1 Corinthians 2

Pol uqa Korin agena wawaga meleec eunu maden

Ija cotiel, ija ageca bibileb saen euna ija je cunugnu dahini celigiannu cisdom qa Jisas Kraisca uqa na babalecna tuitu qocobil cal menca eunu je dih cisdom. Eunu ija ageca hom saen euna ija Anutna je jahunec qaqasili mamadig ija doc ben dogina euna isec je qee maadelem. Odimig ija ageca hom saen euna ija lehani culeceb cucuiem, odocob ija qeleli bilem. Odimig ijana iwaladec jeca, ijana me je maadecca, eu dana doc ben doccana qee qasali maadelem. Ija dana agena cisdoc falicduadeceb age ijanu cisdoqagannu qee gale tel. Euqa ija Anutna Kis eu gagadic odocca eu ihacaadi qasali maadem. Ija mahanadec dana agena doc eu agena wawaga meleec camas mudigiannu qee gale tena. Ija Anutna gagadic odoc eu agena wawaga meleec camas mudigiannu gale tena. Eunu ija odi je qasali maadem.

Anutna Kis uqa doc meca cisdoc silecca igen

Euqa ege age Anutna kobol doc gesis dana eu je cisdoc silecca maadocomun dogina. Euqa je cisdoc silecca age ogina eu mahanadec qee, odocob eu mahana iloilo bilegina eu agena qee. Mahana iloilo bilegina eu age qee moqagan. Euqa je cisdoc silecca ege maadoqona eu Anutna je jahunec, eu dana cajaca amagana jahunec bilia. Anut uqa maha qee ifanec ninijen ege wawige meleec ege binanigeca uqaca bileqannu je jahunec eu maden. Mahana iloilo bilegina oso cisdoc silecca inu qee dol. Age inu doubmi age Tibud gagadic odoc fulacdocca umeig na babalecna tuitu qocobil qee cal moub. Euqa eu Anutna jaqec je madena eu odi nijina:

“Anut uqa dana cajaca age Anutnu nalug megina agenu
ceteh me bahic mati saciadon bilia.
Ceteh me bahic eu dana amagana qee felein.
Odocob eu dana dahinigana qee dah melein.
Odocob eu dana agena cisdocna ha qee calel,” ena.
(Aisaia 64.4)

10 Euqa dana uqa dana osona cisdoc qee dona. Dana uqadodoc dolog eu uqana cisdoc cunug du cuhadona. Eu odiha Anutna Kis uqa dih Anutna cisdoc du cuhadona. Odocob Anutna Kis eu ceteh cunug wali fena. Odocob uqa Anutna cisdoc jahuni nijia euha wali fena. Eunu Anut uqa uqana Kisna uqana je jahunec ihacgeceb eu egenu camasac men. 12 Odocob ege mahanadec kis qee olom, ege Anutna Kis om. Ege bagol igec Anut igen eu doqannu uqa Kis igen. 13 Odocob ege dana cajaca age Kisca bilegina eu Kisna mele je sildiadoqona. Ege odi oodob ege je dana cisdoc silecca age iwalgein euna qee sildiadoqona qa ege je Kis iwalgen euna sildiadocomun dogina.

14 Odocob bagol igec Anutna Kis ege igina eu dana uqa Kisca bilina eu himec fogo docnu ihoc. Dana uqa Kisca qee bilina eu Kisna bagol igec eunu fogo docnu ihoc qee. Bagol igec eu age uqanu ceteh gad ena. Eunu dana oso uqa Anutna Kisca qee bilina eu uqa bagol Anutna Kis ege igina eu qee ona. 15 Anutna jaqec je madena eu odi nijina:

“In uqa Tibudna cisdoc dona?
In uqa Tibud iwaldocnu ihoc?” ena.
(Aisaia 40.13)

Eunu dana oso uqa Kisca bilina eu uqa ceteh cunug eu mefo, me qeefo gesiladecnu ihoc qa oso uqa dana Kisca eu gesildocnu ihoc qee nijel. Euqa ege Kraisna cisdocca biluquna.

Copyright information for `AEY