a[Ais 29:11; Ese 2:9-10]
b[Stt 49:9; Ais 11:1,10; MHO 22:16]
c[Sek 4:10; Jon 1:36; MHO 13:8]
d[MHO 8:3-4; Sng 141:2]
e[Sng 33:3; 40:3; 96:1; 98:1]
f[Kis 19:6; Ais 61:6; MHO 1:6; 20:6]
g[Dan 7:10; Hi 12:22]

Revelation of John 5

Sipsip-ney hiy God so mamey ma lok-sarohon ke ma kampi ira hiy non

Sohiy so meyki hokwe, hakwe sawk senkin ma-lira, uwr, sia-king mon ma liwak hiykwe, mamey ma lok-sarohon ke nakruok, hyo iha-sayar mon kokwe. Ok mokwe muwmon muwmon, po nuw-meyamey, seyr, mamey sohok ko kopi mokwe, kendol-lor iha sirom mu nareys-ar non non nak-okin nasnas say kraipakrai. a  Seyr hakwe ensel seirpey-ar se nak-ira, hiykwe wouk-ok aiopey hay non senkin me-sanion sow, “Uwr yaprue ihey, kendol-lor iha sirom mu nareys-ar non me kamane sow ey, seyr mamey ma lok-sarohon ke kampi ey hokwe, posokwaw so?” Sawk nonkumey mon o, ki mon o, seyr ki ouon mon o, mamey ma lok-sarohon sokwe kampi ira ey hokwe, uwr prueyn yaprue ihey-ar lopa. Ha senkin lira menkin, hakwe sawk eheyr kraiar sehe nuw-yuk, payhokuaw, uwr prueyn yaprue ihey-ar lopa, mamey ma lok-sarohon sokwe kampi ira ey hokwe. Sa hanekwe sawk sios mo makwey-uwr prueyn hiy kiy-me, “Hunkwe eheyr peie lyuk o, kwa lira, laion Juda mo uwr-ku ko, Devit so ney-nona hiykwe uwr seirpey, aw ma lono akre akre hiy non. Hiykwe mamey ma lok-sarohon, kendol-lor iha sirom mu nareys-ar non ma nak-okin nasnas-say sokukwe, liy kampi.” b 

Sohiy so meyki hokwe, hakwe sawk senkin lira, Sipsip-ney kamon hiykwe sia-king ko ompok mon liarok. Sipsip-ney sohokwe, ay iha-iha-aw su ma lwayr o, sios mo makwey-uwr o, hom nuw-awndiy kawk. Sipsip-ney hokwe ma lokin kwor okrue se hieyn lira. Hiykwe kon iha sirom mu nareys-ar non, seyr, nene iha sirom mu nareys-ar non. Somokwe, God so Niohney iha sirom mu nareys-ar non kipay lowpwarowp ki ko mon ma me-ha hom non. c  Sipsip-ney hiykwe sa le nok, mamey ma lok-sarohon ke lway, uwr sia-king mon ma liwak so iha sayar ko ke. Hiy lway menkin, ay ihaiha-aw su ma lwayr o, sios makwey-uwr iha seys, sune seys ihaiha-aw o, homkwe, Sipsip-ney sohiy so inour mon pamuow kamapueys hawon sowkway. Hmo prueyn prueyn-aw homkwe, nowpay kamon gita ke hieyn non, seyr yowr gol non ma meio, seme nakruok. Yowr somokwe yakuw prawk yaprue mokwe woki nuw-wak. Yakuw prawk yaprue somokwe kristen-uwrsa mo mesopok hom non. d  Seyr homkwe yayh kamon senkin nak-me owk,

“Hunkwe yaprue ihey-ar sora, mamey ma lok-sarohon ke sehe lway, seyr hunkwe kendol-lor ma nak-okin nasnas say kraipakrai me seme kamane sow. Payhokuaw, hnekwe papo lokin kwor krue, seyr hno nioh hokwe uwrsa uwr-ku senkin senkin ko o, wouk-ok senkin senkin non o, seyr uwrsa kipay lowpwarowp ko o, seyr owh-ohi senkin senkin non o, po nakway huonokyaw prosue, God so owh mon ma-le ey mokwe. e 
10 Hunkwe uwrsa seme kokwe God so mey-uwr pris orhey non po mon wak, seyr king me hieyn po mon wak, ki ehe hiy-wayr ey hokwe.” f 

Sipsip-ney so uru se ma lowk nakie me-ihey hiy non

11 Sa ha ma-sahre ira menkin, hakwe sawk ensel poya-poya mo wouk-ok me lonuayk. Hmo sor-meir mokwe sankaw, tausen tausen, seyr milion milion. Homkwe sia-king o, ay iha-iha-aw su ma lwayr sohom o, seyr sios makwey-uwr sune seys iha seys ihaiha-aw me nakrok awndiy kawk. g  12 Seyr yayh kokwe aiopey hay senkin me-kuw,

“Sipsip-ney ma lokin kwor okrue hokwe, yaprue ihey-ar nuw-wak, krai o, omeme ihey-ar poya poya o, nonkway yaprue o, hay ipey-ar o, uru ayaw-ar ma nuw-wak o, panpaniowni o, me-ihey-ok o, seme lonokyaw ey hokwe.”
13 Seyr hakwe senkin lonuayk, ompay inaw ma lwak nonkumey ko, ki ko, ki ouon ko, seyr sour-yawp-ar ko, ompay lowpwarowp serey ma lwak somokwe yayh senkin me-kuw,

“Me-ihey-ok o, uru ayaw-ar ma nuw-wak o, panpaniowni o, hay ipey-ar o, somokwe uwr sia-king mon ma liwak o, seyr sipsip-ney o, hoho mon-aw ka lwak peyow peyow.”
14 Ay ihaiha-aw su ma lwayr somokwe sawk senkin lonuayk me, “Ok-ar,” seyr sios makwey-uwr homkwe pamuow kampueys nok, nak-me-ihey.

Copyright information for `AAU