɨ yayí̵ seainarɨŋí̵pɨ ámá gwí̵ wɨrí̵ wɨrí ní̵nɨ arí̵á wigí̵ámɨ eŋáná ámɨ weapɨmí̵árɨnɨ. 11 Ayí̵ í̵á nɨseaxero opisí̵ aŋí̵yo seawáráná ayá sí̵wí̵ nɨsearorɨ ‘Pí̵ne' arɨre uranɨre'wɨnɨ?’ mɨyaiwipa e'í̵rɨxɨnɨ. Íná Gorɨxo pí pí nánɨ searí̵í̵yí̵ ananɨ kwíyí̵ oyápimɨ dánɨ urɨpí̵rí̵árɨnɨ. 12 Xexɨrí̵meá wo nɨwiápí̵nɨmearɨ xexɨrí̵meáomɨ opɨkípoyɨnɨrɨ í̵á nɨxerɨ opisí̵ aŋí̵yo wárɨrɨ xanowa enɨ wigí̵ niaíwí̵ opɨkípoyɨnɨrɨ í̵á nɨxero opisí̵ aŋí̵yo wárɨro niaíwí̵yí̵ enɨ xanɨyau'mɨ opɨkípoyɨnɨrɨ wárɨro epí̵rí̵árɨnɨ. 13 Seyí̵ne' yoí̵ nionɨyá nɨrɨro xí̵darɨŋagí̵a nánɨ wikí̵ nɨseaónɨro sí̵mí̵ tí̵nɨ seaipí̵rí̵árɨnɨ. E seaipí̵rí̵á eŋagɨ aiwɨ gɨyí̵ gɨyí̵ne' eŋí̵ neánɨro nionɨ nɨxí̵dɨro anɨŋí̵ dɨŋí̵ nɨkwí̵roro nerí̵náyí̵, sí̵á yoparí̵ nionɨ ámɨ bɨmí̵áyi Gorɨxo ananɨ yeáyí̵ seayimɨxemeaní̵árɨnɨ.

Ámá wo ŋwí̵á imónɨŋe xórórí̵ ení̵íná nánɨ urɨŋí̵ nánɨrɨnɨ.

