Matthew 13

Ewayí̵ ikaxí̵ wití̵ siyí̵ wiároŋí̵ nánɨrɨnɨ.

Jisaso sí̵á ayimɨ aŋí̵yo pí̵nɨ nɨwiárɨmɨ nɨpeyearɨ ipí maŋí̵pá tí̵nɨ e'í̵ nɨŋwearɨ ámá oxí̵ apɨxí̵ ayá wí epí̵royí̵ wiarɨŋagí̵a nánɨ ewe' bámɨ nɨpɨxemoánɨrɨ e'í̵ nɨŋwearɨ oxí̵ apɨxí̵ ní̵nɨ sɨnɨ ipí imaŋí̵pá tí̵nɨ roŋáná ewayí̵ xwɨyí̵á ayá wí nura nurí̵ná re urɨŋɨnigɨnɨ, “Ámá wo (Nene aye' siyí̵ nɨwiáróa nurí̵ná yarɨŋwápa) o xegí̵ omɨŋí̵yo wití̵ siyí̵ nɨwiáróa umɨnɨrɨ nánɨ nurɨ rɨxa xwí̵á yuní̵ ikɨxeárɨnɨŋe píránɨŋí̵ nɨwiárorɨ aí wí óí̵ maŋí̵pá tí̵nɨ pie'róí̵yí̵ iŋí̵ nɨbɨrɨ mɨmání̵ eŋɨnigɨnɨ. Ámɨ wí sí̵ŋá ínɨmɨ yapɨnɨŋáná xwí̵á seáyɨ e onɨmiápɨ eŋí̵yo pie'róí̵yí̵ xwí̵á akwɨní̵ánáɨ eŋagɨ nánɨ apaxí̵ me' nerápɨrɨ nɨyapɨrɨ aiwɨ sogwí̵ nɨwepí̵nɨrɨ xaíwí̵ anáná mí̵mɨ rapiŋí̵ mɨwárɨŋí̵ eŋagɨ nánɨ yeáyí̵ yɨweánárɨŋɨnigɨnɨ. Ámɨ wí emí̵ pɨpɨŋí̵ arí̵kiárɨnɨŋe wiároŋí̵yí̵ emí̵ pɨpɨŋí̵yo dánɨ nawínɨ nerápɨmáná emí̵ xeŋwɨrárɨŋagɨ nánɨ wití̵ ayí̵ ná mɨweŋɨnigɨnɨ. Ámɨ wí xwí̵á naŋí̵yo wiároŋí̵yí̵ nerápɨrɨ nɨyapɨrɨ ná nɨkɨkɨreánɨrí̵ná wí aga dɨŋí̵ nɨmorɨ í̵á mɨropaxí̵ werɨ wí xwe' obaxí̵ werɨ wí xwe' onɨmiápɨ werɨ eŋɨnigɨnɨ.” Jisaso ewayí̵ xwɨyí̵á e nurɨrɨ re urɨŋɨnigɨnɨ, “Seyí̵ne' wití̵ siyí̵ nánɨ rí̵á apɨ nánɨ arí̵á ókiarí̵ nɨmóní̵poyɨ.” urɨŋɨnigɨnɨ.

“Ayí̵ rɨpɨ nánɨ xɨxewisí̵ ikaxí̵ tí̵nɨ seararɨŋɨnɨ.” urɨŋí̵ nánɨrɨnɨ.

