Romans 3

“Judayí̵ xwɨyí̵á Gorɨxoyá eánɨŋí̵pɨ tí̵gí̵áyí̵rɨnɨ.” urɨŋí̵ nánɨrɨnɨ.

Ámá iyí̵ sí̵mí̵ sí̵ó wákwínarɨgí̵ápimɨ dánɨ Gorɨxoyá imónɨpaxí̵ meŋagɨ nánɨ píyo dánɨ Judayene e'máyo mu'roŋwɨnɨ? Negí̵ wákwínarɨŋwápimɨ dánɨ aga pí naŋí̵ neaiiarɨŋí̵rɨnɨ? Ai, nene Judayene eŋagwɨ nánɨ amɨpí naŋí̵ bɨ bɨ obaxí̵ neaímeaŋí̵rɨnɨ. Naŋí̵ bɨ bɨ obaxí̵yí̵ xɨránɨ imónɨŋí̵pɨ, ayí̵ rɨpɨrɨnɨ. Gorɨxo xwɨyí̵á xí̵oyápɨ Judayí̵ nɨxí̵dɨro mewe'í̵rɨxɨnɨrɨ neaiapɨŋí̵rɨnɨ. Judayí̵ dɨŋí̵ nɨwɨkwí̵roro xwɨyí̵á apimɨ xaíwí̵ í̵á mɨxɨrɨpa egí̵á eŋagɨ nánɨ píoɨ rɨpaxí̵rɨnɨ? “ ‘Ayí̵ dɨŋí̵ nɨwɨkwí̵roro xaíwí̵ í̵á mɨxɨrɨpa egí̵á nánɨ Gorɨxo “Naŋí̵ e nɨseaiimí̵árɨnɨ.” urárɨŋí̵pɨ arí̵á ikeamoní̵árɨnɨ. Xɨxenɨ e ení̵ámanɨ.’ rɨpaxí̵rɨnɨ.” rɨseaimónarɨnɨ? Aga oweoɨ! Ámá ní̵nɨ yapí̵ rarɨgí̵á imónɨŋagí̵a aí Gorɨxo nánɨ wí e rɨpaxí̵ menɨnɨ. Nepánɨ nɨrɨrɨ xegí̵ rarɨŋí̵pɨ tí̵nɨ xɨxenɨ yárarɨŋorɨnɨ. Bɨkwí̵yo dánɨ axí̵pɨ re rɨnɨnɨ, “Ámá ‘Gorɨxoxɨ í̵wí̵ nene eŋwápɨ nánɨ xwɨyí̵á neameárarɨŋí̵pɨ xɨxenɨ neameárarɨŋɨnɨ.’ rɨrɨpí̵rí̵árɨnɨ. Joxɨ xwɨyí̵á rɨmeáranɨro yarí̵ná xopɨrárí̵ wirí̵árɨnɨ.” rɨnɨŋagɨ nánɨ re yaiwiŋwɨnɨ, “Gorɨxo rarɨŋí̵pɨ tí̵nɨ xɨxenɨ yárarɨŋorí̵anɨ?” yaiwiŋwɨnɨ. Ayɨnánɨ “O xegí̵ Judayo ‘E nɨseaiimí̵árɨnɨ.’ urárɨŋí̵pɨ wí arí̵á ikeamoní̵ámanɨ.” seararɨŋɨnɨ.