14 “Seyí̵ne' ámá sɨpí seaikárɨŋo ŋwí̵á imónɨŋe xórórí̵ nerɨ xwɨrí̵á ikɨxe'agɨ nɨwɨnɨrí̵náyí̵ ámá Judia pɨropenɨsí̵yo ŋweagí̵áyí̵ dí̵wí̵ tí̵ŋí̵ e nánɨ e'í̵ yíí̵rɨxɨnɨ. Ámá gɨyí̵ xwɨyí̵á rɨpɨ í̵á roarɨgí̵áyí̵ dɨŋí̵ píránɨŋí̵ móí̵rɨxɨnɨ. 15 Ámá gɨyí̵ gɨyí̵ aŋí̵ waíwí̵yo nɨpeyiro seáyí̵mɨnɨ mɨrɨnɨŋiwámɨ nɨŋwearo ‘Sɨpí neaikárɨŋo rɨxa ŋwí̵á imónɨŋe xwɨrí̵á ikɨxe'í̵rɨnɨ.’ rɨnarɨŋagí̵a arí̵á nɨwirí̵náyí̵ nɨwiápí̵nɨmeámáná amɨpí ínɨmɨ aŋí̵ mɨrɨnɨŋiwámɨ weŋí̵pɨ meaanɨro nánɨ mɨpáwipa sa dí̵wí̵ tí̵ŋí̵ e nánɨ aŋí̵nɨ e'í̵ yíí̵rɨxɨnɨ. 16 Ámá aiwá omɨŋí̵yo yarɨgí̵áyí̵ enɨ arí̵á e nɨwirí̵náyí̵ ámɨ iyí̵á meaanɨro nánɨ aŋí̵ e nánɨ mupa sa dí̵wí̵yo nánɨ e'í̵ yíí̵rɨxɨnɨ. 17 Íná apɨxí̵ niaíwí̵ agwí̵ egí̵íwa tí̵nɨ sɨnɨ niaíwí̵ amɨŋí̵ narɨgí̵íwa tí̵nɨ aŋí̵nɨ e'í̵ upaxí̵ meŋagɨ nánɨ aweyɨ. Arɨge aŋí̵nɨ dí̵wí̵yo nánɨ e'í̵ yipí̵rí̵árí̵anɨ? 18 Aŋí̵nɨ e'í̵ mupaxí̵ neaimónɨnɨgɨnɨrɨ Gorɨxomɨ rɨxɨŋí̵ re urí̵í̵rɨxɨnɨ, ‘Íná imɨŋí̵ mɨrɨpa e'wɨnɨgɨnɨ.’ urí̵í̵rɨxɨnɨ. 19 Gorɨxo xwí̵á imɨxɨrɨ aŋí̵na imɨxɨrɨ eŋí̵ e dánɨ ámá xeanɨŋí̵ nimóga bagí̵a aiwɨ sɨpí seaikárɨŋo ŋwí̵á imónɨŋe xwɨrí̵á ikɨxe'áná xeanɨŋí̵ rí̵á tí̵ŋí̵ seaikárɨní̵árɨnɨ. Xeanɨŋí̵ íná imónɨní̵ápɨ tí̵nɨ ámɨ wí xɨxenɨ imónɨní̵á menɨnɨ. 20 Gorɨxo ‘Xeanɨŋí̵ apɨ aŋí̵nɨ pí̵nɨ owiárɨnɨ.’ mɨyaiwipa nerí̵náyí̵ ámá ní̵nɨ mɨŋweapaxí̵rɨnɨ. Ámá xí̵o eyíroárɨŋí̵yí̵ nánɨ dɨŋí̵ nɨmorɨ nánɨ ‘Xeanɨŋí̵ apɨ aŋí̵nɨ anɨpá oimónɨnɨ.’ yaiwiní̵á eŋagɨ nánɨ apaxí̵ me' pí̵nɨ wiárɨní̵árɨnɨ. 21 Xeanɨŋí̵ apɨ seaímeááná ámá wí ‘Ámá yeáyí̵ neayimɨxemeaní̵a nánɨ arí̵owayá xwí̵á piaxí̵yo dánɨ iwiaroní̵o jí̵iwo ŋweanɨ.’ ránáyí̵ranɨ, ‘Riwo ŋweanɨ.’ ránáyí̵ranɨ, arí̵á mɨwipa e'í̵rɨxɨnɨ. 22 Wí epaxí̵ eŋánáyí̵, ámá Gorɨxo eyíroárɨŋí̵yo yapí̵ wíwapɨyanɨro nerí̵ná nepa mimónɨpa nero aí ‘Arí̵owayá xwí̵á piaxí̵yo dánɨ iwiaroŋáonɨrɨnɨ.’ nurɨmáná emɨmí̵ ero ayá rɨwamónɨpaxí̵ imónɨŋí̵pɨ ero epí̵rí̵árɨnɨ. Wí nepa mimónɨpa nero aí ‘Gorɨxoyá wí̵á rókiamoarɨŋáonɨrɨnɨ.’ urɨro emɨmí̵ ero ayá rɨwamónɨpaxí̵pɨ ero epí̵rí̵árɨnɨ. 23 Amɨpí rí̵we'ná imónɨní̵ápɨ nánɨ rɨxa áwaŋí̵ searí̵agɨ yapí̵ seaíwapɨyipí̵rɨxɨnɨrɨ nánɨ dɨŋí̵ nɨmoro e'í̵rɨxɨnɨ.

Ámá imónɨŋo aŋí̵namɨ dánɨ weapɨní̵ápɨ nánɨrɨnɨ.

24 Xeanɨŋí̵ apɨ nɨpɨnɨ rɨxa nɨseaímeámáná eŋáná sogwí̵ sí̵á yinɨrɨ emá wí̵á mónɨpa erɨ 25 siŋí̵ aŋí̵namɨ dánɨ exweánowirɨ amɨpí eŋí̵ eánɨŋí̵ aŋí̵namɨ eŋí̵yí̵ u'pɨyinɨrɨ nemáná eŋáná 26 ámá imónɨŋáonɨ eŋí̵ neánɨrɨ agwí̵yo dánɨ wí̵á nókía weaparɨŋagɨ nanɨpí̵rí̵árɨnɨ. 27 Nanáná aŋí̵nají̵ ámá Gorɨxo eyíroárɨŋí̵ xwí̵á rɨrímɨ nɨrímɨnɨ aŋí̵ gɨmɨ ŋweagí̵áyo wirɨmeaemepí̵rɨ urowárɨmí̵árɨnɨ.” urɨŋɨnigɨnɨ.

Ewayí̵ ikaxí̵ íkí̵á pikí̵ nánɨrɨnɨ.