10 Wiepɨsarɨŋowa idáná Jisaso xegí̵pɨ ŋweaŋáná nɨbɨro yarɨŋí̵ re wigí̵awixɨnɨ, “Joxɨ ámáyo nure'wapɨyirí̵ná ewayí̵ xwɨyí̵á tí̵nɨ pí nánɨ urarɨŋí̵rɨnɨ?” urí̵agí̵a 11 o re urɨŋɨnigɨnɨ, “Xwɨyí̵á eŋíná dánɨ Gorɨxo xwioxí̵yo mɨmeámí̵ nɨseairɨ seameŋweaní̵ápɨ nánɨ yumí̵í imónɨŋí̵pɨ nionɨ soyí̵ne' nɨjí̵á imónɨpí̵rɨ nánɨ áwaŋí̵ nɨsearɨrɨ aiwɨ ámá wíyo áwaŋí̵ murarɨŋɨnɨ. 12 Ayí̵ rɨpɨ nánɨrɨnɨ. Ámá nionɨ xwɨyí̵á rarí̵ná arí̵á niro dɨŋí̵ nɨkwí̵roro nero nɨjí̵á bɨ tí̵ŋí̵ imónarɨgí̵á gɨyí̵ gɨyí̵ Gorɨxo ámɨ wí mɨnɨ winɨŋoɨ. Arí̵á mɨnipa ero dɨŋí̵ mɨnɨkwí̵ropa ero yarɨgí̵á gɨyí̵ gɨyí̵ ‘Nɨjí̵á rɨpɨ imónɨŋɨnɨ.’ yaiwiarɨŋagí̵a aí Gorɨxo apɨ aí ámɨ nurápɨnɨŋoɨ. 13 Ayɨnánɨ ámáyo nure'wapɨyirí̵ná ewayí̵ xwɨyí̵á tí̵nɨ urarɨŋárɨnɨ. Ámá nionɨ dɨŋí̵ mɨnɨkwí̵ropa yarɨgí̵áyí̵ ewayí̵ xwɨyí̵á nionɨ rarɨŋápɨ arí̵á nɨniro aiwɨ mí̵kí̵ nánɨ dɨŋí̵ mɨmopa nero nɨjí̵á wí imónarɨgí̵ámanɨ. 14 Ayí̵ e yarí̵ná xwɨyí̵á Gorɨxo rɨŋí̵ wí̵á rókiamoagí̵ Aisaiao nɨrɨrɨ rí̵wamɨŋí̵ eaŋí̵ rɨpɨ rɨxa xɨxenɨ imónarɨnɨ, ‘Seyí̵ne' aríkwí̵kwí̵ nɨwiro segí̵ arí̵á pí̵rónɨro sɨŋwí̵ supárɨro nero nánɨ arí̵á nɨwia nuro aí nɨjí̵á imónɨpí̵rí̵ámanɨ. Sɨŋwí̵ nɨwɨga nuro aí dɨŋí̵ wí mopí̵rí̵ámanɨ. 15 Ayí̵ rɨpɨ nánɨrɨnɨ. Segí̵ dɨŋí̵ tí̵nɨ ne'ra warɨgí̵áyí̵ne' mɨŋí̵ sí̵ŋánɨŋí̵ imoŋagí̵a nánɨ seararɨŋɨnɨ. Wigí̵ sɨŋwí̵ mɨsupárɨpa ero arí̵á mɨpí̵rónɨpa ero nero sɨŋwɨrɨyí̵, wigí̵ sɨŋwí̵ tí̵nɨ sɨŋwí̵ anɨro arí̵á ero dɨŋí̵ píránɨŋí̵ neyíroro moro wigí̵ í̵wí̵ yarɨgí̵áyí̵ rí̵wí̵mɨnɨ mamoro e'ánáyí̵ Gorɨxonɨ píránɨŋí̵ wimɨxɨpaxí̵rɨnɨ.’ Xwɨyí̵á apɨ xɨxenɨ imónɨnɨ nánɨ ámáyí̵ e yarɨŋoɨ. 16 E nerɨ aí gí̵ seaiepɨsarɨŋáoyí̵ne' segí̵ sɨŋwí̵ tí̵nɨ sɨŋwí̵ nanɨro arí̵á tí̵nɨ arí̵á niro nero nánɨ yayí̵ oseainɨnɨ. 17 Aga nepa seararɨŋɨnɨ, ‘Wí̵á rókiamoagí̵á obaxí̵yí̵ tí̵nɨ ámá we' rónɨgí̵á obaxí̵yí̵ tí̵nɨ enɨ soyí̵ne' sɨŋwí̵ nanɨro arí̵á niro yarɨgí̵á rɨpɨ nánɨ “None sɨŋwí̵ wɨní̵wanɨgɨnɨ.” nɨyaiwiro aga nɨwimónɨrɨ aí wí arí̵á niro sɨŋwí̵ nanɨro yagí̵ámanɨ.’ seararɨŋɨnɨ.” urɨŋɨnigɨnɨ.

Wití̵ siyí̵ wiároŋí̵ mí̵kí̵ nánɨ áwaŋí̵ urɨŋí̵ nánɨrɨnɨ.