E nerɨ aí Judayene Gorɨxomɨ maŋí̵ nɨwiaíkirane sɨpí eŋwápimɨ dánɨ o nearɨŋí̵pɨ tí̵nɨ xí̵o xɨxenɨ píránɨŋí̵ xí̵darɨŋí̵pɨ sɨŋánɨ piaumɨmí̵ ninɨrí̵náyí̵, píoɨ rɨpaxí̵rɨnɨ? Ámá wí nene nɨwiaíkirane sɨpí yarɨŋagwɨ sɨŋwí̵ nɨneanɨrɨŋí̵yo dánɨ “Neparɨnɨ. Ámá wímanɨ. Sa Gorɨxonɨ xí̵o rɨŋí̵pɨ tí̵nɨ xɨxenɨ yárarɨŋorɨnɨ.” yaiwiarɨŋagí̵a nánɨ nene re rɨpaxí̵ranɨ, “Gorɨxo Judayene wikí̵ nɨneaónɨrɨ pɨrí̵ nɨneamamorí̵ná nɨpɨkwɨnɨ mɨyarɨnɨnɨ.” rɨpaxí̵ranɨ? “Ámá dɨŋí̵ nɨpɨkwɨnɨ mamó rarɨgí̵ápa nɨmorɨ rí̵a rarɨŋɨnɨ?” nimónarɨnɨ. Oweoɨ, wí e rɨpaxí̵ menɨnɨ. “Judayene sɨpí eŋwápɨ nánɨ Gorɨxo pɨrí̵ nɨneamamorí̵ná nɨpɨkwɨnɨ mɨyarɨnɨnɨ.” rɨpaxí̵ eŋánáyí̵, o arɨge nerɨ ámá nɨyonɨ enɨ pɨrí̵ umamopaxí̵ imónɨnɨ? O ámá nɨyonɨ enɨ pɨrí̵ umamopaxo eŋagɨ nánɨ wí e rɨpaxí̵ menɨnɨ. Ámá wo re nɨrɨnɨgɨnɨ, “Ámá wí nionɨ Gorɨxomɨ maŋí̵yo nɨwiaíkirɨ sɨpí yarɨŋagɨ sɨŋwí̵ nɨnanɨro re yaiwipí̵ráoɨ, ‘Ámáyo xí̵o xegí̵ urarɨŋí̵pɨ sí̵mí̵ e nɨtɨnɨrɨ xɨxenɨ xí̵darɨŋo, ayí̵ ámá wímanɨ. Sa Gorɨxorɨnɨ.’ E nɨyaiwiro omɨ yayí̵ numerí̵náyí̵, pí nánɨ o nionɨ í̵wí̵ e'ápɨ nánɨ xwɨyí̵á nɨnɨmeárɨrɨ pɨrí̵ nɨmamopaxí̵rɨnɨ? Sɨpí nionɨ e'ápimɨ dánɨ ámá Gorɨxo yarɨŋí̵pɨ nánɨ dɨŋí̵ naŋí̵ nɨmoro yarɨŋagí̵a nánɨ nionɨ arɨge pɨrí̵ nɨmamopaxí̵rɨnɨ?” Ámá wo e nɨrɨnɨgɨnɨ. Ámá o e nɨrɨní̵pɨ nepa eŋánáyí̵, ámá wí nionɨ yapí̵ nɨnɨxekwí̵moro repɨyí̵ “Poro e nɨra warɨŋorɨnɨ.” rarɨgí̵ápa axí̵pɨ re oraneyɨ, “Naŋí̵ imónɨŋí̵pɨ sɨŋánɨ imɨxanɨ nánɨ ne sɨpí ne'ra owaneyɨ.” oraneyɨ. E nɨsearɨrɨ aí ámá e rarɨgí̵áyí̵ xɨxenɨ xwɨyí̵á meárɨnɨpí̵rí̵árɨnɨ.

“Ámá we' rónɨŋí̵ imónɨgí̵áyí̵ wí menɨnɨ.” urɨŋí̵ nánɨrɨnɨ.

