Matthew 3

Jono wayí̵ numeaia uŋo xwɨyí̵á wáí̵ urɨmeŋí̵ nánɨrɨnɨ.

Jono, wayí̵ numeaia uŋo, Jisaso sɨnɨ Nasaretɨ ŋweaŋáná, o nurɨ Judia pɨropenɨsí̵yo ámá dɨŋí̵ meaŋe wáí̵ nurɨmerí̵ná re urayagí̵rɨnɨ, “Gorɨxo xwioxí̵yo mɨmeámí̵ nɨneairɨ píránɨŋí̵ neameŋweanɨ aŋwɨ ayo eŋagɨ nánɨ segí̵ í̵wí̵ yarɨgí̵ápɨ rí̵wí̵mɨnɨ nɨmamoro píránɨŋí̵ nɨsanɨro ŋweáí̵rɨxɨnɨ.” urayagí̵rɨnɨ. Wí̵á rókiamoagí̵ Aisaiaoyɨ rɨnɨŋo nɨrɨrɨ rí̵wamɨŋí̵ re eaŋí̵pɨ, “Ámá dɨŋí̵ meaŋí̵mɨ dánɨ ámá wo rí̵aiwá re rarɨnɨ, ‘Ámɨnáo nánɨ segí̵ dɨŋí̵ óí̵ naŋí̵nɨŋí̵ wimoiro óí̵ píránɨŋí̵ imoarɨgí̵ápánɨŋí̵ wimoiro nero ŋweáí̵rɨxɨnɨ.’ rarɨnɨ.” rí̵wamɨŋí̵ e nɨrɨrɨ eaŋí̵pɨ tí̵nɨ xɨxenɨ Jono nurɨ axí̵pɨ e yagí̵rɨnɨ. O rapɨrapí̵ naŋí̵ nɨyínɨrɨ emeagomanɨ. Kamerí̵ í̵á (iyí̵á írɨkwí̵nɨŋí̵ imónɨŋí̵ wu') nɨyínɨrɨ arerɨxí̵ írɨŋí̵yo yínagorɨnɨ. Aiwá enɨ naŋí̵ nagomanɨ. Áxwaxí̵ tí̵nɨ pí̵kí̵ iniɨgí̵ tí̵nɨ nagorɨnɨ. Judayí̵ wigí̵ aŋí̵ xwe' Jerusaremɨ ŋweagí̵áyí̵ tí̵nɨ Judia pɨropenɨsí̵yo amɨ amɨ ŋweagí̵áyí̵ ní̵nɨ tí̵nɨ iniɨgí̵ Jodanɨ rapápámɨ ŋweagí̵áyí̵ tí̵nɨ Jono tí̵ŋí̵ e nánɨ nuro wigí̵ í̵wí̵ yarɨgí̵ápɨ nánɨ waropárí̵ wíáná o wayí̵ numeaia nurɨ aí Parisiowa tí̵nɨ Sajusiowa tí̵nɨ —Awa weyí̵nɨ nɨmenɨro ámá wíyo seáyɨ e wimónarɨgí̵áwarɨnɨ. Awa Jono wayí̵ oneameainɨro barɨŋagí̵a Jono sɨŋwí̵ e nɨwɨnɨrɨ ayí̵ wigí̵ í̵wí̵ yarɨgí̵áyí̵ rí̵wí̵mɨnɨ nɨmamoro nɨsanɨro me' “Wayí̵nɨ oneameainɨ.” nɨyaiwiro barɨŋagí̵a nɨwɨnɨrɨ nánɨ re urɨŋɨnigɨnɨ, “Sidɨrí̵ miáoyí̵ne', ‘Rí̵we'ná Gorɨxo xeanɨŋí̵ seaikárɨní̵á eŋagɨ nánɨ e'í̵ u'poyɨ.’ go searí̵agɨ rí̵nɨŋí̵ meaanɨgɨnɨrɨ wáyí̵ nero nionɨ tí̵ámɨnɨ e'í̵ barɨŋoɨ? Soyí̵ne' í̵wí̵ yarɨgí̵ápɨ rí̵wí̵mɨnɨ nɨmamorí̵náyí̵, píránɨŋí̵ nero íkí̵á sogwí̵ naŋí̵ nɨwerí̵ná yarɨŋí̵pa imóní̵í̵rɨxɨnɨ. Re mɨnɨrɨpa e'poyɨ, ‘Negí̵ arí̵o Ebɨrí̵amoyáone eŋagɨ nánɨ Gorɨxo wí xeanɨŋí̵ neaikárɨní̵á menɨnɨ.’ mɨnɨrɨpa e'poyɨ. Gorɨxo ‘Ebɨrí̵amoyá í̵wiárí̵awe' nánɨ “Nionɨ ayo xeanɨŋí̵ nɨwirí̵ná arɨge xwe' obaxí̵ imónɨní̵árɨnɨ?” nɨyaiwirɨ ududí̵ winarɨnɨ.’ rɨyaiwiarɨŋoɨ? Oweoɨ, Gorɨxo dɨŋí̵ e yaiwipaxí̵ menɨnɨ. Ananɨ sí̵ŋá tí̵yo dánɨ Ebɨrí̵amo nánɨ í̵wiárí̵awe' wimɨxɨyipaxí̵rɨnɨ. 10 Gorɨxo rɨxa rapɨwe' íkí̵á mí̵kí̵ tí̵ŋí̵ e nánɨ í̵á xɨrɨnɨ. Íkí̵á gɨnɨ gɨna sogwí̵ naŋí̵ mɨwe'agɨ nɨwɨnɨrí̵ná nɨdɨkárɨrɨ rí̵á ikeaárɨní̵árɨnɨ. 11 Nionɨ sa iniɨgí̵ tí̵nɨ wayí̵ seameaiarɨŋárɨnɨ. Nionɨ eŋí̵ eánɨŋáonɨ aiwɨ rí̵wí̵yo bɨní̵o nionɨ nɨmu'rónɨnɨ. Seyí̵ne' nionɨ nánɨ ‘Ámá we' rónɨŋorɨnɨ.’ niaiwiarɨŋagí̵a aiwɨ o nionɨ tí̵nɨ xɨxenɨ mimónɨŋagɨ nánɨ ámá xɨnáíwánɨŋí̵ nimónɨro omɨŋí̵ wiiarɨgí̵áyí̵ bosoyá sɨkwí̵ su' gwí̵ wíkweaiarɨgí̵ápa nionɨ oyá wíkweaipaxí̵ menɨnɨ. O wayí̵ nɨseameairí̵ná iniɨgí̵ tí̵nɨ seameainí̵ámanɨ. Wiyí̵ne' Gorɨxoyá kwíyí̵ tí̵nɨ seameairɨ wiyí̵ne' rí̵á tí̵nɨ seameairɨ ení̵árɨnɨ.” nurɨrɨ 12 Gorɨxo ámá naŋí̵yo yeáyí̵ uyimɨxemearɨ sɨpíyo anɨpá imɨxɨrɨ ení̵á eŋagɨ nánɨ ewayí̵ xwɨyí̵á re urɨŋɨnigɨnɨ, “Omɨŋí̵ yarɨgí̵áyí̵ pokí̵ tí̵nɨ wití̵ aiwá eyeyírómí̵ ero aiwá ná aŋí̵yo tɨro mamɨwí̵ tí̵nɨ sɨyikí̵ tí̵nɨ rí̵á ikeaárɨro yarɨgí̵ápa Gorɨxo enɨ axí̵pɨ e emí̵ánɨrɨ wití̵ mamɨwí̵ tí̵nɨ ná tí̵nɨ eyeyírómí̵ inɨŋe xegí̵ pokí̵ í̵á nɨxɨrɨrɨ ronɨ. Aiwá náyí̵ aŋí̵yo tɨrɨ mamɨwí̵ tí̵nɨ sɨyikí̵ tí̵nɨ rí̵á supárɨpaxí̵ mimónɨŋí̵yo ikeaárɨrɨ ení̵árɨnɨ.” urɨŋɨnigɨnɨ.