18 E nurɨrɨ re urɨŋɨnigɨnɨ, “Ewayí̵ xwɨyí̵á ámá wo nurɨ wití̵ siyí̵ wiároŋí̵pɨ mí̵kí̵ nánɨ áwaŋí̵ osearɨmɨnɨ. 19 Wití̵ siyí̵ wiároŋí̵yí̵ xwɨyí̵á Gorɨxo xwioxí̵yo mɨmeámí̵ nerɨ seameŋweaní̵ápɨ nánɨrɨnɨ. Ámá xwɨyí̵á apɨ arí̵á nero nɨjí̵á mepa e'í̵áyí̵ ayí̵ wití̵ siyí̵ óí̵ maŋí̵pá tí̵nɨ pie'roŋí̵pí̵nɨŋí̵ imónɨŋoɨ. Ayí̵ arí̵á wiarí̵ná obo, arí̵kí yarɨŋo nɨbɨrɨ ayí̵ Gorɨxomɨ dɨŋí̵ wɨkwí̵ropí̵rɨxɨnɨrɨ xwɨyí̵á apɨ wigí̵ xwioxí̵yo mɨnɨŋí̵yí̵ emɨ rɨroámí̵ yarɨŋí̵rɨnɨ. 20 Ámá xwɨyí̵á apɨ arí̵á nɨwirí̵ná axíná yayí̵ nero ‘Naŋí̵rɨnɨ.’ yaiwíí̵áyí̵, ayí̵ wití̵ siyí̵ sí̵ŋá ínɨmɨ yapɨnɨŋáná xwí̵á seáyɨ e akwɨní̵ánáɨ eŋí̵yo pie'roŋí̵yí̵nɨŋí̵ imónɨŋoɨ. 21 Wití̵ siyí̵ sí̵ŋá ínɨmɨ yapɨnɨŋagɨ nánɨ rapiŋí̵ ná ínɨmɨ mɨwárɨpa eŋí̵yí̵nɨŋí̵ ámá ayí̵ enɨ wigí̵ dɨŋí̵ rapiŋí̵nɨŋí̵ xwí̵áyo mí̵mɨ í̵á mumɨxɨŋagɨ nánɨ ámá wí ayí̵ xwɨyí̵á apɨ xí̵darɨŋagí̵a nánɨ xeanɨŋí̵ wikáráná apaxí̵ me' pí̵nɨ wiárarɨgí̵árɨnɨ. 22 Ámá xwɨyí̵á apɨ arí̵á nɨwiro aiwɨ wigí̵ yarɨgí̵ápa sɨnɨ nɨxí̵dɨrónáyí̵ amɨpí xwí̵áyo dáŋí̵ ayá tí̵ŋí̵pɨ nánɨ dɨŋí̵ obɨbaxí̵ moro ‘Amɨpí wí nionɨ mɨnɨmu'ropa oninɨ.’ yaiwiro ‘Amɨpí ayá tí̵ŋí̵pɨ arɨge nɨmeámí̵árí̵anɨ?’ yaiwiro ne'ra warɨgí̵áyí̵ ayí̵ wití̵ siyí̵ emí̵ pɨpɨŋí̵ kɨkɨdɨpeárɨgí̵e pie'roŋí̵yí̵nɨŋí̵ imónɨŋoɨ. Wití̵ emí̵ xeŋwɨrárɨŋagɨ nánɨ ná mɨwepa eŋí̵yí̵nɨŋí̵ ámá ayí̵ enɨ ‘Amɨpí ayá tí̵ŋí̵pɨ arɨre nerɨ meámí̵árí̵anɨ?’ yaiwiarɨgí̵ápɨ xwɨyí̵á Gorɨxoyápimɨ yokwarɨmí̵ e'áná omɨ anɨŋí̵ miní̵ xí̵darɨgí̵ámanɨ. 23 Ámá xwɨyí̵á apɨ arí̵á nɨwiro nɨjí̵á e'í̵áyí̵ ayí̵ wití̵ siyí̵ xwí̵á naŋí̵yo pie'roŋí̵yí̵nɨŋí̵ imónɨŋoɨ. Wití̵ apɨ ná kɨkɨreánɨŋí̵yí̵nɨŋí̵ ámá ayí̵ enɨ ná nɨwerí̵ná wí dɨŋí̵ nɨmorɨ í̵á mɨropaxí̵ werɨ wí xwe' obaxí̵ werɨ wí obaxí̵ onɨmiápɨ werɨ yarɨgí̵árɨnɨ.