Ayɨnánɨ píoɨ ranɨre'wɨnɨ? “Judayene seáyɨ e imónɨŋí̵ bɨ neaímeaŋí̵ eŋagɨ nánɨ e'máyo seáyɨ e wimónɨŋwɨnɨ.” ranɨre'wɨnɨ? Wí e ranɨme'wɨnɨ. Ayí̵ rɨpɨ nánɨrɨnɨ. Nionɨ xámɨ nɨrɨrí̵ná “Ámá nɨnenenɨ Judayeneranɨ, Gɨrikɨyeneranɨ, negí̵ í̵wí̵ yarɨŋwápɨ neaɨkwarɨpeaárɨnɨnɨ.” rɨxa rárí̵á eŋagɨ nánɨ wí e rɨpaxí̵ menɨnɨ. 10 Bɨkwí̵yo dánɨ rɨpɨ rɨpɨ nɨra unɨŋí̵yí̵ nionɨ seararɨŋápimɨ sopɨŋí̵ nonɨnɨ. Bɨkwí̵yo wí e rɨpɨ nɨrɨnɨrɨ eánɨnɨ, “Ámá wí aga we' rónɨgí̵á mimónɨŋoɨ. Wo aí e mimónɨnɨ. 11 Ámá wí nɨjí̵á nimónɨro ‘Arɨge nerɨ Gorɨxomɨ ínɨmɨ wurí̵nɨmɨnɨre'ɨnɨ?’ yaiwiarɨgí̵ámanɨ. 12 Ní̵nɨ omɨ rí̵wí̵ umóagí̵a nánɨ oyá sɨŋwí̵yo dánɨ rɨxa sɨpí imónɨŋoɨ. Wí we' rónɨŋí̵ imónɨŋí̵pɨ yarɨgí̵ámanɨ. Wo aí e mɨyarɨŋí̵rɨnɨ.” nɨrɨnɨrɨ eánɨnɨ. 13 Ámɨ wí e rɨpɨ enɨ nɨrɨnɨrɨ eánɨnɨ, “Wigí̵ maŋí̵yo dánɨ rarɨgí̵ápɨ xwárɨpá oxoámioaŋáná pɨyaŋí̵ eaarɨŋí̵pí̵nɨŋí̵ imónɨnɨ. Yapí̵ owíwapɨyaneyɨnɨro ayá wí nɨra warɨgí̵árɨnɨ. Weaxí̵á sidɨŋí̵ norí̵ná ámá pɨkiarɨŋí̵pa wigí̵ xwɨyí̵á nɨrɨróná axí̵pɨ yarɨŋí̵rɨnɨ.” enɨ nɨrɨnɨrɨ eánɨnɨ. 14 Ámɨ wí e rɨpɨ enɨ nɨrɨnɨrɨ eánɨnɨ, “Xwɨyí̵á ámáyo ikayí̵wí̵ umearɨro ramɨxɨro yarɨgí̵ápɨ wigí̵ maŋí̵yo magwí̵ ráronɨ.” enɨ nɨrɨnɨrɨ eánɨnɨ. 15 Ámɨ wí e “Ayí̵ ámá opɨkianeyɨnɨrɨ aga sí̵mí̵ xeadí̵pe'narɨgí̵árɨnɨ. 16 Ayí̵ nemerɨgí̵e aga uyí̵nií̵ nɨwikárí̵asáná rɨxa ‘Yeyɨ!’ rarí̵ná pí̵nɨ nɨwiárɨmɨ warɨgí̵áyí̵rɨnɨ. 17 Óí̵ ámá nɨwayɨrónɨro ŋweapí̵rɨ nánɨ imónɨŋí̵yimɨ wí warɨgí̵ámanɨ.” enɨ nɨrɨnɨrɨ eánɨnɨ. 18 Ámɨ wí e “Ayí̵ ‘Gorɨxo seáyɨ e imónɨŋorí̵anɨ?’ nɨyaiwiro wí wáyí̵ wiarɨgí̵ámanɨ.” enɨ nɨrɨnɨrɨ eánɨnɨ. Apɨ apɨ nɨra unɨŋí̵yí̵ nionɨ seararɨŋápɨ tí̵nɨ xɨxenɨrɨnɨ.

19 Nene nɨjí̵á re imónɨŋwɨnɨ. Ámá nɨmɨnɨ ŋweagí̵áyí̵ Gorɨxomɨ xwɨyí̵á maŋí̵ nexoámoro murɨpaxí̵ imónɨro oyá sɨŋwí̵yo dánɨ xwɨyí̵á meárɨnɨpaxí̵ imónɨro epí̵rí̵a nánɨ pí pí ŋwí̵ ikaxí̵ eánɨŋí̵pimɨ dánɨ rɨnɨŋí̵pɨ Judayene, apimɨ xí̵dí̵í̵rɨxɨnɨrɨ nearepeárɨŋene neararɨnɨ. 20 Ayí̵ rɨpɨ nánɨrɨnɨ. Ámá wí “Ŋwí̵ ikaxí̵ eánɨŋí̵pimɨ píránɨŋí̵ oxí̵dɨmɨnɨ.” nɨyaiwiro e'í̵áyí̵ apɨ tí̵nɨ xɨxenɨ me' wiwanɨŋí̵yí̵ “Nionɨ nɨwiaíkirɨ í̵wí̵ e'áonɨrí̵anɨ?” nɨyaiwinɨrɨ nɨjí̵á e imónarɨgí̵árɨnɨ. Ayɨnánɨ ámá ŋwí̵ ikaxí̵ eánɨŋí̵pimɨ nɨxí̵dɨrɨŋí̵pimɨ dánɨ wí Gorɨxoyá sɨŋwí̵ tí̵ŋí̵ e dánɨ we' rónɨgí̵áyí̵ imónɨpí̵rí̵á menɨnɨ.