Jisasomɨ wayí̵ umeaiŋí̵ nánɨrɨnɨ.

13 Jisaso Jono wayí̵ onɨmeainɨrɨ nánɨ Gariri pɨropenɨsí̵yo dánɨ nɨbɨrɨ iniɨgí̵ Jodanɨ rapá tí̵ŋí̵ e nɨre'morɨ omɨ wímeáagɨ aiwɨ 14 Jono nurakímɨnɨrɨ nerɨ re urɨŋɨnigɨnɨ, “Joxɨ nionɨ nánɨ o wayí̵ onɨmeainɨrɨ rɨbarɨŋɨnɨ? Oweoɨ, ‘Joxɨ wayí̵ onɨmeainɨ.’ nimónarɨnɨ.” urí̵agɨ aí 15 Jisaso re urɨŋɨnigɨnɨ, “Xe wayí̵ oumeaimɨnɨrɨ sɨŋwí̵ naneɨ. E neraínáyí̵, Gorɨxo nionɨ nánɨ ‘O sɨwí̵ we' rónɨŋí̵yí̵ ní̵nɨ oenɨ.’ yaiwiarɨŋí̵pɨ xɨxenɨ yaní̵wiɨ.” urí̵agɨ 16 o Jisasomɨ wayí̵ umeaíáná o rɨxa nímɨnɨmeámɨ peyarí̵ná re eŋɨnigɨnɨ. Aŋí̵ pɨrí̵yo dánɨ óí̵ ináná kwíyí̵ Gorɨxoyápɨ xawiówí̵nɨŋí̵ nɨweapɨrɨ omɨ wímeaŋɨnigɨnɨ. Omɨ wímeááná re eŋɨnigɨnɨ. 17 Aŋí̵namɨ dánɨ xwɨyí̵á re rɨne'napɨŋɨnigɨnɨ, “Gí̵ niaíwí̵ ayá tí̵ŋorɨnɨ. Amɨpí o yarɨŋí̵pɨ nánɨ yayí̵ ninarɨnɨ.” rɨne'napɨŋɨnigɨnɨ.

Copyright information for AAK