Ewayí̵ ikaxí̵ rɨpɨkí̵yí̵ wití̵ omɨŋí̵yo yapɨŋí̵ nánɨrɨnɨ.

24 O “Agwɨ Gorɨxo ámá sɨpíyí̵ wigí̵ dɨŋí̵ tí̵nɨ xe ne'ra u'í̵rɨxɨnɨrɨ sɨŋwí̵ nɨwɨnɨrɨ aiwɨ rí̵we'ná rí̵áyo ikeaárɨní̵árɨnɨ.” oyaiwípoyɨnɨrɨ ewayí̵ xwɨyí̵á ámɨ xegí̵ bɨ nurɨrɨ re urɨŋɨnigɨnɨ, “Gorɨxo xegí̵ ámáyo xwioxí̵yo mɨmeámí̵ nerɨ meŋweámɨnɨrɨ nánɨ yarí̵ná imónɨŋí̵pɨ, ayí̵ ámá wo xegí̵ omɨŋí̵yo xwí̵á yuní̵ nikɨxe'máná wití̵ siyí̵ wiároŋí̵pɨ tí̵nɨ rí̵ramɨŋɨyí̵ epaxí̵rɨnɨ. 25 Wití̵ siyí̵ nɨwiároárɨmáná xegí̵ aŋí̵yo nánɨ nurɨ sá weŋáná o tí̵nɨ sí̵mí̵ tí̵nɨ inarɨgí̵ío nɨbɨrɨ re eŋɨnigɨnɨ. Rɨpɨkí̵ siyí̵ wití̵ siyí̵ wiárónɨŋe seáyɨ e nɨwiároárɨmɨ uŋɨnigɨnɨ. 26 Nɨwiároárɨmɨ numáná eŋáná rɨxa wití̵ nerápɨrɨ nɨyapɨrɨ rɨxa ná kɨkɨreánɨmɨnɨrɨ yarí̵ná omɨŋí̵ xiáwomɨ omɨŋí̵ wiiarɨgí̵áwa sɨŋwí̵ wɨní̵áyí̵ wɨnɨgí̵awixɨnɨ. Rɨpɨkí̵ aí tí̵nɨ nawínɨ eŋagɨ nɨwɨnɨmɨ nuro bosomɨ re urɨgí̵awixɨnɨ, ‘None “Joxɨ dɨxí̵ omɨŋí̵yo siyí̵ naŋí̵nɨ wiároŋí̵rɨnɨ.” neaimónarɨnɨ. Arɨre nerɨ rɨpɨkí̵ enɨ nerápɨrɨ yapí̵í̵rí̵anɨ?’ urí̵agí̵a 28 o re urɨŋɨnigɨnɨ, ‘Gí̵ sí̵mí̵ tí̵nɨ inarɨgwí̵ío eŋí̵rí̵anɨ? Oyɨ, orɨnɨ!’ urí̵agɨ xegí̵ omɨŋí̵ wiiarɨgí̵áwa yarɨŋí̵ re wigí̵awixɨnɨ, ‘None nurane rɨpɨkí̵yí̵ yɨyoámí̵ yanɨre'wɨnɨ?’ urí̵agí̵a aí 29 o re urɨŋɨnigɨnɨ, ‘Oweoɨ, soyí̵ne' rɨpɨkí̵yí̵ yɨyoámí̵ nerí̵ná wití̵ aí tí̵nɨ yɨyoámí̵ epí̵rɨxɨnɨrɨ 30 aiwá mipí̵rí̵íná nánɨ ní̵nɨ xe oenɨrɨ sɨŋwí̵ wɨní̵poyɨ. Wití̵ rɨxa yóí̵ eŋáná wití̵ mɨwákwímí̵ yarɨgí̵áwamɨ re urɨmí̵árɨnɨ, “Xámɨ rɨpɨkí̵yí̵ mɨwákwímí̵ nero áwɨnɨ e gwí̵ nɨkɨrí̵wímáná rí̵á ikeaárí̵í̵rɨxɨnɨ. E nemáná wití̵ mɨwákwímí̵ nero aiwá aŋí̵ nɨtiarɨgí̵iwámɨ nɨtíí̵rɨxɨnɨ.” urɨmí̵árɨnɨ.’ urɨŋɨnigɨnɨ.” Jisaso ewayí̵ xwɨyí̵á e urɨŋɨnigɨnɨ.