“Ámá Jisasomɨ dɨŋí̵ wɨkwí̵róí̵áyí̵ we' rónɨŋoɨ.” urɨŋí̵ nánɨrɨnɨ.

21 E nerɨ aí agwɨ ríná óí̵ Gorɨxo xí̵oyá sɨŋwí̵ tí̵ŋí̵ e dánɨ ámá we' rónɨŋí̵ oimóní̵poyɨnɨrɨ wimɨxárɨŋí̵yi xewanɨŋo rɨxa sɨwá neaiŋí̵rɨnɨ. Ŋwí̵ ikaxí̵ Moseso eŋíná nɨrɨrɨ eaŋí̵pɨ tí̵nɨ xwɨyí̵á wí̵á rókiamoagí̵áwa nɨrɨro eagí̵ápɨ tí̵nɨ apiau' óí̵ agwɨ ríná Gorɨxo ámá we' rónɨŋí̵ oimóní̵poyɨnɨrɨ wimɨxárɨŋí̵yi nánɨ nɨrɨrɨ sopɨŋí̵ norɨ aiwɨ we' rónɨŋí̵ apɨ ámá wiwanɨŋí̵yí̵ ŋwí̵ ikaxí̵ eánɨŋí̵pimɨ nɨxí̵dɨrɨŋí̵pimɨ dánɨ imónɨpaxí̵pɨmanɨ. Xegí̵ bɨ imónɨŋí̵pɨrɨnɨ. 22 Ayí̵ rɨpɨ seararɨŋɨnɨ. Gorɨxo ámá go go Jisasɨ Kiraisomɨ dɨŋí̵ wɨkwí̵roarɨŋagɨ nɨwɨnɨrí̵ná “Gí̵ we' rónɨŋí̵ worɨnɨ.” rárarɨŋí̵rɨnɨ. Ayí̵ rɨpɨ nánɨrɨnɨ. Ámá nɨnenenɨ í̵wí̵ nerane Gorɨxo seáyɨ e imónɨŋí̵ apɨ e'í̵rɨxɨnɨrɨ imónɨŋí̵pɨ me' pɨsí̵í weárɨŋwá eŋagwɨ nánɨ o Judayo xegí̵ bɨ wiirɨ e'máyo xegí̵ bɨ wiirɨ nerɨ yeáyí̵ uyimɨxemeaní̵ámanɨ. Dɨŋí̵ wɨkwí̵róí̵á gɨyí̵ gɨyí̵ ní̵nɨ nánɨ o “Dɨŋí̵ wɨkwí̵roarɨgí̵áyí̵, ayí̵ gí̵ we' rónɨgí̵áyí̵rɨnɨ.” rárarɨŋí̵rɨnɨ. 24 Gorɨxo wínɨyí̵ enɨ xɨxe bɨ oniípoyɨnɨrɨ mɨneaií wá nɨneawianɨrɨ Kiraisɨ Jisaso nɨneapeirí̵ná nearoayíroŋí̵pimɨ dánɨ “Gí̵ we' rónɨgí̵áyí̵rɨnɨ.” rárarɨŋí̵rɨnɨ. 25 O ámá “Jisaso nene aní̵nanɨgɨnɨrɨ nánɨ wayí̵á neapeiŋí̵rí̵anɨ?” nɨyaiwiro dɨŋí̵ wɨkwí̵roarɨgí̵ápimɨ dánɨ wigí̵ í̵wí̵ yarɨgí̵ápɨ yokwarɨmí̵ wiíɨmɨgɨnɨrɨ omɨ ámáyá sɨŋwí̵ anɨgí̵e dánɨ rɨdɨyowánɨŋí̵ wiárɨŋí̵rɨnɨ. E nerí̵ná “Niɨwanɨŋonɨ we' rónɨŋí̵ imónɨŋí̵pɨ tí̵nɨ xɨxenɨ yarɨŋárɨnɨ.” e'nɨŋí̵ nɨrɨrɨ sɨwá neaiŋí̵rɨnɨ. Ayí̵ rɨpɨ nánɨ rarɨŋɨnɨ. Eŋíná dánɨ Gorɨxo kikií̵ánɨŋí̵ nerɨ “Ámá í̵wí̵ e'í̵ápɨ nánɨ axíná pɨrí̵ oumamómɨnɨ.” mɨyaiwí sa nɨmu'róa nu'ɨsáná agwɨ ríná ámá ní̵nɨ “Neparɨnɨ. Gorɨxo we' rónɨŋí̵ imónɨŋí̵pɨ tí̵nɨ xɨxenɨ yarɨŋorɨnɨ.” yaiwipí̵rí̵a nánɨ xewaxomɨ e wiárɨŋí̵rɨnɨ. Ayɨnánɨ Jisasomɨ dɨŋí̵ wɨkwí̵róí̵á gɨyí̵ gɨyí̵ nánɨ ananɨ “We' rónɨgí̵áyí̵rɨnɨ.” rɨpaxorɨnɨ.