28 E nurɨrí̵ná ewayí̵ xwɨyí̵á rɨpɨ urɨŋɨnigɨnɨ, “Íkí̵á pikí̵yɨ rɨnɨŋí̵yí̵ reŋí̵ sɨŋí̵ neánɨro mɨŋí̵ ináná ‘Xwiogwí̵ rɨxarí̵anɨ?’ yaiwiarɨgí̵árɨnɨ. 29 Pikí̵yí̵nɨŋí̵ xwiogwíná nánɨ nɨjí̵á imónɨpí̵rɨ yarɨŋí̵pa xwɨyí̵á nionɨ ekɨyiŋí̵ nánɨ searí̵áyí̵ rɨxa imónarɨŋagɨ nɨwɨnɨrí̵náyí̵ dɨŋí̵ re yaiwíí̵rɨxɨnɨ, ‘Jisaso rɨxa nɨweapɨrɨ nánɨ rɨyarɨnɨ? Rɨxa aŋí̵ í̵wí e'nɨŋí̵ rónapɨnɨ.’ yaiwíí̵rɨxɨnɨ. 30 Nepa seararɨŋɨnɨ. Ámá gwí̵ axí̵ rɨrí sɨnɨ anɨpá mimónɨpa eŋáná nionɨ searí̵ápɨ wí surí̵má mimónɨpa nerɨ nɨpɨnɨ xɨxenɨ imónɨní̵árɨnɨ. 31 Xwí̵á tí̵nɨ aŋí̵na tí̵nɨ anɨpá imónɨní̵á eŋagɨ aiwɨ xwɨyí̵á nionɨyá wí surí̵má imónɨní̵ámanɨ.

Jisaso weapɨní̵áyi nánɨ ámá ní̵nɨ wo nɨjí̵á mimónɨnɨ.

32 Nionɨ ámɨ gínɨ gíná nɨweapɨmí̵a nánɨyí̵ ámá ní̵nɨ aiwɨ wo nɨjí̵á mimónɨnɨ. Aŋí̵nají̵ aiwɨ nionɨ aiwɨ mají̵á imónɨŋwɨnɨ. Sa gí̵ áponɨ nɨjí̵árɨnɨ. 33 Ayɨnánɨ dɨŋí̵ píránɨŋí̵ nɨmoro ŋweáí̵rɨxɨnɨ. Nionɨ gínɨ gíná nɨweapɨmí̵a nánɨ seyí̵ne' mají̵á imónɨŋagí̵a nánɨ xwayí̵ nanɨrɨ ŋweáí̵rɨxɨnɨ.” nurɨrɨ 34 re urɨŋɨnigɨnɨ, “Nionɨ nɨweapɨmí̵a nánɨyí̵ re'nɨŋí̵ imónɨnɨ. Ámá wo aŋí̵ wímɨ urí̵nɨmɨnɨrɨ nurí̵ná xɨnáíwánɨŋí̵ omɨŋí̵ wiiarɨgí̵áwa o omɨ ‘Nionɨ u'áná omɨŋí̵ joxɨ niiarɨŋí̵pɨ píránɨŋí̵ niíɨrɨxɨnɨ.’ nura uŋɨnigɨnɨ. E nerí̵ná womɨ ‘Aŋí̵ í̵wí e awí roarɨŋoxɨ xwayí̵ nanɨrɨ awí róɨrɨxɨnɨ.’ urɨŋo eŋí̵pɨ 35 soyí̵ne' axí̵pɨ e'í̵rɨxɨnɨ. O ‘Aŋí̵ xiáwo gínɨ gíná bɨnɨrí̵enɨŋoɨ?’ nɨyaiwirɨ ‘Sí̵ápɨ tí̵nɨ bɨnɨrí̵enɨŋoɨ? Árí̵wegí̵yo bɨnɨrí̵enɨŋoɨ? Karí̵karí̵ rí̵aiwá rarí̵ná bɨnɨrí̵enɨŋoɨ? Wí̵á mónɨŋí̵mɨ bɨnɨrí̵enɨŋoɨ?’ nɨyaiwia nurɨ mají̵á nimónɨrɨ nánɨ 36 o nionɨ sá weŋáná nímeanɨgɨnɨrɨ anɨŋí̵ xwayí̵ nanɨrɨ awí roarɨŋí̵pa nɨyí̵ne'nɨ enɨ nionɨ weapɨmí̵a nánɨ píránɨŋí̵ dɨŋí̵ nɨmoro ŋweáí̵rɨxɨnɨ. Seyí̵ne' enɨ maiwí nikárɨga warɨŋagí̵a sɨŋwí̵ seanɨmɨgɨnɨrɨ nánɨ seararɨŋɨnɨ.” urɨŋɨnigɨnɨ.

Copyright information for AAK