Ewayí̵ ikaxí̵ masɨte' siyí̵ nánɨrɨnɨ.

31 O ámá re oyaiwípoyɨnɨrɨ “Agwɨ ámá obaxí̵ Jisasomɨ mɨxí̵darɨŋagí̵a aiwɨ rí̵wí̵yo Gorɨxo xegí̵ ámáyo xwioxí̵yo mɨmeámí̵ nerɨ umeŋweaŋánáyí̵ Jisasoyá ámá obaxí̵ imónɨpí̵rí̵árɨnɨ.” oyaiwípoyɨnɨrɨ ewayí̵ xwɨyí̵á ámɨ bɨ nurɨrɨ re urɨŋɨnigɨnɨ, “Gorɨxo seyí̵ne' xwioxí̵yo mɨmeámí̵ nɨseairɨ seameŋweaní̵ápɨ, ayí̵ masɨte' aiwá siyí̵nɨŋí̵ imónɨnɨ. Masɨte' aiwá xegí̵ siyí̵ aga onɨmiá imónɨnɨ. Masɨte' siyí̵ nɨmearo omɨŋí̵yo moárarɨgí̵áyí̵ 32 aiwá siyí̵ nɨyonɨ masɨte' siyí̵ aga onɨmiá eŋagɨ aiwɨ rɨxa nɨyapɨrɨ xwe' nɨrorí̵ná íkí̵ánɨŋí̵ roŋáná iŋí̵ nɨbɨrɨ nɨŋwearɨ ye'wí̵ tɨpaxí̵ imónarɨŋí̵rɨnɨ.” urɨŋɨnigɨnɨ.

Ewayí̵ ikaxí̵ yisí̵ nánɨrɨnɨ.

33 O ewayí̵ xwɨyí̵á ámɨ bɨ nurɨrɨ re urɨŋɨnigɨnɨ, “Gorɨxo xwioxí̵yo mɨmeámí̵ nɨseairɨ seameŋweaní̵ápɨ, ayí̵ yisí̵nɨŋí̵ —Yisí̵ bisí̵kerí̵á sɨnɨ sɨŋí̵ eŋáná bɨ onɨmiápɨ ínɨmɨ táná nɨmɨnɨ íkwiaŋwí̵ eapɨnarɨŋí̵rɨnɨ. Gorɨxo xwioxí̵yo mɨmeámí̵ nɨseairɨ seameŋweaní̵ápɨ, ayí̵ yisí̵nɨŋí̵ imónɨnɨ. Apɨxí̵ bisí̵kerí̵á sɨnɨ sɨŋí̵ dɨramɨxí̵ xwe' sɨxí̵ ínɨŋáná yisí̵ bɨ nɨmearo ínɨmɨ táná nɨmɨnɨ íkwiaŋwí̵ eapɨnarɨŋí̵rɨnɨ.” urɨŋɨnigɨnɨ.

Ewayí̵ xwɨyí̵á tí̵nɨnɨ ure'wapɨyiŋí̵ nánɨrɨnɨ.

34 Jisaso oxí̵ apɨxí̵ e epí̵royí̵ egí̵áyo xwɨyí̵á apɨ nɨpɨnɨ nure'wapɨyirí̵ná ewayí̵ xwɨyí̵ánɨ nurɨrɨ ure'wapɨyayiŋɨnigɨnɨ. 35 Xwɨyí̵á Gorɨxoyá wí̵á rókiamoagí̵ wo nɨwurɨyirɨ rí̵wamɨŋí̵ eaŋí̵ rɨpɨ, “Nionɨ xwɨyí̵á nɨrɨrí̵ná ewayí̵ xwɨyí̵áyo dánɨ rɨrɨ xwɨyí̵á Gorɨxo xwí̵á imɨxɨŋíná dánɨ ínɨmɨ rɨnɨŋí̵pɨ áwaŋí̵ rɨrɨ emí̵árɨnɨ.” nɨrɨrɨ eaŋí̵pɨ xɨxenɨ imónɨnɨ nánɨ Jisaso nure'wapɨyirí̵ná ewayí̵ xwɨyí̵á tí̵nɨnɨ nurɨrɨ ure'wapɨyagí̵rɨnɨ.