27 Ayɨnánɨ ámá go “Ŋwí̵ ikaxí̵ Moseso nɨrɨrɨ eaŋí̵pimɨ xí̵darɨŋápimɨ dánɨ we' rónɨŋí̵ imónɨŋáonɨrɨnɨ.” nɨrɨrɨ mɨxí̵ meakí̵nɨpaxí̵ imónɨnɨ? Oweoɨ, ŋwí̵ ikaxí̵ eánɨŋí̵pɨ xí̵darɨgí̵ápimɨ dánɨ marí̵áɨ, sa Jisasomɨ dɨŋí̵ wɨkwí̵roarɨgí̵ápimɨ dánɨ we' rónɨgí̵áyí̵ imónarɨgí̵á eŋagɨ nánɨ ámá e rɨpaxí̵ imónɨgí̵áyí̵ wí menɨnɨ. 28 Ayɨnánɨ re neaimónarɨŋí̵rɨnɨ, “Gorɨxo ‘Ámá ayí̵ we' rónɨgí̵áyí̵rɨnɨ.’ nɨrárɨrí̵ná wigí̵ ŋwí̵ ikaxí̵ eánɨŋí̵pɨ xí̵darɨgí̵ápimɨ dánɨ rárarɨŋí̵manɨ. Jisasomɨ dɨŋí̵ wɨkwí̵roarɨgí̵ápimɨ dánɨnɨ e rárarɨŋí̵rɨnɨ.” E nɨneaimónɨrɨ ure'wapɨyarɨŋwárɨnɨ. 29 “Gorɨxo Judayonɨ yeáyí̵ uyimɨxemeaní̵a nánɨ imónɨŋorɨnɨ.” rɨyaiwiarɨŋoɨ? “E'máyo enɨ yeáyí̵ uyimɨxemeaní̵a nánɨ mimónɨŋorɨnɨ.” rɨyaiwiarɨŋoɨ? Oweoɨ, e'máyo nánɨ enɨ imónɨŋorɨnɨ. 30 O ná wonɨ imónɨŋo eŋagɨ nánɨ “Ámá ayí̵ gí̵ we' rónɨgí̵áyí̵rɨnɨ.” nɨrɨrí̵ná bɨ bɨ yarɨŋagí̵a nɨwɨnɨrɨŋí̵pimɨ dánɨ e rárɨní̵ámanɨ. Iyí̵ sí̵mí̵ sí̵ó wákwínɨgí̵áyí̵ranɨ, sí̵ó mɨwákwínɨgí̵áyí̵ranɨ, sa Jisasomɨ dɨŋí̵ wɨkwí̵roarɨŋagí̵a nɨwɨnɨrɨŋí̵pimɨ dánɨnɨ “We' rónɨŋí̵ imónɨgí̵áyí̵rɨnɨ.” rárɨní̵árɨnɨ. 31 Nene re nɨrɨrane'náyí̵, “Ámá Jisasomɨ dɨŋí̵ wɨkwí̵roarɨgí̵ápimɨ dánɨnɨ Gorɨxo ‘Ayí̵ we' rónɨgí̵áyí̵rɨnɨ.’ rárarɨŋí̵rɨnɨ.” nɨrɨrane'náyí̵, “Ŋwí̵ ikaxí̵ eánɨŋí̵pɨ xwí̵á oiwenɨnɨrɨ yarɨŋwɨnɨ.” rɨseaimónarɨnɨ? Aga oweoɨ! E nɨrɨrane'náyí̵, nepa ŋwí̵ ikaxí̵ eánɨŋí̵pimɨ sí̵kí̵kí̵ nomɨxɨrɨ yarɨŋwɨnɨ.

Copyright information for AAK