Ewayí̵ ikaxí̵ rɨpɨkí̵ nánɨ urɨŋí̵pɨ mí̵kí̵pɨ áwaŋí̵ urɨŋí̵ nánɨrɨnɨ.

36 O oxí̵ apɨxí̵ e epí̵royí̵ egí̵áyo pí̵nɨ nɨwiárɨmɨ nurɨ aŋí̵yo nɨpáwirɨ ŋweaŋáná xegí̵ wiepɨsarɨŋowa nɨbɨro re urɨgí̵awixɨnɨ, “Joxɨ neare'wapɨyirí̵ná ewayí̵ ikaxí̵ rɨpɨkí̵ nánɨ nearí̵í̵pɨ áwaŋí̵ nɨnearɨrɨ píránɨŋí̵ neare'wapɨyiɨ.” urí̵agí̵a 37 o re urɨŋɨnigɨnɨ, “Ámá wití̵ siyí̵ naŋí̵ wiároŋoyí̵ ámá imónɨŋáonɨ nánɨrɨnɨ. 38 Omɨŋí̵yí̵ ayí̵ xwí̵á rɨrí nánɨrɨnɨ. Wití̵ siyí̵ naŋí̵yí̵, ayí̵ ámá Gorɨxo xwioxí̵yo mɨmeámí̵ nerɨ umeŋweaní̵áyí̵ nánɨrɨnɨ. Rɨpɨkí̵yí̵ ayí̵ ámá Gorɨxomɨ muxí̵darɨgí̵áyí̵, ámá oboyáyí̵ nánɨrɨnɨ. 39 Sí̵mí̵ tí̵nɨ inarɨgí̵ío, rɨpɨkí̵ siyí̵ wiároŋo, ayí̵ Oborɨnɨ. Aiwá yóí̵ eŋagɨ mipí̵rí̵ínáyí̵ ayí̵ sí̵á yoparí̵yi nánɨrɨnɨ. Wití̵ mɨwákwímí̵ nero mipí̵rí̵áyí̵, ayí̵ aŋí̵nají̵rɨnɨ. 40 Ayɨnánɨ rɨpɨkí̵yí̵ mɨwákwímí̵ nero gwí̵ nɨkɨrí̵wímáná rí̵á ikeaárɨgí̵ápa imónɨŋí̵yí̵ sí̵á yoparí̵yimɨ axí̵pɨ e imónáná 41 ámá imónɨŋáonɨ ámá rɨkɨkɨrí̵ó ero wa enɨ nene yarɨŋwápɨ oe'poyɨnɨrɨ wíwapɨyiro yarɨgí̵áyí̵ gí̵ ápo meŋweaní̵e ŋweapí̵rɨxɨnɨrɨ gí̵ aŋí̵najowa awí eámeámí̵ epí̵rɨ urowárɨmí̵árɨnɨ. 42 Urowáráná awa awí eámeámí̵ nemáná rí̵á ápiáwí̵ xwe' anɨŋí̵ wearɨŋí̵rímɨ ikeaáráná ayí̵ e dánɨ ‘Yeyɨ!’ nɨrɨro magí írónɨpí̵rí̵árɨnɨ. 43 E nerɨ aí oxí̵ apɨxí̵ we' rónɨgí̵á Gorɨxoyáyí̵ xí̵o xwioxí̵yo mɨmeámí̵ nerɨ umeŋweaní̵e dánɨ sogwí̵ nanɨrí̵ná yarɨŋí̵pa xɨxí̵eá sɨŋánɨ inɨpí̵rí̵árɨnɨ. Seyí̵ne' arí̵á tí̵gí̵áyí̵ne' eŋánáyí̵, arí̵á ókiarí̵ nɨmóní̵poyɨ.” urɨŋɨnigɨnɨ.

Ewayí̵ ikaxí̵ ayá tí̵ŋí̵ imónɨŋí̵ wí pí̵ní̵ weŋí̵pɨ nánɨrɨnɨ.

44 O ámá re oyaiwípoyɨnɨrɨ, “Gorɨxo xwioxí̵yo mɨmeámí̵ nɨseairɨ seameŋweaní̵ápɨ ayá tí̵ŋí̵pí̵nɨŋí̵ imónɨŋagɨ nánɨ Jisaso pí pí nearí̵agɨ aí xɨxenɨ e'wanɨgɨnɨ.” oyaiwípoyɨnɨrɨ ewayí̵ xwɨyí̵á re urɨŋɨnigɨnɨ, “Gorɨxo xwioxí̵yo mɨmeámí̵ nɨseairɨ seameŋweaní̵ápɨ, ayí̵ xwí̵á bimɨ wí e ayá rɨmɨxarɨŋí̵pɨ wí pí̵ní̵ tɨnɨŋí̵pí̵nɨŋí̵ imónɨnɨ. Ámá wo nemerí̵ná wenɨŋí̵ nerɨ nɨwɨnɨmearɨ yayí̵ nikárɨnɨrɨ nánɨ re eŋɨnigɨnɨ. Mí̵rí̵ nurɨ ámá wíyo áwaŋí̵ murí̵ xegí̵ amɨpí ní̵nɨ nɨgwí̵ nánɨ bí̵ nerɨ nɨgwí̵ apɨ tí̵nɨ nɨmeámɨ nurɨ xwí̵á apɨnɨ bí̵ eŋɨnigɨnɨ.” urɨŋɨnigɨnɨ.

Ewayí̵ ikaxí̵ memiá nánɨrɨnɨ.

45 Ámɨ re urɨŋɨnigɨnɨ, “Gorɨxo xwioxí̵yo mɨmeámí̵ nerɨ píránɨŋí̵ seameŋweaní̵ápɨ, ayí̵ ámá amɨpí mɨmu'rónɨŋí̵ wo memiá awiaxí̵nɨ awiaxí̵nɨ nánɨ pí̵á emearɨŋí̵pánɨŋí̵ imónɨnɨ. 46 Bá nɨyonɨ mu'rónɨŋagɨ nɨwɨnɨmeaárɨmo aŋí̵nɨ nurɨ xegí̵ amɨpí ní̵nɨ bí̵ nemáná nɨgwí̵ apɨ tí̵nɨ memiápá bí̵ eŋɨnigɨnɨ.” nurɨrɨ, “Gorɨxo xwioxí̵yo mɨmeámí̵ nɨneairɨ neameŋweaní̵ápɨ ayá tí̵ŋí̵pí̵nɨŋí̵ imónɨŋagɨ nánɨ Jisaso pí pí nearí̵agɨ aí xɨxenɨ e'wanɨgɨnɨ.” oyaiwípoyɨnɨrɨ ewayí̵ xwɨyí̵á e urɨŋɨnigɨnɨ.

Ewayí̵ ikaxí̵ ubení̵ nánɨrɨnɨ.

47 O re urɨŋɨnigɨnɨ, “Gorɨxo ámá xí̵o xegí̵ xwioxí̵yo mɨmeámí̵ nerɨ umeŋweámɨnɨrɨ nerí̵ná ení̵ápɨ, ayí̵ ubení̵ ipíyo nɨmamówárɨro peyí̵ xɨxegí̵nɨ í̵á mɨnarɨŋí̵pánɨŋí̵ imónɨnɨ. 48 Rɨxa peyí̵ magwí̵ mɨnɨŋagɨ nɨwɨnɨro nɨmɨxearo ipí imaŋí̵pá tí̵ŋí̵ e nɨtɨro e'í̵ nɨŋweámáná peyí̵ naŋí̵nɨ neyíroro íkwiaŋwí̵yo mɨmeámí̵ nɨyárɨro sɨpíyí̵ emɨ mɨmeámí̵ egí̵awixɨnɨ. 49 Sí̵á yoparí̵yimɨ axí̵pɨ e imónáná aŋí̵najowa nɨweapɨro we' rónɨgí̵áyo nɨmu'roro sɨpí yarɨgí̵áyo yɨyoámí̵ nero 50 rí̵á ápiáwí̵ xwe' anɨŋí̵ wearɨŋí̵rímɨ ikeaáráná ayí̵ e dánɨ ‘Yeyɨ!’ nɨrɨro magí írónɨpí̵rí̵árɨnɨ.” urɨŋɨnigɨnɨ.

Xwɨyí̵á naŋí̵ xámɨŋí̵ tí̵nɨ sɨŋí̵ tí̵nɨ nánɨrɨnɨ.

51 Wiepɨsarɨŋí̵yo re urɨŋɨnigɨnɨ, “Nionɨ seare'wapɨyarɨŋápɨ nɨpɨnɨ mí̵kí̵ nánɨ rɨxa nɨjí̵á rimónɨŋoɨ?” urí̵agɨ “Oyɨ.” urí̵agí̵a 52 o re urɨŋɨnigɨnɨ, “Ŋwí̵ ikaxí̵ eánɨŋí̵pɨ mewegí̵á nionɨ nɨnɨxí̵dɨro gí̵ wiepɨsarɨŋáyí̵ nimónɨro yarɨgí̵á ní̵nɨ ayí̵ ámá amɨpí mɨmu'rónɨgí̵áyí̵nɨŋí̵ imónɨŋoɨ. Ayí̵ wigí̵ ayá rɨmɨxarɨgí̵ápɨ aŋí̵yo weŋí̵mɨ sɨŋí̵ bɨ tí̵nɨ xámɨŋí̵ bɨ tí̵nɨ nɨmearo ámáyo sɨwá wiarɨgí̵ápa gí̵ seaiepɨsarɨŋáoyí̵ne' xwɨyí̵á eŋíná Moseso nɨrɨrɨ rí̵wamɨŋí̵ eaŋí̵pɨ tí̵nɨ nionɨ agwɨ seararɨŋápɨ tí̵nɨ axí̵pɨ e epí̵rí̵árɨnɨ.” urɨŋɨnigɨnɨ.

Xí̵o xegí̵ Nasaretɨ ŋweáyí̵ rí̵wí̵ umogí̵á nánɨrɨnɨ.

53 Jisaso ewayí̵ xwɨyí̵á apɨ nura nu'ɨsáná e dánɨ pí̵nɨ nɨwiárɨmɨ nurɨ 54 aŋí̵ xí̵o xegí̵ xwe' iwiaroŋe nɨre'morɨ rotu' aŋí̵yo nɨpáwirɨ xwɨyí̵á ure'wapɨyarí̵ná ayí̵ ududí̵ nero re rɨnɨgí̵awixɨnɨ, “Ámá royí̵ nɨjí̵á emɨmí̵ yarɨŋí̵ rɨpɨ gɨmɨ dánɨ nɨjí̵á imóní̵í̵rí̵anɨ? 55 O aŋí̵ mɨrarɨŋí̵ Josepomɨ xewaxo menɨranɨ? Xɨnáí Mariaíyɨ mɨrɨnɨŋíranɨ? Xogwáowa Jemiso tí̵nɨ Josepo tí̵nɨ Saimono tí̵nɨ Judaso tí̵nɨ rɨnɨŋowa re mɨŋweagí̵á reŋoɨ? 56 Xɨnapíwa nene tí̵nɨ mɨŋweapa reŋoɨ? E eŋagɨ nánɨ ámá royí̵ arɨge nɨjí̵á apɨ imóní̵í̵rí̵anɨ?” nɨrɨnɨro 57 wikí̵ dɨŋí̵ nɨwóga warɨŋagí̵a Jisaso xewanɨŋo nánɨ re urɨŋɨnigɨnɨ, “Ámá xwɨyí̵á Gorɨxoyá wí̵á urókiamoarɨŋí̵ womɨ aŋí̵ mɨdáŋí̵yí̵ arí̵á umónarɨgí̵á aí xegí̵ e dáŋí̵yí̵ tí̵nɨ xexɨrí̵meáyí̵ tí̵nɨ o nánɨ ‘Sa negí̵ ámáorɨnɨ.’ nɨyaiwiro arí̵á umónarɨgí̵ámanɨ.” nurɨrɨ 58 ayí̵ dɨŋí̵ mɨwɨkwí̵roarɨŋagí̵a nánɨ e nɨŋwearí̵ná emɨmí̵ xwapí̵ mɨwíwapɨyiŋɨnigɨnɨ.

Copyright information for AAK